Ọdaphan Ịpe ạ Mạtiu Ạge Bọ

10 Kụ ọdi aakpomhoghi 12 ạbumatuan phọ ọdi kụ ạngo bịdi ịikpo ophoroghom ịkaraph aruwaloor, r’ookonhom oomo ọdo ạreezegh r’ariiphinha.

2 Ịphen kụ asiḍien a 12 abutelhedom mọ: Ọḅel phọ pọ, ạ Sạịmọn, ọpo ọmhagh ghan bọ mọ Pita r’ Ạndrụ umor phọ ọdi; a Jems ọony phọ ạ Zẹbẹdi rạ Jọn umor phọ ọdi; 3 a Filip rạ Bạtọlọmiu; ạ Tọmọs rạ Mạtiu ọbonyiom iisogh phọ; a Jems ọony phọ Ạlfiọs; rạ Tạdiọs; 4 ạ Sạịmọn oye oophugh phọ; ra Judas Iskạrịọt, ọpo eekunha phọ aal bọ nyọdi.

5 A Jizọs arom 12 phọ ạbuen phọ, kụ ạḅenhi mọ: “Kẹ́ki rikpisi phọ ipẹ awe areelhe phọ kụ odi bọ, kụ kéḍigh kẹn r’eniin ẹmha ạ Sạmeria; 6 kpạripe ghụn, ịki ghan ẹteeny bụo eelhe phọ Izrẹl ọghigh bọ iyool ịga dị mephe. 7 Ịduon nyinha rẹki bọ, igbeelhom ghan mọ: ‘Ọmhar k’ạke phọ matuman sịen.’ 8 Iikonhom bụlo úmoon, eḅerion bụdi momhuughu, eḍighi ịdi ạbuo ẹzegh ọku ufe kọḅaal, ephorogh ịkaraph aruwaloor. Ịngo inyinha oopho, ịngo aani oopho. 9 Kẹ́wa gol ọbobo silva ọbobo ọgiata ẹlogh sịphe okuru ikpoki phọ anyina, 10 ḅịlhe kẹ́pam okuru eḍien kụ ẹghimhom erelhe phọ, ọbobo ịyal ạrusuoma,* ọbobo rokoro, ọbobo ịkpara, ịdi eḍighi bọ ẹkpe ni ọngo eḍien oye dị rakumuan rukumuan.

11 “Tọrobo egbogh ọbobo ẹbam ẹmha lọ nyinha eḍigh, ịwa oye lọ kighuraam inyinha ạḅilhe ạnaghan dom mọ, kụ ẹrol r’ọdi tụtu nyinha ẹḍua ẹpe phọ. 12 Nyinha eḍigh otu phọ, ịmagh uwo otu phọ. 13 Eḍighi mạar dị ạbuo otu phọ ighuraam ni inyinha, pọ ẹepho phọ nyinha rẹwaanhaan bọ bịdi ẹrol r’ạbidi, kụolo eḍighi mạar dị inyinha íghuraam, pọ ẹepho phọ nyinha rẹwaanhaan bọ bịdi eḅula esi anyinha. 14 Tọrobo esi dị oye inyinha ị́sighe ọbobo ụ́naghan dom mọ anyinha, ịikpa ịisaar aruwol phọ anyinha mem dị nyinha emite otu phọ ọbobo ẹmha phọ. 15 Mị ạkar rịḅenhi ghan inyinha mọ, Ḍio Ịiruen phọ ạraraar kedughanhaan ni Sọdọm ra Gomọrạ epu ẹmha phọ ẹpe phọ.

16 “Ịmiin! Mị rirom inyinha mọ ịki ịdipho iyool ịga dị edi igbo areephe ạno; esi ịduon phọ ịsu olhoghi ịdipho ạrakaraph ạraraar, kụolo ịdipho arukuru ghọzo kéḍighi we iikelheghian. 17 Igonha loor anyinha, ịdi eḍighi bọ awe kịsighe ni inyinha ẹki ruutu ịiruen kụ ịgurogh inyinha ẹpe arubughotu phọ ạbidi. 18 Kụ bịdi kokol li ẹmhu ạmhi ịmheremhi inyinha ghisigh abupoghom r’aruwo ẹmha, pịdi nyinha ẹkaaph ịlo ạmhi ẹḅenhi bịdi r’areelhe phọ. 19 Kụolo mem dị ịsighe inyinha ọghimhom, kẹ́moogh oboom ọoḅaghamhian aloor ịlo ịyaar phọ ọbobo eten phọ nyinha kẹkaaph bọ, loor esi dị kịḅenhi ni inyinha ịyaar ọghaaph mem mọ ọpo phọ; 20 ịdi eḍighi bọ nyinha bịn kụ rẹ́kaaph, kụolo uwaloor Ọde phọ anyinha kụ rịlhoghonhaan inyinha ḍịghaagh ọghaaph. 21 Umor kạḅogh ni umor ọdi ạngo we mọ oghiigh, ḅịlhe ọde ạḅogh mọony ọdi ạngo, ạnmuny kozuoghom ni bụrude r’aburunhiin ạbidi kụ ọḅilhe ọḅogh ọngo we mọ ọze. 22 Kụ oomo awe kokol li ẹmhu aḍien phọ ạmhi ịlhogh inyinha ḍien, kụolo ọpo mạkparam* bọ asi ẹpe eekunha phọ, kọpel li. 23 Mem lọ ịgbiphoghom inyinha eniin ẹmha, isuma ẹghi ẹnhon; ịdi eḍighi bọ mị ạkar rịḅenhi ghan inyinha mọ, nyinha kételhe ẹman rạmha phọ Izrẹl kụ Ọony phọ oye agbi oru.

