Ọdaphan Luk
12 Mem mọ ọpo phọ, ạsimuunir awe uukpomhoghan ni dị tụtu omhiigh ọozeghian, kụ ọdi ạphur amhiigh ọḅenhi ạbumatuan phọ ọdi mọ: “Igonha loor anyinha esi a yist ạ Fạrisi phọ, ịduon phọ pọ ạdol ịyal arisigh phọ ạbidi. 2 Ịyaar ílo dị omhiigha loor okpereghi kụ kóganhanhamhi, kụ ịyaar ịbooghian ílo dị kólegheri. 3 Esi ịduon phọ, tọrobo ịyaar dị nyinha ẹghaaph esi ufiri kọnaghan ni esi ạḍiḅaal, kụ ịlo nyinha eepholha osoph kọtol li ạnyu otu kụ ogbeelhom. 4 Ọḅaram ịsien, rịghiri ạmhi, mị rịḅenhi ghan inyinha mọ, kékiilhaan bụphe kotue bọ ni okiigh oye kụolo kótue mụn bọ oḍighi ịdi epu pạ. 5 Kụolo mị kịḅenhi inyinha oye dị nyinha kekiilhaan: Ikiilhaan Ọpo aghiigh oye, ạḅilhe bọ ni ạmhoogh ịikpo oroph osumeeny ạ Gẹhẹnạ.* Ii, mị rịḅenhi ghan inyinha mọ, ikiilhaan Nyọon phọ. 6 Rọsighe ghan ịyal ạ kọịn dị ị́kar ịman mạar* kụ okoom oogh ạsimighor, kị́dipho? Kụolo ghạlhamo r’ịduon phọ ni bịn r’oniin ọnyo ạbidi dị Ẹnhaan rabulha* ghan ólho. 7 Kụolo ẹlo anyinha, ghạlhamo r’ọnhu ạsilhaal dị edi rụmhu anyinha bịn ọdi alegheri ni. Kẹ́moogh oghiilhaan; nyinha ẹman ni mạar epu ịbadi ạsimighor.
8 “Mị rịḅenhi ghan inyinha mọ, tọrobo oye dị ạghaaph ịlo ạmhi ghisigh awe, Ọony phọ oye kạkaaph aani ni ịlo ọdi ghisigh ạruukpaany phọ Ẹnhaan. 9 Kụolo oye dị ụpharanhaan ịmhi ghisigh awe, Ọony phọ oye kạparanhaan aani ni nyọdi ghisigh ạruukpaany phọ Ẹnhaan. 10 Kụ tọrobo oye lọ ạghaaph ịkaraph ịlo Ọony phọ oye, kọsar ri ọbilhenhaan, kụolo ọlo ạghaaph ịkaraph ịlo uwaloor iigbia phọ kọ́sar ọbilhenhaan. 11 Mem dị ịmheremhi inyinha ghisigh awe dị ookpomhoghan,* r’aghisigh ạbuo ịtooghi r’awe dị ọpham ịikpo, kẹ́moogh oboom ọoḅaghamhian aloor ịlo ịyaar phọ ọbobo eten phọ nyinha kẹkaaph bọ ọphelhaam ạrumhu anyinha ọbobo ịlo ọphagharanhaan dị nyinha kẹngo bịdi, 12 ịdi eḍighi bọ uwaloor iigbia phọ kịtughemhi ni inyinha mem mọ ọpo phọ rạraar phọ nyinha kẹkaaph bọ.”
