Ọdaphan Ịpe ạ Mạk Ạge Bọ

13 Ọdi ạḍua sịphe otu ịiḅereghi phọ ramite, kụ oniin ọnyo ạmatuan ọdi ạḅenhi nyọdi mọ: “Ọtughemhia, mịin! pọ eeghe ịma asighiigh r’ịma aruutu!” 2 Kụolo a Jizọs ạḅenhi nyọdi mọ: “Nạ ạmiin ni igbogh aruutu phọ ịphen phọ? Aḍighiigh kẹ́tol mụn ni bịn ạnyu aḍighiigh sịen phọ dị kóler.”

3 Ịdipho ọdi ạrol bọ sịphe Ẹeḅaraph phọ Olivs asoman otu ịiḅereghi phọ, a Pita, ra Jems, rạ Jọn r’ Ạndru upuru ni nyọdi mem dị oginha ọdi bịn odi mọ: 4 “Ụḅenhi iyoor, ịphen phọ kemite pụr amem, kụ eeghe kụ keḍeenhaan bọ mọ mẹteeny dị oomo ạraraar phọ ịphen phọ kesi eekunha?” 5 Kụ a Jizọs amhiigh ọḅenhi ạbidi mọ: “Igonha loor ọbo oye kiikelheghi ghan bọ inyinha. 6 Ịbadi kotumhom ghan ni ḍien phọ ạmhi kụ ọḅem ghan mọ, ‘Mị kụ ọdi phọ ni,’ kụ ookelheghi ịbadi awe. 7 Ọḅaram ịsien, mem dị nyinha ẹnhaghan ịlo ạraagham dị etuman r’ịdi ẹkelhan, kéekpereghaany; ịphen phọ kemite ni, kụolo eekunha phọ kẹ̋teeny.

8 “Eelhe kozuom ni eelhe ḅịlhe ọmhar azuom ọmhar; ade phọ kepiigha ni rikpisi kịrokiro; ekuom eḍien kẹtol kẹn ni. Oomo phọ ịphen phọ eḍighi emhiighom ẹgbagara eephinha dị ẹghigh eephinha oghunhughun.

9 “Igonha loor anyinha. Awe kịsighe ni inyinha ẹki ruutu ịiruen, kụ ịgurogh inyinha ẹpe arubughotu phọ ạbidi kụ ọḅilhe okol ẹmhu ạmhi ịmheremhi inyinha ghisigh abupoghom r’aruwo ẹmha, pịdi nyinha ẹkaaph ịpe nyinha emheeraam bọ ẹḅenhi bịdi. 10 Ḅịlhe kẹn, kọpur ri ogbeelhom iiḅi ịinhaghan phọ oleenye oomo areelhe phọ. 11 Kụ mem dị ịsighe inyinha rọkimhom, kẹ́moogh oboom ọoḅaghamhian aloor ịlo ịyaar phọ nyinha kẹkaaph bọ; kụolo ịkaaph tọrobo ịyaar lọ ịḅenhi inyinha ọghaaph mem mọ ọpo phọ, ịdi eḍighi bọ nyinha kụ rẹ́kaaph, kụolo uwaloor iigbia phọ kụ rạkaaph. 12 Umor kạḅogh ni umor ọdi ạngo we mọ oghiigh, ḅịlhe ọde ạḅogh mọony ạngo, ạnmuny kozuoghom ni bụrude r’aburunhiin ạbidi kụ ọḅilhe ọḅogh ọngo we mọ ọze. 13 Kụ oomo awe kokol li ẹmhu aḍien phọ ạmhi ịlhogh inyinha ḍien. Kụolo ọpo mạkparam* bọ asi ẹpe eekunha phọ, kọpel li.

14 “Tọrobo ịpe ẹrol bọ, mem dị nyinha ẹmhiin ịyaar ạḅaphanya phọ rẹkom ghan bọ muphe phọ dị ẹmheera esi dị ị́kpe (ọpo rạbal bọ ạmhoogh ọroph ọmhiin), pọ bụphe odi bọ Judia omhiigh osumughu ọghi ẹpe ạraaḅaraph phọ. 15 Oye dị odi ạnyu otu kúsoor ọbobo kúḍigh olhoghi otu ọdi ọsighe ịyaar; 16 kụ oye dị odi ozo kúḅula olhoghi otu ọsighe ạraraar dị ọdi mạwilhe ịdipho ạsuoma ạnyu ọdi. 17 Ịmhinhimhiin kụ kẹtolhonhaan nmạriir dị odi r’eghun r’ạbulo ọpham nmụny dị kőghinhe mạmaam mem mọ ọpo phọ! 18 Ịiḅereghi ghan mọ kíḍighi mem ẹephoom; 19 ịdi eḍighi bọ ariiḍio phọ ịpe phọ keḍighi riiḍio igbogh ịiḅaghamhi dị ke̋mite ghan k’amem mọ Ẹnhaan amhiigh bọ ọlhem ạraraar kụ ẹteeny nyịidipho, kụ emite, kémite mụn. 20 Ọkar ọghaaph, riiḍio phọ ịpe phọ kụ a Jehova* ósoph okpere, pọ r’oye kákpetenhaan. Kụolo ọdi mạtuan bụphe ọdi mạsaḅar bọ asoph riiḍio phọ ịpe phọ akpere.

