Ọdaphan Jọn
18 A Jizọs rọghaaph ịphen phọ, kụ ạbumatuan phọ ọdi r’ọdi osoor Eḍiiny a Kidrọn ọḅeeny ọghi ekpisi dị oghoony ịizupha odi, kụ oḍigh sịphe oghoony phọ. 2 A Judas phọ aal bọ nyọdi alhegheri aani ni esi phọ, ịdi eḍighi bọ a Jizọs agbor ghan ni ạpham bụmatuan phọ ọdi ạghimhom sịphe phọ. 3 Esi ịduon phọ a Judas ạpham ni ḍita ạbuo ẹgham r’abukoriom dị aruwo ẹmhu ạbupinyon rịkia phọ r’ạbuo ạ Fạrisi phọ kụ orom arumom. Kụ bịdi ụpham ịmhure r’ịtozi r’ịinya ẹgham. 4 A Jizọs alhegheri bọ ni oomo ịpe kemitenhaan bọ nyọdi, arelhe ni amite ạmheera ghisigh ạbidi kụ apuru mọ: “Nyinha rẹwa ghan ạnhian?” 5 Kụ bịdi ọphagharanhaan nyọdi mọ: “Jizọs ọpo ạ Nạzạrẹt phọ.” Kụ ọdi ạḅenhi bịdi mọ: “Mị kụ ọdi phọ.” Kụ a Judas, ọpo aal bọ nyọdi, ạmheera aani ni r’ạbidi.
6 Kụolo a Jizọs ạḅenhi bọ bịdi mọ, “Mị kụ ọdi phọ,” bịdi uḅulholhom yogh ni ọmhan kụ omhelheghu. 7 Kụ ọdi ạḅilhe apuru bịdi mọ: “Nyinha rẹwa ghan ạnhian?” Kụ bịdi mọ: “Jizọs ọpo ạ Nạzạrẹt phọ.” 8 Kụ a Jizọs ạḅem mọ: “Mị ịḅenhi inyinha mọ mị kụ ọdi phọ. Eru mạar lọ nyinha rịwa ịmhi, pọ ịbilhe we phọ ạbuen phọ bịdi ọḍua.” 9 Ịphen phọ imhunhenhi ịpe ọdi ạḅem bọ mọ: “Mị útoph r’oniin ọnyo ạbuphe nạ mụngo bọ ịmhi.”
10 Ạ Sạịmọn Pita ạpham ni elhool ẹgham, esi ịduon phọ, aruph ni elhool ẹgham mọ asophom aḅeri elhiom ẹbenhe ogbogh ọpinyon rịkia phọ. Ḍien ẹbenhe phọ ughol mọ ạ Mạlkọs. 11 Kụolo a Jizọs ạḅenhi Pita mọ: “Lọgh elhool phọ sịphe aḍuphul phọ. Mị kụ́pugholhom mọgo phọ Ọde phọ mụngo bọ ịmhi ḍụghum?”
12 Kụ ạbuo ẹgham mọ r’oḍiemhiom ạbuo ẹgham mọ r’abukoriom mọ ạbuo a Ju phọ orom bọ, osiph Jizọs ọghoroghi rạghaagh phọ. 13 Bịdi ụphur ọsighe nyọdi ọghimhom kạ Ạnạs, ịdi eḍighi bọ ọdi ọde ạnhir a Keyạfạs, ọpo aḍighi bọ ogbogh ọpinyon rịkia lhạ phọ ạḍiphe phọ. 14 Ọkar ọghaaph, a Keyạfạs kụ aromha bọ bụo a Ju phọ mọ eḍighi ịlo ạsuo ạbidi dị oniin oye kạtuan we phọ amugh.
