Ọdaphan Luk

22 Mem mọ ọpo phọ Ẹyaal ạ Brẹd Phọ Yist Rọ́logh Ghan Bọ, oghol bọ mọ Ẹyaal Ọphel Otenhe phọ rẹkpul. 2 Kụ aruwo ẹmhu ạbupinyon rịkia phọ r’ạbutughemhia Olhogh phọ ụwa ghan eten dị ẹkar ẹnhighe ọsighe oghiighom ọdi, loor esi dị bịdi ughiilhaan ghan we phọ. 3 Kụ a Setạn aḍigh loor a Judas, ọpo oghol bọ mọ Iskạrịọt, oniin sịphe a Ḍioph r’ Ịyal phọ, 4 kụ ọdi ạghi ạteeny ruwo ẹmhu ạbupinyon rịkia phọ r’aruwo ẹmhu abukoriom otu ịiḅereghi phọ ạghaaphan ịlo aalha ạbidi nyọdi. 5 Ịphen phọ ịḅaal li olhoghi ạbidi kụ ọḅem mọ bụno kọngo nyọdi ikpoki a silva. 6 Kụ ọdi amheeraam kụ amhiigh ọwa ịma eepoogh dị ọdi kaboolha bịdi nyọdi mem dị aḍita awe úlo.

7 Aḍio phọ role ghan bọ Ẹyaal ạ Brẹd Phọ Yist Rọ́logh Ghan Bọ iru ni ẹteeny, kụ aḍio phọ ạḍiphe phọ kụ ẹdi rọpighiron ghan bọ ẹkia Ọphel Otenhe phọ. 8 Kụ a Jizọs arom Pita rạ Jọn mọ: “Ịki eekolhobian ịlo Ẹyaal Ọphel Otenhe phọ pịdi yira ole.” 9 Kụ bịdi opuru nyọdi mọ: “Ḍighen kụ ẹdi nạ rạwa mọ yoor ụki uukolhobian?” 10 Kụ ọdi ạḅenhi bịdi mọ: “Ịmiin! Mem dị nyinha eḍigh ẹmha phọ, oye dị ạpham oko ạmuum katu ni ịteeny inyinha. Ịdaph nyọdi eḍigh otu phọ ọdi kaḍigh bọ. 11 Ịḅenhi uwo otu phọ mọ, ‘Ọtughemhia phọ ạḅem mọ yoor upuru nyịnha mọ: “Odi ẹghen osoph aruuruen phọ ọpo mị r’ạbumatuan phọ ạmhi kọtol bọ ole Ẹyaal Ọphel Otenhe phọ?”’ 12 Kụ oye phọ kiḍeenhaan ni inyinha oboom osoph ạnyu sịphe otu ẹedanheen phọ dị moselhemhi. Iikolhobian sịphe phọ ịlo Ẹyaal Ọphel Otenhe phọ.” 13 Kụ bịdi ọghi kụ ọmhiin dị edi ọkar ịpe ọdi ạḅenhi bọ bịdi, kụ ookolhobian ịlo Ẹyaal Ọphel Otenhe phọ.

14 Amem mọ rẹteeny, kụ ọdi r’abutelhedom mọ ọdi ọrol ịdaabili. 15 Kụ ọdi ạḅenhi bịdi mọ: “Mị ụkar kụ ạwa ghan olhe Ẹyaal Ọphel Otenhe phọ ẹphen phọ r’anyinha kụ egbi ọteeny amem ịmhinhimhiin phọ ạmhi; 16 ịdi eḍighi bọ mị rịḅenhi ghan inyinha mọ, mị kále mụn ẹyaal phọ ẹphen phọ tụtu oomo ạraraar dị egbolhomaam ẹyaal phọ emhunhughan ẹpe Ọmhar phọ Ẹnhaan.” 17 Ọdi rọsighe mọgo, kụ ạngo Ẹnhaan ḍịseph kụ ạḅem mọ: “Itiin ẹphughol, oniin ạḅogh ạngo nyoniin, 18 ịdi eḍighi bọ mị rịḅenhi ghan inyinha mọ, emhiigh rodon phọ kụ rẹki, mị kạ́pughol mụn miim mọ ạmuen phọ tụtu Ọmhar phọ Ẹnhaan aru.”

