Ọdaphan Ịpe ạ Mạk Ạge Bọ
8 Mem mọ ọpo phọ, aḍiboom aḍita awe ụḅilhe ni ookpomhoghan, kụ ụ́moogh ịyaar olhe. Kụ ọdi ạmhagh bụmatuan phọ ọdi kụ ạḅenhi mọ: 2 “Ighirigiir awe phọ ạbuen phọ edi ni, loor esi dị sịen ịraar aḍughul otu bịdi mọrol bọ r’ạmhi kụ ụ́moogh ịyaar olhe. 3 Mị ạḅenhi bịdi mọ oghelheghu r’ọkoony phọ kọkanyanhu ni eten, kụ buniin ạbidi ụḅua ni rikpisi dị ẹkel kụ oru.” 4 Kụolo ạbumatuan phọ ọdi ụphagharanhaan nyọdi mọ: “Kọmiin ẹghen ạ brẹd dị kaleeny we phọ ạbuen phọ ekpisi phọ ẹphen edi bọ ịduon sạm?” 5 Kụ ọdi apuru bịdi mọ: “Ika iiḅoghoḍi ạ brẹd nyinha ẹpham bọ?” Kụ bịdi mọ: “Oḍual ịne.” 6 Kụ ọdi ạḅenhi ḍita awe phọ mọ ọrolhoghu ude. Kụ ạsighe oḍual iiḅoghoḍi ạ brẹd phọ, ạngo ḍịseph Ẹnhaan, ạparion, kụ ạḅogh ạngo bụmatuan phọ ọdi mọ odi, kụ bịdi odiemhi ḍita awe phọ. 7 Bịdi ụphamham ni iphurukpu ịbam ina, kụ ọdi rọoḅereghi, kụ ạḅenhi bịdi mọ ọsighe odiemhi we phọ. 8 Kụ awe phọ olhe ẹpherogh, kụ ạbumatuan phọ ọson ipoḍi phọ esugha bọ kụ emuza oḍual igbogh ạrigiel. 9 Kụ alhephiri ạnmuny dị ọrol sịphe phọ rọki ni ọmhan 4,000. Kụ ọdi ạḅenhi bịdi mọ oghelheghu.
10 Mem mem mọ bịn ọdi r’ạbumatuan phọ ọdi oḍigh oghuugh ọghi ekool ạ Dạlmạnutạ. 11 Kụ ạbuo ạ Fạrisi phọ uru ni ọteeny nyọdi ẹpe phọ ọdegh ọdi ophogh, kụ omhiigh ọogbaghanhaan r’ọdi, kụ ọḅenhi nyọdi mọ aḍighi amiteom eḍeenhaan k’ạke bụno ọmhiin. 12 Kụ ịphen phọ ị́ḅaal olhoghi a Jizọs, kụ ạḅem mọ: “Uḍighi ika kụ oghiil phọ ọphon phọ rọwa ghan bọ ọmhiin eḍeenhaan? Mị ạkar rịḅenhi ghan inyinha mọ, kọ́ngo eḍeenhaan oghiil phọ ọphon phọ.” 13 Esi ịduon phọ ọdi ạwilhe ni bịdi ạḅilhe aḍigh oghuugh, kụ ạḅeeny ọphoripho ạga ọphiiny ạbazi phọ.
14 Kụolo bịdi uwulha ni ọphamham ạ brẹd, kụ ụ́moogh ẹnhon ịyaar sịphe oghuugh phọ emuton eniin eeḅoghoḍi ạ brẹd. 15 Kụ ọdi ạghi onyen ạphur bịdi rụru mọ: “Igonha loor anyinha esi a yist ạ Fạrisi phọ ra yist phọ ạ Hẹrọd.” 16 Kụ bịdi omhiigh ọghaaph sịphe igbo phọ ạbidi ịlo ịpe bịdi ụ́pam bọ ạ brẹd. 17 Kụ a Jizọs rolhegheri ịphen phọ, kụ ạḅenhi mọ: “Uḍighi ika kụ nyinha edi bọ rẹkaaph ghan mọ nyinha ị́pam ạ brẹd? Nyinha ke̋lhegheri ni ẹḅilhe ẹnhaghanhan ịphen phọ? Ẹḅilhe ni ịkparanhaan inyinha ọnhaghanhan sịphe ilhoghi phọ anyinha? 18 ‘Ghạlhamo r’ịduon nyinha ẹmhoogh bọ ni riḍien, nyinha rẹ́miin ghan eten; kụ ghạlhamo r’ịduon nyinha ẹmhoogh bọ ni reḅeri, nyinha rẹ́naghan ghan?’ Nyinha ebulha ni 19 mem mọ mị ạsighe bọ oogh iiḅoghoḍi ạ brẹd phọ ạngoom eḍien 5,000 awe phọ? Ipoḍi phọ nyinha ẹson bọ imuza ika ạrigiel?” Kụ bịdi ọphagharanhaan nyọdi mọ: “Ḍioph r’ịyal.” 20 “Mem mọ mị ạsighe bọ oḍual iiḅoghoḍi ạ brẹd phọ ạngoom eḍien 4,000 awe phọ, ipoḍi phọ nyinha ẹson bọ imuza ika igbogh ạrigiel?” Kụ bịdi ọḅenhi nyọdi mọ: “Oḍual.” 21 Esi ịduon phọ ọdi ạḅenhi bịdi mọ: “Nyinha kẹ̋nhaghanhan ni?”
