Ọdaphan Ịpe ạ Mạtiu Ạge Bọ
20 “Ọmhar k’ạke phọ ạkigh ọde otu dị amite eḅon ạḍiroor ophir awe dị kọki ozo ạ vạịn ọdi. 2 Awe phọ romheeraam mọ ọdi ạkpe bụno oniin a dinerịọs* ḍio, kụ ọdi ạḅenhi mọ ọghi okumuan ẹpe ozo ạ vạịn phọ ọdi. 3 Ọdi ạḅilhe ni amite mem dị rẹki omhunhenhiom ịraar ạwa* phọ, kụ ạmhiin bụnhon dị ọmheregha ẹpe aḍighi phọ dị ịyaar oḍighi ụ́moogh; 4 kụ ọdi ạḅenhi bịdi mọ, ‘Ịki ekumuan aani ẹpe ozo ạ vạịn phọ, mị kịkpe ni inyinha ịdi ẹkasian.’ 5 Kụ bịdi onyeenhe. Kụ ọdi ạḅilhe amite mem dị rẹki omhunhenhiom odiiny ạwa* phọ r’omhunhenhiom esugha ạwa* phọ ạḅilhe ạtuugh ịduon phọ aḍighi. 6 Kụ eekunha phọ, mem dị rẹki omhunhenhiom 11 ạwa* phọ kụ ọdi amite ạmhiin bụnhon dị ọmheregha yogh, kụ ạpuru mọ, ‘Uḍighi ika kụ nyinha ẹmeregha yogh bọ sịen dị ịyaar oḍighi nyinha ị́moogh?’ 7 Kụ bịdi ọphagharanhaan mọ, ‘Loor esi dị oye iyoor kűphir.’ Kụ ọdi ạḅenhi bịdi mọ, ‘Ịki aani ẹpe ozo ạ vạịn phọ ekumuan.’
8 “Rẹteeny dulhe, kụ uwo ozo ạ vạịn phọ ạḅenhi ọpo ọdi ạma bọ ophogh oḍighi phọ mọ, ‘Mạgh we oḍighi phọ ạkpeeghi, miighom bụphe osugha bọ ọmhan phọ kụ akureriom bụḅel phọ.’ 9 Mem mọ bụphe omhiigh bọ oḍighi omhunhenhiom 11 ạwa phọ oru bọ, ụkpe tọrobo ọnyo ạbidi oniin a dinerịọs.* 10 Kụ mem mọ ạbuḅel phọ oru bọ, bịdi ụutughian ghan mọ kọkpe ni bụno opuemhi bụeripho, kụolo ụkpe aani tọrobo ọnyo ạbidi oniin a dinerịọs.* 11 Bịdi rạar ikpoki phọ kụ omhiigh ogumhom uwo ozo phọ 12 kụ ọḅem mọ, ‘Bụen osugha bọ ọmhan phọ ukumuan oniin ạwa bịn; kụolo iniin phọ ikpoki phọ nạ ụkpe bọ iyoor phọ okumuan bọ oomo ẹmhu aḍio phọ r’ẹgholhoghol ogogo phọ kụ ẹdi nạ ạkpe aani bịdi! 13 Kụolo ọdi ạphagharanhaan oniin ọnyo ạbidi mọ, ‘Mọo, mị nyịnha ịkaraph úḍighi. Kóniin a dinerịọs* kụ ẹdi nạ amheeraam bọ mọ mị ụkpe nyịnha? 14 Sịghe ịpe mọngo bọ nyịnha ạghimhom. Mị rạwa ọngo ạbuen osugha bọ ọmhan phọ iniin phọ ịpe mị ạngo bọ nyịnha. 15 Mị ụ́moogh elhiom oḍighinhom ạraraar ạmhi ịpe mị rạwa bọ ḍụghum? Ọbobo nạ ạtuan ịduon mị aḍighi bọ ogey oye* kụ rugbeghe yogh bọ ịmhi?’* 16 Eniin phọ eten phọ, bụphe odi bọ ọmhan koḍighi bụḅel, kụ ạbuḅel phọ oḅula ọmhan.”