19 Kụ ọdi ạḅilhe ạsighe ạ brẹd, ạngo Ẹnhaan ḍịseph, kụ ạparion ạngo bịdi, kụ ạḅem mọ: “Ạ brẹd phọ ọphon phọ ạmeera esi aḍizu phọ ạmhi, mị kịtuan bọ inyinha kụ ạngo. Iḍighi ghan ịduon phọ ịlo ọotughian ghan ạmhi.” 20 Bịdi rolhe eḍien adulhe phọ rọmhan, kụ ọdi ạsighe mọgo phọ aḍighi aani iginha phọ, kụ ạḅem mọ: “Ạmogo phọ ọphon phọ ạmeera esi imhoom ịyo phọ kemiigh bọ mem dị mị ịtuan inyinha azu ịḅaal phọ ạmhi.

21 “Kụolo ịmiin! ọpo kaal bọ ịmhi odi ni sịen ịdaabili phọ r’ạmhi. 22 Ọkar agey, oomo ạraraar phọ ọge bọ ịlo Ọony phọ oye kemunughan ni; tọrobo ịpe ẹrol bọ, ịmhinhimhiin kụ kẹtolhonhaan oye phọ ọpo kabool bọ Ọony phọ oye!” 23 Kụ bịdi omhiigh oopuruan ịlo oye phọ ạkar bọ rạwa oḍighi ịduon phọ sịphe igbo phọ ạbidi.

24 Tọrobo ịpe ẹrol bọ, iboom ịigbaghanhaan imite ni sịphe igbo phọ ạbidi ịlo oye dị aḍighi ọkaraghi ogbogh. 25 Kụolo ọdi ạḅenhi bịdi mọ: “Aruwo ẹmha aḅirinhi phọ roponhomaam ghan ni bụphe bịdi rọtooghi bọ kophogh, kụ olegheriom bụtooghia phọ ịdipho awe dị roḍighi ghan iiḅi bụnhon. 26 Kụolo ị́kpeanhaan dị nyinha kẹtol aani ịdipho phọ. Kpạripe ghụn ọkaraghi ogbogh sịen igbo phọ anyinha ạrol ịdipho ọdi aḍighi ọkaraghi ọbam, kụ ọpo raḍiemhiom bọ ạrol ịdipho ọdi rakumu kạngo bụnhon. 27 Sịen ọpo rale bọ eḍien phọ r’ọpo rạḅamhaghinhaan bọ nyọdi, ạnhian kụ apu ạnhian? Kọ́po rale bọ eḍien phọ? Kụolo mị odi sịen igbo phọ anyinha ịdipho ọpo rakumu bọ.

28 “Tọrobo ịpe ẹrol bọ, nyinha kụ ịrol bọ r’ạmhi esi oomo ịiḅaghamhi phọ mị asoman bọ; 29 kụ mị righiran inyinha ịyo ịdipho Ọde phọ ạmhi mughiran bọ ịmhi ịyo, ịlo ọngo ạmhi Ọmhar, 30 pịdi nyinha ẹtol sịphe ịdaabili phọ ạmhi ele ẹpughol r’ạmhi ẹpe Ọmhar phọ ạmhi ẹḅilhe ẹtolhoghuom sịgada ịtooghi oogbonhaan ịiruen 12 arughunhughun phọ Izrẹl.

31 “Sạịmọn, Sạịmọn, mịin! a Setạn mạḅem mọ ọno rạwa ọsal oomo anyinha ịdipho a wit. 32 Kụolo mị maghol li nyịnha ạaḅereghian Ẹnhaan mọ omheeraam mọ ạna kúdugh; kụ mem dị nạ aḅula, kpạramhi bumor phọ ạna.” 33 Kụ ọdi ạḅenhi nyọdi mọ: “Uwo Ẹmhoogh, mị ạnya ni ọdaph ạna ọghi ikoli ḅịlhe kẹn r’omhugh.” 34 Kụ a Jizọs ạḅem mọ: “Pita, mị rạḅenhi ghan nyịnha mọ, ạkenhegh kạ́laay rodon phọ tụtu nạ mạpharanhaan ịraar amem mọ nạ ịmhi úlhegheri.”

