Ọdaphan Luk

24 Kụ ḍịḅel aḍio awiki phọ, bịdi uḅon ni ọghi ẹpe oḍi phọ, r’ạraraar ịma eḍu phọ bịdi ookolhobian bọ. 2 Kụolo bịdi ụmhiin dị mookilhemhi ḍighiigh phọ opukiom bọ ọnhu oḍi phọ ọsighe, 3 kụ bịdi oḍigh bọ sịphe oḍi phọ, ụ́miin ḍizu Uwo Ẹmhoogh phọ Jizọs. 4 Bịdi odi ni rookia ịlo ịphen phọ, bịn ịyal awe dị ọkpolhoghian rụsuoma dị rẹmu ọmheera pạ bịdi odi bọ. 5 Aruugu asiph ni nmạriir phọ kụ ozumeri rụmhu ạbidi ude, kụ awe phọ ọḅenhi bịdi mọ: “Uḍighi ika kụ nyinha rẹwa bọ oye dị odi r’ighuḍum igbo ạbudi momhuughu? 6 Ọdi ólho sịen, ịdi eḍighi bọ moḅeton nyọdi esi aḍuugh. Ịitughian ịpe ọdi ịḅenhi bọ inyinha mem mọ ạrol bọ ẹpe Gạlili, 7 mọ kọḅogh ni Ọony phọ oye ọlogh ḍịghaagh abuḍighinhom ịkaraph kụ ọkan nyọdi loor oreeny okiigh, kụ aḅetenhu esi aḍuugh omhunhenhiom ịraar aḍughul otu phọ.” 8 Kụ bịdi ọotughian ikpo ọnhu phọ ọdi, 9 kụ ọḅua ẹpe oḍi phọ ọghi ọḅenhi Ḍioph r’ Oniin phọ r’ạbueripho ạbumatuan phọ oomo ạraraar phọ ịphen phọ. 10 Bụphe ọghi bọ ẹpe oḍi phọ pọ a Meri Mạgdạlin, ra Joạnạ, ḅịlhe ra Meri onhiin phọ a Jems. Kụ ạbueripho ạnmariir phọ ọdaph bọ bịdi oru ụghaaph aani ni ịphen phọ ọḅenhi butelhedom mọ. 11 Kụolo bịdi úmeeraam, ụutughian ghan mọ ịpe ạnmariir phọ ọḅenhi bọ bịdi ị́moogh ẹmhu.

12 Kụolo a Pita aḅetenhu ni aghiil ạghi ẹpe oḍi phọ, aḅiriman aḅiilha, kụ ạmhiin iidugha arukpe phọ bịn. Kụ ọdi ạḅua, kụ ạkparagha ghan ọotughian ịyaar phọ emite bọ.

13 Kụolo ḍio phọ ạḍiphe phọ, ịyal ạbumatuan urelhe ni rọki ẹmha dị oghol mọ Ẹmeọs, dị ọḍua Jeruselem kụ rọki, rẹki ni ọmhan oḍual ạ mạịl,* 14 kụ ọghaaph ghan sịphe igbo phọ ạbidi ịlo oomo ịphen memite bọ.

