Ọdaphan Ịpe ạ Mạk Ạge Bọ

14 Ịyal aḍughul otu bịn kụ isugha ọteeny Ẹyaal Ọphel Otenhe phọ r’ Ẹyaal Ạ Brẹd Phọ Yist Rọ́logh Ghan Bọ. Kụ aruwo ẹmhu ạbupinyon rịkia phọ r’ạbutughemhia Olhogh phọ ọwa ghan eten ọsighe ikeḍi osiphom ọdi oghiigh; 2 kụolo bịdi ụḅem ghan mọ: “Kíḍighi sịen ẹyaal phọ; ọbo awe phọ kotuphe ghan bọ.”

3 Ọdi odi Bẹtạni kạ Sạịmọn ọpo ạmhoogh ghan bọ ẹzegh ọku ufe phọ rale ghan eḍien, kụ oniin ạnhir aru r’eeku ạlạbạstạ* dị elo ịma eḍu kụ edi, ọkar ogey ạ nạd* dị ạmhan ḍighi. Ạnhir phọ aḅuton eeku ạlạbạstạ phọ amhiigh ooduom elo phọ ẹmhu a Jizọs. 4 Bịdi rọmhiin ịphen phọ kụ buniin omhiigh ọghaaph r’ọghagh olhoghi sịphe igbo phọ ạbidi mọ: “Uḍighi ika kụ ropiemhi bọ ịduon elo ịma eḍu phọ ẹphen phọ? 5 Mutue ni aal elo ịma eḍu phọ ẹphen phọ ikpoki dị mipel li 300 a dinerạị* ọsighe ọngo rukulhom mọ!” Kụ ạnhir phọ aphin esi ạbidi iboom.* 6 Kụ a Jizọs ạḅem mọ: “Ịkporion ạnhir phọ rạghaagh. Uḍighi ika kụ nyinha rẹwa bọ ọngo ọdi ịiḅaghamhi? Ọdi uḍighinhaan ịmhi ịma ịyaar. 7 Arukulhom mọ kọtol ghan ni r’anyinha oomo amem, kụ nyinha ketue ni eḍighinhaan bịdi iiḅi tọrobo amem lọ nyinha ẹwa, kụolo mị kạ́tol r’anyinha oomo amem. 8 Ọdi aḍighi ịpe ọdi katue bọ; ọdi uuduom ịmhi elo ịma eḍu phọ ẹphen ookolhobian aloor phọ ạmhi kụ egbi ọteeny amaḍi phọ ạmhi. 9 Mị ạkar rịḅenhi ghan inyinha mọ, tọrobo ekpisi sịen oomo aḅirinhi phọ dị ogbeelhom iiḅi ịinhaghan phọ, kọkaaph ghan ni ịphen ạnhir phọ ọphon aḍighi bọ ọotughianham ọdi.”

10 Kụ a Judas Iskạrịọt, oniin sịphe a Ḍioph r’ Ịyal phọ, ạghi ni ạteeny ruwo ẹmhu ạbupinyon rịkia phọ ịlo aalha ạbidi nyọdi. 11 Bịdi ọnhaghan bọ ịphen phọ, ịḅaal li olhoghi ạbidi kụ oguan ọngo ọdi ikpoki a silva. Kụ ọdi amhiigh ọwa eepoogh aal a Jizọs.

12 Ẹḅel aḍio Ẹyaal Ạ Brẹd Phọ Yist Rọ́logh Ghan Bọ, mem mọ rọpighiron ghan bọ ẹkia Ọphel Otenhe phọ, ạbumatuan phọ ọdi uru ni ọteeny nyọdi kụ opuru mọ: “Ḍighen kụ ẹdi nạ rạwa mọ yoor ụki uukolhobian dị nạ kạtol ale Ẹyaal Ọphel Otenhe phọ?” 13 Esi ịduon phọ, ọdi arom ịyal ạbumatuan ọdi kụ ạḅenhi bịdi mọ: “Ịki ẹpe ẹmha phọ, oye dị ạpham oko ạmuum katu ni ịteeny inyinha. Ịdaph nyọdi, 14 kụ tọrobo esi lọ ọdi aḍigh, ịḅenhi uwo otu phọ mọ, ‘Ọtughemhia phọ ạḅem mọ: “Odi ẹghen osoph aruuruen phọ ọpo mị r’ạbumatuan phọ ạmhi kọtol bọ ole Ẹyaal Ọphel Otenhe phọ?”’ 15 Kụ ọdi kiḍeenhaan ni inyinha oboom osoph ạnyu sịphe otu ẹedanheen phọ, dị moselhemhi ọḅilhe oseere rạraar ịlo esi r’esi. Iikolhobian sịphe phọ ịlo Ẹyaal Ọphel Otenhe phọ yira kole bọ.” 16 Kụ ạbumatuan phọ onyeenhe ọghi oḍigh ẹpe ẹmha phọ kụ ọmhiin dị edi ọkar ịpe ọdi ạḅenhi bọ bịdi, kụ ookolhobian ịlo Ẹyaal Ọphel Otenhe phọ.

