Ọdaphan Ịpe ạ Mạtiu Ạge Bọ

13 Mem mọ a Jizọs ạḅua bọ pạ otu phọ ḍio phọ ạḍiphe phọ, odị ạghi ni ạrol oogbom ọphiiny ạbazi phọ. 2 Kụ aḍiboom aḍita awe oru ookpomhoghan sịphe ọdi odi bọ dị tụtu ọdi ạghi aḍigh oghuugh ạrol ude, kụ aḍita awe phọ ọmheregha pạ oogbom ọphiiny ạbazi phọ. 3 Kụ ọdi ạsighe rạghaaph ọmaaniom ạtughemhiom bịdi ịbadi ạraraar, kụ ạḅem mọ: “Ịnaghan! Oḅephom ozo ạghi ni ọzuph ikpo ịizupha, 4 ịduon ọdi rạzuph bọ, iniin ikpo ịizupha phọ imhelheghu ọgbal eten, kụ ịnhun eru eekpophi. 5 Ịnhon imhelheghu de asighiigh dị ịisaar ị́kar ilo, bịn eginha amem ẹraarogh loor esi dị ịisaar phọ ị́bugh. 6 Kụolo ogogo romite, bịn ạsel ịizupha phọ, kụ ẹnhuughi loor esi dị ị́moogh sịnhi. 7 Ịnhon imhelheghu esi iitoor, kụ iitoor phọ esiighi ẹze ịizupha phọ. 8 Kụolo ịnhon imhelheghu ḍịma ade, kụ emhiigh omhuum iimhumha. Iniin imhuum epu ọnhu ịpe ọzuph bọ 100 amem, iniin 60 amem, ịnhon 30 amem. 9 Ọlo ạmhoogh reḅeri ạnhaghan.”

10 Kụ ạbumatuan phọ oru ọteeny nyọdi kụ opuru mọ: “Uḍighi ika kụ nạ rạtughemhiom ghan bọ bịdi rạghaaph ọmaaniom?” 11 Kụ ọdi ạphagharanhaan mọ: “Nyinha kụ ẹdi mọngo eepoogh ọnhaghanhan ạraraar ịbooghian phọ Ẹnhaan ịlo Ọmhar k’ạke phọ, kụolo ụ́ngo aani bịdi. 12 Loor esi dị tọrobo oye lọ ạmhoogh, kọngo ni ịnhon ọḅaram, kụ ọdi ạmoogh ạbalabalami; kụolo oye lọ ụ́moogh, ghạlhamo r’ịpe ọdi ạmhoogh bọ bịn kọboor ri nyọdi. 13 Mị rạtughemhiom ghan bịdi rạghaaph ọmaaniom loor esi dị bịdi ropogh ni kụolo ụ́miin, rọnaghan ni kụ ụ́naghan, kụ ụ́naghanhan kẹn ẹmhu ịyaar phọ rọkaaph bọ. 14 Kụ ịpe Ạịzạyạ ạghaaph bọ remunughan ni esi ạbidi. Ọdi ạḅem mọ: ‘Nyinha kẹkar ri ẹnaghan kụolo kẹ́naghanhan ẹmhu phọ, nyinha kẹkar ri epogh kụolo kẹ́miin. 15 Loor esi dị arokpom awe phọ ạbuen phọ mẹkpar, kụ bịdi rọnaghanham ghan ni reḅeri phọ ạbidi, kụolo róḍighi ghan ịlo ọnhaghan. Bịdi mokpereghi riḍien ạbidi, ọbo bịdi kọmiin ghan bọ eten, ọḅilhe oḍueghi reḅeri ạbidi ọbo kọnaghan ghan bọ ọḅilhe ọnaghanhan ẹmhu ịyaar phọ sịphe arokpom mọ ạbidi, ooghiraan otu pịdi mị aakonhom bịdi.’