15 Bịdi rọkaaph ni ịlo ạraraar phọ ịphen phọ, kụ a Jizọs r’aloor aru ạteeny bịdi kụ amhiigh orelhean ạbidi, 16 kụolo bịdi útue ụlogh nyọdi elhegh. 17 Kụ ọdi apuru bịdi mọ: “Ọghaaph phọ ọphon phọ nyinha ẹghaaph bọ ịduon retelheom ọghen ọghaaph?” Kụ bịdi ọmheera zim okiriri yogh. 18 Kụ oniin ọnyo ạbidi dị oghol mọ a Kliopạs ạphagharanhaan nyọdi mọ: “Nạ ooruen dị arugh Jeruselem kụ nạ ólhegheri bọ* rạraar phọ memiteghu bọ ẹpe phọ siḍughul otu phọ ịphen phọ?” 19 Kụ ọdi apuru bịdi mọ: “Ịghen ạraraar?” Kụ bịdi ọḅenhi nyọdi mọ: “Rạraar phọ egbolhomaam bọ Jizọs ọpo ạ Nạzạrẹt phọ, ọpo aḍeenhaan bọ mọ ọdi oyil dị ạmhoogh ịikpo esi ạraraar phọ ọdi aḍighi ghan bọ ạḅilhe ạghaaph ghisigh Ẹnhaan r’aghisigh oomo awe phọ; 20 r’ịpe aruwo ẹmhu ạbupinyon rịkia phọ r’ạbutooghia phọ ọḅogh bọ nyọdi ọngo mọ osophonhaan ọoruen aḍuugh, kụ ọkan bọ nyọdi loor oreeny. 21 Ọbo yoor uḍuom ghan olhoghi mọ oye phọ ọphon phọ kụ ọpo kạpel bọ Izrẹl. Kụ ọḅaram ịsien, ọphon phọ omhunhenhiom ịraar aḍughul otu egbi k’amem mọ ạraraar phọ ịphen phọ emiteghu bọ. 22 Ḅịlhe kẹn, buniin ạnmariir igbo ayoor ụghaaph ni rạraar dị eḍigh ḍiigu esi ayoor, loor esi dị bịdi uḅon ni ọghi ẹpe oḍi phọ 23 kụolo ụ́miin ḍizu phọ ọdi, kụ oru ọḅem kẹn mọ bịdi ụmhiin rụukpaany dị ọḅenhi bụno mọ ọdi odi ni r’ighuḍum. 24 Kụ buniin ạbuphe ọrol bọ r’ayoor onyeenhe ẹpe oḍi phọ, kụ ọmhiin dị oḍi phọ odi ịdipho ạnmariir phọ ọghaaph bọ, kụolo ụ́miin nyọdi.”

25 Kụ ọdi ạḅenhi bịdi mọ: “We dị olhoghi ụ́su ḅịlhe roobinya omheeraam oomo ịpe ariil phọ mọghaaph bọ! 26 Ị́moghi ḍịen mọ ạ Krạịst phọ ạmhiinhom rạraar phọ ịphen phọ pịdi ọngo nyọdi eghuan phọ ẹkpe bọ ọngo ọdi ḍụghum?” 27 Kụ ọdi amhiighom ịge phọ a Mozis r’oomo ịge Ariil phọ, ọgba ọḅenhi ạbidi ẹmhu oomo ạraraar phọ Ịge Iigbia phọ ẹghaaph bọ ịlo ọdi.

28 Eekunha phọ, bịdi rotuman ẹmha phọ bịdi rọki bọ, kụ ọdi aḍighi mụdi ọdi rạkiom ni ghisigh erelhe phọ ọdi. 29 Kụolo bịdi ụuḅereghian nyọdi mọ kụ́kiom ghisigh, kụ ọḅem mọ: “Tọl r’ayoor, loor esi dị amem mẹghi kụ mọony amem kekpereghian.” Esi ịduon phọ ọdi aḍigh ni ạrol r’ạbidi. 30 Ịduon ọdi r’ạbidi rolean bọ, kụ ọdi ạsighe ạ brẹd, ạaḅereghi,* kụ ạparion amhiigh ọngo ạbidi. 31 Bịdi rọmhiin ịphen phọ kụ ariḍien phọ ạbidi ẹḅaranhu kụ ọlhogh nyọdi elhegh kụ ọdi aphe sịphe igbo phọ ạbidi. 32 Kụ oniin ạḅenhi nyọniin mọ: “Iikia ílo ạraraar phọ ọdi ụḅenhi bọ iyira ẹpe eten phọ etir bọ rokpom ayira ịdipho, mem mọ ọdi rạgba bọ kaagholhomhi ẹmhu ạraraar phọ edi bọ sịphe Ịge Iigbia phọ kụḅenhi iyira!” 33 Kụ bịdi oḅerenhu mem mem mọ oḅula Jeruselem, kụ ọmhiin Ḍioph r’ Oniin phọ r’ạbuphe ookpomhoghan bọ r’ạbidi, 34 kụ a Ḍioph r’ Oniin phọ r’awe phọ ọḅenhi bịdi mọ: “Ọkar agey moḅeton Uwo Ẹmhoogh phọ esi aḍuugh, ọdi amitenhaan Sạịmọn!” 35 Kụ bịdi ọghaaph aani ịlo ạraraar phọ emite bọ ẹpe eten phọ r’ịpe bịdi ọlhogh bọ nyọdi elhegh mem mọ ọdi ạparion bọ ạ brẹd phọ.

