Ọdaphan Jọn
21 Ịphen phọ reten kụ a Jizọs ạḅilhe aḍeenhaan loor ọdi bụmatuan phọ, egi phọ ẹpe Ọphiiny Ạbazi phọ ạ Tạịbiriạs. Imite ịduon. 2 Ạ Sạịmon Pita rạ Tọmọs (ọpo ọmhagh ghan bọ mọ Didimọs), rạ Nạtạnịẹl ọpo a Kenạ ẹpe Gạlili, r’ịyal phọ ạnmuny phọ ạ Zẹbẹdi, r’ịyal ạbunhon ạbumatuan ụrol eniin esi. 3 Kụ ạ Sạịmọn Pita ạḅenhi bịdi mọ: “Mị rạki ạkoni.” Kụ bịdi ọḅenhi nyọdi mọ: “Yoor rotu aani ni.” Kụ bịdi ọghi oḍigh oghuugh onyeenhe, kụolo ḍughul phọ ạḍiphe phọ bịdi ụ́teeny ina.
4 Kụ ịduon rekpoghoronhu bọ, a Jizọs ạmheera ni ẹpe oogbom ọphiiny ạbazi phọ, kụolo ạbumatuan phọ úlegheri mọ a Jizọs. 5 Kụ a Jizọs apuru bịdi mọ: “Nmụny phọ, nyinha ẹmoogh ni ịyaar olhe?”* Kụ bịdi ọphagharanhaan mọ: “Eeye!” 6 Kụ ọdi ạḅenhi bịdi mọ: “Izu ọzuguru phọ elhiom anyinha bịn nyinha kẹteeny ni ịyaar.” Kụ bịdi ọtuugh ịduon phọ oḍighi, kụolo útue ụkpaaghi ọzuguru phọ ụlogh sịphe oghuugh phọ loor esi iboom ina phọ bịdi ọteeny bọ. 7 Kụ ọnyo ạmatuan phọ a Jizọs ạphomhoghian bọ ạḅenhi Pita mọ: “Ọpo phọ Uwo Ẹmhoogh phọ!” Ạ Sạịmọn Pita ạkpolhoghian oginha ạsuoma olhoghi* mem mọ ạnhaghan bọ ịphen phọ, esi ịduon phọ ọdi ạsighe ạsuoma ạnyu ọdi ạkpolhoghian, kụ apel asuma ọphiiny ạbazi phọ. 8 Kụolo ạbueripho ạbumatuan phọ uḍigh ọḅam oghuugh, kụ oḍurogh ọzuguru phọ ina phọ emuza bọ orumhom loor esi dị bịdi ụ́kar ụkelhan ạnyu ade. Ọḍua ịsiphe bịdi ọrol bọ osi ạnyu ade keḍighi ni 300 ạrada.*
9 Bịdi rophun kụ ọmhiin nịan dị ọḅam ena rạ brẹd. 10 Kụ a Jizọs ạḅenhi bịdi mọ: “Ịsighe iniin ina phọ pụruku nyinha ẹteeny bọ erumhom ẹphen.” 11 Kụ ạ Sạịmọn Pita aḍigh oghuugh phọ aḍur ọzuguru phọ igbogh ina phọ emuza bọ aphunhe ạnyu ade, kụ ina phọ ịmhan 153 ikpo. Kụ ghạlhamo r’ịduon ina phọ ẹbugh bọ, ọzuguru phọ ọ́phanyuan. 12 Kụ a Jizọs ạḅenhi bịdi mọ: “Itu elhe eḍien ạḍiroor.” Kụ r’ọnyo ạmatuan dị ạmhoogh oḅio opuru ọdi mọ: “Nạ ạnhian?” ọ́rol, loor esi dị bịdi ulhegheri ni mọ ọdi Uwo Ẹmhoogh phọ. 13 A Jizọs rọngo bịdi ạ brẹd phọ, kụ ạḅilhe ạsighe ena phọ ạngo bịdi. 14 Ọphon phọ omhunhenhiom ịraar amem dị a Jizọs amitenhaan bụmatuan phọ ọdi egbi k’amem mọ oḅeton bọ nyọdi esi aḍuugh phọ.