16 “Kụolo, ibo idianhaan ni inyinha loor esi dị ariḍien phọ anyinha rẹmiin ni ḅịlhe areḅeri phọ anyinha rẹnaghan ni. 17 Mị ạkar rịḅenhi ghan inyinha mọ, ịbadi ariil r’awe elhiom eḍighinhom ịyaar ụwa ni ọmhiin aani ạraraar phọ nyinha rẹmiin bọ kụolo ụ́miin, bịdi ụwa kẹn ni ọnhaghan aani ạraraar phọ nyinha rẹnaghan bọ kụolo ụ́naghan.

18 “Ịnaghan nụun ẹmhu ọghaaph ọmaaniom oye phọ ạghi bọ ọzuph ịizupha phọ. 19 Mem dị oye ạnhaghan dom Ọmhar phọ kụ ụ́naghanhan ẹmhu phọ, ọkaraph oye phọ ratu ghan ni kạsighe ịpe ọzuph bọ sịphe ekpom mọ ọdi; ẹphen kụ ekpo ẹezupha phọ emheel bọ ọgbal eten phọ. 20 Kụ ịdi egbolhomaam ekpo ẹezupha phọ emheel bọ de asighiigh phọ, ọphon phọ oye dị ạnhaghan dom mọ kụ eginha amem ạsighe r’ibo. 21 Adom mọ rẹtol ghan ni sịphe ekpom mọ ọdi ekulha amem kụolo sịnhi rési ghan, bịn ameel eginha amem mem dị ịiḅaghamhi ọbobo ịgbiphoghom ẹteeny nyọdi loor esi adom mọ. 22 Ịdi egbolhomaam ekpo ẹezupha phọ emheel bọ esi iitoor phọ, ọphon phọ ọdi ạnhaghan dom mọ, kụ oboom ọoḅaghamhian aloor ịlo aghuḍum sịen aḅirinhi phọ* r’ịikpo iikelheghian phọ ikpoki ẹmhoogh bọ eghiigh dom mọ, bịn ítue imuum iimhumha. 23 Ịdi egbolhomaam ẹpe emheel bọ ḍịma ade phọ, ọphon phọ ọdi ạnhaghan dom mọ ạḅilhe ạnhaghanhan ẹmhu phọ, kụ ạkar amhuum iimhumha. Buniin umhuum opu ọnhu ịpe ọzuph bọ 100 amem, bụnhon 60 amem, bụeripho 30 amem.”

24 Kụ ọdi ạḅilhe ạngo bịdi ọnhon ọghaaph ọmaaniom, mọ: “Kọsighe Ọmhar k’ạke phọ ọmaaniom oye dị ạzuph igey ịizupha ozo ọdi. 25 Mem dị awe rọnaani, ạmulhogh ḍien ọdi aru ni ạzuph ịkaraph ịizupha ạḅophoghiom igey ịizupha* phọ ọdi bịn ạḅua. 26 Mem mọ ịizupha phọ eḍum bọ emhuum iimhumha, ụmhiinhom ni kẹn ịkaraph ịizupha phọ. 27 Kụ ạrebenhe phọ oru ọteeny uwo otu phọ ạbidi kụ opuru mọ, ‘Oye phọ, nạ ọ́zuph ḍịen igey ịizupha ẹpe ozo phọ ạna? Uḍighi ika kụ ịkaraph ịizupha edimhom bọ?’ 28 Kụ ọdi ạphagharanhaan bịdi mọ, ‘Oye dị ụlhogh ịmhi ḍien kụ aḍighi ịphen phọ.’ Kụ ạrebenhe phọ opuru nyọdi mọ, ‘Nạ rạwa ni mọ yoor ọghi oruph ịkaraph ịizupha phọ ḍụghum?’ 29 Kụ ọdi ạḅem mọ, ‘Eeye, eeni nyinha kẹki oruph ịkaraph ịizupha phọ bịn ẹḅaram igey phọ. 30 Ịbilhe ịyal phọ ịdi ẹḅophoghan eḍum tụtu ẹteeny mem ibugha phọ, ẹteeny mem mọ ạmuphe phọ, mị kạḅenhi ni bụo ibugha phọ mọ: Ịpur eruph ịkaraph ịizupha phọ ẹghoroghi pịdi oguom nịan; kụ egbi ookpomhoghi igey ịizupha phọ ọlhogh otu phọ mị rasereghi ghan bọ rạraar phọ.’”

