Ọdaphan Luk

11 A Jizọs ạrol li eniin esi ạaḅereghi ghan, kụ ọdi rọmhan ịiḅereghi phọ, kụ oniin ọnyo ạmatuan ọdi ạḅenhi nyọdi mọ: “Uwo Ẹmhoogh, ụtughemhi iyoor ịlo ọoḅereghi ghan ịdipho ạ Jọn ạtughemhi bọ bụmatuan phọ ọdi.”

2 Kụ ọdi ạḅenhi bịdi mọ: “Tọrobo amem lọ nyinha rẹeḅereghi, ịḅem ghan mọ: ‘Ọde, ọḅaalhamhi ni ḍien phọ ạna.* Ọmhar phọ ạna aru ni. 3 Ụngo iyoor eḍien* tọrobo aḍio ọdaphan ịpe yoor omhoghi bọ ḍio phọ. 4 Sạr ịkaraph ayoor ụwilhenhaan iyoor, loor esi dị yoor rọsar aani ghan ni kọwilhenhaan tọrobo oye dị alhe ọmhugh ayoor;* kụ kámeera yoor omheel oḍighanhaan ọdegh ophogh.’”*

5 Kụ ọdi ạḅenhi bịdi mọ: “Ọḅem mọ ọnyo anyinha ạmoogh ọyaghiri kụ ạghi k’ọyaghiri phọ ogbo aḍughul ạḅenhi mọ, ‘Ọyaghiri, ạalhe aani ịmhi ịraar iiḅoghoḍi ạ brẹd, 6 loor esi dị ọyaghiri ạmhi ạḅua ni ekpisi dị ẹkel atu ophogh ạmhi kụ mị ụ́moogh ịyaar ọngo.’ 7 Kụolo ọyaghiri phọ ạrol olhoghi ạphagharanhaan mọ: ‘Ịmhi kụ́uḅaghamhi. Mọkasi eghuugh phọ, kụ ịbam ạnmuny ạmhi r’ạmhi mọmhinha. Mị kátue aḅetenhu ạngo nyịnha ịyaar.’ 8 Mị rịḅenhi ghan inyinha mọ, ghạlhamo ọdi óghol li ẹmhu ạrighiri phọ ạbidi oḅetenhu ọngo nyọdi ịyaar, ọdi kaḅetenhu ni ạngo tọrobo ịyaar lọ rạwa loor ịduon ạghiom bọ ni ghisigh rạlom r’oḅom ẹmhu. 9 Kụ mị rịḅenhi ghan inyinha mọ, ịlom ghan, bịn kịngo ni inyinha; ịwa ghan, bịn nyinha kẹmiin ni; ikar ghan, bịn kighughuronhaan ni inyinha. 10 Ịdi eḍighi bọ tọrobo oye lọ ạlhom ghan kọngo ni, kụ tọrobo oye lọ ạwa ghan kạmiin ni, ḅịlhe tọrobo oye lọ akar ghan kokughuronhaan ni. 11 Ọkar agey, ọghen ọde sịen igbo phọ anyinha kụ ẹdi ọony ọdi kạlom ena, kụ ạngo ẹkaraph ịyaar kpạripe r’ena phọ? 12 Ọbobo kạlom eghelhe ạkenhegh kụ ạngo ḍikororoph ạnyu ade? 13 Esi ịduon phọ, eru mạar dị nyinha phọ eḍighi bọ bụkaraph awe rẹngo ghan ni nmụny anyinha igey ạraraar, pọ Ọde phọ anyinha odi bọ ẹpe k’ạke phọ kạngo ni uwaloor iigbia phọ bụphe rọlom bọ nyọdi!”