13 Oniin oye sịphe aḍita awe phọ ạḅenhi nyọdi mọ: “Ḅẹnhi umor phọ ạmhi adi erua phọ ụngo ịmhi bin ạmhi.” 14 Kụ a Jizọs ạḅenhi nyọdi mọ: “Oye phọ, ạnhian kụ ụma ịmhi ịdipho oogboom ịiruen ọbobo ịdipho oye dị kidianhaan inyinha erua?” 15 Kụ ọdi ạḅenhi ḍita awe phọ mọ: “Ịmaar ẹḅarion riḍien anyinha kụ egonha loor ọbo nyinha kẹmoogh ghan bọ ekpooko,* loor esi dị ghạlhamo r’amem dị oye phọ ạmhoogh akpol, ạraraar phọ ịpe oye phọ ạmhoogh bọ kụ rẹ́ngo ghan oye phọ ghuḍum.” 16 Esi ịduon phọ, ọdi ạngo ni bịdi ọghaaph ọmaanhiom, mọ: “Oniin ọolha abugha ni iboom ibugha ozo ọdi. 17 Kụ ọdi amhiigh ọotughian sịphe olhoghi ọdi mọ, ‘Mị kaḍighi ika nyịidipho mị ụ́moogh mụn bọ esi oseere ibugha phọ ạmhi?’ 18 Kụ ọdi ạḅem mọ, ‘Ịduon kụ ịdi mị kaḍighi: Mị kalereghi ruutu phọ mị rasereghi ghan bọ rạraar phọ kụ ạloghoḍi ịdi ẹbugh epu pạ, kụ mị ạlogh oomo ạraraar phọ ạmhi r’ibugha phọ ạmhi sịphe phọ, 19 kụ mị ạḅenhi loor ạmhi mọ: “Nạ makpol ịbadi igey ạraraar dị kẹsighe nyịnha ịbadi ạsia; pooghian, alhe ạphughol, ạghelhom loor.”’ 20 Kụolo Ẹnhaan ạḅenhi nyọdi mọ, ‘Uwo elologhi, kọsighe ghuḍum mọ* ạna ḍughul phọ ạḍien phọ. Kụ oomo ạraraar phọ nạ akpol bọ keḍighi ịlo ạnhian?’ 21 Ịpe kụ ịdi rẹtolhonhaan ghan oye dị akpolhonhaan ruphua loor ọdi kụolo aḍighi uwo ekulhom ghisigh Ẹnhaan.”
22 Kụ ọdi ạḅenhi bụmatuan phọ ọdi mọ: “Pọ kụ ịyaar phọ mị rịḅenhi bọ inyinha mọ, kẹ́moogh mụn oboom ọoḅaghamhian aloor ịlo aghuḍum mọ anyinha ịdi egbolhomaam ịyaar olhe, ọbobo ịlo aloor phọ anyinha ịdi egbolhomaam ịyaar ọkpolhoghian. 23 Loor esi dị aghuḍum mọ kụ ạmhan mạar apu eḍien ḅịlhe aloor phọ kụ ịmhan mạar epu iinmenhan. 24 Ipogh ekiririom rịghilhigho phọ: Bịdi ịizupha rẹ́zuph ghan kụ ibugha rébugha ghan; bịdi ị́moogh esi osereghi ariiḍien ọbobo otu osereghi ạraraar; kụolo Ẹnhaan rạngo ghan ni bịdi eḍien. Nyinha kụ ị́man mạar ipu ịnhun phọ ḍụghum? 25 Ọghen ọnyo anyinha kụ katue ạdoonye ghuḍum mọ ọdi ghạlhamo r’oniin a kubit* esi ọoḅaghamhian ghan aloor iboom? 26 Esi ịduon phọ, eru mạar dị nyinha kétue eḍighi ẹeny ịyaar phọ ẹphen phọ, uḍighi ika kụ nyinha ẹmoogh bọ oboom ọoḅaghamhian aloor ịlo ịphoripho ạraraar phọ? 27 Ipogh ekiririom ịpe ạsifalhaway phọ reḍum ghan bọ: Bịdi rékumuan ghan, kụ rélo ghan kẹn rukpe; kụolo mị rịḅenhi ghan inyinha mọ ghạlhamo r’ịduon ạ Sọlọmọn ạmhoogh bọ ni ịbadi ịma ạraraar bịn iinmenhan phọ ọdi ị́nighe iileeny sịfalhaway phọ. 28 Eru mạar dị Ẹnhaan raanmenhemhi ghan ni ịduon ịizupha elhegheḍum mọ ịpe rodon ọmhiin iḍue kotoph bọ ni osumeeny nịan, pọ eeghe ịdi ọdi kiinmenhemhi inyinha, nyinha awe dị omheeraam aghom! 29 Esi ịduon phọ, kẹ́moogh mụn ọoḅaghamhian aloor ịlo ịyaar dị nyinha kele r’ịyaar dị nyinha kẹpughol. Kẹ́moogh mụn oboom ọoḅaghamhian aloor; 30 loor esi dị ịphen kụ ạraraar phọ awe aḅirinhi phọ ọlhogh bọ ikuph rọwa, kụolo Ọde phọ anyinha alegheri ni mọ nyinha emoghi rạraar phọ ịphen phọ. 31 Kpạripe ghụn, ịwa ghan Ọmhar phọ ọdi, bịn ọdi kịḅaranhaan ni inyinha rạraar phọ ịphen phọ.
