Ọdaphan Ịpe ạ Mạtiu Ạge Bọ

26 A Jizọs rọghaaph oomo ạraraar phọ ịphen phọ rọmhan, kụ ạḅenhi bụmatuan phọ ọdi mọ: 2 “Nyinha elegheri ni mọ ịyal aḍughul otu kụ isugha ọteeny Ẹyaal Ọphel Otenhe phọ, ḅịlhe mọ kọḅogh ni Ọony phọ oye ọlogh ḍịghaagh awe mọ ọkan loor oreeny oghiigh.”

3 Kụ aruwo ẹmhu ạbupinyon rịkia phọ r’ikumor awe phọ ookpomhoghan ogiga ogbogh ọpinyon rịkia phọ, oghol bọ mọ a Keyạfạs, 4 kụ bịdi oḅian ọsighe ikeḍi osiphom a Jizọs kụ oghiigh ọdi. 5 Kụolo, bịdi ụḅem ghan mọ: “Kíḍighi sịen ẹyaal phọ, ọbo kẹkom ghan bọ ịdi awe phọ kotuphe.”

6 Mem dị a Jizọs odi Bẹtạni kạ Sạịmọn ọpo ạmhoogh ghan bọ ẹzegh ọku ufe phọ, 7 oniin ạnhir aru ni ạteeny nyọdi r’eeku ạlạbạstạ* dị elo ịma eḍu dị ẹmhan ḍighi edi, kụ amhiigh ooduom elo phọ ẹmhu ọdi sịphe ọdi rale bọ eḍien phọ. 8 Ạbumatuan phọ ọmhiin bọ ịphen phọ, ụghagh ni olhoghi kụ ọḅem mọ: “Uḍighi ika kụ ạnhir phọ ọphon phọ rapiemhi bọ ịdipho elo phọ? 9 Mutue ni aal elo phọ ẹphen phọ iboom ikpoki ọsighe ọghi ọngo rukulhom mọ.” 10 A Jizọs alhegheri bọ ni ịpe bịdi rọkaaph bọ ạḅenhi bịdi mọ: “Uḍighi ika kụ nyinha rẹwa bọ ọngo ịiḅaghamhi ạnhir phọ? Ọdi uḍighinhaan ịmhi ịma ịyaar. 11 Arukulhom mọ kọtol ghan ni r’anyinha oomo amem, kụolo mị kạ́tol r’anyinha oomo amem. 12 Ọdi aaduom loor phọ ạmhi elo ịma eḍu phọ ẹphen phọ ookolhobian ạmhi ịlo amaḍi. 13 Mị ạkar rịḅenhi ghan inyinha mọ, tọrobo ekpisi sịen oomo aḅirinhi phọ dị ogbeelhom iiḅi ịinhaghan phọ ịphen phọ, kọkaaph ghan ni ịphen ạnhir phọ ọphon phọ aḍighi bọ ọotughianham ọdi.”

14 Kụ oniin sịphe aḌioph r’Ịyal phọ, ọpo oghol bọ mọ a Judas Iskạrịọt, ạghi ạteeny ruwo ẹmhu ạbupinyon rịkia phọ 15 kụ ạḅem mọ: “Mị aalha inyinha nyọdi nyinha kịngo ịmhi eeghe?” Kụ bịdi ọḅem mọ bụno kọngo nyọdi 30 ipoḍi a silva. 16 Emhiigh mem mọ ọpo phọ kụ rẹki, ọdi ạwa ghan ịma eepoogh aal ọdi.

17 Ẹḅel aḍio Ẹyaal Ạ Brẹd Phọ Yist Rọ́logh Ghan Bọ, ạbumatuan phọ uru ni ọteeny Jizọs, kụ opuru mọ: “Ḍighen kụ ẹdi nạ rạwa mọ yoor uukolhobian dị nạ kạtol ale Ẹyaal Ọphel Otenhe phọ?” 18 Kụ ọdi mọ: “Ịki ẹpe ẹmha phọ ẹteeny Ọpeer ẹḅenhi mọ, ‘Ọtughemhia phọ ạḅem mọ: “Amem mọ ụmaanhaan bọ ịmhi metuman; Mị r’ạbumatuan phọ ạmhi kọtol k’ạna kụ ole Ẹyaal Ọphel Otenhe phọ.”’” 19 Esi ịduon phọ, ạbumatuan phọ uḍighi ni ịpe a Jizọs ạḅenhi bọ bịdi kụ ookolhobian ịlo Ẹyaal Ọphel Otenhe phọ.