14 Ịpe reten kụ ọdi aphorogh loor oye ọkaraph uwaloor dị úmeera ghan mọ oye phọ ạḅa. Kụ ọkaraph uwaloor phọ rọḅua bịn oye phọ ụ́ḅa ghan bọ amhiigh ọḅa, kụ eḍighi iikia esi aḍita awe phọ. 15 Kụ buniin awe ọḅem ghan mọ: “Ọdi ạsighe ịikpo a Biẹlzịbọb,* ọtooghia ịkaraph aruwaloor phọ kụ raporoghom ghan bọ ịkaraph aruwaloor phọ.” 16 Kụ bụnhon ọḅenhi nyọdi mọ aḍighi amiteom eḍeenhaan k’ạke bụno ọmhiin, ọdegh ọdi ophogh. 17 Ọdi alhegheri ni ịpe bịdi rọotughian bọ, kụ ạḅenhi bịdi mọ: “Tọrobo ịtooghi dị amadia odi kepe ni, ḅịlhe otu lọ amadia odi kameel li. 18 Eniin phọ eten phọ, eru mạar dị a Setạn mamhiigh rabian loor, ịtooghi phọ ọdi kẹmeera bọ ika? Nyinha rẹḅem ghan mọ mị ạsighe ịikpo a Biẹlzịbọb kụ raporoghom ghan ịkaraph aruwaloor phọ. 19 Eru mạar dị mị ạsighe ịikpo a Biẹlzịbọb kụ raporoghom ghan ịkaraph aruwaloor, ịghen ịikpo kụ ẹdi ạnmuny phọ anyinha ọsighe bọ roporoghom aani ghan? Pọ kụ ịyaar phọ bịdi kụ koḍighi bọ buugboom ịiruen anyinha. 20 Kụolo eḍighi mạar dị mị ạsighe ni ḍụnhugh Ẹnhaan kụ raporoghom ghan ịkaraph aruwaloor phọ, pọ ọkar agey Ọmhar phọ Ẹnhaan mạar inyinha eten. 21 Mem dị oye dị ạmhoogh ịikpo ạḅilhe ạnyaaghian ịinya ẹgham rakori otu ọdi, ịyaar kémitenhaan rạraar phọ ọdi ạmhoogh bọ. 22 Kụolo mem dị oye dị ạmhoogh ịikpo apu nyọdi aru azuom nyọdi kụ ạkpar apu, kạsigheogh ni oomo ịinya ẹgham mọ ọdi aḍuom bọ olhoghi kụ adi rạraar phọ ọdi ạsigheogh bọ angọ bụnhon. 23 Tọrobo oye lọ úlo gạ ạmhi pọ rurupheom ịmhi elhephiri, kụ tọrobo oye lọ ịmhi úḍighan ookpomhoghi ạbunhon pọ rạwalhalhamhi ghan ghụn.

24 Mem dị ọkaraph uwaloor ạḍua loor oye, ratelhe yogh ghan rikpisi dị ạmuum úlo ọwa amarugh, kụ mem dị ụ́miin, kụ ạḅem mọ: ‘Mị kaḅula sịphe otu phọ ạmhi mị ạḅua bọ amite.’ 25 Rosi kụ ạmiin dị oḅeer ọḅaalhamhi ọḅilhe ọnhighemhi. 26 Kụ amite ạki ạmagh oḍual ịnhon ịkaraph aruwaloor dị ẹgbagara epu nyọdi, kụ oḍigh sịphe phọ otugh. Kụ ạdol oye phọ ọpo phọ ebeeph epu ịpe ẹrol ghan bọ ẹḅel amem mọ.”

27 Ọdi odi ni rạkaaph rạraar phọ ịphen phọ, kụ oniin ạnhir ạrol ẹpe aḍita awe phọ odi bọ ạlo ạḅenhi nyọdi mọ: “Ọḅaal olhoghi kụ odianhaan ạnhir phọ ạmhar bọ nyịnha ạḅilhe ạngo nyịnha mạmaam!” 28 Kụolo ọdi ạḅem mọ: “Eeye, kpạripe ghụn, ọḅaal olhoghi odianhaan bụphe rọnaghan ghan bọ ekpo ọnhu phọ Ẹnhaan kọḅilhe ọdaph!”