36 Bịdi odi ni rọkaaph rạraar phọ ịphen phọ kụ ọdi r’aloor amite sịphe igbo phọ ạbidi kụ ạḅenhi bịdi mọ: “Ẹepho ịrolhonhaan inyinha.” 37 Kụolo loor esi unmam mọ r’aruugu phọ rasiph bọ bịdi, bịdi ụutughian ghan mọ bụno ọmiin uwaloor. 38 Kụ ọdi ạḅenhi bịdi mọ: “Uḍighi ika kụ nyinha reekpereghaany bọ? Eeghe kụ iḍighi kụ iikia meḍigh bọ ilhoghi anyinha? 39 Ipogh rạghaagh phọ r’aruwol phọ ạmhi, bịn nyinha kẹmiin ni mọ ạmhi phọ ni; ịḅogh ịmhi kụ ẹmhiin, uwaloor rạ́moogh ghan iphulhupul r’ịḅarara ịduon nyinha ẹmhiin bọ ni mọ mị ạmoogh.” 40 Ọdi rọḅem ịduon phọ, kụ aḍeenhaan bịdi rạghaagh phọ r’aruwol phọ ọdi. 41 Kụolo bịdi úmeeraam ịpe bịdi rọmiin bọ loor esi iboom ibo r’iikia, kụ ọdi apuru bịdi mọ: “Nyinha ẹmoogh ni ịyaar olhe pạ?” 42 Kụ bịdi ọngo nyọdi ena dị ọphoghi, 43 kụ ọdi ạsighe ạany ghisigh ạbidi.

44 Kụ ọdi ạḅenhi bịdi mọ: “Ịphen kụ ạraraar phọ mị ịḅenhi bọ inyinha mem mọ mị odi bọ ni r’anyinha, mọ oomo ịpe ọge bọ ịlo ạmhi sịphe Olhogh phọ a Mozis r’ịge Ariil phọ r’ Ạsuor phọ ẹmoogh omhunhughan.” 45 Kụ ọdi ạlhoghonhaan bịdi ḍịghaagh ọkuamhi ọnhaghanhan ẹmhu Ịge Iigbia phọ, 46 kụ ọdi ạḅenhi bịdi mọ, “Ịge Iigbia phọ ẹkaaph mọ: ạ Krạịst phọ kạmiinhom ni, kụ aḅetenhu esi aḍuugh omhunhenhiom ịraar aḍughul otu phọ, 47 kụ okol ghan ḍien phọ ọdi ogbeelhom ọḅenhi we oomo areelhe phọ mọ okiton, pịdi ọsar ịkaraph ạbidi ọbilhenhaan, kụ komiigh Jeruselem. 48 Nyinha kụ kẹkaaph ịlo ạraraar phọ ịphen phọ ẹḅenhi we. 49 Kụ ịmiin! mị kiruom ni inyinha ịyaar phọ Ọde phọ ạmhi aguanhaan bọ. Kụolo, ịtol sịen ẹmha phọ tụtu ịikpo ẹḍua ẹpe k’ạke eru isoorom inyinha.”

50 Kụ ọdi ạpham bịdi ạḍuanham sịphe ẹmha phọ asiemhi k’ẹpe Bẹtạni, kụ aphoophe rạghaagh ọdi ạseph bịdi. 51 Ọdi odi ni rạseph bịdi, kụ Ẹnhaan ạgbatan nyọdi esi ạbidi ạsighe agheelhom k’ạke. 52 Kụ bịdi okpuḍian ọngo nyọdi kụ oḅula Jeruselem r’iboom ibo. 53 Kụ bịdi ụghi ghan ni sịphe otu ịiḅereghi phọ oomo amem, oboom Ẹnhaan.