Ọdaphan Ịpe ạ Mạk Ạge Bọ

10 Ọdi rọḅua ẹpe phọ kụ ạghi asi ẹpe ạruuku phọ a Judia edi bọ, ẹḅeenyom Ọphiiny ạ Jọdạn, kụ aḍiboom aḍita awe ọḅilhe ookpomhoghan sịphe ọdi odi bọ. Kụ ọdi ạḅilhe amhiigh ọtughemhi ạbidi ịdipho ọdi raḍighi ghan bọ. 2 Kụ ạbuo ạ Fạrisi phọ oru ọteeny nyọdi r’ạḍiitughian ọdegh ọdi ophogh, kụ opuru mụghumo ẹkpeanhaan ni dị oye kaseere ạnhir ọdi. 3 Kụ ọdi ạphagharanhaan bịdi mọ: “A Mozis ạto ịḅenhi inyinha mọ iḍighi ghan ika?” 4 Kụ bịdi mọ: “A Mozis amheera ni mọ oye dị rạwa oseere ạnhir ọdi ạge ghan ḍịnya oseereom ạnhir kụ agbi nụun ophorogh ọdi.” 5 Kụolo a Jizọs ạḅenhi bịdi mọ: “Ọdi ạtuan ịgbagara arokpom mọ anyinha kụ ịgeanhaan bọ inyinha olhogh phọ ọphon phọ. 6 Tọrobo ịpe ẹrol bọ, k’emhiighom mọ Ẹnhaan ạlhem bọ rạraar, ‘Ọdi ạlhem bịdi ẹya r’elhephiri. 7 Esi ịduon phọ, oye kạbilhe ọde r’onhiin ọdi, 8 kụ ọdi r’ạnhir phọ ọdi* oḍighi iniin iphulhupul,’ kụ iḍighi kụ bịdi úḍighi mụn ịyal, kụolo iniin iphulhupul. 9 Esi ịduon phọ, bụphe Ẹnhaan mạḅophoghi bọ, oye kụ́gbarion.” 10 Bịdi rọḅilhe oḍigh olhoghi otu, kụ ạbumatuan phọ omhiigh opuru ọdi sipuru ịlo ịphen phọ. 11 Kụ ọdi ạḅenhi bịdi mọ: “Tọrobo oye lọ aseere ạnhir ọdi ạghi ạphin ọnhon pọ malhe ẹmha ạḅilhe aḍighi ịkaraph ạki esi ạnhir phọ ọdi, 12 kụ eḍighi mạar dị ạnhir ạḅam ikpoki kụ ạghi ạal ọnhon olom, pọ malhe ẹmha.”

13 Awe umhiigh ni oruom ọdi ịbam ạnmuny dị ọdi kạḅogh, kụolo ạbumatuan phọ ụḅaam ni bịdi. 14 Kụ a Jizọs ạmhiin bọ ịphen phọ iphin ni esi ọdi kụ ạḅenhi bịdi mọ: “Imeera ịbam ạnmuny phọ oru ụteeny ịmhi; késophoghom bịdi, loor esi dị Ọmhar phọ Ẹnhaan ọlo ọdo phọ ạbuen phọ. 15 Mị ạkar rịḅenhi ghan inyinha mọ, tọrobo oye lọ ụ́sighe Ọmhar phọ Ẹnhaan ịdipho ọbumoony rạsighe ghan bọ ịyaar, káḍigh ni bịn Ọmhar phọ.” 16 Kụ ọdi aḅerion ịbam ạnmuny phọ, ạḅamham rạghaagh ọdi bịdi, kụ amhiigh ọseph ạbidi.

17 Ọdi romite sịphe otu phọ rạḍua, kụ oye aghiil aru akpuḍian ghisigh ọdi kụ apuru nyọdi mọ: “Ogey Ọtughemhia, mị kaḍighi eeghe kụ ạmoogh ghuḍum k’agee-pọ?” 18 Kụ a Jizọs ạḅenhi nyọdi mọ: “Uḍighi ika kụ nạ ụmhagh bọ ịmhi mọ ogey? Ọnhon oye ólho dị aḍighi ogey emuton Ẹnhaan. 19 Nạ alegheri ni iilhogh phọ ẹḅem bọ mọ: ‘Kạ́ko enu, kále ẹmha, kámi imhi, kạ́gbaanhaan oye ịkaraph ạsiagba, káagbegheḍiom oye, lọgh eegu ọde r’onhiin ạna.’” 20 Kụ oye phọ ạḅenhi nyọdi mọ: “Ọtughemhia, mị raako ghan ni oomo ịphen phọ k’ẹghoroghor ạmhi.” 21 Kụ a Jizọs aphogh oye phọ kụ ạmhoogh ẹphomhoghian ạghi esi ọdi kụ ạḅem mọ, “Eniin ịyaar kụ isugha dị nạ kaḍighi: Kịa aalhaghi rạraar phọ nạ ạmhoogh bọ kụ ạngo ikpoki phọ rukulhom mọ, bịn nạ kạmoogh ni ephua ẹpe k’ạke; kụ aru aḍighi ọnyo ạmatuan ạmhi.” 22 Kụolo olhoghi ọdi ọ́ḅaal loor esi ọphagharanhaan phọ, kụ ọdi akururu, kụ ạḅua, loor esi dị ọdi ạmoogh iboom ạraraar.