29 Mem dị aḍita awe phọ momhiigh rookpomhoghan, ọdi amhiigh ni ọḅem mọ: “Oghiil phọ ọphon phọ ọkaraph oghiil; rọwa ọmhiin eḍeenhaan, kụolo kọ́ngo bịdi eḍeenhaan emuton eḍeenhaan phọ a Jona. 30 Ịdipho a Jona aḍighi bọ eḍeenhaan esi awe phọ a Niniva, kụ ẹdi Ọony phọ oye kaḍighi aani eḍeenhaan esi oghiil phọ ọphon phọ. 31 Ḍio Ịiruen phọ ukuenhi ạnhir esoorom mọ r’awe oghiil phọ ọphon phọ koḅerenhu ni esi aḍuugh, kụ ọdi asoph ọoruen apumhe bịdi, loor esi dị ọdi ạḅua ni k’ekpisi dị ẹkel aru ọnhaghan ikpo ọnhu ọsu olhoghi phọ ạ Sọlọmọn. Kụolo ịmiin! oye dị apu Sọlọmọn odi ni sịen. 32 Ḍio Ịiruen phọ awe phọ a Niniva r’oghiil phọ ọphon phọ koḅerenhu ni esi aḍuugh, kụ awe phọ a Niniva osoph ọoruen opumhe bịdi, loor esi dị bịdi ukiton ni mem mọ ọnhaghan bọ dom mọ a Jona. Kụolo ịmiin! oye dị apu Jona odi ni sịen. 33 Mem dị oye ạsu ọtozi, rạ́booghi ghan, kụ rákpereghiom ghan kẹn egunhum,* kpạripe ghụn rạḅam ghan ạnyu ọmheremhiom ọtozi, pịdi awe dị oḍigh otu phọ ọmiin ḍịḅaal phọ. 34 Ekpeḍien phọ ạna kụ ọtozi aloor phọ. Mem dị ekpeḍien phọ ạna egbon eniin esi,* pọ oomo aloor phọ ạna esoor aani ni;* kụolo mem dị regbeghian,* pọ aloor phọ ạna ekul aani ni. 35 Esi ịduon phọ, mịin mọ ạḍiḅaal phọ edi bọ loor phọ ạna íḍighi ufiri. 36 Kụ iḍighi kụ, eḍighi mạar dị oomo aloor phọ ạna esoor kụ esi íkul, pọ oomo ạna kasoor ri ịdipho amem dị ọtozi asoor ạngo nyịnha ḍịḅaal.”

37 Ọdi rọghaaph ịphen phọ rọmhan, kụ oniin ọnyo ạ Fạrisi ạḅenhi nyọdi mọ aru k’ọno alhe eḍien. Kụ ọdi ạghi ni k’oye phọ ạrol ịdaabili olhe eḍien phọ. 38 Tọrobo ịpe ẹrol bọ, iḍighi ni iikia esi ọnyo ạ Fạrisi phọ ọmhiin mọ a Jizọs ọ́phur ootolha rạghaagh* kụ agbi omhiigh olhe eḍien phọ. 39 Kụolo Uwo Ẹmhoogh phọ ạḅenhi nyọdi mọ: “Nyinha ạbuo ạ Fạrisi phọ, nyinha reetol ghan ọmhan ạmogo phọ r’ạgbagba phọ, kụolo ẹpe olhoghi phọ ẹenir kụ imuza. Ịpe kụ ịdi nyinha edi aani, ekpooko r’ạsipioghom kụ imuza ilhoghi anyinha. 40 Rolologhi! Tọ ọpo ạlhem bọ oye phọ yira oru bọ ẹphen ạnyu phọ kụ ạlhem aani bọ ni oye phọ yira oru bọ ẹpe olhoghi phọ? 41 Ịsighe rạraar phọ edi bọ rokpom anyinha kụ eenmoom ruunmo ọlhoghonhaan ạḍighaagh bụlo ekuom,* bịn oomo ạraraar dị igbolhomaam inyinha kẹḅaal li. 42 Kụolo ịmhinhimhiin kụ kịrolhonhaan inyinha ạbuo ạ Fạrisi phọ, loor esi dị nyinha rẹngo ghan ni bin esi aḍioph abin a mint ra ruu r’oomo ịpheripho ịizupha phọ rọsighe ghan bọ kọdughemhiom eḍien,* kụolo nyinha mẹgunhom elhiom ọoruen phọ r’ẹphomhoghian phọ Ẹnhaan! Ẹkpe ni dị nyinha kẹngo bin esi aḍioph abin phọ, kụolo ị́ma imiteom mọ nyinha kẹgunhom ịphoripho ạraraar phọ ịphen phọ. 43 Ịmhinhimhiin kụ kịrolhonhaan inyinha ạbuo ạ Fạrisi phọ, loor esi dị ịḅeraan inyinha ọrolhom ạsigada aghisigh* ẹpe arubughotu phọ ḅịlhe dị awe kịmhagh ghan inyinha r’eghuan ẹpe aḍighi phọ! 44 Ịmhinhimhiin kụ kịrolhonhaan inyinha, loor esi dị nyinha ẹkigh iiḍi dị awe úlegheri mụn, kụ rọozeghi ghan koten!”

