Ọdaphan Ịpe ạ Mạk Ạge Bọ

1 Emhiighom iiḅi ịinhaghan phọ ịlo a Jizọs Krạịst, Ọony phọ Ẹnhaan: 2 Ọdaphan ịpe ọge bọ sịphe ạḍinya oyil phọ Ạịzạyạ mọ: “(Mịin! Mị ratom otelhedom ạmhi oḍiemhi ghan* oseleminhaan ạna eten phọ ạna.) 3 Ụnhaghan ni ẹḍogh dị ẹlo ghan ẹpe ẹdala phọ mọ: ‘Iikolhobian eten phọ a Jehova!* Iselhe yogh reten phọ ọdi.’” 4 Ạ Jọn Oḍiinyeom Mụum mọ ạrol li ẹpe ẹdala phọ, agbeelhom ghan mọ oḍiiny ạmuum kụ kaḍeenhaan mọ oye makiton pịdi ọsar ịkaraph ọdi ọbilhenhaan. 5 Kụ awe oomo ạramha phọ a Judia r’oomo awe phọ a Jeruselem ọghi ghan ọteeny nyọdi, kụ ọghaaph ghan ịkaraph phọ ạbidi omiteom, kụ ọdi aḍiinye ghan bịdi mụum sịphe Ọphiiny ạ Jọdạn. 6 Ạ Jọn ạkpolhoghian ghan ạsuoma asuphuuph ạ kạmẹl r’okuughaam esin dị oḍighinhom ozu ẹnham, kụ igurubia* r’ẹnhuum aḍiowo kụ iḍighi ghan eḍien ọdi. 7 Kụ ọdi agbeelhom ghan mọ: “Oye dị upu ịmhi odi ni ọmhan ạmhi ratu dị iḍigh arokoro ọdi bịn mị ụ́man ozuman ọkarion. 8 Mị uḍiinye ghan inyinha mụum, kụolo ọdi kiḍiinyeom inyinha uwaloor iigbia phọ.”

9 Mem mọ ọpo phọ, a Jizọs ạḅua ni Nạzạrẹt ẹpe Gạlili aru kụ ạ Jọn aḍiinye nyọdi mụum sịphe Ọphiiny ạ Jọdạn. 10 A Jizọs ramite bọ sịphe ạmuum mọ bịn, ạmhiin dị ạsike phọ eghunyonhu, r’uwaloor iigbia phọ dị rasoorom nyọdi ịdipho okuru ghọzo. 11 Kụ ẹḍogh ẹḅa ẹpe k’ạke phọ mọ: “Nạ Ọony ạmhi dị mị ạphomhoghian; eḍighinhom ịyaar phọ ạna ịḅeraan ni ịmhi iboom.”

12 Mem mem mọ bịn uwaloor phọ anyu nyọdi ọghi ẹpe ẹdala phọ. 13 Kụ ọdi ạrol ẹpe ẹdala phọ 40 aḍughul otu, kụ a Setạn ạdegh nyọdi aphogh. Ọdi ạrol ẹpe phọ r’ịnham elhegheḍum, kụolo ạruukpaany phọ ụlhoghonhaan ghan ni nyọdi ḍịghaagh.

14 Rosiph Jọn rọlhogh ikoli, kụ a Jizọs ạghi ẹpe Gạlili agbeelhom ghan dom iiḅi ịinhaghan phọ Ẹnhaan 15 kụ ạḅem ghan mọ: “Amem mọ ọmaanhaan bọ memhunhughan, ḅịlhe Ọmhar phọ Ẹnhaan matuman sịen. Ikiton, kụ ẹmhoogh omheeraam ẹghi esi iiḅi ịinhaghan phọ.”

16 Ịdipho ọdi ratelhe bọ oogbom Ọphiiny Ạbazi phọ ạ Gạlili, kụ ạmhiin Sạịmọn r’ Ạndrụ umor phọ ạ Sạịmọn dị rozu ghan ịzuguru ạbidi, bịdi uḍighi bụkoniom ạkoni. 17 Kụ a Jizọs ạḅenhi bịdi mọ: “Itu ịdaph ịmhi, mị kiḍighi inyinha bụkoniom awe.” 18 Mem mem mọ bịn bịdi ọwilhe ịzuguru phọ ạbidi ọdaph nyọdi. 19 Ọdi rorelhe ọghi ghisigh ẹnum, kụ ạmhiin Jems ọony phọ ạ Zẹbẹdi rạ Jọn umor phọ ọdi, dị odi olhoghi oghuugh ạbidi rọokoḍi ghan ịzuguru ạbidi, 20 kụ ạmhagh bịdi mem mem mọ. Kụ bịdi ọwilhe Zẹbẹdi ọde phọ ạbidi r’awe phọ bịdi ophir bọ sịphe oghuugh phọ, kụ ọdaph nyọdi. 21 Kụ bịdi oḍigh Kạpạnịọm.