15 Ạ Sạịmọn Pita r’ọnhon ọnyo ạmatuan ụdaph ni Jizọs. Kụ ogbogh ọpinyon rịkia phọ alhegheri ni ọnyo ạmatuan phọ ọphon phọ, esi ịduon phọ ọdi ạdaph ni Jizọs aḍigh sịphe ogiga ogbogh ọpinyon rịkia phọ. 16 Kụolo a Pita ạmheera erugh ẹpe ọnhu aḍibuo phọ. Esi ịduon phọ, ọphoripho ọnyo ạmatuan phọ ogbogh ọpinyon rịkia phọ alhegheri bọ, amite ni ạghi ạḅaanhaan okoriom ọnhu aḍibuo phọ kụ ạpham Pita aḍighom. 17 Kụ ẹbenhe ọnyanhi phọ aḍighi bọ okoriom ọnhu aḍibuo phọ apuru Pita mọ: “Nạ ḍịen kóniin ọnyo ạmatuan oye phọ ọphon phọ?” Kụ a Pita ạphagharanhaan mọ: “Mị kọ́nyo ạmatuan ọdi.” 18 Kụ ạrebenhe phọ r’abukoriom mọ ụkpoonhi ni nịan iiḅu kụ ọmheera okoom ọonma ghan, loor esi dị osipheeny ạrol li. Kụ a Pita ạmheera ni r’ạbidi ạanma aani ghan nịan phọ.
19 Ogbogh ọpinyon rịkia phọ apuru ni Jizọs sipuru ịlo ạbumatuan phọ ọdi r’ịtughemhi phọ ọdi. 20 Kụ a Jizọs ạphagharanhaan nyọdi mọ: “Mị ụtughemhi ghan ni we esi ogbo. Oomo amem mị ụtughemhi ghan ni ẹpe arubughotu phọ r’ẹpe otu ịiḅereghi phọ oomo ạbuo a Ju phọ rookpomhoghan ghan bọ, mị ụ́booghian ghan kụ ạghaaph ịyaar. 21 Uḍighi ika kụ nạ ạḅilhe bọ rupuru ghan ịmhi sipuru? Puru bụphe ọnhaghan bọ ịpe mị ạghaaph ghan bọ. Bịdi olegheri ni rạraar phọ mị ạghaaph ghan bọ.” 22 A Jizọs rọghaaph ịphen phọ, kụ oniin okoriom dị ạmheera aani sịphe phọ aḅor nyọdi kụ ạḅem mọ: “Ịduon kụ ịdi nạ rạpanyanhaan ghan ogbogh ọpinyon rịkia phọ?” 23 Kụ a Jizọs ạḅenhi nyọdi mọ: “Eru mạar dị mị ạghaaph ịyaar dị eeph, pọ kạaph amiteom ọpioman phọ ạmhi; kụolo eru mạar dị mị ụ́kaaph ịyaar dị eeph, uḍighi ika kụ nạ uḅor bọ ịmhi?” 24 Kụ Ạnạs ạḅem mọ ọsighe nyọdi ịdipho ọghoroghi bọ ni rạghaagh phọ ọghiom Keyạfạs ogbogh ọpinyon rịkia phọ.
25 Mem mọ ạmuphe phọ a Pita ạmeera ni sịphe ọdi rạanma bọ nịan phọ. Kụ bụphe ọrol bọ r’ọdi opuru nyọdi mọ: “Tọ nạ óḍighi aani oniin ọnyo ạmatuan ọdi?” Kụ ọdi ạpharanhaan mọ: “Mị kọ́nyo ạmatuan ọdi” 26 Kụ oniin ẹbenhe ogbogh ọpinyon rịkia phọ dị aḍighi siya oye phọ a Pita asoph bọ aḅeri phọ ạḅem mọ: “Mị ụmhiin ni nyịnha ẹpe oghoony ịizupha phọ r’ọdi, kị́dipho?” 27 Kụolo a Pita ạḅilhe ni ạpharanhaan, bịn mem mem mọ ạkenhegh ạlhaay.
