Ọdaphan Ịpe ạ Mạk Ạge Bọ

12 Kụ ọdi amhiigh ọtughemhiom ạbidi rạghaaph ọmaanhiom, mọ: “Oye ạzuph ni ozo ạ vạịn, kụ aghoony aaghironhom ạḅilhe aguph epogh ọzeer iimhumha phọ, kụ ạlhogh otu ẹedanheen dị aphoph ạghi ạnyu pạ ozo phọ. Kụ ọdi ạngo ozo phọ buḅephom iizo mọ ophoghonhaan nyịnho kụ ạḅua ạghi ẹnhon eelhe. 2 Rẹteeny mem mọ iimhumha phọ rẹḅaal ghan bọ, kụ arom ẹbenhe ọdi mọ ạghi ạteeny buḅephom iizo phọ ạsighe bin ọdi. 3 Kụolo bịdi usiph ni ẹbenhe phọ, okuphogh, kụ ophorogh r’oopho ạraghaagh. 4 Ọdi ạḅilhe ni arom ọnhon ẹbenhe mọ ạghi ạteeny bịdi, kụ bịdi ọgur ẹmhu phọ ạay ọḅilhe oofolhomhi. 5 Kụ ọdi ạḅilhe arom ọnhon, kụ bịdi oghiigh nyọon phọ, kụ ọdi ạḅilhe arom ḍita ạbunhon, kụ bịdi okuphogh buniin, ọze buniin. 6 Eekunha phọ, ọdi arom ni ọony ọdi dị ọdi ạphomhoghian. Kụ ạḅem mọ, ‘Bịdi kọlogh ni eegu ọony phọ ạmhi.’ 7 Kụolo abuḅephom iizo phọ uupuruan mọ, ‘Ọphon kụ kale bọ erua ozo ạ vạịn phọ. Itu oghiigh nyọdi pịdi erua phọ ọdi eḍighi ẹlo ayira.’ 8 Kụ bịdi osiph nyọdi oghiigh kụ ọghogh ọḍuanham sịphe ozo ạ vạịn phọ. 9 Uwo ozo ạ vạịn phọ kaḍighi eeghe? Ọdi katu ni ạze buḅephom iizo phọ kụ ạḅogh ozo ạ vạịn phọ ạngo bụnhon awe. 10 Nyinha kạ̋al ghan sịphe Ịge Iigbia phọ mọ, ‘Aḍighiigh phọ ạbuloghom ruutu phọ oghel bọ meḍighi ḍighiigh dị ẹmhan mạar epu ịnhon.* 11 Ịphen phọ ịḅua esi a Jehova* kụ eru, kụ ẹmaar ẹnighe sịen ariḍien phọ ayira’?”

12 Bịdi ọnhaghan bọ ịphen phọ ụwa ni osiph ọdi, loor esi dị ulhegheri ni mọ ạtuan bụno kụ ạngo bọ ọghaaph ọmaanhiom mọ, kụolo ughiilhaan ni ḍita awe phọ. Kụ bịdi ọwilhe nyọdi ọḅua.

13 Ịpe reten kụ bịdi orom buniin ạbuo ạ Fạrisi phọ r’ạbumatuan phọ ạ Hẹrọd mọ ọghi ọteeny nyọdi pịdi ọsighe ịyaar dị ọdi kạkaaph osiphom nyọdi. 14 Bịdi rosi, kụ ọḅenhi nyọdi mọ: “Ọtughemhia, yoor olegheri mọ nạ rạgba ghan agey kụ nạ ráḍighi ghan rạraar ọnhighe aghisigh awe, loor esi dị nạ rápogh ghan we ạnyu r’ạnyu bịn, kụolo nạ rạtughemhi ghan ịdi eru ịne ịlo Ẹnhaan. Ẹnighe ni osogh iisogh ọngo a Siza ọbobo ị́nighe? 15 Yoor usogh ni ọbobo yoor kúsogh?” Ọdi alhegheri ni ikeḍi phọ ạbidi, kụ apuru mọ: “Uḍighi ika kụ nyinha rịdegh bọ ịmhi kephogh? Iruom ịmhi oniin a dinerịọs* mị upogh.” 16 Kụ bịdi oruom nyọdi oniin a dinerịọs,* kụ ọdi apuru bịdi mọ: “Ọphon phọ arisigh ạnhian, kụ ạḍien phọ aḍien ạnhian?” Kụ bịdi ọḅenhi nyọdi mọ: “Ịlo a Siza.” 17 Kụ a Jizọs ạḅem mọ: “Ịngo Siza ịpe eru bọ ịlo a Siza, kụ ẹngo Ẹnhaan ịpe Ẹnhaan.” Kụ ịphen phọ iḍighi ni iikia esi ạbidi.