35 Kụ ọdi apuru kẹn bịdi mọ: “Mem mọ mị irom bọ inyinha mọ ịki egbeelhom dom mọ Ẹnhaan kụ nyinha ị́pam bọ okuru ikpoki r’okuru eḍien r’arokoro, ịyaar ikuom ni inyinha?” Kụ bịdi ọphagharanhaan mọ: “Eeye!” 36 Kụ ọdi ạḅenhi bịdi mọ: “Nyịidipho tọrobo ọlo ạmhoogh okuru ikpoki ọbobo okuru eḍien ạpham ni, kụ ọlo ụ́moogh elhool ẹgham aal ạsuoma ạnyu ọdi aghoom nyeniin. 37 Ịdi eḍighi bọ mị rịḅenhi ghan inyinha mọ ịpe ọge bọ ịlo ạmhi mọ, ‘Ugbiom nyọdi ọlhoghom busoroghuom iilhogh phọ’ ẹmoogh omhunhughan. Kụ ịphen phọ memhiigh remunhughan esi ạmhi.” 38 Kụ bịdi ọḅem mọ: “Uwo Ẹmhoogh, pọrono sịen ịyal arolhool ẹgham.” Kụ ọdi ạḅenhi bịdi mọ: “Mẹkasian ni.”

39 Ọdi rọḍua sịphe phọ, kụ ạghi ẹpe Ẹeḅaraph phọ Olivs ịdipho eḍighi bọ eḍighinhom ịyaar ọdi, kụ ạbumatuan phọ ụdaph ni nyọdi. 40 Bịdi rosi esi phọ, kụ ọdi ạḅenhi bịdi mọ: “Ịkiom ghisigh ẹeḅereghi ghan, ọbo nyinha keḍigh ghan bọ esi ọdegh ophogh.” 41 Kụ ọdi arelhe ạḅua sịphe bịdi odi bọ ẹnum,* kụ akpuḍian amhiigh ọoḅereghi 42 mọ: “Ọde, eru mạar dị nạ rạwa ni pọ sịghe mọgo phọ ọphon phọ ghisigh ạmhi. Kụolo ogbi ạmhi kụ kúmite, ọpo ạna kụ amite.” 43 Kụ ọokpaany ạḅua k’ạke aru ạkparamhi nyọdi. 44 Kụolo ọdi amheelhom ni oboom ọto dị tụtu ạkuamhi ghan bịn ạaḅereghi r’oomo ekpom; kụ elhomhan phọ ọdi reteph bọ ẹghigh ịḅaal. 45 Ọdi rọoḅereghi rọmhan kụ ạghi ạteeny bụmatuan phọ ọdi, kụ ạmhiin dị bịdi rọnaanhi, ịdi eḍighi bọ asiloor phọ medugh loor esi ọto. 46 Kụ ọdi ạḅenhi bịdi mọ: “Uḍighi ika kụ nyinha rẹnaanhi bọ? Iḅerenhu ẹghiom ghisigh ẹeḅereghi ghan, ọbo nyinha keḍigh ghan bọ esi ọdegh ophogh.”

47 Ọdi odi ni rạkaaph, bịn aḍita awe dị a Judas, oniin sịphe a Ḍioph r’ Ịyal phọ, kụ aḍiemhiom oru, kụ a Judas ạghi ạteeny Jizọs ọkpun. 48 Kụolo a Jizọs apuru nyọdi mọ: “Judas, nạ ạsighe ḍịkpun kụ raboolhom Ọony phọ oye?” 49 Mem dị bụphe odi bọ r’ọdi ọmhiin bọ ịpe rẹwa bọ omite phọ, bịdi ụḅem mọ: “Uwo Ẹmhoogh, yoor ụsighe elhool ẹgham mọ ubian bịdi?” 50 Kụ oniin ọnyo ạbidi asoph ni aḅeri ẹbenhe ogbogh ọpinyon rịkia phọ. 51 Kụolo a Jizọs ạḅem mọ: “Mẹnhighe ni.” Kụ ọdi ạḅogh aḅeri ẹbenhe phọ kụ aakonhom. 52 Kụ a Jizọs ạḅenhi ruwo ẹmhu ạbupinyon rịkia phọ r’aruwo ẹmhu abukoriom otu ịiḅereghi phọ r’ikumor awe phọ oru bọ osiph ọdi mọ: “Mị ạkigh ọḅa kụ nyinha ẹpam bọ rolhool ẹgham r’ạraḅam etu osiphom ạmhi? 53 Mị ạrol ghan bọ ẹpe otu ịiḅereghi phọ r’anyinha ḍio etum ḍio nyinha ịmhi ísiph, kụolo mụen amem anyinha r’amem dị ạbuo ufiri phọ koḍeenhaan ịikpo ạbidi.”

