Ọdaphan Jọn
13 Kụ egbi bọ ẹteeny amem Ẹyaal Ọphel Otenhe phọ a Jizọs alhegheri ni mọ amem mọ ọdi kạḍua bọ sịen aḅirinhi phọ aḅula kạ Ọde phọ mẹteeny, esi ịduon phọ ọdi ạphomhoghian ni bụmatuan phọ ọdi* odi bọ sịen aḅirinhi phọ asiemhi eekunha. 2 Mem mọ ọpo phọ bịdi odi ni role eḍien adulhe, kụ Eru phọ maḍighi ni ịdi a Judas Iskạrịọt, ọony phọ ạ Sạịmọn rạatughian ịlo aal a Jizọs. 3 Kụ loor ịduon a Jizọs alhegheri bọ ni mọ Ọde phọ mạḅogh oomo ạraraar ạlogh ḍịghaagh ọno ḅịlhe mọ ọno ạḅua kạ Ẹnhaan kụ aru kụ rạki ọteeny Ẹnhaan, 4 aḅetenhu ni sịphe bịdi ọrol bọ role eḍien phọ ạkporonhaan rụsuoma ạnyu ọdi aseere. Kụ ạsighe tọwẹl akuugha esin ọdi. 5 Kụ ạlhogh mụum ạgbagba kụ amhiigh ootol aruwol ạbumatuan phọ ọdi, kụ ạsighe tọwẹl phọ ọdi akuugha bọ agbuuroghom ghan ruwol phọ. 6 Ọdi ạghi ni asi pạ ạ Sạịmọn Pita odi bọ. Kụ a Pita apuru nyọdi mọ: “Uwo Ẹmhoogh, nạ rạwa ootol aruwol ạmhi?” 7 Kụ a Jizọs ạphagharanhaan nyọdi mọ: “Nyịidipho nạ ọ́nhaghanhan ịphen mị raḍighi bọ, kụolo nạ kạnaghanhan ni mem dị ịphen phọ reten.” 8 Kụ a Pita ạḅenhi nyọdi mọ: “Nạ káatol li bịn ruwol ạmhi.” Kụ a Jizọs ạphagharanhaan nyọdi mọ: “Mị úutol ruwol phọ ạna, pọ nạ kátue ạtol r’ạmhi.” 9 Kụ ạ Sạịmọn Pita ạḅenhi nyọdi mọ: “Uwo Ẹmhoogh, pọ káatol ruwol ạmhi bịn, ḅạram rạghaagh ạmhi r’ẹmhu ạmhi.” 10 Kụ a Jizọs ạḅenhi nyọdi mọ: “Oye kụ mawura mụum pọ oomo aloor phọ ẹḅaal li, kụ ímoghi mọ ootol ịnhon ariisi aloor ọdi emuton ruwol phọ. Kụ nyinha ẹḅaal li, kụolo oomo anyinha kụ ị́ḅaal.” 11 Ọdi alhegheri ni oye phọ kabool bọ nyọdi. Pọ kụ ịyaar phọ ạḅem bọ mọ: “Oomo anyinha kụ ị́ḅaal.”
12 Ọdi rootol ruwol phọ ạbidi rọmhan, kụ ạkpolhoghian rụsuoma ạnyu phọ ọdi, ạḅilhe ạghi ạrol sịphe ịdaabili phọ kụ apuru bịdi mọ: “Nyinha elegheri ni ịyaar phọ mị ạtuan bọ aatol ruwol anyinha? 13 Nyinha rịmhagh ghan ịmhi mọ ‘Ọtughemhia’ ra ‘Uwo Ẹmhoogh,’ kụ ịduon phọ ni, mị Ọtughemhia ni ra Uwo Ẹmhoogh. 14 Esi ịduon phọ, eḍighi mạar dị mị phọ aḍighi bọ Uwo Ẹmhoogh rạ Ọtughemhia phọ kụ aatol li ruwol anyinha, pọ igbo anyinha oniin ạmoogh ootol aani aruwol oniin. 15 Loor esi dị mị miphighinhaan inyinha eḍeenhaan, mọ ịpe mị iḍighi bọ inyinha kụ ẹdi nyinha kẹtuugh eḍighi aani ghan. 16 Mị ạkar rịḅenhi ghan inyinha mọ, ẹbenhe rápu ghan ọde otu ọdi, ḅịlhe otelhedom rápu ghan ọpo arom bọ nyọdi. 17 Nyinha elhegheri rạraar phọ ịphen phọ kụ ẹtuugh eḍighi, nyinha kẹmoogh ni ọḅaal olhoghi. 18 Kụ mị rạ́kaaph ghan ịlo oomo anyinha; mị alegheri ni bụphe mị mạsaḅar bọ. Kụolo ịphen phọ kemunhenhi ịpe ịge iigbia phọ ẹghaaph bọ mọ: ‘Ọpo r’ạmhi olhean ghan bọ maaghiraan uzuom ịmhi.’* 19 Emhiigh nyịidipho kụ rẹki, mị kịḅenhi ni inyinha kụ egbi omite, pịdi mem lọ emite nyinha elegheri mọ mị oye phọ ọpo phọ ni mị rạkaaph ghan bọ mọ mị atu phọ. 20 Mị ạkar rịḅenhi ghan inyinha mọ, tọrobo oye lọ ạlhoghoma oye dị mị arom, pọ mụlhoghoma aani ịmhi, kụ tọrobo oye lọ ụlhoghoma ịmhi, pọ mạlhoghoma aani Nyọpo urom bọ ịmhi.”