20 Adulhe reghul, kụ ọdi ra 12 ạbumatuan phọ ọdi ọrol ịdaabili. 21 Bịdi odi role eḍien, kụ ọdi ạḅem mọ: “Mị ạkar rịḅenhi ghan inyinha mọ, oniin ọnyo anyinha kaal li ịmhi.” 22 Ịphen phọ iḍighi ni ịdi bịdi omheelhom oboom ọto, kụ tọrobo ọnyo ạbidi amhiigh opuru ọdi mọ: “Uwo Ẹmhoogh, tọ kạ́mhi o, mị ni?” 23 Kụ ọdi mọ: “Ọpo rạlogh bọ ḍịghaagh ọdi sịen ạgbagba phọ r’ạmhi kụ kaal bọ ịmhi. 24 Etu ni ịne mọ Ọony phọ oye kamugh ni ịdipho ọge bọ ni ịlo ọdi, kụolo ịmhinhimhiin kụ kẹtolhonhaan oye phọ ọpo kabool bọ Ọony phọ oye! Mịnighe ghụn dị ọbo oye phọ ọpo phọ mụ́mar rọmhar.” 25 Kụ a Judas, ọpo rạwa bọ aal ọdi, ạḅem mọ: “Rạbạị, tọ kạ́mhi o, mị ni?” kụ a Jizọs ạḅenhi nyọdi mọ: “Nạ r’aloor mạghaaph.”

26 Bịdi odi ni role, kụ a Jizọs ạsighe ạ brẹd, rọngo Ẹnhaan ḍịseph, kụ ạparion ạngo bụmatuan phọ ọdi, kụ ạḅem mọ, “Itiin, elhe. Ạ brẹd phọ ọphon phọ ạmeera esi aḍizu phọ ạmhi.” 27 Kụ ọdi ạsighe mọgo, ạngo Ẹnhaan ḍịseph kụ ạngo bịdi, kụ ạḅem mọ: “Oomo anyinha ịpughol, 28 loor esi dị amiim mọ ạmuen phọ ạmeera esi ‘ịḅaal phọ ạmhi ịlo ịyo phọ,’ kọtuan bọ ịbadi kụ ozu pịdi ọsar ịkaraph ạbidi ọbilhenhaan. 29 Kụolo mị rịḅenhi ghan inyinha mọ: Mị kạ́pughol mụn ni bịn miim mọ ạmuen phọ tụtu ẹteeny ḍio phọ mị r’anyinha kẹpughol bọ mumhoom amiim ẹpe Ọmhar Ọde phọ ạmhi.” 30 Eekunha phọ, bịdi rọmhoor roboom Ẹnhaan kụ omite ọghi ẹpe Ẹeḅaraph phọ Olivs.

31 Kụ a Jizọs ạḅenhi bịdi mọ: “Ḍughul phọ ạḍien phọ oomo phọ anyinha kekpetaan ni emeel loor ịpe kimitenhaan bọ ịmhi, ịdi eḍighi bọ ọge ni sịphe Ịge Iigbia phọ mọ: ‘Mị kazuom ni opoghom mọ kụ aḍita iyool ịga phọ ẹwalhalha.’ 32 Kụolo Ẹnhaan ruḅeton ịmhi esi aḍuugh, mị kịphur ri inyinha aḍiemhi ghan ẹpe Gạlili.” 33 Kụolo a Pita ạḅenhi nyọdi mọ: “Ghạlhamo oomo ạbueripho ukpetaan ni omhelheghu loor ịpe kemitenhaan bọ nyịnha, mị kákpetaan ni bịn!” 34 Kụ a Jizọs ạḅenhi nyọdi mọ: “Mị ạkar rạḅenhi ghan nyịnha mọ, dulhe phọ ạḍien phọ tụtu ạkenhegh rạlaay nạ kụpharanhaan ni ịmhi ịraar amem.” 35 Kụ a Pita ạḅenhi nyọdi mọ: “Ghạlhamo ịma mọ mị umugh r’ạna, mị nyịnha kạ́pharanhaan ni bịn.” Kụ oomo ạbueripho ạbumatuan phọ ọḅem aani iginha phọ.

36 Kụ a Jizọs r’ạbumatuan phọ ọdi oru osi esi dị oghol mọ ạ Gẹtsẹmạni, kụ ọdi ạḅenhi bịdi mọ: “Ịtol ude sịen, mị ụki ẹpe ụuḅereghi.” 37 Kụ ọdi ạpham Pita r’ịyal phọ ạnmuny phọ ạ Zẹbẹdi ạghimhom, kụ amheelhom oboom ọto. 38 Kụ ọdi ạḅenhi bịdi mọ: “Mị ameelhom ni oboom ọto dị rạwa oghiigh ạmhi. Ịtol sịen iḍighan ịmhi egon.” 39 Kụ ọdi arelhe ạghi ghisigh ẹnum, kụ akpuḍian azumeri ẹmhu ọdi, kụ ạaḅereghi mọ: “Ọde ạmhi, lọ edugh ni, pọ ạmogo phọ ọphon phọ utenhom ịmhi. Kụolo ogbi ạmhi kụ kúmite, ọpo ạna kụ amite.”

