Ọdaphan Jọn
14 “Kẹ́eḅaghamhian loor. Ịmoogh omheeraam ẹghi esi Ẹnhaan; ẹḅilhe ẹmhoogh omheeraam eru esi ạmhi. 2 Sịphe otu Ọde phọ ạmhi ịbadi ariisi ọrolhoghu edi ni. Mụghumo kị́duon ọbo mị inyinha mị́ḅenhi ịphen phọ. Kụ mị rạki ookolhobinhaan anyinha esi. 3 Mị ạghi iikolhobinhaan inyinha esi phọ, mị kạḅilhe ni aḅula atu ịsighe inyinha akeelhom olhoghi otu, pịdi nyinha ẹtol aani esi phọ mị kạtol bọ. 4 Kụ nyinha elegheri ni eten ẹpe mị rạki bọ.”
5 Kụ ạ Tọmọs apuru nyọdi mọ: “Uwo Ẹmhoogh, yoor úlegheri bọ ekpisi phọ nạ rạki bọ, yoor kolegheri bọ ika eten phọ?”
6 Kụ a Jizọs ạḅenhi nyọdi mọ: “Mị kụ eten phọ r’igey phọ r’aghuḍum mọ. Oye kátue ạteeny Ọde phọ dị úugo esi ạmhi. 7 Eru mạar dị nyinha ilhegheri ni ịmhi ọbo nyinha milegheri aani ni Ọde phọ ạmhi; kụ emhiigh nyịidipho kụ rẹki nyinha melhegheri nyọdi ẹḅilhe ẹmiin nyọdi.”
8 Kụ a Filip ạḅenhi nyọdi mọ: “Uwo Ẹmhoogh, uḍeenhaan iyoor Ọde phọ, bịn kịgbaanyan ni iyoor.”
9 Kụ a Jizọs ạḅenhi nyọdi mọ: “Filip, ẹedoony amem mọ ạmuen mị mạrol bọ r’anyinha kụ nạ ịmhi kűlhegheri ni? Oye lọ mụmhiin ịmhi pọ mạmhiin aani Ọde phọ. Uḍighi ika kụ nạ ạḅem bọ mọ, ‘Uḍeenhaan iyoor Ọde phọ’? 10 Nạ ómheeraam mọ mị ạḅoph ni rạ Ọde phọ ḅịlhe mọ Ọde phọ ạḅoph ni r’ạmhi? Rạraar phọ mị rịḅenhi bọ inyinha mị rạ́atughian ghan ịlo ạmhi bịn kạghaaph, kụolo Ọde phọ ạḅoph bọ r’ạmhi kụ raḍighi oḍighi phọ ọdi dị eego esi ạmhi. 11 Imeeraam ni mọ mị ạḅoph ni rạ Ọde phọ ḅịlhe mọ Ọde phọ ạḅoph ni r’ạmhi; kụ ghạlhamo nyinha ịmhi ímheeraam ni, pọ ịtuan ni iiḍighi phọ emheeraam. 12 Mị ạkar rịḅenhi ghan inyinha mọ, tọrobo oye lọ ạmhoogh omheeraam aru esi ạmhi kaḍighi aani ni iiḍighi phọ ịphen mị raḍighi ghan bọ; kụ kaḍighi kẹn ni ịdi epu ịphen phọ, loor esi dị mị rạki ọteeny Ọde phọ. 13 Kụ tọrobo ịyaar dị nyinha eghol ḍien ạmhi kụ ẹlhom, mị kaḍighi ni, pịdi okuenhi Ọde phọ dị eego esi Ọony phọ. 14 Eru mạar dị nyinha eghol ḍien ạmhi kụ ẹlhom tọrobo ịyaar, mị kaḍighi ni.