54 Kụ bịdi osiph nyọdi ọḍuanham, kụ ọpham ọghimhom k’ogbogh ọpinyon rịkia phọ; kụ a Pita ạdaph ni bịdi kụolo ạrol k’ẹpe ọmhan. 55 Buniin awe ụkpoonhi ni nịan pạ ogbo ogiga phọ ọrolhoghu ude, kụ a Pita ạrol aani ni r’ạbidi. 56 Kụolo oniin ẹbenhe ọnyanhi ạmhiin ni nyọdi sịphe ạrol bọ ude phọ atuman nịan phọ, kụ akiririom aphogh kụ ạḅem mọ: “Oye phọ ọphon phọ ạrol aani ghan ni r’ọdi.” 57 Kụolo ọdi ạpharanhaan ni mọ: “Nyạnhi phọ, mị úlegheri nyọdi.” 58 Mọony amem reten bịn ọnhon oye ạmhiin nyọdi kụ ạḅem mọ: “Nạ oniin ọnyo ạbidi aani ni.” Kụolo a Pita ạḅem mọ: “Oye phọ, mị kọ́nyo ạbidi.” 59 Rẹki ọmhan oniin ạwa, kụ ọnhon oye amhiigh ọghaaph ọkpaariom mọ: “Ọkar agey oye phọ ọphon phọ ạrol aani ghan ni r’ọdi, iikia ílo, ọdi ọlo ạ Gạlili!” 60 Kụolo a Pita ạḅem mọ: “Oye phọ, mị úlegheri ịphen nạ rạkaaph bọ.” Kụ ọdi odi ni rạkaaph, bịn ạkenhegh ạlhaay. 61 Kụ Uwo Ẹmhoogh phọ akiton aphogh Pita, kụ a Pita ạatughian ịpe Uwo Ẹmhoogh phọ ạḅenhi bọ nyọdi mọ: “Tụtu ạkenhegh rạlaay rodon phọ, nạ kụpharanhaan ni ịmhi ịraar amem.” 62 Kụ ọdi amite erugh kụ amhoghi egey phọ emoghi.

63 Mem mọ ọpo phọ awe phọ rokori bọ Jizọs umhiigh ni ọgilaam ọdi r’ọgiphogh ọdi; 64 kụ rọsighe ịyaar rozuom risigh ọdi, kụ ọḅem ghan mọ: “Mọ nạ oyil pọ ụḅenhi iyoor oye phọ ạgiph bọ nyịnha.” 65 Kụ bịdi ụghaaph ni ịbadi ịnhon ịkaraph ạraraar ịlo a Jizọs dị ẹepu ḍien phọ Ẹnhaan.

66 Rẹḅaal, kụ aḍita ikumor awe phọ, ịduon phọ pọ, aruwo ẹmhu ạbupinyon rịkia phọ r’ạbutughemhia Olhogh phọ, ookpomhoghan, kụ ọpham nyọdi ọghimhom ẹpe ạ Sạnhẹdrin* phọ kụ ọḅem mọ: 67 “Mọ nạ kụ ạ Krạịst phọ pọ ụḅenhi iyoor.” Kụolo ọdi ạḅenhi bịdi mọ: “Ghạlhamo mị ịḅenhi ni inyinha, nyinha kémeeraam. 68 Kụ ọḅaram ịsien, mị ipuru inyinha ḍipuru, nyinha kẹ́pagharanhaan. 69 Tọrobo ịpe ẹrol bọ, emhiigh nyịidipho kụ rẹki, Ọony phọ oye kạtol li ḍịghaagh elhiom Ẹnhaan ịikpo phọ.” 70 Bịdi rọnhaghan ịphen phọ kụ ọḅem mọ: “Ịduon phọ pọ nạ rạḅem ghan mọ nạ Ọony Ẹnhaan?” Kụ ọdi ạḅenhi bịdi mọ: “Nyinha r’aloor kụ rẹkaaph.” 71 Kụ bịdi mọ: “Yira ọḅilhe rọwa ghan we dị kọkaaph rạraar ịlo ọdi oḍighinhom eeghe? Yira mọnhaghan ni dị ẹḅua ọnhu ọdi emite.”