17 Rẹteeny dulhe, kụ a Ḍioph r’ Ịyal phọ r’ọdi oru osi. 18 Bịdi ọtol ịdaabili role ghan eḍien, kụ a Jizọs ạḅem mọ: “Mị ạkar rịḅenhi ghan inyinha mọ, oniin ọnyo anyinha dị ralean ni r’ạmhi kaal li ịmhi.” 19 Kụ bịdi omheelhom ọto kụ omhiigh opuru ọdi oniin atum nyoniin mọ: “Tọ kạ́mhi o, mị ni?” 20 Kụ ọdi ạḅenhi bịdi mọ: “Oniin sịen a Ḍioph r’ Ịyal phọ ni, ọpo rạlogh bọ ḍịghaagh ọdi sịen ạgbagba phọ r’ạmhi. 21 Ọony phọ oye kamugh ni ịdipho ọge bọ ni ịlo ọdi, kụolo ịmhinhimhiin kụ kẹtolhonhaan oye phọ ọpo kabool bọ Ọony phọ oye! Mịnighe ghụn dị ọbo oye phọ ọpo phọ mụ́mar rọmhar.”

22 Bịdi odi ni role, kụ ọdi ạsighe ạ brẹd, ạngo ḍịseph Ẹnhaan, kụ ạparion ạngo bịdi, kụ ạḅem mọ: “Itiin, ạ brẹd phọ ọphon phọ ạmeera esi aḍizu phọ ạmhi.” 23 Kụ ọdi ạsighe mọgo, ạngo Ẹnhaan ḍịseph kụ ạngo bịdi, kụ oomo ạbidi ọphughol. 24 Kụ ọdi ạḅenhi bịdi mọ: “Amiim mọ ạmuen phọ ạmeera esi ‘ịḅaal phọ ạmhi ịlo ịyo phọ,’ kọtuan bọ ịbadi kụ ozu. 25 Mị ạkar rịḅenhi ghan inyinha mọ, mị kạ́pughol mụn ni bịn miin mọ ạmuen phọ tụtu ẹteeny ḍio phọ mị r’anyinha kẹpughol bọ mumhoom amiin ẹpe Ọmhar phọ Ẹnhaan.” 26 Eekunha phọ, bịdi rọmhoor roboom Ẹnhaan kụ omite ọghi ẹpe Ẹeḅaraph phọ Olivs.

27 Kụ a Jizọs ạḅenhi bịdi mọ: “Oomo phọ anyinha kekpetaan ni emeel, ịdi eḍighi bọ ọge ni sịphe Ịge Iigbia phọ mọ: ‘Mị kazuom ni opoghom mọ kụ iyool ịga phọ ẹwalhalha.’ 28 Kụolo Ẹnhaan ruḅeton ịmhi esi aḍuugh, mị kịphur ri inyinha aḍiemhi ghan ẹpe Gạlili.” 29 Kụolo a Pita ạḅenhi nyọdi mọ: “Ghạlhamo oomo ạbueripho ukpetaan ni omhelheghu, mị kákpetaan.” 30 Kụ a Jizọs ạḅenhi nyọdi mọ: “Mị ạkar rạḅenhi ghan nyịnha mọ rodon phọ, ii, dulhe phọ ạḍien phọ, tụtu ạkenhegh rạlaay ịyal amem, nạ kụpharanhaan ni ịmhi ịraar amem.” 31 Kụ ọdi ạghaaph ghan bịn ạkpaariom mọ: “Ghạlhamo ịma mọ mị umugh r’ạna, mị nyịnha kạ́pharanhaan ni bịn.” Kụ oomo ạbueripho ọḅem aani iginha phọ.