40 Kụ ọdi aḅula ạteeny bụmatuan phọ kụ ạmhiin dị rọnaanhi, kụ ạḅenhi Pita mọ: “Nyinha ítue iḍighan ịmhi igon ghạlhamo r’oniin ạwa? 41 Igon ghan ẹḅilhe ẹeḅereghi ghan, ọbo nyinha keḍigh ghan bọ esi ọdegh ophogh. Ọkar agey, edi ni ekpom mọ oḍighi, kụolo aloor phọ kụ idugh.” 42 Kụ ọdi ạḅilhe ạghi omhunhenhiom ịyal amem, kụ ạaḅereghi mọ: “Ọde ạmhi, eru mạar dị ạmogo phọ ọphon phọ kátue utenhom ịmhi emuton dị mị ạphugholhom, pọ ogbi phọ ạna kụ amite.” 43 Kụ ọdi ạḅilhe aḅula kụ ạmhiin dị bịdi rọnaanhi loor esi dị ạralha maḅogh riḍien ạbidi. 44 Kụ ọdi ạwilhe bịdi, ạḅilhe ạghi ạaḅereghi omhunhenhiom ịraar amem, kụ ạghaaph eniin phọ ịyaar phọ. 45 Kụ ọdi ạḅilhe aḅula ạteeny bụmatuan phọ ọdi kụ ạḅenhi bịdi mọ: “Mem mọ ạmuen ẹrol bọ ịduon kụ ẹdi nyinha rẹnaanhi kẹḅilhe ephooghian! Ịmiin! Rẹteeny mem mọ kobool bọ Ọony phọ oye ọlogh ḍịghaagh abuḍighinhom ịkaraph phọ. 46 Iḅerenhu ọḍua. Ọpo kaal bọ ịmhi matuman sịen.” 47 Ọdi odi ni rạkaaph, bịn a Judas, oniin sịphe aḌioph r’Ịyal phọ, aru r’aḍiboom aḍita awe dị ọdaph nyọdi kụ ọphamhagh rolhool ẹgham r’ạraḅam, dị aruwo ẹmhu ạbupinyon rịkia phọ r’ikumor awe phọ kụ orom.

48 Ọpo kabool bọ nyọdi ạḅenhi ni bịdi ịyaar dị kọloghom elhegh, mọ: “Ọpo mị kạkpun bọ kụ oye phọ, isiph nyọdi.” 49 Kụ ọdi ạghi ạteeny Jizọs, kụ ạḅem mọ: “Mị ạmagh ni o Rạbạị!” kụ amhiigha loor ạkpun nyọdi. 50 Kụolo a Jizọs apuru nyọdi mọ: “Mọo, nạ ụtuan eeghe kụ aru bọ?” Kụ bịdi oru osiph Jizọs. 51 Kụolo oniin ọdi ạrol aani ra Jizọs aruph ni elhool ẹgham ọdi asophom aḅeri ẹbenhe ogbogh ọpinyon rịkia phọ. 52 Kụ a Jizọs ạḅenhi nyọdi mọ: “Ḅulhemhi elhool ẹgham mọ sịphe nạ ạsighe bọ, ịdi eḍighi bọ tọrobo oye lọ akoph elhool ẹgham kamugh ḍuugh elhool ẹgham. 53 Nạ ragbi mọ mị kátue ạlom Ọde phọ ạmhi nyịidipho mọ uruom ịmhi rụukpaany dị opel 12 ọolhoogh? 54 Kụ eru mạar dị mị ạlhom, ika kụ ịdi ịpe Ịge Iigbia phọ ẹghaaph bọ mọ ịphen phọ kụ kemite kemunughan bọ?” 55 Pọ kụ amem dị a Jizọs ạḅenhi ḍita awe phọ mọ: “Mị ạkigh ọḅa kụ nyinha ẹpam bọ rolhool ẹgham r’ạraḅam etu osiphom ạmhi? Ḍio etum ḍio mị ụrol ghan ni sịphe otu ịiḅereghi phọ ạtughemhi ghan, kụ nyinha ịmhi ísiph. 56 Kụolo oomo ịphen phọ imite omhunhenhi ịpe ariil phọ ọge bọ sịphe Ịge Iigbia phọ.” Kụ oomo ạbumatuan phọ ọwilhe nyọdi osumughu.

57 Bụphe osiph bọ Jizọs ụsighe nyọdi ọghimhom ka Keyạfạs ogbogh ọpinyon rịkia phọ, ẹpe ạbutughemhia Olhogh phọ r’ikumor awe phọ ookpomhoghan bọ. 58 Kụ a Pita ạdaph ghan ni nyọdi, kụolo ạrol k’ẹpe ọmhan tụtu osi sịphe ogiga ogbogh ọpinyon rịkia phọ. Ọdi roḍigh olhoghi kụ ạrol ude r’ạrebenhe otu phọ ọmhiin ịpe kemite bọ.