28 Kụ bịdi ọsighe Jizọs ka Keyạfạs ọghimhom ẹpe ogiga opoghom mọ. Mem mọ ạmuphe phọ ạḍiroor mẹḅaal. Kụolo bịdi úḍigh aani ẹpe ogiga opoghom mọ, ọbo bịdi kọopuan ghan bọ loor ạbidi bịn ọbilhe olhe Ẹyaal Ọphel Otenhe phọ. 29 Kụ ạ Pạịlet amite aru ạteeny bịdi kụ apuru mọ: “Oye phọ ọphon phọ asoor eeghe olhogh?” 30 Kụ bịdi ọphagharanhaan nyọdi mọ: “Mọ oye phọ ọphon phọ olhogh ósoor, ọbo yoor mụ́ḅogh nyọdi ụngo nyịnha.” 31 Kụ ạ Pạịlet ạḅenhi bịdi mọ: “Ịsighe nyọdi ẹghi ẹdaph olhogh phọ anyinha esophonhaan nyọdi ọoruen.” Kụ ạbuo a Ju phọ ọḅenhi nyọdi mọ: “Yoor ụ́moogh elhiom oghiigh oye.” 32 Ịphen phọ imite omhunhenhi ịpe a Jizọs ạghaaph bọ ịlo ọdo aḍuugh phọ ọdi kamugh bọ.
33 Kụ ạ Pạịlet ạḅilhe aḍigh ẹpe ogiga opoghom mọ kụ ạmhagh Jizọs apuru mọ: “Nạ kụ Uwo Ẹmha ạbuo a Ju phọ ni?” 34 Kụ a Jizọs ạphagharanhaan mọ: “Nạ kụ rạwa olhegheri ịphen phọ kụ nạ upuru bọ ịmhi, ọbobo nạ ụnhaghan ịlo ạmhi ọnhu ạbunhon awe?” 35 Kụ ạ Pạịlet ạḅem mọ: “Mị ọnyo a Ju ḍụghum? Awe eelhe phọ anyinha r’aruwo ẹmhu ạbupinyon rịkia phọ kụ ụḅogh nyịnha ụngo ịmhi. Nạ uḍighi eeghe?” 36 Kụ a Jizọs ạphagharanhaan mọ: “Ọmhar phọ ạmhi kọ́lo aḅirinhi phọ ọphon phọ. Mọ Ọmhar phọ ạmhi aḍighi ọlo aḅirinhi phọ ọphon phọ, ọbo ạbumatuan phọ ạmhi mube ni, bịdi múmeera ụḅogh ịmhi ọngo bụo a Ju phọ. Kụolo ịduon mị ạghaaph bọ, Ọmhar phọ ạmhi kọ́lo aḅirinhi phọ ọphon phọ.” 37 Kụ ạ Pạịlet apuru nyọdi mọ: “Kụ nạ uwo ẹmha ni?” Kụ a Jizọs ạphagharanhaan mọ: “Nạ r’aloor kụ rạkaaph mọ mị uwo ẹmha. Ụtuan mọ mị ụkaaph ịlo igey phọ kụ ụmhar bọ ịmhi, ọḅilhe urom ịmhi oru ịsien aḅirinhi phọ. Kụ tọrobo oye dị odi gạ igey phọ rạnaghan ghan ni ịlo mị ạghaaph.” 38 Kụ ạ Pạịlet apuru nyọdi mọ: “Igey phọ pọ eeghe?”
Ọdi rọghaaph ịphen phọ, kụ ạḅilhe amite ạghi ạteeny bụo a Ju phọ kụ ạḅenhi mọ: “Mị ụ́miin esi dị oye phọ ọphon phọ ạpioman. 39 Kụ ọdaphan eḍighinhom ịyaar phọ anyinha, mị kaseere ni oye ḍio Ẹyaal Ọphel Otenhe phọ. Esi ịduon phọ nyinha rẹwa mọ mị useere Uwo Ẹmha ạbuo a Ju phọ ḍụghum?” 40 Kụ bịdi ọlo mọ: “Káseere oye phọ ọphon phọ, seere Bạrạbạs!” Kụ ạ Bạrạbạs phọ aḍighi ọḅa.