Ọdaphan Jọn

17 A Jizọs rọghaaph rạraar phọ ịphen phọ kụ aphogh ẹpe k’ạke, kụ ạḅem mọ: “Ọde, amem mọ mẹteeny. Kuenhi ọony phọ ạna pịdi ọony phọ ạna aghuenhi nyịnha. 2 Nạ mạḅogh oomo awe* ạngo nyọdi, pịdi ọdi ạngo ghuḍum k’agee-pọ oomo ạbuphe nạ mạngo bọ nyọdi. 3 Ọmhoogh aghuḍum k’agee-pọ, pọ ẹwa mọ bịdi olhegheri nyịnha* eginha egey Ẹnhaan phọ, ra Jizọs Krạịst phọ nạ kụ arom bọ. 4 Mị maghuenhi nyịnha sịen ade phọ loor ịduon mị mạmhan bọ oḍighi phọ nạ ụngo bọ ịmhi mọ mị uḍighi. 5 Esi ịduon phọ, Ọde, meera mị ụtol ọogaany ạna ụḅilhe ụmoogh eghuan phọ mị ạmhoogh ghan bọ mem mọ mị ạrol ghan bọ ọogaany ạna kụ aḅirinhi phọ agbi bọ omite.

6 “Mị maḍighi ịdi awe phọ nạ ạsighe bọ sịen aḅirinhi phọ ụngo ịmhi molhegheri ḍien phọ ạna. Bịdi uḍighi bụo ạna, kụ nạ ụngo ịmhi, kụ bịdi mọdaph ikpo ọnhu phọ ạna. 7 Kụ nyịidipho bịdi molhegheri mọ oomo ạraraar phọ nạ ụngo bọ ịmhi ịḅua ḍịghaagh ạna kụ eru; 8 loor esi dị mị mạḅenhi bịdi rạraar phọ nạ ụḅenhi bọ ịmhi, kụ bịdi mọsighe r’oomo ekpom kụ ọkar olegheri mọ mị uru ịdipho ọmeera enye ạna ọḅilhe omeeraam mọ nạ kụ urom ni ịmhi. 9 Mị ạtuan bịdi kụ rạaḅereghi bọ; mị ụ́tuan aḅirinhi phọ kụ rạaḅereghi, mị ạtuan ghụn bụphe nạ mụngo bọ ịmhi, loor esi dị bịdi ạbuo ạna; 10 oomo ạraraar ạmhi ịlo ạna, kụ ịlo ạna ịlo ạmhi, kụ mughuenhi ịmhi igbo ạbidi.

11 “Mị úlo mụn sịen aḅirinhi phọ, bịdi kụ odi sịen aḅirinhi phọ, kụ mị ratu ọteeny ạna. Ọde Iigbia, tụan ni ḍien phọ ạna nạ mụngo bọ ịmhi aghoph bịdi, pịdi bịdi oḍighi oniin oye* ịduon yira oḍighi bọ oniin oye.* 12 Mị ụtuan ni ḍien phọ ạna nạ mụngo bọ ịmhi aphogh ghan bịdi mem mọ mị ạrol bọ r’ạbidi; kụ mị maghoph ni bịdi k’ạnyiidipho kụ r’oniin ọnyo ạbidi kőphe emuton ọony amuphe phọ, pịdi emunhenhi ịpe ịge iigbia phọ ẹghaaph bọ. 13 Kụolo nyịidipho mị ratu ọteeny ạna, kụ mị rạkaaph ghan ịphen phọ sịen aḅirinhi phọ, pịdi bịdi ọmoogh aani iboom ibo ịduon mị ạmhoogh bọ. 14 Mị mạḅenhi bịdi ịpe nạ ạghaaph bọ, kụolo aḅirinhi phọ ọlogh bịdi ḍien, loor esi dị bịdi kạ́buo aḅirinhi phọ ịduon mị úḍighi bọ ọlo aḅirinhi phọ.

15 “Mị rạ́lom ghan mọ sịghe bịdi sịen aḅirinhi phọ, mị rạlom ghan ghụn mọ pogh bịdi loor esi ọkaraph oye phọ. 16 Bịdi kạ́buo aḅirinhi phọ, ịduon mị úḍighi bọ ọlo aḅirinhi phọ. 17 Ḅạalhamhi bịdi* dị eego esi igey phọ; ekpo ọnhu phọ ạna kụ igey phọ. 18 Ịduon nạ urom bọ ịmhi oru ịsien aḅirinhi phọ, kụ ẹdi mị arom aani bịdi sịen aḅirinhi phọ. 19 Kụ mị ạtuan bịdi kụ rạḅaalhamhi bọ loor ạmhi, pịdi bịdi ọḅaal aani dị eego esi igey phọ.

20 “Mị ụ́tuan oginha ạbuen phọ kụ rạaḅereghi bọ, mị ạtuan aani ni bụphe kọmoogh bọ omheeraam otu esi ạmhi mem dị ọnhaghan ịtughemhi phọ ạbidi, 21 pịdi oomo ạbidi oḍighi oniin oye, ịduon nạ, Ọde, ạḅoph bọ r’ạmhi kụ mị ạḅoph bọ r’ạna, bịdi ọḅoph aani r’ayira ọbo aḅirinhi phọ omheeraam mọ nạ kụ urom ni ịmhi. 22 Mị mạngo bịdi eghuan phọ nạ mụngo bọ ịmhi, pịdi bịdi oḍighi oniin oye ịduon yira ọdighi bọ oniin oye. 23 Mị ạḅoph ni r’ạbidi kụ nạ ạḅoph r’ạmhi, ọbo bịdi ọkar oḍighi oniin oye,* pịdi aḅirinhi phọ olhegheri mọ nạ kụ urom ni ịmhi ḅịlhe mọ nạ ạpomoghian ni bịdi ịduon nạ ụphomhoghian bọ ịmhi. 24 Ọde, mị rạwa dị bụphe nạ mụngo bọ ịmhi kọtol aani esi dị mị odi, pịdi bịdi ọmiin eghuan phọ nạ mụngo bọ ịmhi, loor esi dị nạ ụphomhoghian ni ịmhi kụ egbi bọ ọteeny emhiighom* aḅirinhi phọ. 25 Ọde Aruukuan, ọkar agey, aḅirinhi phọ kőlhegheri nyịnha, kụolo mị alhegheri ni nyịnha, kụ bụen phọ molhegheri mọ nạ kụ urom ni ịmhi. 26 Mị maḍighi ịdi bịdi molhegheri ḍien phọ ạna, kụ mị kaḍighi ni ạkiom ghisigh pịdi bịdi ọmoogh aani ẹdo ẹphomhoghian phọ nạ ạmhoogh bọ aru esi ạmhi, kụ mị ạḅoph r’ạbidi.”