Ọdaphan Ịpe ạ Mạtiu Ạge Bọ
4 Kụ uwaloor phọ arorori Jizọs ạghimhom ẹpe ẹdala phọ, kụ Eru phọ ạghi ạdegh nyọdi aphogh. 2 Ọdi rọkaagh ẹḍogh 40 aḍughul otu,* kụ ọkoony asiph nyọdi. 3 Kụ Eru phọ aru ạteeny nyọdi kụ ạḅenhi mọ: “Mọ nạ ọony Ẹnhaan ni, pọ ḅẹnhi sighiigh phọ ịphen mọ eten iiḅoghoḍi ạ brẹd.” 4 Kụ ọdi ạphagharanhaan mọ: “Ọge ni sịphe Ịge Iigbia phọ mọ: ‘Eḍien* bịn kétue ẹngo oye ghuḍum, kụolo tọrobo ekpo ọnhu dị ẹḍua ọnhu a Jehova* emite kụ ketue ẹngo oye ghuḍum.’”
5 Kụ Eru phọ ạsighe nyọdi ạghimhom ẹmha iigbia phọ, kụ ạmheremhi nyọdi ẹpe eekunha ạnyu otu ịiḅereghi phọ 6 kụ ạḅenhi mọ: “Mọ nạ ọony Ẹnhaan ni, pọ pel akuruph, ịdi eḍighi bọ ọge ni sịphe Ịge Iigbia phọ mọ: ‘Ọdi kakol li ẹmhu ạna ạngo ịto rụukpaany phọ ọdi,’ ḅịlhe mọ, ‘Bịdi kokoph ni nyịnha ọbo nạ kạgurom ghan bọ owol ạna ḍighiigh.’” 7 Kụ a Jizọs ạḅenhi nyọdi mọ: “Ọge kẹn ni sịphe Ịge Iigbia phọ mọ: ‘Kạ́degh a Jehova* Ẹnhaan phọ ạna apogh.’”
8 Kụ Eru phọ ạḅilhe ạpham nyọdi ạsiinyom ạnyu ẹeḅaraph dị ephoph iboom, kụ aḍeenhaan nyọdi oomo ịtooghi aḅirinhi phọ r’igbogh phọ ạbidi. 9 Kụ ạḅenhi nyọdi mọ: “Mị kạngo nyịnha oomo ạraraar phọ ịphen phọ, eḍighi mạar dị nạ akpuḍian mem bịn uuseeny ịmhi.” 10 Kụ a Jizọs mọ: “Ḍụa sịen Setạn! Ịdi eḍighi bọ ọge ni sịphe Ịge Iigbia phọ mọ: ‘A Jehova* Ẹnhaan phọ ạna kụ ẹdi nạ kaaseeny, ọdi bịn kụ ẹdi nạ kakumuan ghan rukumuan iigbia ạngo.’” 11 Kụ Eru phọ ạwilhe nyọdi ạḅua, kụ ạruukpaany oru ọlhoghonhaan nyọdi ḍịghaagh.
12 Mem mọ a Jizọs ạnhaghan bọ mọ mosiph Jọn ọlogh ikoli, ọdi ạḅua ni ạghi Gạlili. 13 Ịpe reten, kụ ọdi ạḅua Nạzạrẹt ạghi Kạpạnịọm, ẹmha dị etuman ọphiiny ạbazi ạ Zẹbiulọn rạ Nạftạlạị kụ arugh. 14 Ịphen phọ imite omhunhenhi ịpe oyil phọ Ạịzạyạ ạghaaph bọ mọ: 15 “Rạmha ạ Zẹbiulọn rạ Nạftạlạị, nyinha ạbuphe odi bọ ẹpe eten ọphiiny ạbazi phọ, ẹḅeenyom Ọphiiny phọ ạ Jọdạn, Gạlili phọ aruuruen phọ orugh bọ! 16 Awe dị odi esi ufiri mọmhiin ḍiboom ạḍiḅaal, ḅịlhe ạḍiḅaal mesoorom bụphe odi bọ rokool dị oogho aḍuugh apuki.” 17 Emhiigh mem mọ ạmuphe phọ kụ rẹki, a Jizọs amhiigh ni ogbeelhom mọ: “Ikiton, ịdi eḍighi bọ Ọmhar k’ạke phọ matuman sịen.”
18 Ịdipho ọdi ratelhe bọ oogbom Ọphiiny Ạbazi phọ ạ Gạlili, kụ ạmhiin ịyal abumor, Sạịmọn, ọpo oghol bọ mọ a Pita, r’ Ạndrụ umor phọ ọdi, dị rozu ghan ọzuguru, bịdi uḍighi bụkoniom ạkoni. 19 Kụ ọdi ạḅenhi bịdi mọ: “Itu ịdaph ịmhi, mị kiḍighi inyinha bụkoniom awe.” 20 Mem mem mọ bịn bịdi ọwilhe ịzuguru phọ ạbidi ọdaph nyọdi. 21 Ạḅilhe atelhe rạki, kụ ạmhiin ịyal ạbunhon abumor, Jems ọony phọ ạ Zẹbẹdi rạ Jọn umor phọ ọdi. Bịdi ụrol olhoghi oghuugh r’ọde phọ ạbidi Zẹbẹdi, ọokoḍi ghan ịzuguru ạbidi, kụ ọdi ạmhagh bịdi. 22 Mem mem mọ bịn bịdi ọwilhe oghuugh phọ r’ọde phọ ạbidi ọdaph nyọdi.
23 Ọdi arelhe ni oomo ạ Gạlili, ạtughemhi ghan sịphe arubughotu phọ ạbidi, agbeelhom iiḅi ịinhaghan ịlo Ọmhar phọ kụ ạḅilhe aakonhom ghan oomo ọdo ạreezegh r’ariiphinha dị awe phọ ọmhoogh. 24 Kụ ịinhaghan ịlo ọdi elheeny oomo a Siria, kụ awe omhiigh ọsighe oruom ọdi oomo ạbulo ạreezegh r’ịgbagara ariiphinha rẹeḅaghamhi, r’ạbudi ịkaraph aruwaloor edi loor, r’ạbudi rosiphi isughuna, r’ạbudi ariisi aloor emhuughu, kụ ọdi aakonhom bịdi. 25 Loor ịduon phọ, aḍita awe ụḅua ni Gạlili ra Dikạpọlis* ra Jeruselem ra Judia r’ẹḅeenyom Ọphiiny phọ ạ Jọdạn oru ọdaph nyọdi.