22 Bịdi rosi Bẹtseidạ, kụ awe oruom nyọdi oye dị rạ́miin ghan eten, kụ ọoḅereghian nyọdi mọ ạḅogh oye phọ. 23 Kụ ọdi ạpham ḍịghaagh oye phọ rạ́miin ghan bọ eten phọ arelheom ạḍuanham sịphe ẹmha phọ. Ọdi rọsinhom riḍien oye phọ ịghor, kụ ạḅamham rạghaagh ọdi oye phọ kụ apuru mọ: “Nạ ạmiin ni ịyaar?” 24 Kụ oye phọ aphogh akitonhom esi phọ kụ ạḅem mọ: “Mị ạmiin ni we, kụolo ọkigh ireeny dị retelhe yogh.” 25 Kụ ọdi ạḅilhe ạḅogh riḍien oye phọ, kụ oye phọ amhiigh ọmhiin agey. Kụ ariḍien phọ ọdi ẹḅaranhu, kụ amhiigh ọkuamhi ọmhiin oomo ạraraar. 26 Kụ ọdi ạḅenhi oye phọ mọ agheel, kụ ạḅilhe ạḅenhi mọ: “Káḍigh ẹpe ẹmha phọ.”
27 Kụ a Jizọs r’ạbumatuan phọ ọdi ọḅua sịphe phọ onyeenhe ẹpe ạramha phọ ạ Sịsạriạ Filipạị, kụ ọdi amhiigh opuru ạbidi ẹpe eten phọ mọ: “Awe rọḅem ghan mọ mị ạnhian?” 28 Kụ bịdi ọphagharanhaan nyọdi mọ: “Buniin rọḅem ghan mọ nạ ạ Jọn Oḍiinyeom Mụum mọ, buniin mọ nạ Ẹlạịjạ, kụ bunhọn mọ nạ oniin sịphe ariil phọ.” 29 Kụ ọdi apuru bịdi mọ: “Nyinha phọ rẹḅem aani ghan mọ mị ạnhian?” Kụ a Pita ạphagharanhaan nyọdi mọ: “Nạ kụ ạ Krạịst phọ.” 30 Kụ ọdi ạphur bịdi rụru ạkpaariom mọ kụ́ḅenhi oye ọdo oye phọ ọdi aru bọ. 31 Kụ ọdi ạḅilhe amhiigh ọḅenhi ạbidi mọ Ọony phọ oye kạmiinhom ni iboom ịmhinhimhiin, kụ ikumor awe phọ r’aruwo ẹmhu ạbupinyon rịkia phọ r’ạbutughemhia Olhogh phọ okel ọḅilhe okiigh nyọdi, kụ ọdi aḅetenhu esi aḍuugh omhunhenhiom ịraar aḍughul otu phọ. 32 Ọkar agey, a Jizọs ạghaaph ni ịphen phọ aagholhomhi. Kụolo a Pita ạmhagh ni nyọdi atenhom ọgbal kụ amhiigh ọḅaam ọdi. 33 Kụ ọdi aaghiraan aphogh bụmatuan phọ ọdi, kụ ạḅaam Pita, ạḅem mọ: “Ten ọmhan ạmhi, Setạn! ịdi eḍighi bọ ịitughian phọ ạna ịlo awe, kị́lo Ẹnhaan.”
34 Kụ ọdi ạmhagh ḍita awe phọ r’ạbumatuan phọ ọdi kụ ạḅenhi mọ: “Oye lọ rạwa oḍighi ọnyo ạmatuan ạmhi kạparanhaan loor ọdi, kụ ạsighe oreeny ịmhinhimhiin* phọ ọdi ụdapham ghan ịmhi. 35 Ịdi eḍighi bọ tọrobo oye lọ rạwa ọphel aghuḍum mọ ọdi katoph ni, kụolo tọrobo oye lọ aghol ẹmhu ạmhi r’iiḅi ịinhaghan phọ kụ aroph ghuḍum mọ ọdi kạpel li. 36 Ọkar ọghaaph, eeghe ạsuo kụ ẹdi oye kạmoogh eru mạar dị ạmhoogh oomo aḅirinhi phọ kụolo aroph ghuḍum mọ ọdi? 37 Ọkar eeghe kụ ẹdi oye katue ạngo oonmenhenhiom aghuḍum ọdi? 38 Tọrobo oye dị ughiilhom ịmhi r’ikpo ọnhu phọ ạmhi umugholoor sịen oghiil phọ ọphon mọwilhe bọ Ẹnhaan* kụ roḍighi bọ ịkaraph, Ọony phọ oye kakiilhom aani ni nyọdi umugholoor mem mọ ọdi kạpam bọ rụukpaany phọ atumhom r’eghuan Ọde phọ ọdi.”