Ọdaphan Ịpe ạ Mạtiu Ạge Bọ

23 Kụ a Jizọs ạḅenhi ḍita awe phọ r’ạbumatuan phọ ọdi mọ: 2 “Ạbutughemhia Olhogh phọ r’ạbuo ạ Fạrisi phọ mọrolhomhi loor ạbidi ạgada phọ a Mozis. 3 Esi ịduon phọ, tọrobo ịyaar lọ bịdi ịḅenhi inyinha oḍighi, iḍighi ni, kụolo kẹ́daph iḍighinhom ạraraar phọ ạbidi, loor esi dị bịdi rọtughemhi ghan kụolo róḍighi ghan ịpe bịdi rọtughemhi bọ. 4 Bịdi rọkoroghi ghan sidool dị ẹemor kọḅam rụpha awe, kụolo ghạlhamo r’ạḍunugh ạbidi bịn rọ́wa ghan ọḅoghom aani. 5 Tọrobo ịyaar dị bịdi roḍighi, rọtuan ghan mọ awe ọmhiin bịdi kụ oḍighi. Esi ọmaam, bịdi rọbughe yogh ghan igbe ịge iigbia phọ bịdi rọkagha yogh ghan bọ oghophaam aloor, kọḅilhe ọdoonye ịghelhe ạrusuoma phọ ạbidi. 6 Rẹḅeraan ghan bịdi ọrol esi dị ẹnhighe epu ịnhon mem amale adulhe r’ạsigada aghisigh* ẹpe arubughotu phọ. 7 Rẹḅeraan ghan kẹn dị kọmagh ghan bịdi r’eghuan ẹpe aḍighi phọ ḅịlhe dị awe kọmagh ghan bịdi mọ Rạbạị.* 8 Kụolo kémeera mọ awe ịmhagh inyinha mọ Rạbạị, loor esi dị oniin Ọtughemhia bịn kụ ẹdi nyinha ẹmhoogh, kụ oomo phọ anyinha abumor. 9 Ḅịlhe kẹn, kẹ́magh oye mọ ọde anyinha sịen ade phọ, loor esi dị oniin Ọde bịn kụ ẹdi nyinha ẹmhoogh, Ọpo k’ạke phọ. 10 Awe inyinha kị́mhagh kẹn mọ abuḍiemhiom, loor esi dị oniin Oḍiemhiom bịn kụ ẹdi nyinha ẹmhoogh, kụ ọpo phọ pọ ạ Krạịst. 11 Kụolo ọkaraghi ogbogh sịen igbo phọ anyinha kụ akumu ghan ạngo bụeripho. 12 Tọrobo ọlo aphophe loor ọdi kosoore ni, kụ oye lọ asooromhi loor ọdi kopophe ni.

13 “Ịmhinhimhiin kụ kịrolhonhaan inyinha ạbutughemhia Olhogh phọ r’ạbuo ạ Fạrisi phọ, nyinha awe ịyal arisigh! loor esi dị nyinha mẹkasi eghuugh Ọmhar k’ạke phọ; nyinha phọ r’aloor íḍigh, kụ nyinha ímeera kẹn mọ bụphe rọwa bọ oḍigh phọ oḍigh. 14* ——

15 “Ịmhinhimhiin kụ kịrolhonhaan inyinha ạbutughemhia Olhogh phọ r’ạbuo ạ Fạrisi phọ, nyinha awe ịyal arisigh! loor esi dị nyinha rẹḅeeny ghan ni ọphiiny ạbazi kẹḅilhe erelhe ạnyu ade okiton oye pịdi aḍigh aani ẹku ịiḅereghi ạbuo a Ju phọ, kụ roḍigh, kụ nyinha eḍighi ịdi ọdi kabeeph ipu inyinha ịyal amem kụ ạkpe ọghi ạ Gẹhẹnạ.*