21 “Ḅịlhe kẹn, oye ịḅenhi inyinha mọ, ‘Ịmiin! Ạ Krạịst phọ odi ẹphen,’ ọbobo, ‘Ịmiin! Odi ẹpe,’ kémeeraam. 22 Loor esi dị ariil ọkpe r’awe dị oghophora mọ bụno ạ Krạịst komite ni kụ oḍighi yogh ịiḍaany ookelheghiom ạbuphe mọsaḅar bọ, lọ edugh ni. 23 Esi ịduon phọ, igon ghan. Mị mịḅenhi inyinha oomo ạraraar kụ egbi ẹteeny amem dị kemite.

24 “Kụolo riiḍio phọ ịpe phọ, mem dị ịiḅaghamhi phọ ịpe phọ reten, erumhuḍio phọ keḍighi ni ufiri, ḅịlhe ụnwanyu phọ kạ́ngo mụn ḍịḅaal phọ ọdi, 25 kụ ạraanhaan phọ kẹḍua ni ẹpe k’ạke phọ emelheghu, ḅịlhe ịikpo ạsike phọ kepiigha ni. 26 Kụ awe kọmiin ni Ọony phọ oye ẹpe ọotu phọ dị ạpham iboom ịikpo r’eghuan kụ ratumom. 27 Ọdi katom ni rụukpaany phọ ọdi kụ bịdi ọki inya ạsiagaany ade phọ ookpomhoghi bụphe mọsaḅar bọ, emhiigh eekunha ade phọ kụ esi eekunha ạke phọ.

28 “Ịtuugha esi ọghaaph ọmaanhiom oreeny a fig phọ: Mem dị omhoom ọla a fig amite asi esi dị rạtaarogh, bịn nyinha relegheri ghan ni mọ aghozogh matuman. 29 Eniin phọ eten phọ, mem dị nyinha ẹmhiin dị ạraraar phọ ịphen phọ remiteghu, pọ ilegheri mọ Ọony phọ oye matuman pạ eghuugh phọ. 30 Mị ạkar rịḅenhi ghan inyinha mọ oghiil phọ ọphon phọ káten ni bịn tụtu oomo ạraraar phọ ịphen phọ emite ẹmhan. 31 Ạke phọ r’ade phọ kepe ni, kụolo ikpo ọnhu phọ ạmhi képe ni bịn.

32 “Kụ ịlo aḍio phọ ạḍiphe phọ ọbobo amem mọ oye ólhegheri, ghạlhamo r’ạruukpaany ẹpe k’ạke phọ r’Ọony phọ bịn úlegheri, emuton Ọde phọ. 33 Igon ghan, ẹghiom ghisigh eemhanham, ịdi eḍighi bọ nyinha ílegheri mem mọ ọmaanhaan bọ dị ạraraar phọ ịphen phọ kemite. 34 Ẹkigh mem dị oye rạwa ọghi ẹnhon eelhe kụ ạḅogh otu ọdi ạngo rẹbenhe ọdi mọ ophogh ghan, ạḅilhe ạngo tọrobo ọnyo ạbidi ịyaar oḍighi, kụ ạḅenhi okoriom eghuugh otu phọ mọ agon ghan. 35 Esi ịduon phọ, igon ghan, loor esi dị nyinha ílegheri mem mọ uwo otu phọ ratu bọ, mụghumo katu ọgbal adulhe ọbobo ogbo aḍughul ọbobo mem dị ke̋kpoghoronhu* ọbobo eḅon ạḍiroor, 36 pịdi mem dị ọdi aru ekperenhom, kạ́miin dị nyinha rẹnaanhi. 37 Kụ ịphen mị rịḅenhi bọ inyinha, mị rạḅenhi aani oomo awe mọ: Igon ghan.”