32 “Kẹ́moogh oghiilhaan ẹbam egu iyool ịga, ịdi eḍighi bọ Ọde phọ anyinha mamheera ọngo anyinha Ọmhar phọ. 33 Ibolhoghi rạraar phọ nyinha ẹmhoogh bọ ẹsighe ikpoki phọ eenmoom ruunmo ọlhoghonhaan ạḍighaagh bụlo ekuom.* Ịmoogh rukuru ikpoki dị réḅu ghan, ịduon phọ pọ ephua dị kémunheen dị edi ẹpe k’ạke, ẹpe ọḅa kátuman bọ ḅịlhe ịyaar kégbo bọ. 34 Ịdi eḍighi bọ esi lọ ephua anyinha edi kụ ẹdi arokpom anyinha kẹtol aani.
35 “Iinmenhan, ẹnyaaghian* ḅịlhe kémeera ịtozi anyinha eḍim, 36 kụ ẹrol ịdipho awe dị rokori dị uwo otu ạbidi dị ạghi pinien katigheel, pịdi ọdi aru akar bịdi okughuronhaan nyọdi mem mem mọ. 37 Ọḅaal olhoghi kụ odianhaan rẹbenhe phọ ạbuphe ọde otu phọ ạbidi katu bọ kụ ạmiin dị rogon! Mị ạkar rịḅenhi ghan inyinha mọ, ọdi kạkpolhoghian ni ạsuoma arukumuan kụ ạḅenhi bịdi mọ ọrol ịdaabili kụ atu ạngo bịdi eḍien. 38 Kụ eru mạar dị ọdi arigheel ḍughul,* ọbobo mem mọ ạsikenhegh rẹlaay ghan bọ,* kụ ạmhiin dị bịdi ọnyaaghian, ọḅaal olhoghi kụ odianhaan bịdi! 39 Ilegheri mọ, mụghumo uwo otu phọ alhegheri ni mem* mọ ọḅa phọ katu bọ, ọdi múmeera ạka otu ọdi aḍigh. 40 Nyinha phọ kẹn, ịnyaaghian ghan, loor esi dị Ọony phọ oye katu mem* dị nyinha íseere olhoghi.”
41 Kụ a Pita apuru mọ: “Uwo Ẹmhoogh, ọghaaph ọmaanhiom mọ ọphon phọ nạ rụḅenhi ghan iyoor bịn ọbobo oomo awe phọ?” 42 Kụ Uwo Ẹmhoogh phọ ạphagharanhaan mọ: “Ạnhian nụun kụ ẹbenhe* phọ ạkpe bọ oḍuom olhoghi, ọpo asụ bọ olhoghi, ọpo ọde otu phọ kạma bọ mọ aphogh rẹbenhe phọ ọdi, ạḅilhe ạngo ghan bịdi eḍien dị ẹkasian mem lọ ẹkpeanhaan? 43 Ọḅaal olhoghi kụ odianhaan ẹbenhe phọ ọpo phọ eḍighi mạar dị ọde otu phọ ọdi aru kụ ạmhiin dị ọdi raḍighi ni ịduon phọ! 44 Mị ạkar rịḅenhi ghan inyinha mọ, ọde otu phọ kạma ni nyọdi mọ aphogh oomo ạraraar phọ ọno ạmhoogh bọ. 45 Kụolo eru mạar dị ẹbenhe phọ ọpo phọ ạatughian mọ, ‘Ọde otu phọ ạmhi raabinya ni oru,’ kụ amhiigh okuphogh ạbueripho ạrebenhe phọ, nmạriir phọ r’alhephiri phọ, ạḅilhe amhiigh olhe r’ọphughol amiim dị tụtu amiim mọ kakiigh, 46 ọde otu ẹbenhe phọ ọpo phọ katu ḍio dị ọdi úseere olhoghi r’amem dị ọdi úlegheri, kụ ạliom ẹbenhe phọ iboom kụ aseere nyọdi esi dị bụphe ụ́kpe bọ oḍuom olhoghi phọ kụ odi. 47 Kọgurogh ni iboom ẹbenhe phọ ọpo ạnhaghanhan bọ ịpe ọde otu phọ ọdi rạwa bọ kụ ụ́nyaaghian bọ ọbobo úḍighi bọ ịpe orom bọ nyọdi.* 48 Kụolo kọgur ephurukpu ọpo ụ́naghanhan bọ kụ aḍighi rạraar dị ẹkpe ọgurogh. Ọkar agey, kopuru ni iboom ạraraar ḍịghaagh ạtorobo oye lọ ọngo ọbughe, ḅịlhe kẹn kopuru ni opuemhi ḍịghaagh oye dị ọngo iboom ạraraar mọ aphogh.