16 “Ịmhinhimhiin kụ kịrolhonhaan inyinha abuḍiemhiom mọ rọ́miin ghan bọ eten, kụ rọḅem ghan bọ mọ, ‘Eḍighi mạar dị oye aghunya r’otu ịiḅereghi phọ, pọ ị́kpaariom mọ ọdi aḍighi ịpe ọdi aghunya bọ; kụolo eḍighi mạar dị aghunya ra gol otu ịiḅereghi phọ pọ ạmoogh oḍighi ịpe ọdi maghunya bọ.’ 17 Rolologhi r’awe dị rọ́miin ghan eten! Sịen a gol phọ r’otu ịiḅereghi phọ aḍighi bọ ịdi a gol phọ aḍighi ọlo iigbia, ọghen kụ ạmhan mạar apu? 18 Nyinha ẹḅilhe kẹn rẹḅem ghan mọ, ‘Eḍighi mạar dị oye aghunya r’ẹkpan phọ, pọ ị́kpaariom mọ ọdi aḍighi ịpe ọdi aghunya bọ; kụolo eḍighi mạar dị aghunya r’inmo phọ edi bọ ạnyu ẹkpan phọ pọ ạmoogh oḍighi ịpe ọdi maghunya bọ.’ 19 We dị rọ́miin ghan eten! Sịen inmo phọ r’ẹkpan phọ eḍighi bọ ịdi inmo phọ eḍighi ẹlo iigbia, ẹghen kụ ịmhan mạar epu? 20 Esi ịduon phọ, oye lọ aghunya r’ẹkpan phọ pọ akunya r’ẹkpan phọ r’ạtorobo ịyaar dị edi ạnyu ẹkpan phọ; 21 kụ oye lọ aghunya r’otu ịiḅereghi phọ pọ akunya r’otu ịiḅereghi phọ r’Ẹnhaan phọ arugh bọ pạ phọ; 22 kụ oye lọ aghunya r’ạke phọ pọ akunya r’ạgada ịtooghi phọ Ẹnhaan r’Ẹnhaan phọ ạrolhom bọ.

23 “Ịmhinhimhiin kụ kịrolhonhaan inyinha ạbutughemhia Olhogh phọ r’ạbuo ạ Fạrisi phọ, nyinha awe ịyal arisigh! loor esi dị nyinha rẹngo ghan ni bin esi aḍioph abin a mint ra dil rạ kọmin phọ,* kụolo nyinha mẹgunhom rạraar phọ ịpe ẹmhan bọ mạar epu sịphe Olhogh phọ, ịduon phọ pọ, elhiom ọoruen, r’ọnma ighirigiir r’ạdol ọḅar. Ẹman ni mạar ọngo abin esi aḍioph abin phọ, kụolo ị́ma imiteom mọ kọgunhom ịphoripho ạraraar phọ ịphen phọ. 24 Nyinha abuḍiemhiom dị eten rẹ́miin ghan, nyinha ẹmiin ni ẹmhaam ẹsighe sịphe ạmuum mọ nyinha rẹwa bọ ọphughol phọ kụolo kạmẹl nyinha rẹminhom ni!

25 “Ịmhinhimhiin kụ kịrolhonhaan inyinha ạbutughemhia Olhogh phọ r’ạbuo ạ Fạrisi phọ, nyinha awe ịyal arisigh! loor esi dị nyinha reetol ghan ọmhan ạmogo phọ r’ạgbagba phọ, kụolo ẹpe olhoghi phọ ẹenir kụ imuza. Ịpe kụ ịdi nyinha edi aani, ekpooko r’oḍighi ghan ạraraar dị ịḅeraan inyinha kụ imuza olhoghi anyinha. 26 Nạ ọnyo ạ Fạrisi dị rạ́miin ghan eten, pụr aatol olhoghi ạmogo phọ r’ạgbagba phọ, pịdi ẹphen ạnyu phọ ẹḅaal aani.

