Ọdaphan Ịpe ạ Mạtiu Ạge Bọ

15 Kụ buniin ạbuo ạ Fạrisi phọ r’ạbutughemhia Olhogh phọ ọḅua ẹpe Jeruselem oru ọteeny Jizọs, kụ opuru mọ: 2 “Uḍighi ika kụ ạbumatuan phọ ạna ọgunhom bọ eḍighinhom ịyaar awe iḍiodi phọ? Esi ọmaam, bịdi róotolha ghan rạghaagh* kụ ogbi olhe eḍien.”

3 Kụ ọdi ạphagharanhaan bịdi mọ: “Uḍighi ika kụ nyinha ẹtuan bọ eḍighinhom ịyaar phọ anyinha ẹgunhom ịto phọ Ẹnhaan? 4 Esi ọmaam, Ẹnhaan ạḅem mọ, ‘Lọgh eegu ọde r’onhiin ạna,’ ḅịlhe mọ, ‘Ikiigh ọlo aatuuny* ọde ọbobo onhiin ọdi.’ 5 Kụolo nyinha rẹḅem ghan mọ, ‘Tọrobo oye lọ ạḅenhi ọde ọbobo onhiin ọdi mọ: “Mị mạḅogh rạraar phọ mị mụsighe bọ ạlhoghonhaan nyịnha ḍịghaagh ạngo Ẹnhaan ịdipho inmo,” 6 ómhoghi mụn ọlhogh eegu ọde ọdi.’ Esi ịduon phọ, nyinha meḍighi ịdi ekpo ọnhu phọ Ẹnhaan ị́moogh mụn mạar oḍighinhom loor eḍighinhom ịyaar phọ anyinha. 7 Nyinha awe ịyal arisigh, Ạịzạyạ ạkar kụ ịmhiinhaan inyinha ịmiin phọ ẹḅem bọ mọ: 8 ‘Awe phọ ạbuen phọ opu bịn rọkaaph ghan mọ bụno ụlhogh ịmhi eegu, kụolo arokpom mọ ạbidi ịkelhan ni ịmhi iboom. 9 Iiseeny phọ bịdi ruuseeny ghan bọ ịmhi eḍighi ni oopho bịn, loor esi dị ạraraar phọ bịdi rọtughemhi ghan bọ eḍighi ịto awe.’” 10 Kụ ọdi ạmhagh ḍita awe phọ kụ ạḅenhi mọ: “Ịnaghan ẹḅilhe ẹnhaghanhan ẹmhu ịphen mị kạkaaph bọ: 11 Ịyaar dị ẹḍua ọnhu oye emite kụ reḍighi ghan ịdi oye phọ kạ́ḅaal, kẹ́pe eḍigh bọ.”

12 Kụ ạbumatuan phọ oru ọteeny nyọdi kụ ọḅenhi mọ: “Nạ alegheri ni mọ ịphen nạ ạghaaph bọ iphin ni olhoghi ạbuo ạ Fạrisi phọ?” 13 Kụ ọdi ạphagharanhaan bịdi mọ: “Tọrobo ẹezupha dị Ọde k’ạke phọ ạmhi kụ ụ́zuph kotuphuron ni. 14 Ịbilhe bịdi. Bịdi abuḍiemhiom dị rọ́miin ghan eten. Oye dị rạ́miin ghan eten kụ aḍiemhiom ọnhon oye dị rạ́miin ghan eten, ịyal phọ ạbidi komelheghu ni osuma epogh.” 15 Kụ a Pita ạḅem mọ: “Gbạ ẹmhu ọghaaph ọmaaniom mọ ụḅenhi iyoor.” 16 Kụ a Jizọs ạḅem mọ: “Nyinha phọ kẹn bịn kẹ̋nhaghanhan aani? 17 Nyinha ílegheri mọ tọrobo ịyaar dị eḍigh ọnhu oye reten ghan keḍigh ọkuruḅaka phọ kụ ọni otoph? 18 Kụolo tọrobo ịyaar lọ ẹḍua ọnhu kụ emite, ịḍua sịphe ekpom mọ kụ eru, kụ ịpe kụ reḍighi ghan bọ ịdi oye phọ kạ́ḅaal. 19 Esi ọmaam, sịphe ekpom mọ kụ ịdi ịkaraph igbiighi rẹḍua ghan kemite, kụ etorori ẹlogh ọko enu, olhe ẹmha, ọrolhan esi dị ụ́ḅaal,* imhi, ọgbaanhaan oye ịkaraph ạsiagba, r’ọopu aḍien Ẹnhaan. 20 Ạraraar phọ ịphen phọ kụ reḍighi ghan ịdi oye phọ kạ́ḅaal; olheom ạraghaagh dị úutolha* kụ réḍighi ghan ịdi oye phọ kạ́ḅaal.”