21 A Jizọs ạghaaph bọ ịphen phọ ạmhan, ịiḅaghamhi ni nyọdi iboom, kụ ạghaaph amiteom mọ: “Mị ạkar rịḅenhi ghan inyinha mọ, oniin ọnyo anyinha kaal li ịmhi.” 22 Kụ ạbumatuan phọ úlegheri oye phọ ọdi ạtuan bọ rạkaaph ịphen phọ, kụ oniin akiton aphogh nyoniin. 23 Oniin ọnyo ạmatuan, ọpo a Jizọs ạphomhoghian bọ, ạrol li atuman* Jizọs. 24 Kụ ạ Sạịmọn Pita ạyapha nyọon phọ kụ ạḅenhi mọ: “Ụḅenhi iyoor oye phọ ọdi ạtuan bọ rạkaaph ịphen phọ.” 25 Kụ ọnyo ạmatuan phọ ọphon phọ ạbeḍenhom ekpolhoghi a Jizọs kụ apuru mọ: “Uwo Ẹmhoogh, ạnhian kụ oye phọ?” 26 Kụ a Jizọs ạphagharanhaan mọ: “Ọpo mị kạngo bọ ọpherepe ạ brẹd phọ mị katiom bọ sịen ạgbagba phọ.” Kụ ọdi rotiom ạ brẹd phọ, kụ ạngo Judas, ọony phọ ạ Sạịmọn Iskạịrọt. 27 A Judas rạar ọpherepe ạ brẹd phọ, kụ a Setan aḍigh loor a Judas. Kụ a Jizọs ạḅenhi mọ: “Gboogborion aḍighi ịyaar phọ nạ raḍighi bọ.” 28 Kụolo r’oniin ọnyo ạbuphe ọrol aani bọ sịphe ịdaabili phọ dị alhegheri ịyaar phọ a Jizọs ạtuan bọ kụ ạḅenhi nyọdi ịduon phọ ọ́rol. 29 Buniin ụutughian ghan ghụn mọ ịduon a Judas kụ rạpam ghan bọ igbe ikpoki phọ, pọ a Jizọs ạḅenhi ghan nyọdi mọ, “Kịa agho rạraar dị koleom ẹyaal phọ,” ọbobo mọ ạghi ạngo ịyaar rukulhom mọ. 30 Kụ ọdi rạar ọpherepe ạ brẹd phọ, bịn ạḅua eginha amem. Kụ iḍighi ḍughul.
31 Ọdi romite ọḅua, kụ a Jizọs ạḅem mọ: “Nyịidipho moghuenhi Ọony phọ oye, ọḅilhe okuenhi aani Ẹnhaan dị eego esi Ọony phọ oye. 32 Ẹnhaan r’aloor kakuenhi ni nyọdi, kụ kátoph mem oghuenhi ọdi. 33 Bạm ạnmuny, mị kạḅilhe ni ạtol r’anyinha ephurukpu amem. Nyinha kịwa ni ịmhi; kụolo ịduon mị ạḅenhi bọ bụo a Ju phọ mọ, ‘Ẹpe mị rạki bọ nyinha kétue etu,’ mị rịḅenhi aani inyinha nyịidipho. 34 Mị rịngo inyinha omhoom olhogh, oniin ạphomhoghian nyoniin; ịduon mị ịphomhoghian bọ inyinha, oniin ạphomhoghian aani nyoniin. 35 Ịphen phọ kụ keḍighi ịdi oomo awe kolegheri mọ nyinha ạbumatuan ạmhi, eḍighi mạar dị nyinha ẹmhoogh ẹphomhoghian igbo anyinha.”
36 Kụ ạ Sạịmọn Pita apuru nyọdi mọ: “Uwo Ẹmhoogh, nạ rạki ẹghen?” Kụ a Jizọs ạphagharanhaan mọ: “Ekpisi phọ mị rạki bọ, nạ kátue ụdaph ịmhi ạki nyịidipho, kụolo onyebel roten nạ katu ni.” 37 Kụ a Pita ạḅenhi nyọdi mọ: “Uwo Ẹmhoogh, uḍighi ika kụ mị kátue bọ ạdaph nyịnha nyịidipho? Mị kạtuan ni nyịnha ạngo ghuḍum mọ ạmhi.” 38 Kụ a Jizọs ạḅenhi nyọdi mọ: “Nạ kụtuan ni ịmhi ạngo ghuḍum mọ ạna? Mị ạkar rạḅenhi ghan nyịnha mọ, ạkenhegh kạ́laay tụtu nạ mụpharanhaan ịmhi ịraar amem.”