27 “Ịmhinhimhiin kụ kịrolhonhaan inyinha ạbutughemhia Olhogh phọ r’ạbuo ạ Fạrisi phọ, nyinha awe ịyal arisigh! loor esi dị nyinha ẹkigh iiḍi dị ogbul ọphalhaḅaal ạgba, dị ẹphen ạnyu phọ ẹmaar ẹnhighe ọmhiin kụolo ẹpe olhoghi phọ ịḅarara awe dị momhuughu r’ọdo kịrokiro ịḅoria ạraraar kụ emuza. 28 Eniin phọ eten phọ, riḍien awe nyinha eḍighi we elhiom eḍighinhom ịyaar, kụolo ẹpe olhoghi phọ anyinha ọkpe r’osoroghu iilhogh kụ imuza.

29 “Ịmhinhimhiin kụ kịrolhonhaan inyinha ạbutughemhia Olhogh phọ r’ạbuo ạ Fạrisi phọ, nyinha awe ịyal arisigh! loor esi dị nyinha ẹmaar reselhemhi ghan iiḍi ariil phọ kẹḅilhe ẹnhighemhi iiḍi awe elhiom eḍighinhom ịyaar phọ, 30 kụ nyinha rẹḅem ghan mọ, ‘Mụghumo yoor ụrol aani mem ạburude ạburude phọ ayoor, yoor múḍighan aani bịdi ozu ịḅaal ariil phọ.’ 31 Esi ịduon phọ, nyinha r’aloor kụ ịsighe ọnhu anyinha rẹkaaphom mọ nyinha ạnmuny ạbuphe ọze bọ riil phọ. 32 Meḍighi bọ ịduon phọ, pọ ịmadan oḍighi phọ ạburude ạburude phọ anyinha omhiigh bọ.

33 “Rạkaraph ạraraar, nmụny ạsiḅom, ika kụ ịdi nyinha kekpetenhaan bọ dị kósoph ọoruen iphumhe inyinha otoph ọlogh Gẹhẹnạ?* 34 Esi ịduon phọ, mị riruomonaan inyinha riil r’awe ọsu olhoghi r’ạbutughemhia. Buniin ạbidi nyinha kẹze ni kụ ẹkanhagh loor ireeny, ḅịlhe buniin nyinha kẹgurogh ni sịphe arubughotu phọ anyinha kụ ẹgbiphoghom bịdi ẹmha etum ẹmha, 35 pịdi ịḅaal oomo awe elhiom eḍighinhom ịyaar phọ mozu ghan bọ sịen ade phọ ẹtol ẹmhu anyinha, emhiigh ịḅaal oye elhiom eḍighinhom ịyaar phọ Ebẹl kụ esi ịḅaal ạ Zẹkạrạyạ ọony phọ ạ Bạrạkạyạ, ọpo nyinha eghiigh bọ igbo esi iigbia phọ r’ẹkpan phọ. 36 Mị ạkar rịḅenhi ghan inyinha mọ, oomo ạraraar phọ ịphen phọ kemitenhaan ni oghiil phọ ọphon phọ.

37 “Jeruselem, Jeruselem, ọzeom ariil phọ r’ọpo ratoḅol ghan bọ ikpo bụlo orom mọ oru ọteeny nyọdi, ịbadi amem mị mạwa ni ookpomhoghi ạnmuny phọ ạna ịdipho ạkenhegh ramughonhom ghan bọ nmụny ọdi! Kụolo nạ ọ́wa. 38 Ịmiin! Mịwilhenhaan inyinha otu phọ anyinha.* 39 Loor esi dị mị rịḅenhi ghan inyinha mọ, nyinha ịmhi kị́mhiin mụn ni bịn tụtu nyinha ẹḅem mọ, ‘Ạḍiseph kụ edianhaan ọpo ratumhom bọ ḍien phọ a Jehova!’”*