18 Kụ ạbuo ạ Sạdusi phọ úmeeraam bọ mọ oḅetenhu esi aḍuugh odi ni, uru ni ọteeny nyọdi kụ opuru mọ: 19 “Ọtughemhia, a Mozis ạge mọ eru mạar dị oye ụ́mar mọony kụ ạwilhe ạnhir ọdi amhugh, pọ umor ọdi aphin ạnhir phọ amiteghomonhaan nmụny umor phọ ọdi mamhugh bọ. 20 Oḍual abumor ụrol li. Okumoor phọ aphin ạnhir kụ mọony ọ́mhar bịn amhugh. 21 Kụ omhunhenhiom ịyal phọ aphin ạnhir phọ kụolo mọony ọ́mhar bịn amhugh, kụ iniin phọ kụ imitenhaan omhunhenhiom ịraar phọ. 22 Kụ oomo oḍual phọ umhuughu ni dị nmụny ụ́mar. Kụ eekunha phọ, ạnhir phọ amhugh aani. 23 Mem oḅetenhu esi aḍuugh phọ, ọdi kaḍighi ạnhir ạnhian? Sịen dị oḍual phọ ạbidi ophin bọ ni nyọdi.” 24 Kụ a Jizọs ạḅenhi bịdi mọ: “Nyinha ílegheri Ịge Iigbia phọ r’ịikpo phọ Ẹnhaan, pọ kụ ịyaar phọ nyinha ẹpiom bọ. 25 Ịdi eḍighi bọ mem mọ bịdi koḅerenhu bọ esi aḍuugh, awe kópin ghan nmạriir kụ kọ́nughenyan ghan nmạnyaan, kụolo bịdi kọtol ịdipho ạruukpaany phọ edi bọ ẹpe k’ạke phọ. 26 Ịdi egbolhomaam oḅeton ạbuphe momhuughu bọ, nyinha kạ̋al ghan ḍịnya phọ a Mozis, sịphe ẹghaaph bọ ịlo ekpu eḍum mọ ạnian phọ elhe bọ, kụ Ẹnhaan ạḅenhi bọ nyọdi mọ: ‘Mị Ẹnhaan Ebrạhạm r’Ẹnhaan Ạịzik r’Ẹnhaan a Jekọb’? 27 Ọdi Ẹnhaan ạbuen odi bọ, kẸ́nhaan ạbuphe momhuughu bọ. Nyinha ẹkar kụ ẹpiom.”

28 Oniin ọtughemhia Olhogh phọ dị aru aani sịphe phọ ạnhaghan ịpe bịdi rọogbaghanhaan bọ, alhegheri ni mọ a Jizọs mạphagharanhaan bịdi agey, kụ apuru nyọdi mọ: “Sịphe oomo iilhogh phọ ọghen kụ ọḅel?”* 29 Kụ a Jizọs ạphagharanhaan mọ: “Ọḅel phọ pọ, ‘Ịnaghan, we Izrẹl, a Jehova* Ẹnhaan phọ ayira oniin a Jehova,* 30 kụ nạ kạpomoghian a Jehova* Ẹnhaan phọ ạna r’oomo ekpom ạna r’oomo aghuḍum* ạna r’oomo olhoghi ạna r’oomo ịnyaam ạna.’ 31 Omhunhenhiom ịyal phọ pọ, ‘Pọmoghian matuman ạna ịdipho aloor phọ ạna.’ Ọnhon olhogh dị apu ịphen phọ ólho.” 32 Kụ ọtughemhia Olhogh phọ ạḅenhi nyọdi mọ: “Ọtughemhia, ịphen nạ ạghaaph bọ ịne ni, ‘Eniin Ẹnhaan bịn kụ edi, kụ emuton nyọdi ẹnhon Ẹnhaan ílo’; 33 kụ ọphomhoghian ọdi r’oomo ekpom oye phọ, r’oomo ọnhaghanhan ạḍughum oye phọ, r’oomo ịnyaam oye phọ r’ọphomhoghian amatuman oye phọ ịdipho aloor oye phọ kụ ịmhan mạar epu oomo ịphophoghinheen ạrikia phọ r’ịnhon ọdo ạrikia.” 34 Kụ a Jizọs rọmhiin mọ oye phọ ạpagharanhaan ni r’ọsu olhoghi kụ ạḅenhi nyọdi mọ: “Nạ ọ́kelhan Ọmhar phọ Ẹnhaan.” Kụ oye ọ́mhoogh mụn oḅio ọḅilhe opuru ọdi ịyaar.