24 “Oye dị rọtughemhi rápu ghan ọtughemhia phọ, ḅịlhe ẹbenhe rápu ghan ọde otu ọdi. 25 Ẹkasian ni dị ọpo rọtughemhi bọ kạkigh ọtughemhia phọ ọdi, ḅịlhe ẹbenhe phọ kạkigh ọde otu phọ ọdi. Eḍighi mạar dị uwo otu phọ kụ ọmhagh ni mọ a Biẹlzịbọb* pọ kọmagh aani ni kẹn bụo otu phọ! 26 Esi ịduon phọ kékiilhaan bịdi, ịyaar ílo dị okpereghi kụ kókpegheron, kụ ịyaar ịbooghian ílo dị kólegheri. 27 Ịlo mị ịḅenhi inyinha esi ufiri, ịkaaph esi ạḍiḅaal, kụ ịlo mị aapholha ịḅenhi inyinha ịtol ạnyu otu kụ egbeelhom. 28 Kụ kékiilhaan bụphe kotue bọ ni okiigh oye kụolo kótue bọ opiemhi ghuḍum oye phọ,* ikiilhaan ghụn Ẹnhaan phọ katue bọ ni akiigh oye ạḅilhe apiemhi ghuḍum oye phọ* sịphe Gẹhẹnạ.* 29 Rọsighe ghan kọịn dị ụ́kar ụman mạar* kụ okoom ịyal ạsimighor, kị́dipho? Kụolo ghạlhamo r’ịduon phọ ni bịn r’oniin ọnyo ạbidi kámeel ude dị Ọde phọ anyinha kálegheri. 30 Kụolo ọdi alegheri ni ọnhu ạsilhaal dị edi ẹmhu anyinha. 31 Esi ịduon phọ kẹ́moogh oghiilhaan; nyinha ẹman ni mạar epu ịbadi ạsimighor.

32 “Tọrobo oye dị ạghaaph ịlo ạmhi ghisigh awe, mị kạkaaph aani ni ịlo ọdi ghisigh Ọde phọ ạmhi odi bọ k’ạke phọ. 33 Kụolo oye dị ụpharanhaan ịmhi ghisigh awe, mị kạparanhaan aani ni nyọdi ghisigh Ọde phọ ạmhi odi bọ k’ạke phọ. 34 Kẹ́etughian mọ mị uru oseere ẹepho sịen ade phọ; mị útu oseere ẹepho, mị uru ghụn ọkom amadia. 35 Mị uru ọgbarion ọde r’ọony ọdi, onhiin r’ọnyanhi ọdi, ạnhir ilhom r’onhiin olom ọdi. 36 Ọkar agey, ạbumulhogh ḍien oye phọ koḍighi bụo eghun otu ọdi. 37 Tọrobo oye dị ạphomhoghian ọde ọbobo onhiin ọdi upu ịmhi pọ ọ́kpeanhaan oḍighi ạmatuan ạmhi; kụ tọrobo oye dị ạphomhoghian ọony ọbobo ọnyanhi ọdi upu ịmhi pọ ọ́kpeanhaan oḍighi ạmatuan ạmhi. 38 Ḅịlhe tọrobo oye lọ ụ́wa ọpham oreeny ịmhinhimhiin* phọ ọdi ọdapham ạmhi pọ ókpeanhan oḍighi ạmatuan ạmhi. 39 Tọrobo oye lọ rạwa ọphel aghuḍum mọ* ọdi katoph ni, kụolo tọrobo oye lọ aghol ẹmhu ạmhi kụ aroph ghuḍum mọ ọdi kạmoogh ni ghuḍum.

40 “Tọrobo oye lọ ịlhoghoma inyinha pọ mụlhoghoma aani ịmhi, kụ tọrobo oye lọ ụlhoghoma ịmhi pọ mạlhoghoma aani Nyọpo urom bọ ịmhi. 41 Tọrobo oye lọ ạlhoghoma oyil loor esi dị aḍighi oyil kạmoogh ni ịikpia phọ oyil rạmoogh ghan bọ, kụ tọrobo oye lọ ạlhoghoma oye elhiom eḍighinhom ịyaar loor esi dị aḍighi oye elhiom eḍighinhom ịyaar kạmoogh ni ịikpia phọ oye elhiom eḍighinhom ịyaar rạmoogh ghan bọ. 42 Ḅịlhe tọrobo oye lọ ạngo mọgo ạmuum lọ ạpho oniin sịen ạbubam mọ ạbuen phọ mọ ạphughol loor esi dị aḍighi ọnyo ạmatuan ạmhi, mị ạkar rịḅenhi ghan inyinha mọ kọkpe ni nyọdi ịikpia.”