Ọdaphan Ịpe ạ Mạk Ạge Bọ

9 Ọdi ạḅilhe ni ạḅenhi bịdi mọ: “Mị ạkar rịḅenhi ghan inyinha mọ buniin ạbuen ọmheregha bọ sịen phọ kómugh tụtu ọphur ọmhiin dị Ọmhar phọ Ẹnhaan maru r’ịikpo.” 2 Odiiny aḍughul otu reten kụ a Jizọs ạpham Pita ra Jems rạ Jọn ạsiinyom ạnyu eboom ẹeḅaraph. Kụ ọdi anmia sịphe ghisigh ạbidi; 3 kụ ạsuoma ạnyu phọ ọdi amhiigh ọnmanha, kụ ạḅaal apu ịdi oye ịsien ade phọ katue aatol ạḅaalhamhi. 4 Ḅịlhe kẹn, Ẹlạịja ra Mozis umitenhaan ni bịdi, kụ ọghaaphan ghan Jizọs. 5 Kụ a Pita ạḅenhi Jizọs mọ: “Rạbạị, ẹnighe agey ịduon yoor odi aani bọ sịen. Esi ịduon phọ yoor ụlogh sịen ịraar arogbogo, oniin ọlo ạna, oniin ọlo a Mozis, oniin ọlo Ẹlạịjạ.” 6 Ọkar ọghaaph, ọdi ólhegheri ịlo oḍighi, ịdi eḍighi bọ bịdi ụmhoogh ni oboom oghiilhaan. 7 Kụ ọotu amite asoorom bịdi, kụ ẹḍogh ẹḅa sịphe ọotu phọ mọ: “Ọphon kụ Ọony phọ ạmhi mị ạphomhoghian bọ. Ịnaghanhan nyọdi.” 8 Mem mem mọ bịn bịdi ophogh okitonhom kụ ụ́miin mụn ọnhon oye dị odi r’ạbidi emuton Jizọs.

9 Ịduon bịdi ọḍua bọ sịphe ẹeḅaraph phọ rosoor, ọdi ạphur ri bịdi rụru ạkpaariom mọ kụ́ḅenhi oye rạraar phọ bịdi ọmhiin bọ tụtu Ọony phọ oye aḅetenhu esi aḍuugh. 10 Bịdi ụsighe ni ịpe ọdi ạghaaph bọ oseerean ilhoghi ạbidi,* kụolo uupuruan ghan igbo ạbidi ịyaar phọ oḅetenhu esi aḍuugh phọ ọdi ạghaaph bọ aghol rẹma ghan bọ. 11 Kụ bịdi omhiigh opuru ọdi mọ: “Uḍighi ika kụ ạbutughemhia Olhogh phọ rọḅem ghan bọ mọ Ẹlạịjạ kụ kạpur atu?” 12 Kụ ọdi ạḅenhi bịdi mọ: “Ọkar agey, Ẹlạịjạ kụ kạpur ri atu, kụ aḅulhemhi oomo ạraraar ịpe ẹkpe bọ ọrol. Kụolo uḍighi ika kụ Ịge Iigbia phọ ẹḅem bọ mọ Ọony phọ oye kạmiinhom ni iboom ịmhinhimhiin kụ ọḅilhe okel nyọdi? 13 Ọkar agey, mị rịḅenhi ghan inyinha mọ Ẹlạịjạ maru ni, kụolo bịdi uḍighi nyọdi ịlo ẹḅeraan, ọdaphan ịpe ọge bọ ịlo ọdi.”

