Ọdaphan Ịpe ạ Mạk Ạge Bọ

7 Kụ ạbuo ạ Fạrisi phọ r’abuniin ạbutughemhia Olhogh phọ dị ọḅua ẹpe Jeruselem oru ukoom ni Jizọs. 2 Kụ bịdi ọmhiin buniin ạbumatuan phọ ọdi dị roleom ghan eḍien rạghaagh dị ị́ḅaal, ịduon phọ pọ, rạghaagh dị úutolha.* 3 (Loor esi dị ạbuo ạ Fạrisi phọ r’oomo ạbuo a Ju phọ róle ghan eḍien dị ụ́pur uutolha rạghaagh usiemhi ẹekara ạḍighaagh ạbidi. Bịdi olom okeelhom eḍighinhom ịyaar awe iḍiodi phọ. 4 Kụ mem dị origheel ḍighi, róle ghan eḍien tụtu ọphur ootolha loor ạbidi. Ịnhon ịbadi eḍighinhom ạraraar edi ni dị ọḅogh ọngo bịdi dị bịdi olhom ogheelhom, ịdipho oḍinyighi ạmuum sịmogo, r’ịnyoki r’ạraraar dị ọlhemhom ọgiata.) 5 Kụ ạbuo ạ Fạrisi phọ ạbuen phọ r’ạbutughemhia Olhogh phọ opuru nyọdi mọ: “Uḍighi ika kụ ạbumatuan phọ ạna rọ́daph ghan bọ eḍighinhom ịyaar awe iḍiodi phọ, kụ roleom ghan bọ eḍien rạghaagh dị ị́ḅaal?” 6 Kụ ọdi ạḅenhi bịdi mọ: “Ạịzạyạ ạkar kụ ịmhiinhaan inyinha awe ịyal arisigh phọ ịmiin mem mọ ạge bọ mọ: ‘Awe phọ ạbuen phọ opu bịn rọkaaph ghan mọ bụno ụlhogh ịmhi eegu, kụolo arokpom mọ ạbidi ịkelhan ni ịmhi iboom. 7 Iiseeny phọ bịdi ruuseeny ghan bọ ịmhi eḍighi ni oopho bịn, loor esi dị ạraraar phọ bịdi rọtughemhi ghan bọ eḍighi ịto awe.’ 8 Nyinha ẹgunhom ịto phọ Ẹnhaan kụ elom ekeelhom eḍighinhom ịyaar awe.”

9 Kụ ọdi ạḅilhe ạḅenhi bịdi mọ: “Nyinha rẹgunhom ghan ịto phọ Ẹnhaan r’ikeḍi pịdi nyinha ẹdaph ghan eḍighinhom ịyaar phọ anyinha. 10 Esi ọmaam, a Mozis ạḅem mọ, ‘Lọgh eegu ọde r’onhiin ạna,’ ḅịlhe mọ, ‘Ikiigh ọlo aatuuny* ọde ọbobo onhiin ọdi.’ 11 Kụolo nyinha rẹḅem ghan mọ, ‘Eḍighi mạar dị oye ạḅenhi ọde ọbobo onhiin ọdi mọ: “Ạraraar phọ mị mụsighe bọ ạlhoghonhaan nyịnha ḍịghaagh eḍighi kọbạn (ịduon phọ pọ, inmo dị mọḅogh ọngo Ẹnhaan),”’ 12 pọ nyinha rémeera mụn mọ ọdi aḍighinhaan ghạlhamo r’eniin ịyaar ọde ọdi ọbobo onhiin ọdi. 13 Esi ịduon phọ, nyinha meḍighi ịdi ekpo ọnhu phọ Ẹnhaan ị́moogh mụn mạar oḍighinhom loor eḍighinhom ịyaar phọ anyinha nyinha mẹḅogh bọ ẹngo bụnhon. Kụ ịnhon ịbadi ạraraar edi ni dị ẹrol ịduon phọ dị nyinha ẹḅilhe reḍighi ghan.” 14 Kụ ọdi ạḅilhe ạmhagh ḍita awe phọ kụ ạḅenhi mọ: “Ịnaghan ịphen mị kịḅenhi bọ inyinha, ẹḅilhe ẹnhaghanhan ẹmhu phọ. 15 Ịyaar ílo dị keḍigh olhoghi aloor oye kụ eḍighi ịdi oye phọ kạ́ḅaal; kụolo ẹpe ẹḍua bọ olhoghi aloor phọ emite kụ reḍighi ghan ịdi oye phọ kạ́ḅaal.” 16* ——