49 “Mị uru ọlhogh ạnian sịen ade phọ, kụ mị ạḅilhe rạwa eeghe eḍighi mạar dị mị mạlhogh ni? 50 Ọkar agey, ẹmoogh ni ọdo oḍiinye ạmuum dị kuḍiinye ịmhi, kụ oḅio ạmhi kạ́po tụtu eru eten! 51 Nyinha rẹetughian ghan mọ mị uru oseere ẹepho sịen ade phọ? Eeye, mị rịḅenhi ghan inyinha mọ, mị uru ghụn ọkom amadia. 52 Loor esi dị emhiigh nyịidipho kụ rẹki amadia kạtol li eghun otu, eḍighi mạar dị oogh awe kụ odi pọ ịraar kozuom ịyal kụ ịyal ozuom ịraar. 53 Amadia kạtol li, ọde kazuom ni ọony kụ ọony azuom ọde, onhiin kazuom ni ọnyanhi kụ ọnyanhi azuom onhiin, onhiin olom kazuom ni ạnhir ọony ọdi kụ ạnhir ilhom azuom onhiin olom ọdi.”
54 Kụ ọdi ạḅilhe ni ạḅenhi ḍita awe phọ mọ: “Mem dị nyinha ẹmhiin dị aḍio eghire pạkiri phọ ẹpe erumhuḍio phọ remeel ghan bọ, nyinha reegborion ghan ni ọḅem mọ, ‘Ogbogh ọlophia kạloph ni,’ kụ ẹtuugh emite. 55 Kụ nyinha ẹmhiin dị oghim ạḍua ẹpe esoorom mọ ratu, nyinha rẹḅem ghan mọ, ‘Eboom ẹgholhoghol kẹtol li,’ kụ rẹtuugh ghan ni kemite. 56 We ịyal arisigh, nyinha repogh ghan ni de phọ r’okuaḍio phọ bịn kẹghaaph mọ kạmu ni ọbobo kạloph ni, kụolo uḍighi ika kụ nyinha ị́naghanhan bọ ẹmhu ạraraar phọ remiteghu bọ nyịidiphọ? 57 Uḍighi ika kụ nyinha r’aloor ítue bọ isopha ịpe ẹkpe bọ oḍighi? 58 Esi ọmaam, mem dị oye dị r’ạna ẹmhoogh ịiḅaghamhi edi eten rẹki ọmhiin ọtooghia, mịin ni mọ nạ ạteeny nyọdi nyinha ẹkaaphogh ọbo ọdi kạmheremhi ghan bọ nyịnha ghisigh oogboom ịiruen phọ, kụ oogboom ịiruen phọ ạḅogh nyịnha ạngo okoriom otu ikoli phọ, kụ okoriom mọ ạlhogh nyịnha ikoli. 59 Mị rạḅenhi ghan nyịnha mọ, nạ kámite ni bịn tụtu nạ ạkpe ọbam ạ kọịn* phọ ạna asugha bọ.”