35 Tọrobo ịpe ẹrol bọ, ịdipho a Jizọs rạtughemhi bọ ni sịphe otu ịiḅereghi phọ, apuru we phọ mọ: “Uḍighi ika kụ ạbutughemhia Olhogh phọ rọḅem ghan bọ mọ ạ Krạịst phọ ọony a Devid? 36 Uwaloor iigbia phọ anyu ni Devid, kụ ọdi r’aloor ạḅem mọ, ‘A Jehova* ạḅenhi Uwo Ẹmhoogh phọ ạmhi mọ: “Tọl ḍịghaagh elhiom ạmhi tụtu mị ạsighe bụmulhogh ḍien phọ ạna aseere ẹeḍian aruwol ạna.”’ 37 A Devid r’aloor ạmhagh nyọdi mọ Uwo Ẹmhoogh, esi ịduon phọ ika kụ ịdi ọdi aḍighi bọ ọony ọdi?”

Kụ aḍiboom aḍita awe phọ ụghelhom ni ịpe bịdi rọnaghan bọ. 38 Kụ sịphe ịtughemhi phọ ọdi, ạḅilhe ni ạḅem mọ: “Igonha loor esi ạbutughemhia Olhogh phọ rẹḅeraan ghan bọ ọkpolhoghian ịgorogoro ạrusuoma kụ orelheom, ḅịlhe rẹḅeraan ghan bọ dị awe kọmagh ghan bịdi r’eghuan ẹpe aḍighi phọ, 39 kụ rẹḅeraan ghan bọ kẹn ọrolhom ạsigada aghisigh* ẹpe arubughotu phọ r’ọrolhoghu ariisi dị ẹnhighe epu ịnhon mem amale adulhe. 40 Bịdi rọsigheogh ghan rạraar* arukpukelhe ạnmariir, kụ rọoḅereghi ghan ịidoony ịiḅereghi pịdi awe ọmiin bịdi. Ọoruen dị kosophonhaan bọ bịdi kạgbagara ni* apu ịlo ạbunhon.”

41 Kụ ọdi ạghi ạrol asoman rookoom ikpoki phọ kụ amhiigh ophogh ịpe aḍita awe phọ rodoghoḍi bọ ikpoki sịphe arookoom mọ, kụ ịbadi ạraalha ọlhogh ghan ịbadi ạ kọịn. 42 Kụolo oniin ekpukelhe ạnhir dị aḍighi uwo ekulhom aru ni ạlhogh ịyal ịbam ạ kọịn dị ị́kar ịman mạar.* 43 Kụ ọdi ạmhagh bụmatuan phọ ọdi kụ ạḅenhi mọ: “Mị ạkar rịḅenhi ghan inyinha mọ ekpukelhe ạnhir phọ ọphon aḍighi bọ uwo ekulhom mọ kụ ạlhogh apuemhi oomo ạbueripho ọlhogh bọ ikpoki sịphe arookoom mọ. 44 Ịdi eḍighi bọ oomo ạbueripho ụlhogh ghan ikpoki ạbidi dị mepeel, kụolo ghạlhamo r’ịduon ọdi aḍighi bọ uwo ekulhom, ạlhogh oomo ịpe ọdi ạmhoogh bọ, oomo ịpe ọdi ạmhoogh bọ ọrolhom.”