14 Bịdi roru ọteeny bụeripho ạbumatuan phọ, kụ ọmhiin ḍiboom aḍita awe dị okoom bịdi, kụ ạbutughemhia Olhogh phọ r’ạbidi rọogbaghanhaan ghan. 15 Kụ iḍighi ni iikia esi aḍita awe phọ mem mọ ọmhiin bọ nyọdi, kụ oghiil ọghi ọmhagh nyọdi. 16 Kụ ọdi apuru bịdi mọ: “Nyinha rẹegbaghanhaan ghan eeghe?” 17 Kụ oniin sịphe aḍita awe phọ ạphagharanhaan nyọdi mọ: “Ọtughemhia, mị ụsighe ọony ạmhi aruom nyịnha loor esi dị ọkaraph uwaloor odi loor ọdi dị rámeera ghan ọdi ạḅa. 18 Kụ tọrobo amem lọ ạpham nyọdi, raler ghan ni ude, kụ amiigh ofugh oopha ọnhu phọ r’ọghirigha ạralhaany ọdi kụ ịnyaam mọ ọdi emunheen. Kụ mị ạḅenhi bụmatuan phọ ạna mọ ophorogh ọkaraph uwaloor phọ, kụolo bịdi útue.” 19 Kụ a Jizọs ạḅem mọ: “Oghiil dị omheeraam ụ́moogh, mị kạtol r’anyinha kạpur amem? Mị kạminoghom rọozo phọ anyinha ịphen phọ kạpur amem? Ịsighe nyọdi iruom ịmhi.” 20 Kụ bịdi ọsighe ọbumoony phọ oruom nyọdi, kụolo ọkaraph uwaloor phọ rọmhiin nyọdi, kụ aḍighi ịdi ọbumoony phọ amhiigh osiphi isughuna. Kụ romheel ude, kụ amhiigh ookilha, r’ofugh oopha ọnhu ọdi. 21 Kụ a Jizọs apuru ọde phọ mọ: “Ịphen phọ imhiigh kạpur amem?” Kụ ọde phọ ạphagharanhaan mọ: “K’ẹghoroghor ọdi ni, 22 kụ ragbor ghan ni kalher nyọdi asumeeny olhoghi ạnian ḅịlhe r’olhoghi ạmuum oghiigh ọdi. Mọ nạ katue ni aḍighi ịyaar, pọ ụnma aani iyoor ighirigiir ụlhoghonhaan iyoor ḍịghaagh.” 23 Kụ a Jizọs ạḅenhi nyọdi mọ: “Uḍighi ika kụ nạ ạḅem bọ mọ, ‘Mọ nạ katue ni’? Ịyaar ílo dị oye dị ạmhoogh omheeraam kátue aḍighi.” 24 Mem mem mọ bịn ọde ọony phọ ạlo mọ: “Mị ạmoogh ni omheeraam! Ụlhoghonhaan ịmhi ḍịghaagh esi lọ mị amhoghi omheeraam!”

25 A Jizọs rọmhiin ḍita awe dị okpiphaany rotu ẹpe bịdi odi bọ, kụ ạḅaam ọkaraph uwaloor phọ, kụ ạḅenhi mọ: “Nạ uwaloor phọ aḍighi bọ ịdi ọbumoony phọ ọphon phọ rạ́ḅa ghan ḅịlhe ạḅaaghaph, mị rạḅenhi ghan nyịnha mọ, ḍụa loor ọdi kụ kạ́ḅula mụn aḍigh!” 26 Ọkaraph uwaloor phọ rọlooghi ḅịlhe r’oḍighi ịdi ọbumoony phọ asiphi isughuna, kụ amite loor ọdi, kụ ẹghigh mụdi ọbumoony phọ mamhugh, kụ eḍighi ịdi ogbogh opol awe phọ ọḅem ghan mọ: “Ọony phọ mamhugh!” 27 Kụolo a Jizọs ạpham ḍịghaagh ọbumoony phọ kụ ạlhoghonhaan nyọdi ḍịghaagh ọmheera. 28 Ọdi roḍigh olhoghi otu, kụ ạbumatuan phọ oru opuru nyọdi mem dị oginha ọdi bịn odi mọ: “Uḍighi ika kụ yoor útue bọ uporogh ọkaraph uwaloor phọ?” 29 Kụ ọdi ạphagharanhaan bịdi mọ: “Ịiḅereghi bịn kụ ketue eporogh ọdo phọ ọphon phọ.”

30 Kụ bịdi ọḅua sịphe phọ ọghi Gạlili, kụolo ọdi ọ́wa mọ awe olhegheri. 31 Kụ ọdi ạtughemhi bụmatuan phọ ọdi, kụ ạḅenhi bịdi mọ: “Kobool li Ọony phọ oye ọlogh ḍịghaagh awe, kụ bịdi okiigh nyọdi, kụ ghạlhamo r’ịduon kokiigh bọ nyọdi, ọdi kaḅetenhu ni esi aḍuugh omhunhenhiom ịraar aḍughul otu phọ.” 32 Kụolo ghạlhamo r’ịduon bịdi ụ́naghanhan bọ ni ikpo ọnhu phọ ọdi, bịdi ughiilhaan ni opuru ọdi ḍipuru.