31 Kụ ọdi ạḅilhe ạngo bịdi ọnhon ọghaaph ọmaaniom, mọ: “Ọmhar k’ạke phọ ạkigh ekpo ạ mọstạd dị oye ạsighe ạghi ạzuph ozo ọdi. 32 Ọkar agey, ẹdi kụ ighom epu ikpo ịnhon ịizupha, kụolo mem lọ aḍum, rạbugh ghan ni kapu ịnhon ịizupha kaḍighi oreeny, pịdi ịnhun phọ ẹki edoghoḍi ruutu sịphe ịla phọ ọdi.”

33 Kụ ọdi ạḅilhe ạngo bịdi ọnhon ọghaaph ọmaaniom, mọ: “Kọsighe Ọmhar k’ạke phọ ọmaaniom yist dị ạnhir ạsighe aaḅughonhom ịraar ogbogh ọtoom ạ flạwạ tụtu oomo ạ flạwạ phọ aru.”

34 A Jizọs ạsighe rạghaaph ọmaaniom kụ ạtughemhiom ḍita awe phọ oomo ạraraar phọ ịphen phọ. Ọkar agey, ọdi ọ́tughemhi ghan bịdi ịyaar dị úḍighinhom ọghaaph ọmaaniom, 35 ịphen phọ imite omhunhenhi ịpe oyil phọ ạghaaph bọ mọ: “Mị kạtughemhiom ghan rạghaaph ọmaaniom; mị kagbeelhom rạraar dị ạaghi k’emhiighom* aḅirinhi phọ.”

36 Ọdi rọḅenhi ḍita awe phọ mọ oghelheghu, kụ aḍigh olhoghi otu. Kụ ạbumatuan phọ ọdi oru ọteeny nyọdi kụ ọḅem mọ: “Ụḅenhi iyoor ẹmhu ọghaaph ọmaaniom ịkaraph ịizupha phọ ọzuph bọ ẹpe ozo phọ.” 37 Kụ ọdi ạphagharanhaan bịdi mọ: Ọony phọ oye kụ ạzuph bọ igey ịizupha phọ; 38 aḅirinhi phọ kụ ozo phọ. Ạnmuny Ọmhar phọ kụ igey ịizupha phọ, kụolo ạnmuny ọkaraph oye phọ kụ ịkaraph ịizupha phọ, 39 kụ ạmulhogh ḍien phọ ạzuph bọ ịkaraph ịizupha phọ pọ Eru phọ. Amem ibugha phọ pọ eekunha aḅirinhi phọ,* kụ ạbuo ibugha phọ pọ ạruukpaany phọ. 40 Esi ịduon phọ, ịduon orool bọ ịkaraph ịizupha phọ oguom nịan kụ ịdi kẹtol aani eekunha aḅirinhi phọ.* 41 Ọony phọ oye katom ni rụukpaany phọ odị, kụ ọsigheogh sịphe Ọmhar phọ ọdi tọrobo ịyaar dị rẹkom ghan okpetaan r’abusoroghuom iilhogh, 42 kụ otoph osumeeny olhoghi egu ạnian. Sịphe phọ kụ ẹdi bịdi kọtol omoghi yogh ọḅilhe ọkirigha rạlhaal ạbidi. 43 Mem mọ ọpo phọ ạbuo elhiom eḍighinhom ịyaar phọ kọmu ni ịdipho erumuḍio phọ sịphe Ọmhar Ọde phọ ạbidi. Ọlo ạmhoogh reḅeri ạnhaghan.