32 Kụ bịdi oru osi esi dị oghol mọ ạ Gẹtsẹmạni, kụ ọdi ạḅenhi bụmatuan phọ ọdi mọ: “Ịtol ude sịen, mị ụki ụuḅereghi.” 33 Kụ ọdi ạpham Pita ra Jems rạ Jọn ạghimhom, kụ amheelhom oboom ọto. 34 Kụ ọdi ạḅenhi bịdi mọ: “Mị ameelhom ni oboom ọto dị rạwa oghiigh ạmhi. Ịtol sịen egon ghan.” 35 Kụ ọdi arelhe ạghi ghisigh ẹnum, kụ akpuḍian azumeri ẹmhu ọdi, kụ amhiigh ọoḅereghi mọ, lọ edugh ni, pọ amem mọ ạmuphe phọ etenhom nyịnho. 36 Kụ ọdi ạḅem mọ: “Ạbạ,* Ọde ịyaar ílo dị nạ kátue aḍighi; sịghe mọgo phọ ọphon phọ ghisigh ạmhi. Kụolo ịpe mị rạwa bọ kụ kímite, ịpe nạ rạwa bọ kụ emite.” 37 Kụ ọdi aḅula ạteeny bịdi kụ ạmhiin dị rọnaani, kụ ạḅenhi Pita mọ: “Sạịmọn, nạ rạnaanhi? Nạ ọ́mhoogh ịnyaam ọrolhom oniin ạwa ogon ghan? 38 Igon ghan ẹḅilhe ẹeḅereghi ghan, ọbo nyinha keḍigh ghan bọ esi ọdegh ophogh. Ọkar agey, edi ni ekpom mọ oḍighi, kụolo aloor phọ kụ idugh.” 39 Kụ ọdi ạḅilhe ạḅua ạghi ạaḅereghi, kụ ạghaaph eniin phọ ịyaar phọ. 40 Kụ ọdi ạḅilhe aḅula kụ ạmhiin dị bịdi rọnaanhi loor esi dị ạralha maḅogh riḍien ạbidi, kụ bịdi úlegheri ịyaar ọphagharanhaan ọdi. 41 Kụ ọdi ạḅilhe aḅula omhunhenhiom ịraar amem ạteeny bịdi kụ ạḅenhi mọ: “Mem mọ ạmuen ẹrol bọ ịduon kụ ẹdi nyinha rẹnaanhi kẹḅilhe ephooghian! Mẹkasian! Amem mọ mẹteeny! Ịmiin! Robool Ọony phọ oye kọlhogh ḍịghaagh abuḍighinhom ịkaraph. 42 Iḅerenhu ọḍua. Ọpo kaal bọ ịmhi matuman sịen.”

43 Ọdi odi ni rạkaaph, bịn a Judas, oniin sịphe a Ḍioph r’ Ịyal phọ, aru r’aḍita awe dị ọdaph nyọdi kụ ọphamhagh rolhool ẹgham r’ạraḅam, dị aruwo ẹmhu ạbupinyon rịkia phọ r’ạbutughemhia Olhogh phọ r’ikumor awe phọ kụ orom. 44 Ọpo aal bọ nyọdi ạḅenhi ni bịdi ịyaar dị kọloghom elhegh, ọdi ạḅem mọ: “Ọpo mị kạkpun bọ kụ oye phọ, isiph nyọdi, kụ ẹmhaar ẹpham dị ọdi kásuma.” 45 Kụ ọdi ạghi ạteeny Jizọs, kụ ạḅem mọ, “Rạbạị!” kụ amhiigha loor ạkpun nyọdi. 46 Kụ bịdi oru osiph nyọdi. 47 Kụolo oye dị ạmeera aani sịphe phọ aruph ni elhool ẹgham ọdi asophom aḅeri ẹbenhe ogbogh ọpinyon rịkia phọ. 48 Kụolo a Jizọs ạḅenhi bịdi mọ: “Mị ạkigh ọḅa kụ nyinha ẹpam bọ rolhool ẹgham r’ạraḅam etu osiphom ạmhi? 49 Ḍio etum ḍio mị ụrol ghan ni r’anyinha sịphe otu ịiḅereghi phọ ạtughemhi ghan, kụ nyinha ịmhi ísiph. Kụolo ịphen phọ imite omhunhenhi ịpe edi bọ sịphe Ịge Iigbia phọ.”

50 Kụ oomo ạbumatuan phọ ọwilhe nyọdi osumughu. 51 Kụolo oniin ọnyo ugheel ọony dị ạkpolhoghian oginha oodugha ạsuoma aakpereghiom loor ọdi amhiigh ni ọdaph a Jizọs, kụ bịdi ọghi osiph ọdi, 52 kụolo ọnyo ugheel ọony phọ ạwilhenhaan bịdi ạsuoma phọ ọdi kụ asuma r’oginha ạsuoma olhoghi.*