45 Kụ oye dị alhegheri Olhogh phọ agey ạphagharanhaan nyọdi mọ: “Ọtughemhia, nạ rụḅenhi yogh aani ghan iyoor esi ịphen nạ ạghaaph bọ.” 46 Kụ ọdi ạḅem mọ: “Ịmhinhimhiin kụ kịrolhonhaan inyinha ạbuphe olhegheri bọ Olhogh phọ agey, loor esi dị nyinha releti yogh ghan we sidool dị ẹemor, kụolo ghạlhamo r’ạḍunhugh anyinha bịn nyinha rẹ́wa ghan ọḅoghom aani!

47 “Ịmhinhimhiin kụ kịrolhonhaan inyinha, loor esi dị nyinha ẹmaar reselhemhi ghan iiḍi ariil phọ, kụolo ạburude ạburude phọ anyinha kụ ụze bịdi! 48 Ọkar agey nyinha elegheri ni rạraar phọ ạburude ạburude phọ anyinha oḍighi bọ, kụ ịḅeraan kẹn ni inyinha, loor esi dị bịdi ụze riil phọ kụ nyinha reselhemhi ghan iiḍi ariil phọ. 49 Pọ kụ ịyaar phọ Ẹnhaan r’ọsu olhoghi ạḅem bọ mọ: ‘Mị katom ni riil r’abutelhedom ạkiom bịdi, kụ bịdi kọze ni ọḅilhe ọgbiphoghom buniin ạbidi, 50 pịdi ịḅaal oomo ariil phọ mozu ghan bọ k’emhiighom* aḅirinhi phọ ẹtol ẹmhu oghiil phọ ọphon phọ, 51 emhiigh ịḅaal phọ Ebẹl kụ esi ịpe ạ Zẹkạrạyạ, ọpo oghiigh bọ igbo ẹkpan phọ r’otu phọ.’* Ii, mị rịḅenhi ghan inyinha mọ, kopuru ni ịḅaal phọ ạbidi ḍịghaagh oghiil phọ ọphon phọ.

52 “Ịmhinhimhiin kụ kịrolhonhaan inyinha ạbuphe olhegheri bọ Olhogh phọ agey, loor esi dị nyinha mẹsighe ẹduanham ịsabi olhegheri ịyaar phọ. Nyinha phọ r’aloor íḍigh, kụ nyinha resophoghom ghan kẹn bụphe rọwa bọ oḍigh phọ!”

53 Kụ a Jizọs romite sịphe phọ, kụ ạbutughemhia Olhogh phọ r’ạbuo ạ Fạrisi phọ omhiigh ọoḅaghamhi ọdi iboom r’opuru ọdi ịbadi ịnhon asipuru, 54 kụ okoriom ghan ọsighe ịyaar dị ọdi kạkaaph osiphom ọdi.