44 “Kọsighe Ọmhar k’ạke phọ ọmaaniom ephua dị ạaghi ude, dị oye ạghi ạmhiin kụ ạsighe ạaghi aani; kụ loor esi ibo phọ ọdi, ạghi aalhaghi oomo ạraraar dị ọdi ạmhoogh aghoom de phọ ạḍiphe phọ.

45 “Ḅịlhe kẹn kọsighe Ọmhar k’ạke phọ ọmaaniom omuul ḍighi dị rạwa ghan ịma ikpo ẹbe. 46 Ọdi rọmhiin ekpo ẹbe dị ẹmhan mạar iboom, kụ ạghi aagborion aalhaghi oomo ạraraar dị ọdi ạmhoogh aghoom ekpo ẹbe phọ.

47 “Ḅịlhe kẹn kọsighe Ọmhar k’ạke phọ ọmaaniom ọodoony ọseki dị olher* ọphiiny ạbazi kụ ọdo kịrokiro ina emheel. 48 Remuza, kụ ọkpaaghi ophunhe ạnyu ade, ọrol ude, kụ ọson ịpe ẹnhighe bọ odoghoḍi riisi, kụ oroḅolhoghi ịpe ị́nighe bọ. 49 Ịpe kụ ịdi kẹtol aani eekunha aḅirinhi phọ.* Ạruukpaany phọ kọki ni ọgbarion bụkaraph phọ igbo ạbuo elhiom eḍighinhom ịyaar phọ 50 kụ otoph osumeeny olhoghi egu ạnian. Sịphe phọ kụ ẹdi ḅidi kọtol omoghi yogh ọḅilhe ọkirigha rạlhaal ạbidi.

51 “Nyinha ẹnaghanhan ni ẹmhu oomo ạraraar phọ ịphen phọ ḍụghum?” Kụ bịdi ọphagharanhaan nyọdi mọ: “Ii.” 52 Kụ ọdi ạḅenhi bịdi mọ: “Eru ịdipho, pọ tọrobo ọtughemhia dị mọtughemhi ịlo Ọmhar k’ạke phọ ạkigh oye, ọde otu, dị ramiteoghom ghan imhoom r’igbaany ạraraar sịphe osoph aruphua phọ ọdi.”

53 A Jizọs rọmhan ọtughemhiom ạbidi rạghaaph ọmaaniom mọ ịphen phọ, kụ ạḅua ẹpe phọ. 54 Ọdi rosi ẹmha odị, kụ amhiigh ọtughemhi awe phọ ẹpe obughotu phọ ạbidi, kụ ịphen phọ iḍighi ni iikia esi awe phọ kụ ọḅem ghan mo: “Oye phọ ọphon phọ ạghi ẹghen kụ ạmhoogh bọ ọsu olhoghi phọ ọphon phọ r’ịikpo oḍighinhom ịiḍaany phọ ịphen phọ? 55 Ọphon phọ ḍịen kọ́ony ọkaam ạmaka phọ? A Meri ḍịen kụ kónhiin phọ ọdi, ḅịlhe a Jems, ra Josẹf, rạ Sạịmọn ra Judas kụ kábumor phọ ọdi? 56 Oomo abumaranhi phọ ọdi, kụ úlo ghan bọ ẹphen r’ayira? Ạkar ạghi ẹghen kụ ạmhoogh bọ olhegheri ịyaar r’ịikpo phọ ịphen phọ?” 57 Kụ ịphen phọ iḍighi ni ịdi bịdi ụ́moogh omheeraam ụki esi ọdi.* Kụolo a Jizọs ạḅenhi bịdi mọ: “Oyil rakuan ghan ni ịnhon arikpisi emuton sịphe ẹmha phọ ọdi r’olhoghi otu phọ odị.” 58 Kụ loor esi ẹ́moogh omheeraam mọ ạbidi, ọdi óḍighi ịbadi ịiḍaany ẹpe phọ.