21 A Jizọs rọḅua sịphe phọ, kụ ạghi rokool ạ Tạyạ rạ Sạịdọn. 22 Bịn ạnhir ọlo a Finisia dị arugh ẹpe phọ aru ạteeny nyọdi kụ amhoghi ghan ạlhom mọ: “Ụnma ịmhi ighirigiir, Uwo Ẹmhoogh, Ọony a Devid. Ọkaraph uwaloor rạmiinhe ni ọnyanhi ạmhi iboom.” 23 Kụolo ọdi ọ́phagharanhaan ạnhir phọ. Esi ịduon phọ ạbumatuan phọ uru ni ọteeny nyọdi kụ ọoḅereghian mọ: “Ḅẹnhi ạnhir phọ ạḍua, loor esi dị amoghi ni rụdaph iyira.” 24 Kụ ọdi ạphagharanhaan mọ: “Ịmhi úrom oru ọteeny ạbunhon awe emuton bụo eelhe phọ Izrẹl ọghigh bọ iyool ịga dị mephe.” 25 Kụolo ạnhir phọ aru ni akpuḍian ghisigh ọdi, kụ ạḅem ghan mọ: “Uwo Ẹmhoogh, ụlhoghonhaan ịmhi ḍịghaagh!” 26 Kụ ọdi ạphagharanhaan mọ: “Ị́kpeanhaan dị kọsighe eḍien ịbam ạnmuny phọ kụ otebenhaan nmụny asuogh.” 27 Kụ ạnhir phọ mọ: “Ịduon phọ ni Uwo Ẹmhoogh, kụolo ạnmuny asuogh phọ rele ghan ni eḍien lọ ẹḅua ịdaabili ạburude otu phọ ạbidi emheel.” 28 Kụ a Jizọs ạphagharanhaan nyọdi mọ: “Nhịr phọ, omheeraam mọ ạna ạbugh ni iboom; ịpe nạ rạwa bọ kụ ẹtuugh emite.” Mem mem mọ bịn ọnyanhi phọ ọdi amhoon.

29 A Jizọs rọḅua sịphe phọ, kụ ạghi esi dị etuman Ọphiiny Ạbazi phọ ạ Gạlili ạsiiny ẹeḅaraph ạrol ude. 30 Kụ aḍiboom aḍita awe oru ọteeny nyọdi r’awe dị oḍiku rạagha, r’ạrukugha, r’ạbudi rọ́miin ghan eten, r’ạbudi rọ́ḅa ghan r’ịbadi ạbunhon dị bịdi ọpham, kụ oru oseere sịphe aghisigh phọ ọdi, kụ ọdi aakonhom bịdi. 31 Kụ mem mọ aḍita awe phọ ọmhiin bọ mọ bụphe ụ́ḅa ghan bọ momhiigh rọḅa, bụphe oḍiku bọ rạagha phọ momhoon, ạrukugha phọ rotelhe, ḅịlhe bụphe ụ́miin ghan bọ eten rọmiin eten, iḍighi ni iikia esi ạbidi kụ bidị oghuenhi Ẹnhaan phọ Izrẹl.

32 Kụ a Jizọs ạmhagh bụmatuan phọ ọdi ạḅenhi mọ: “Ighirigiir awe phọ ạbuen phọ edi ni, loor esi dị sịen ịraar aḍughul otu bịdi mọrol bọ r’ạmhi kụ eḍien kőlhe. Mị ụ́wa ọḅenhi ạbidi mọ oghelheghu r’ọkoony phọ, ọbo bịdi kọkanyanhu ghan bọ eten.” 33 Kụ ạbumatuan phọ ọphagharanhaan nyọdi mọ: “Yoor kọmiin ẹghen ạ brẹd dị kaleeny ḍita awe phọ ạbuen phọ ekpisi phọ ẹphen edi bọ ịduon sạm?” 34 Kụ a Jizọs apuru bịdi mọ: “Ika iiḅoghoḍi ạ brẹd nyinha ẹpham bọ?” Kụ bịdi mọ: “Oḍual ịne, r’iphurukpu ịbam ina.” 35 Kụ ọdi rọḅenhi ḍita awe phọ mọ ọrolhoghu ude, 36 kụ ạsighe oḍual iiḅoghoḍi ạ brẹd phọ r’ina phọ, kụ rọngo ḍịseph Ẹnhaan, kụ ạparion ạḅogh ạngo bụmatuan phọ kụ ạbumatuan phọ odiemhi ḍita awe phọ. 37 Kụ oomo awe phọ olhe ẹpherogh, kụ ạbumatuan phọ ọson ipoḍi phọ esugha bọ kụ emuza oḍual igbogh ạrigiel. 38 Kụ bụphe olhe bọ ụmhan 4,000 alhephiri ạnmuny, dị úgbiom nmạriir r’ịbam ạnmuny. 39 Kụ ọdi rọḅenhi we phọ mọ oghelheghu, kụ aḍigh oghuugh ạghi ekool ạ Mạgạdạn.