15 “Nyinha ịphomhoghian ịmhi, nyinha keeko ni iilhogh phọ ạmhi. 16 Kụ mị kạlom ni Ọde phọ kụ ọdi ịngo inyinha ọnhon ọlogh ḍịghaagh* dị kạtol r’anyinha k’agee-pọ. 17 Ọdi kịngo inyinha uwaloor igey phọ, ọpo aḅirinhi phọ kótue bọ ọmoogh, loor esi dị bịdi rọ́miin ghan ḅịlhe bịdi úlegheri kẹn. Kụolo nyinha elegheri ni, loor esi dị odi loor anyinha kụ ạḅilhe odi r’anyinha. 18 Mị inyinha kị́wilhe ịdipho ạbunyigo ạnmuny. Mị kạḅilhe ni aḅula ịteeny inyinha. 19 Mọony amem aḅirinhi phọ ịmhi kụ́mhiin mụn, kụolo nyinha kịmhiin ni ịmhi, loor esi dị mị odi ni r’ighuḍum kụ nyinha kẹtol li r’ighuḍum. 20 Ḍio phọ ạḍiphe phọ nyinha kelegheri ni mọ mị ạḅoph ni rạ Ọde phọ ḅịlhe mọ nyinha ẹḅoph ni r’ạmhi kụ mị ạḅoph ni r’anyinha. 21 Tọrobo oye dị ạsighe ịto phọ ạmhi kụ ạḅilhe rạdaph ghan kụ ụphomhoghian ịmhi. Kụ Ọde phọ ạmhi kạpomoghian ni tọrobo oye lọ ụphomhoghian ịmhi, kụ mị kạpomoghian ni nyọdi kụ aganhanhamhi loor ạmhi aḍeenhaan nyọdi.”
22 Kụ a Judas (ká Judas Iskạịrọt) ạḅenhi nyọdi mọ: “Uwo Ẹmhoogh, uḍighi ika kụ nạ rạwa bọ oganhanhamhi aloor ạna oḍeenhaan ayoor kpạripe roḍeenhaan aḅirinhi phọ?”
23 Kụ a Jizọs ạphagharanhaan nyọdi mọ: “Tọrobo oye lọ ụphomhoghian ịmhi kạdaph ni ikpo ọnhu phọ ạmhi, kụ Ọde phọ ạmhi kạpomoghian ni nyọdi, kụ yoor otu ọteeny nyọdi kụ ọtol r’ọdi. 24 Oye dị ịmhi ụ́phomhoghian rạ́daph ghan ikpo ọnhu phọ ạmhi. Ikpo ọnhu phọ ịphen nyinha rẹnaghan bọ kị́lo ạmhi, ịlo Ọde phọ urom bọ ịmhi.
25 “Mị mịḅenhi inyinha rạraar phọ ịphen phọ sịen mị odi bọ ni r’anyinha. 26 Kụ ọlogh ḍịghaagh phọ, uwaloor iigbia phọ Ọde phọ kạtuan bọ ḍien ạmhi iruom inyinha, kịtughemhi ni inyinha oomo ạraraar ạḅilhe ịitughianham inyinha oomo ạraraar phọ mị ịḅenhi bọ inyinha. 27 Mị rịwilhenhaan inyinha ẹepho; mị rịngo inyinha ẹepho phọ ạmhi. Mị inyinha ị́ngo eten phọ ẹpe aḅirinhi phọ rọngo ghan bọ. Kẹ́eḅaghamhian loor kụ kẹ́moogh kẹn oghiilhaan. 28 Nyinha ịnhaghan ni mem mọ mị ịḅenhi bọ inyinha mọ, ‘Mị kạki kụ ạḅilhe aḅula ịteeny inyinha.’ Eru mạar dị nyinha ịphomhoghian ni ịmhi pọ nyinha kebo ni loor ịduon mị rạki bọ ọteeny Ọde phọ, ịdi eḍighi bọ Ọde phọ kụ upu ịmhi. 29 Nyịidipho mị mịḅenhi inyinha kụ egbi omite, pịdi mem lọ emite nyinha emeeraam. 30 Mị inyinha kị́ḅenhi mụn rạraar dị epu ịphen phọ, ịdi eḍighi bọ ọtooghia aḅirinhi phọ ratu, kụ ọ́mhoogh ịikpo ọphamham ạmhi. 31 Kụolo oḍighi ịdi aḅirinhi phọ kolegheri mọ mị ạpomoghian ni Ọde phọ, mị rạtuugh ghan ịlo Ọde phọ ụḅenhi ịmhi kụ kaḍighi. Iḅerenhu, ọḍua sịen phọ.