A Ḍio Ophooghian phọ remiigh bọ bịn, a Jizọs aḍigh ẹpe obughotu phọ amhiigh ọtughemhi. 22 Kụ eten ịtughemhi phọ ọdi iḍighi ni iikia esi ạbidi, loor esi dị ọdi ạtughemhi ghan bịdi ịdipho oye dị ạmhoogh ịikpo, kị́dipho ạbutughemhia Olhogh phọ. 23 Mem mọ ọpo phọ, oye dị ọkaraph uwaloor odi loor ạrol li sịphe obughotu phọ ạbidi kụ ạlo mọ: 24 “Jizọs ọpo ạ Nạzạrẹt phọ, nạ rụwa ghan iyoor eeghe? Nạ uru ophiemhi ayoor ḍụghum? Mị alegheri ni ọkar oye phọ nạ aru bọ, nạ kụ Oye Iigbia phọ Ẹnhaan arom bọ!” 25 Kụolo a Jizọs ạḅaam ni ọkaraph uwaloor phọ, kụ ạḅem mọ: “Kpomori ọnhu ạna, amite loor ọdi!” 26 Kụ ọkaraph uwaloor phọ aḍighi ịdi oye phọ amheel amhiigh osiphi isughuna kụ ạlooghi, kụ amite loor oye phọ. 27 Ịphen phọ iḍighi ni kẹn iikia esi oomo awe phọ kụ omhiigh oopuruan sịphe igbo phọ ạbidi mọ: “Ịphen phọ ịghen? Imhoom ịtughemhi! R’ịikpo, ọdi rạngo ghan ni ịto ịkaraph aruwaloor, kụ rẹnaghanhan ghan ni nyọdi.” 28 Kụ eginha amem bịn ịinhaghan ịlo ọdi elheeny oomo ạramha phọ ạ Gạlili.

29 Kụ bịdi ọḅua sịphe obughotu phọ ọghi kạ Sạịmọn r’ Ạndrụ. Kụ a Jems rạ Jọn ụghi aani ni. 30 Onhiin ạnhir ạ Sạịmọn ạmhinha ni dị osipheeny odi loor, kụ eginha amem bịn bịdi ọḅenhi Jizọs ịlo ọdi. 31 Kụ ọdi ạghi ạteeny ạnhir phọ ạpham ḍịghaagh phọ, kụ ạlhoghonhaan nyọdi ḍịghaagh ọmheera. Kụ osipheeny phọ ạḅua loor phọ, kụ ạnhir phọ amhiigh oḍighinhaan ạbidi rạraar.

32 Rẹteeny dulhe, mem dị erumhuḍio memheel ighool, kụ awe omhiigh ọsighe oruom ọdi oomo ạbulo úmoon r’ạbudi ịkaraph aruwaloor rẹeḅaghamhi; 33 kụ oomo awe ẹmha phọ ookpomhoghan sịphe ọnhu aḍibuo otu phọ. 34 Kụ ọdi aakonhom ịbadi awe dị ọmhoogh rẹezegh kịrokiro, ạḅilhe aphorogh ịbadi ịkaraph aruwaloor, kụolo ọdi ómheera ghan mọ ịkaraph aruwaloor phọ ẹghaaph ịyaar, loor esi dị bịdi ulhegheri ni mọ ọdi kụ ạ Krạịst phọ.*

35 Eḅon ạḍiroor, mem dị ke̋kpoghoronhu, ọdi aḅetenhu ni amite erugh ạghi ekpisi dị awe úlo, kụ amhiigh ọoḅereghi. 36 Kụolo ạ Sạịmọn r’ạbuphe odi bọ r’ọdi ụwa ni nyọdi osi ẹpe ọdi odi bọ, 37 kụ rọmhiin nyọdi kụ ọḅenhi mọ: “Oomo awe phọ rọwa ghan nyịnha.” 38 Kụolo ọdi ạḅenhi bịdi mọ: “Ọghi ẹnhon ekpisi, ẹpe ạramha phọ etuman bọ sịen, pịdi mị agbeelhom aani dom mọ Ẹnhaan ẹpe phọ, loor esi dị mị ụtuan ịduon phọ kụ aru bọ.” 39 Kụ ọdi ạghi agbeelhom ghan dom mọ Ẹnhaan oomo ạ Gạlili, ẹpe arubughotu phọ ạbidi ạḅilhe aphorogh ghan ịkaraph aruwaloor phọ.

40 Kụ oye dị ẹzegh ọku ufe eḍighi, aru ni kẹn ạteeny nyọdi kụ akpuḍian, kụ ạaḅereghian ghan mọ: “Lọ nạ rạwa ni, pọ nạ katue ni aḍighi ịdi mị kạḅaal.” 41 Kụ loor esi igbiririph, a Jizọs ạgbuton ni ḍịghaagh ạḅogh nyọdi, kụ ạḅenhi mọ: “Mị rạwa ni! Ḅạal.” 42 Mem mem mọ bịn ẹzegh ọku ufe phọ ẹḅua, bịn oye phọ ạḅaal. 43 Kụ a Jizọs ạḅenhi mọ agheel kụ ạḅilhe ạphur nyọdi rụru, 44 ạḅem mọ: “Mịin mọ nạ ọ́ḅenhi oye ịyaar, kụolo kịa aḍeenhaan loor ạna ọpinyon rịkia phọ ạḅilhe ạngo inmo phọ olhogh phọ a Mozis ạghaaph bọ mọ oye dị ạmhoogh ghan ẹzegh ọku ufe kụ mạḅaal ạngo ghan, pịdi eḍeenhaan bịdi mọ nạ mamhoon.” 45 Kụolo oye phọ rọḅua, kụ amhiigh ogbeelhom oomo ịpe emite bọ olheenye elheeny. Ịphen phọ iḍighi ịdi a Jizọs úugo ghan mụn ekpisi dị awe kọmiin nyọdi mem dị raḍigh ẹmha, kụ ạrol ghan ọgbal ẹmha phọ rikpisi dị awe úlo. Ghạlhamo r’ịduon phọ, bịdi ụḅua ghan ni oomo arikpisi oru ọteeny nyọdi.