17 Ọdi rọwilhe ḍita awe phọ roḍigh olhoghi otu, kụ ạbumatuan phọ ọdi omhiigh opuru ọdi sipuru ịlo ọghaaph ọmaanhiom mọ. 18 Kụ ọdi ạḅenhi bịdi mọ: “Nyinha phọ kẹn ị́naghanhan aani ịdipho ạbueripho? Nyinha ílegheri mọ ịyaar ílo dị keḍigh olhoghi aloor oye kụ eḍighi ịdi oye phọ kạ́ḅaal, 19 loor esi dị réḍigh ghan sịphe ekpom mọ, kụolo reḍigh ghan sịphe ọkuruḅaka phọ kụ ọni otoph?” Esi ọghaaph ịphen phọ, ọdi agbeelhom mọ oomo ariiḍien ẹḅaal li. 20 Kụ ọdi ạḅilhe ạḅem mọ: “Ịyaar dị ẹḍua olhoghi aloor phọ kụ emite kụ reḍighi ghan ịdi oye phọ kạ́ḅaal. 21 Loor esi dị sịphe olhoghi ekpom oye phọ kụ ịdi ịkaraph igbiighi rẹḍua ghan kemite, kụ etorori ẹlogh ọrolhan esi dị ụ́ḅaal,* imhi, ọko enu, 22 olhe ẹmha, ekpooko, sịpioghom, iigbegheḍiom, rọozo umugholoor,* ẹḍim,* ọopu aḍien Ẹnhaan, ophoophe aloor, r’elologhi. 23 Oomo ịkaraph ạraraar phọ ịphen phọ rẹḍua ghan olhoghi kụ emite, kụ eḍighi ịdi oye phọ kạ́ḅaal.”

24 A Jizọs rọḅua sịphe phọ kụ ạghi rokool ạ Tạyạ rạ Sạịdọn. Ọdi aḍigh ni oniin otu kụ ạwa mọ oye kúlegheri kụolo awe ulhegheri ni. 25 Mem mem mọ bịn, ạnhir dị ọkaraph uwaloor rạaḅaghamhi ọbam ọnyanhi ọdi ạnhaghan ni ịlo a Jizọs kụ aru akpuḍian ghisigh ọdi. 26 Ạnhir phọ ọlo a Gris, dị ọmhar ẹpe Finisia, eelhe a Siria; kụ ạaḅereghian ghan nyọdi mọ aphorogh ọkaraph uwaloor phọ loor ọnyanhi phọ ọno. 27 Kụ ọdi ạḅenhi ạnhir phọ mọ: “Eḍien phọ ẹphur ẹpher ịbam ạnmuny phọ, loor esi dị ị́kpeanhaan dị kọsighe eḍien ịbam ạnmuny phọ kụ otebenhaan nmụny asuogh.” 28 Kụolo ạnhir phọ ạphagharanhaan nyọdi mọ: “Ii, oye phọ, kụolo ghạlhamo r’ạnmuny asuogh phọ edi bọ ẹeḍian ịdaabili phọ bịn rele ghan ni eḍien ịbam ạnmuny phọ dị emheel.” 29 Kụ ọdi ạḅenhi ạnhir phọ mọ: “Loor ịphen nạ mạghaaph bọ, keel; ọkaraph uwaloor phọ mạḅua loor ọnyanhi phọ ạna.” 30 Kụ ạnhir phọ agheel olhoghi otu kụ ạmhiin ọbumoony phọ dị ạmhinha ẹmhinha, dị ọkaraph uwaloor phọ mạḅua.

31 A Jizọs rọḅua ekool phọ ạ Tạyạ, kụ aago Sạịdọn r’ekool phọ a Dikạpọlis,* ạghi Ọphiiny Ạbazi phọ ạ Gạlili. 32 Kụ awe ọsighe oye dị ạḅaaghaph dị rạ́ḅa ghan agey oruom nyọdi, kụ ọoḅereghian mọ ạsighe ḍịghaagh ọdi ạḅamham oye phọ. 33 Kụ ọdi ạpham oye phọ sịphe aḍita awe phọ odi bọ atenhom ọgbal. Kụ ạsighe sụnhugh ọdi ạlhogh reḅeri oye phọ, rọsin ịghor kụ ạḅogh nem oye phọ. 34 Kụ ọdi aphogh ẹpe k’ạke, kụ aseere ekpom, kụ akiton aphogh oye phọ kụ ạḅem mọ: “Ẹfạtạ,” ịduon phọ pọ, “Iiphoghonhu.” 35 Kụ areḅeri phọ ọdi eephoghonhu, kụ ạmhoogh eekonhom esi ịiḅaghamhi ạḍiaḅa phọ ọdi, bịn amhiigh ọḅa agey. 36 Kụ ọdi ạphur bịdi rụru mọ kụ́ḅenhi oye, kụolo awe phọ ụkuamhi ghụn bịn ọghaaph ghan ịpe ọdi aḍighi bọ, etigheri ịphur ạruru phọ ọdi. 37 Ịphen phọ ịkar kụ eḍigh ḍiigu esi awe phọ, kụ ọḅem mọ: “Ọdi maḍighi oomo ạraraar agey. Ọdi raḍighi ghan kẹn ịdi bụphe ọḅaaghaph bọ kọnaghan ḅịlhe ạbuphe rọ́ḅa ghan bọ kọḅa.”