23 Kụ a Jizọs aphogh we phọ akitonhom, kụ ạḅenhi bụmatuan phọ ọdi mọ: “Kẹkpar ri dị bụphe ọmhoogh bọ ikpoki koḍigh Ọmhar phọ Ẹnhaan!” 24 Kụ ịphen ọdi ạghaaph bọ iḍighi ni iikia esi ạbumatuan phọ. Kụ a Jizọs ạḅenhi bịdi mọ: “Nmụny phọ, pọ eeghe ịdi ẹkpar oḍigh Ọmhar phọ Ẹnhaan! 25 Edugh ghụn dị ạ kạmẹl kạbol epogh ạlaga epu dị ọolha kaḍigh Ọmhar phọ Ẹnhaan.” 26 Kụ ịphen phọ ịḅilhe ni eḍighi iikia esi ạbidi kụ opuru nyọdi* mọ: “Ạnhian nụun kụ ẹdi kọkar bọ ọpel?” 27 Kụ a Jizọs aphogh bịdi akiririom, kụ ạḅenhi bịdi mọ: “Esi awe ịphen phọ kétue emite, kụolo ílo aani ịdipho esi Ẹnhaan, loor esi dị ịyaar ílo dị Ẹnhaan kátue aḍighi.” 28 Kụ a Pita ạḅenhi nyọdi mọ: “Yoor mọwilhe oomo ạraraar ọdaph nyịnha.” 29 Kụ a Jizọs ạḅem mọ: “Mị ạkar rịḅenhi ghan inyinha mọ, oye ólho dị mạwilhe otu ọbobo bumor ọbobo bumaranhi ọbobo onhiin ọbobo ọde ọbobo ạnmuny ọbobo iizo loor ẹmhu ạmhi r’iiḅi ịinhaghan phọ, 30 dị kạ́moogh nyịidipho 100 amem apuemhi ruutu, bumor, bumaranhi, burunhiin, nmụny, r’iizo r’ịgbiphoghom, kụ ẹpe aḅirinhi phọ ratu bọ* ạmoogh ghuḍum k’agee-pọ. 31 Kụolo ịbadi awe dị oḍighi bụḅel koḅula ni ọmhan, kụ bụdi odi ọmhan oḍighi bụḅel.”

32 Mem dị bịdi odi eten ọsiiny rọki Jeruselem, a Jizọs aḍia ni ghisigh ạbidi, kụ eḍighi iikia esi ạbidi, kụolo bụphe ọdaph bọ bịdi umhiigh ni oghiilhaan. Kụ ọdi ạḅilhe ạmhagh Ḍioph r’ Ịyal phọ atenhom ọgbal kụ amhiigh ọḅenhi ạbidi rạraar phọ kemitenhaan bọ nyọdi mọony amem, mọ: 33 “Ịmiin! Yira rọki Jeruselem, kụ kọḅogh ni Ọony phọ oye ọlogh ḍịghaagh aruwo ẹmhu ạbupinyon rịkia phọ r’ạbutughemhia Olhogh phọ. Bịdi kosoph ni ọoruen aḍuugh opumhe nyọdi kụ ọḅogh nyọdi ọngo we areelhe phọ. 34 Kụ bụen phọ kọgilaam ni nyọdi, ọsinhoghom ịghor, ọḅilhe ọgurogh kụ okiigh, kụ ọdi aḅetenhu esi aḍuugh omhunhenhiom ịraar aḍughul otu phọ.”