17 Mem dị a Jizọs rạ 12 ạbumatuan phọ ọdi ọsiiny rọki Jeruselem, ọdi ạmhagh ni bịdi atenhom ọgbal kụ ạḅenhi mọ: 18 “Ịmiin! Yira rọki Jeruselem, kụ kọḅogh ni Ọony phọ oye ọlogh ḍịghaagh aruwo ẹmhu ạbupinyon rịkia phọ r’ạbutughemhia Olhogh phọ. Bịdi kosoph ni ọoruen aḍuugh opumhe nyọdi 19 kụ ọḅogh nyọdi ọngo we areelhe phọ mọ ọgilaam, ọgurogh ọḅilhe ọkan loor oreeny oghiigh; kụ Ẹnhaan aḅeton nyọdi esi aḍuugh omhunhenhiom ịraar aḍughul otu phọ.”
20 Kụ onhiin ạnmuny phọ ạ Zẹbẹdi ạpham nmụny phọ ọdi aru ạteenyom Jizọs, kụ akpuḍian kụ ạlhom mọ aḍighinhaan nyịno ịyaar. 21 Kụ ọdi apuru ạnhir phọ mọ: “Nạ rạwa eeghe?” Kụ ạnhir phọ ạphagharanhaan nyọdi mọ: “Ḅẹm mọ ịyal phọ ạnmuny phọ ạmhi ạbuen phọ ọrol r’ạna ẹpe Ọmhar phọ ạna, oniin ḍịghaagh elhiom oniin ḍịghaagh ekeeny.” 22 Kụ a Jizọs mọ: “Nyinha ílegheri ịyaar phọ nyinha rẹlom bọ. Nyinha ketue ni ẹpugholhom mọgo phọ mị kạpugholhom bọ mọony amem?” Kụ bịdi mọ: “Yoor kotue ni.” 23 Kụ ọdi ạḅenhi bịdi mọ: “Nyinha kẹkar ri ẹpugholhom mọgo phọ ạmhi, kụolo mị kụ kákol oye dị kạtol ḍịghaagh elhiom r’ạḍighaagh ekeeny ạmhi, loor esi dị bụphe Ọde phọ ạmhi maakolhobinhaan bọ riisi phọ ịpe phọ kụ kọtol.”
24 Mem mọ aḍioph phọ ạbueripho ọnhaghan bọ ịphen phọ, bịdi ụghagham ni olhoghi ịyal phọ abumor phọ. 25 Kụolo a Jizọs aakpomhoghi ni oomo ạbidi kụ ạḅem mọ: “Nyinha elegheri ni mọ ạbutooghia aḅirinhi phọ roponhomaam ghan ni bụphe bịdi rọtooghi bọ kophogh, kụ igbogh awe phọ rọsighe ghan ịikpo phọ ạbidi kowiririom we phọ. 26 Ị́kpeanhaan dị kẹtol ịduon sịen igbo phọ anyinha; kụolo tọrobo oye lọ rạwa oḍighi ogbogh sịen igbo phọ anyinha akumu ghan ạngo bụeripho, 27 kụ tọrobo oye lọ rạwa oḍighi ọḅel sịen igbo phọ anyinha ạmoogh oḍighi ẹbenhe anyinha. 28 Ịdipho Ọony phọ oye ụ́tu bọ dị kokumu ọngo nyọdi, kụolo aru bọ okumu ọngo ạbunhon r’ọsighe aghuḍum mọ ọdi ọkpeom pịdi ẹtagharan ịbadi awe.”
29 Bịdi otelhe rọḍua Jeriko, bịn aḍiboom aḍita awe ọdaph nyọdi. 30 Kụ ịyal awe dị rọ́miin ghan eten dị ọrol ọgbal eten phọ ọnhaghan mọ a Jizọs raten kụ ọlo mọ: “Uwo Ẹmhoogh, ụnma iyoor ighirigiir, Ọony a Devid!” 31 Kụ aḍita awe phọ uubophoghi ni bịdi, kụ ọḅenhi ghan bịdi mọ oḅoroghian; kụolo bịdi ụkuamhi ghan bịn ọlo mọ: “Uwo Ẹmhoogh, ụnma iyoor ighirigiir, Ọony a Devid!” 32 Kụ a Jizọs ạmheera, ạmhagh bịdi, kụ ạḅem mọ: “Nyinha rẹwa mọ mị uḍighinhaan inyinha eeghe?” 33 Kụ bịdi ọphagharanhaan nyọdi mọ: “Uwo Ẹmhoogh, ḅạrion riḍien phọ ayoor.” 34 Loor esi igbiririph, a Jizọs ạḅogh ni riḍien phọ ạbidi, bịn mem mem mọ bịdi ọmhiin eten, kụ ọdaph nyọdi.