15 Bịdi rolhe eḍien phọ rọmhan, kụ a Jizọs apuru Sạịmọn Pita mọ: “Sạịmọn ọony ạ Jọn, nạ ụphomhoghian ni ịmhi apu ịphen phọ?” Kụ ọdi mọ: “Ii, Uwo Ẹmhoogh, nạ alegheri ni mọ mị ạphomhoghian ni nyịnha.” Kụ ọdi ạḅenhi nyọdi mọ: “Pọ ngọ eḍien nmụny iyool ịga phọ ạmhi.” 16 Kụ ọdi ạḅilhe apuru nyọdi omhunhenhiom ịyal amem mọ: “Sạịmọn ọony ạ Jọn, nạ ụphomhoghian ni ịmhi?” Kụ ọdi mọ: “Ii, Uwo Ẹmhoogh, nạ alegheri ni mọ mị ạphomhoghian ni nyịnha.” Kụ ọdi ạḅenhi nyọdi mọ: “Pọ pogh ịbam iyool ịga phọ ạmhi.” 17 Kụ ọdi apuru nyọdi omhunhenhiom ịraar amem mọ: “Sạịmọn ọony ạ Jọn, nạ ụphomhoghian ni ịmhi?” Kụ a Pita akururu loor ịduon ọdi apuru bọ nyọdi omhunhenhiom ịraar amem mọ: “Nạ ụphomhoghian ni ịmhi?” Kụ ọdi ạphagharanhaan mọ: “Uwo Ẹmhoogh, nạ kụ ulhegheri oomo ạraraar; kụ nạ alegheri ni mọ mị ạphomhoghian ni nyịnha.” Kụ a Jizọs ạḅenhi nyọdi mọ: “Pọ ngọ eḍien ịbam iyool ịga phọ ạmhi. 18 Mị ạkar rạḅenhi ghan nyịnha mọ, mem mọ ạsia phọ ạna kẹ̋ghi bọ, nạ kụ ụkpolhoghian ghan ạsuoma ạna ạḅilhe arelhe ghan ạghi tọrobo ekpisi lọ nạ rạwa. Kụolo mem dị nạ aḍighi okumor oye, nạ kasele ni rạghaagh ạna kụ ọnhon oye ạkpolhoghi nyịnha ạsuoma ạḅilhe ạpham nyịnha ạkimhom ekpisi lọ nạ ụ́wa.” 19 Ọdi ạghaaph ịphen phọ oḍeenhaan ọdo aḍuugh phọ a Pita kamugh bọ oghuenhi Ẹnhaan. Ọdi rọghaaph ịphen phọ kụ ạḅenhi nyọdi mọ: “Kịom ghisigh ụdaph ghan ịmhi.”
20 Kụ a Pita aaghiraan aphogh ọmhan kụ ạmhiin ọnyo ạmatuan phọ a Jizọs ạphomhoghian bọ dị rạdaph bịdi. Ọphon kụ ọnyo ạmatuan phọ ạbeḍenhom bọ ekpolhoghi a Jizọs mem mọ bịdi role bọ eḍien adulhe phọ kụ apuru bọ mọ: “Uwo Ẹmhoogh, ạnhian kụ kaal bọ nyịnha?” 21 Kụ a Pita ạmhiin bọ nyọdi, apuru Jizọs mọ: “Uwo Ẹmhoogh, eeghe kụ kemitenhaan aani oye phọ ọphon phọ?” 22 Kụ a Jizọs ạḅenhi nyọdi mọ: “Eru mạar dị mị rạwa mọ ọdi ạrol tụtu mị aḅula, eeghe kụ ịmhooghom nyịnha? Kịom ghisigh ụdaph ghan ịmhi bịn.” 23 Kụ ọghaaph phọ ọphon phọ alheeny ni elheeny igbo ạbumatuan phọ mọ ọnyo ạmatuan phọ ọphon phọ kámugh. Kụolo a Jizọs ọ́ḅem mọ ọdi kámugh, ạḅem ghụn mọ: “Eru mạar dị mị rạwa mọ ọdi ạrol tụtu mị aḅula, eeghe kụ ịmhooghom nyịnha?”
24 Ọnyo ạmatuan phọ ọphon phọ kụ ạghaaph bọ ạḅilhe ạge rạraar phọ ịphen phọ, kụ yoor olegheri ni mọ ịpe ọdi ạghaaph bọ ịne ni.
25 Ọkar ọghaaph, ịbadi ạraraar edi ni dị a Jizọs aḍighi dị ọḅem mọ ụge oomo ịdi, mị ragbi mọ ikpooghinheen ạrinya phọ mụgeom bọ míḍigh sịen aḅirinhi phọ.