35 A Jems rạ Jọn, ạnmuny phọ ạ Zẹbẹdi, uru ni ọteeny nyọdi kụ ọḅenhi nyọdi mọ: “Ọtughemhia, yoor rọwa mọ uḍighinhaan iyoor tọrobo ịyaar lọ yoor ọlhom nyịnha.” 36 Kụ ọdi apuru bịdi mọ: “Nyinha rẹwa mọ mị uḍighinhaan inyinha eeghe?” 37 Kụ bịdi ọphagharanhaan mọ: “Mem dị nạ mạrolhom ạgada eghuan phọ ạna, meera yoor ụtol r’ạna, oniin ḍịghaagh elhiom oniin ḍịghaagh ekeeny.” 38 Kụ a Jizọs ạḅenhi bịdi mọ: “Nyinha ílegheri ịyaar phọ nyinha rẹlom bọ. Nyinha ketue ni ẹpugholhom mọgo phọ mị rạpugholhom bọ ọbobo nyinha ketue ni eḍiiny aani ọdo oḍiiny ạmuum mọ ruḍiinye bọ ịmhi?” 39 Kụ bịdi ọḅenhi nyọdi mọ: “Yoor kotue ni.” Kụ a Jizọs ạḅenhi bịdi mọ: “Nyinha kẹpugholhom ni mọgo phọ mị rạpugholhom bọ, ẹḅilhe eḍiiny ọdo oḍiiny ạmuum mọ ruḍiinye bọ ịmhi. 40 Kụolo mị kụ kákol oye dị kạtol ḍịghaagh elhiom r’ạḍighaagh ekeeny ạmhi, loor esi dị bụphe mookolhobinhaan bọ riisi phọ ịpe phọ kụ kọtol.”

41 Mem mọ aḍioph phọ ạbueripho ọnhaghan bọ ịphen phọ, bịdi ụghagham ni olhoghi Jems rạ Jọn. 42 Kụolo a Jizọs aakpomhoghi ni oomo ạbidi kụ ạḅenhi mọ: “Nyinha elegheri ni mọ bụphe ẹghigh bọ mụdi bịdi kụ rọtooghi aḅirinhi phọ roponhomaam ghan ni bụphe bịdi rọtooghi bọ kophogh, kụ igbogh awe phọ rọsighe ghan ịikpo phọ ạbidi kowiririom we phọ. 43 Ị́kpeanhaan dị kẹtol ịduon sịen igbo phọ anyinha; kụolo tọrobo oye lọ rạwa oḍighi ogbogh sịen igbo phọ anyinha akumu ghan ạngo bụeripho, 44 kụ tọrobo oye lọ rạwa oḍighi ọḅel sịen igbo phọ anyinha ạmoogh oḍighi ẹbenhe oomo anyinha. 45 Loor esi dị, ghạlhamo r’Ọony phọ oye bịn óru dị kokumu ọngo nyọdi, kụolo aru okumu ọngo ạbunhon r’ọsighe aghuḍum mọ ọdi ọkpeom pịdi ẹtagharan ịbadi awe.”

46 Kụ bịdi oḍigh Jeriko. Kụolo ịduon ọdi r’ạbumatuan phọ ọdi r’aḍiboom aḍita awe rọḍua bọ Jeriko, ạ Bạtimiọs (ọony a Timiọs), ọlom le dị rạ́miin ghan eten, ạrol li sịphe ọgbal eten phọ. 47 Kụ ọdi ạnhaghan bọ mọ a Jizọs ọpo ạ Nạzẹrẹt kụ raten, amhiigh ni ọlooghi ọḅem mọ: “Jizọs, Ọony a Devid, ụnma ịmhi ighirigiir!” 48 Esi ịduon phọ ịbadi awe uubophoghi ni nyọdi, kụ ọḅenhi ghan mọ aḅoorian, kụolo ọdi ạkuamhi ghan bịn ạlo mọ: “Ọony a Devid, ụnma ịmhi ighirigiir!” 49 Kụ a Jizọs ạmheera kụ ạḅem mọ: “Ịmhaghanhaan ịmhi nyọdi.” Kụ bịdi ọghi ọmhagh oye phọ rạ́miin ghan bọ eten phọ, kụ ọḅenhi mọ: “Kpọ oḅio! Ḅetenhu; ọdi rạmhagh nyịnha.” 50 Kụ oye phọ aroph ạsuoma ạnyu phọ ọdi, aḅetenhu eginha amem ạghi ạteeny Jizọs. 51 Kụ a Jizọs apuru nyọdi mọ: “Nạ rạwa mọ mị uḍighinhaan nyịnha eeghe?” Kụ oye phọ rạ́miin ghan bọ eten phọ ạḅenhi nyọdi mọ: “Rạboni,* ḍighi ịdi mị kạmiin eten.” 52 Kụ a Jizọs ạḅenhi nyọdi mọ: “Keel. Omheeraam mọ ạna maakonhom nyịnha.” Bịn mem mem mọ ọdi amhiigh ọmhiin eten, kụ amhiigh ọdaph a Jizọs ẹpe eten phọ.