59 Kụ aruwo ẹmhu ạbupinyon rịkia phọ r’oomo awe ạ Sạnhẹdrin phọ ụwa ghan ọkpe ọgba ọḅam ẹmhu a Jizọs pịdi okol okiigh nyọdi. 60 Kụolo bịdi ụ́miin ịyaar, ghạlhamo r’ịduon ịbadi awe oru bọ ni ọgbaaghi ọkpe ọḅam ẹmhu ọdi. Mọony amem bịn ịyal awe oru 61 kụ ọḅem mọ: “Oye phọ ọphon phọ ạḅem mọ, ‘Mị katue ni alereghi otu ịiḅereghi phọ Ẹnhaan kụ ạḅilhe ạlogh esi ịraar aḍughul otu.’” 62 Kụ ogbogh ọpinyon rịkia phọ aḅetenhu kụ ạḅenhi nyọdi mọ: “Nạ ọ́mhoogh aani ịyaar ọghaaph? Nạ ọ́nhaghan ịphen awe phọ ạbuen phọ rọkaaph bọ ịlo ạna?” 63 Kụolo a Jizọs aḅoorian bịn. Kụ ogbogh ọpinyon rịkia phọ ạḅenhi nyọdi mọ: “Kunya ghisigh Ẹnhaan phọ odi ghan bọ ụḅenhi iyoor mọ nạ kụ ạ Krạịst phọ, Ọony phọ Ẹnhaan!” 64 Kụ a Jizọs ạḅenhi nyọdi mọ: “Nạ r’aloor mạghaaph. Kụolo mị rịḅenhi ghan inyinha mọ: Emhiigh nyịidipho kụ rẹki, nyinha kẹmiin Ọony phọ oye dị ạrol ḍịghaagh elhiom Ọpo ạmhoogh bọ ịikpo phọ, kụ ẹmiin nyọdi ẹpe ọotu ạke phọ dị ratu.” 65 Kụ ogbogh ọpinyon rịkia phọ ạphaar ạsuoma ạnyu ọdi, kụ ạḅem mọ: “Ọdi mạapu ḍien Ẹnhaan! Yira ọḅilhe rọwa ghan we dị kọkaaph rạraar ịlo ọdi oḍighinhom eeghe? Nyinha mẹnhaghan ni ịpe ọdi mạapu bọ ḍien phọ Ẹnhaan. 66 Nyinha ẹetughian aani ika?” Kụ bịdi ọphagharanhaan mọ: “Ọdi ạkpe omhugh.” 67 Kụ bịdi ọsinoghom risigh ọdi ịghor, ọgiphogh nyọdi. Kụ bụnhon ooḅorogh nyọdi, 68 kụ ọḅem mọ: “Mọ nạ kụ ạ Krạịst phọ ni, pọ ụḅenhi iyoor oye phọ aḅor bọ nyịnha!”

69 A Pita ạtol ude ẹpe ogiga phọ, kụ oniin ẹbenhe ọnyanhi aru ạteeny nyọdi kụ ạḅem mọ: “Nạ ụdaph aani ghan ni Jizọs ọpo ạ Gạlili phọ!” 70 Kụolo ọdi ạpharanhaan ni ghisigh oomo ạbidi kụ ạḅem mọ: “Mị úlegheri ịphen nạ rạkaaph bọ.” 71 Kụ ọdi ạḅua ạghi ẹpe ọnhu aḍibuo phọ, kụ ọnhon ọnyanhi ạmhiin nyọdi kụ ạḅenhi bụphe ọrol bọ sịphe phọ mọ: “Oye phọ ọphon phọ ạrol aani ghan ni ra Jizọs ọpo ạ Nạzạrẹt phọ.” 72 Ọdi ạḅilhe ni ạpharanhaan kụ aghunya mọ: “Oye phọ ọphon phọ mị úlegheri!” 73 Mọony amem bịn awe phọ ọmheregha bọ sịphe phọ oru ọteeny Pita kụ ọḅem mọ: “Ọkar agey nạ oniin ọnyo ạbidi ni, iikia ílo, nạ rạḅa ghan ịlo awe ạ Gạlili.” 74 Kụ ọdi amhiigh ọlhoghoḍi ịnhu kụ aghunya mọ: “Mị úlegheri oye phọ ọphon phọ!” Mem mem mọ bịn ạkenhegh ạlhaay. 75 Kụ a Pita ạatughian ịpe a Jizọs ạḅem bọ mọ: “Tụtu ạkenhegh rạlaay, nạ kụpharanhaan ni ịmhi ịraar amem.” Kụ ọdi amite erugh kụ amhoghi egey phọ emoghi.