33 Kụ bịdi oru osi Kạpạnịọm. Ọdi roḍigh olhoghi otu, kụ apuru bịdi mọ: “Nyinha ịigbaghanhaan ghan eeghe ẹpe eten phọ?” 34 Kụ bịdi uḅoorian bịn, ịdi eḍighi bọ ẹpe eten phọ bịdi ụugbaghanhaan ghan ịlo oye dị aḍighi ọkaraghi ogbogh sịphe igbo phọ ạbidi. 35 Ọdi rọrol ude kụ ạmhagh Ḍioph r’ Ịyal phọ kụ ạḅenhi bịdi mọ: “Oye dị rạwa oḍighi ọḅel sịen igbo phọ anyinha, ạmoogh osugha ọmhan kụ okumu ghan ọngo ạbueripho.” 36 Kụ ọdi ạsighe ọbumoony ạmheremhi sịphe ogbo ạbidi; rọkom ọbumoony phọ, kụ ạḅenhi bịdi mọ: 37 “Oye lọ ạtuan ḍien ạmhi kụ aghuraam ọdo ọbumoony phọ ọphon phọ, pọ mughuraam aani ịmhi; kụ oye lọ ughuraam ịmhi, pọ ughuraam ịmhi r’Ọpo urom bọ ịmhi.”

38 Kụ ạ Jọn ạḅenhi nyọdi mọ: “Ọtughemhia, yoor ụmhiin oye dị aghol ḍien phọ ạna raporogh ghan ịkaraph aruwaloor, kụ yoor ọghi okikima ọdi, loor esi dị ọdi iyira rụ́daph aani ghan.” 39 Kụ a Jizọs ạḅenhi bịdi mọ: “Kẹ́ki okikima ọdi, ịdi eḍighi bọ oye ólho dị kakol ḍien ạmhi aḍighi ịiḍaany kụ ạnuun amiigh ọghaaph ịkaraph ịlo ạmhi. 40 Oye lọ iyira úsophoghom pọ odi ạga ayira. 41 Kụ tọrobo oye lọ ạtuan mọ nyinha ạbuo ạ Krạịst kụ ịngo inyinha mọgo ạmuum mọ ịpughol, mị ạkar rịḅenhi ghan inyinha mọ kọkpe ni nyọdi ịikpia. 42 Kụolo tọrobo oye lọ aḍighi ịdi oniin sịen ạbubam mọ ạbuen phọ ọmhoogh bọ omheeraam oru esi ạmhi akpetaan, mịnighe ghụn ọsighe ẹna phọ rọgbeom ghan bọ ikpo ịizupha, ẹpe ẹnham adool kụ reeghiremhi ghan bọ, ọkpoom orum ọdi osumeeny ọphiiny ạbazi.

43 “Eḍighi mạar dị ạḍighaagh ạna kụ reḍighi ghan ịdi nạ kakpetaan, pọ soph aroph. Ẹnighe ghụn dị nạ kạtol dị aḍiniin ạḍighaagh ílo kụ ạmoogh ghuḍum kpạripe r’ọrolhom ịyal ạraghaagh kụ oḍigh ạ Gẹhẹnạ,* sịphe ạnian phọ kótue bọ oḍime. 44* —— 45 Kụ eḍighi mạar dị aḍuwol ạna kụ reḍighi ghan ịdi nạ kakpetaan, pọ soph aroph. Ẹnighe ghụn dị nạ kạtol dị aḍiniin aḍuwol ílo kụ ạmoogh ghuḍum kpạripe r’ọrolhom ịyal aruwol kụ oḍigh ạ Gẹhẹnạ.* 46* —— 47 Ḅịlhe kẹn, eḍighi mạar dị ekpeḍien ạna kụ reḍighi ghan ịdi nạ kakpetaan, pọ pọghoron aroph. Ẹnighe ghụn dị nạ kạtolhom eniin ekpeḍien kụ aḍigh Ọmhar phọ Ẹnhaan kpạripe r’ọrolhom ịyal ariḍien kụ koroph nyịnha osumeeny Gẹhẹnạ,* 48 sịphe ịsu phọ rémugh ghan bọ ḅịlhe róḍimhe ghan bọ nịan phọ.

49 “Ịduon rọsighe ghan bọ boph kooduom eḍien kụ ịdi kọsighe nịan ooduom oomo awe. 50 Aboph ạnighe ni, kụolo eḍighi mạar dị aḍiroph aboph phọ ephe, koḅulhemhi bọ ika ḍiroph phọ? Ịmoogh boph sịphe aloor phọ anyinha, kụ ẹphamhanham ẹepho sịphe igbo phọ anyinha.”