53 Bịdi ụsighe Jizọs ọghimhom k’ogbogh ọpinyon rịkia phọ, kụ oomo aruwo ẹmhu ạbupinyon rịkia phọ r’ikumor awe phọ r’ạbutughemhia Olhogh phọ ookpomhoghan. 54 Kụ a Pita ạdaph ni nyọdi, kụolo ạrol k’ẹpe ọmhan tụtu osi sịphe ogiga ogbogh ọpinyon rịkia phọ; kụ ạrol ude r’ạrebenhe otu phọ ạanma ghan nịan. 55 Kụ aruwo ẹmhu ạbupinyon rịkia phọ r’oomo awe ạ Sạnhẹdrin phọ ụwa ghan ọkpe ọgba ọḅam ẹmhu a Jizọs pịdi okol okiigh nyọdi, kụolo ụ́miin. 56 Ọkar ọghaaph, ịbadi uru ni ọgbaaghi ọkpe ọḅam ẹmhu ọdi, kụolo ạsiagba phọ ạbidi ị́ḅophan. 57 Ḅịlhe kẹn, buniin ụmheregha ghan ni ọgba ọkpe ọḅam ẹmhu ọdi mọ: 58 “Yoor ụnhaghan dị ọdi ạḅem mọ, ‘Mị kalereghi otu ịiḅereghi phọ ọphon ọsighe bọ rạghaagh kụ ọlhoghom, kụ esi ịraar aḍughul otu mị ạlogh ọdi ụ́sighe rạghaagh kụ ọlhoghom.’” 59 Kụolo ghạlhamo r’ịphen bịdi ọghaaph bọ bịn, ạsiagba phọ ạbidi ị́ḅophan.

60 Kụ ogbogh ọpinyon rịkia phọ ạmheera sịphe igbo phọ ạbidi kụ apuru Jizọs mọ: “Nạ ọ́mhoogh aani ịyaar ọghaaph? Nạ ọ́nhaghan ịphen awe phọ ạbuen phọ rọkaaph bọ ịlo ạna?” 61 Kụolo ọdi aḅoorian bịn, ọ́phagharanhaan ịyaar. Kụ ogbogh ọpinyon rịkia phọ ạḅilhe apuru nyọdi mọ: “Nạ kụ ạ Krạịst phọ ni, Ọony Ọpo Mọseph bọ?” 62 Kụ a Jizọs ạḅem mọ: “Ii, mị phọ ni; kụ nyinha kẹmiin Ọony phọ oye dị ạrol ḍịghaagh elhiom Ọpo ạmhoogh bọ ịikpo phọ kụ ratu r’ọotu ạke phọ.” 63 Esi ịduon phọ ogbogh ọpinyon rịkia phọ ạphaar ạsuoma ọdi kụ ạḅem mọ: “Yira ọḅilhe rọwa ghan we dị kọkaaph rạraar ịlo ọdi oḍighinhom eeghe? 64 Nyinha mẹnhaghan ni ịpe ọdi mạapu bọ ḍien phọ Ẹnhaan. Nyinha esopha mọ oḍighi ika?”* Kụ oomo ạbidi ọḅem mọ ọdi ạkpe omhugh. 65 Kụ buniin ọmhiigh ọsinhoghom ọdi ịghor, kụ ọsighe ịyaar ozu risigh ọdi ọḅilhe ọgiphogh nyọdi kụ ọḅem mọ: “Mọ nạ oyil pọ ụḅenhi iyoor oye phọ ạgiph bọ nyịnha!” Kụ abukoriom ogiga phọ ooḅorogh nyọdi kụ ọsighe nyọdi ọḍuanham.

66 A Pita odi ude sịphe ogiga phọ, kụ oniin ẹbenhe ọnyanhi ogbogh ọpinyon rịkia phọ aru. 67 Rọmhiin Pita dị rạanma ghan nịan, kụ akiririom aphogh kụ ạḅem mọ: “Nạ ụdaph aani ghan ni Jizọs phọ ọphon phọ, oye ọlo ạ Nạzạrẹt phọ.” 68 Kụolo ọdi ạpharanhaan ni, kụ ạḅem mọ: “Mị úlegheri nyọdi kụ mị únaghanhan kẹn ịphen nạ rạkaaph bọ,” kụ amite ạghi ẹpe ọnhu aḍibuo phọ odi bọ. 69 Ẹbenhe ọnyanhi phọ ạmhiin ni nyọdi ẹpe phọ kụ ạḅilhe amhiigh ọḅenhi ạbuphe ọmheregha bọ sịphe phọ mọ: “Ọphon phọ oniin ọnyo ạbidi ni.” 70 Kụ ọdi ạḅilhe ni ạpharanhaan. Mọony amem bịn bụphe ọmheregha bọ sịphe phọ omhiigh ọḅenhi a Pita mọ: “Ọkar agey nạ oniin ọnyo ạbidi ni, iikia ílo, nạ ọlo ạ Gạlili.” 71 Kụolo ọdi amhiigh ọlhoghoḍi ịnhu kụ aghunya mọ: “Mị úlegheri oye phọ ọphon phọ nyinha rekol ghan bọ!” 72 Mem mem mọ bịn ạkenegh ạlaay omhunhenhiom ịyal amem, kụ a Pita ạatughian ịpe a Jizọs ạḅenhi bọ nyọdi mọ: “Tụtu ạkenhegh rạlaay ịyạl amem, nạ kụpharanhaan ni ịmhi ịraar amem.” Kụ ọdi órue mụn ọphamhaghan loor ọdi kụ amhiigh emoghi.