Ọdaphan Luk
13 Mem mọ ọpo phọ awe dị ọrol sịphe phọ ụḅenhi ni nyọdi ịlo awe ạ Gạlili dị rọpinyon rịkia kụ ạ Pạịlet ạze. 2 Kụ ọdi ạphagharanhaan bịdi mọ: “Nyinha regbi mọ awe ạ Gạlili phọ ịpe phọ emitenhaan bọ kụ uḍighi ịkaraph opu bụnhon awe ạ Gạlili ḍụghum? 3 Eeye, kụolo mị rịḅenhi ghan inyinha mọ; eḍighi mạar dị nyinha íkiton, pọ kopiemhi ni oomo anyinha ịdipho ophiemhi bọ bịdi. 4 Ọbobo nyinha regbi mọ 18 awe phọ otu ạnyu phọ amhelheghuom bọ ạze ẹpe Siloạm kụ uḍighi ịkaraph opu oomo awe phọ orugh bọ Jeruselem? 5 Eeye, kụolo mị rịḅenhi ghan inyinha mọ; eḍighi mạar dị nyinha íkiton, pọ kopiemhi ni oomo anyinha ịdipho ophiemhi bọ bịdi.”
6 Kụ ọdi ạḅenhi bịdi ọghaaph ọmaanhiom mọ ọphon, mọ: “Oniin oye ạzuph ni oreeny a fig ozo ạ vạịn ọdi, kụ aru ophogh mọ ọdi kạmiin ni eemhumha, kụolo ọ́mhiin r’eghuuny. 7 Kụ ọdi ạḅenhi oye phọ rakumuan ghan bọ sịphe ozo ạ vạịn phọ mọ, ‘Sịen ịraar ạsia mị ratu ghan bọ ophogh mọ mị kạmiin ni eemhumha sịen oreeny a fig phọ ọphon phọ, kụolo mị rạ́miin ghan r’eghuuny. Benhogh alher! Uḍighi ika kụ odi bọ sịen ade phọ ạḍien kụ rámuum bọ iimhumha?’ 8 Kụ oye phọ ạphagharanhaan mọ, ‘Oye phọ, bịlhe ạḅilhe ạrol ḍiniin ạlha, mị uguph ukitonhom ukpolhom rạraar dị kẹngo ẹnhuum. 9 Eḍighi mạar dị amhuum ni iimhumha, pọ ẹnighe ni; kụolo eḍighi mạar dị úmuum kụ alher.’”
10 Ḍiniin a Ḍio Ophooghian ọdi ạrol li oniin obughotu ạtughemhi ghan. 11 Kụ oniin ạnhir ạrol li sịphe phọ dị ọkaraph uwaloor aḍighi ịdi odi ghan émoon* esi a 18 ạsia; ạnhir phọ ạkoma ni kụ órue ghan ọmheera osel. 12 A Jizọs rọmhiin nyọdi, kụ ạḅenhi mọ: “Nhịr phọ, mookonhom émoon phọ ạna.” 13 Kụ ọdi ạḅamham rạghaagh ọdi ạnhir phọ, bịn mem mem mọ ạnhir phọ ạmheera asel kụ amhiigh oghuenhi Ẹnhaan. 14 Kụolo oḍiemhiom ịsiphe obughotu phọ ạghagh ni olhoghi loor ịduon a Jizọs aakonhom bọ oye Ḍio Ophooghian phọ, kụ ạḅenhi ḍita awe phọ mọ: “Odiiny aḍughul otu edi ni dị ẹkpe oḍighi ghan oḍighi; esi ịduon phọ, itu ghan siḍughul otu phọ ịpe phọ kụ eekonhoma siloor anyinha, ká Ḍio Ophooghian phọ.” 15 Kụ Uwo Ẹmhoogh phọ ạphagharanhaan nyọdi mọ: “We ịyal arisigh, Ḍio Ophooghian phọ nyinha rẹ́katan ghan ḍịen nạm ọbobo ẹnham adool anyinha sịphe otu ịnham mọ kemiteom ẹghi ẹngo mụum? 16 Ị́kpe dị kookonhom ạnhir phọ ọphon phọ Ḍio Ophooghian phọ, aḍighi bọ ni ọnyanhi Ebrạhạm kụ a Setạn mạmhiinhe bọ 18 ạsia?” 17 Mem mọ ọdi ạghaaph bọ rạraar phọ ịphen phọ, umugholoor amhiigh ni osiph oomo ạbuphe rosophoghom bọ nyọdi, kụolo aḍita awe phọ umhiigh ni obo loor esi oomo ịikia ạraraar phọ ọdi aḍighi yogh bọ.
18 Kụ ọdi ạḅilhe ạḅem mọ: “Ọmhar phọ Ẹnhaan ạkigh eeghe, kụ mị kạmaaniom eeghe? 19 Ạkigh ekpo ạ mọstạd dị oye ạsighe ạghi ạzuph oghoony ịizupha ọdi, kụ eḍum eḍighi oreeny, kụ ịnhun ẹghi ẹlhoghoḍi ruutu sịphe ịla phọ.”
20 Kụ ọdi ạḅilhe ạḅem mọ: “Mị kạmaaniom eeghe Ọmhar phọ Ẹnhaan? 21 Ạkigh yist dị ạnhir ạsighe aaḅughonhom ịraar ogbogh ọtoom* ạ flạwạ tụtu oomo ạ flạwạ phọ aru.”
22 Ịduon ọdi rạki bọ Jeruselem, ọdi ạḍua ghan ni egbogh ẹmha ạgba egbogh ẹmha ạḅilhe ạḍua ẹbam ẹmha ạgba ẹbam ẹmha, ạtughemhi ghan we. 23 Kụ oniin oye apuru nyọdi mọ: “Uwo Ẹmhoogh, bụphe kọpel bọ okom ni?” Kụ ọdi ạḅenhi bịdi mọ: 24 “Ịlogh iboom ịnyaam oten ọnhu aḍibuo phọ aghom bọ kụ oḍigh, loor esi dị mị rịḅenhi ghan inyinha mọ, ịbadi awe kọwa ni oḍigh kụolo kótue. 25 Mem dị uwo otu phọ aḅetenhu ạkasi eghuugh phọ, nyinha kẹmeera ni erugh ekar ghan eghuugh phọ, kụ ẹḅem ghan mọ, ‘Uwo Ẹmhoogh, ughughuronhaan iyoor.’ Kụolo ọdi kịphagharanhaan inyinha mọ: ‘Mị úlegheri ekpisi dị nyinha ẹḅua kụ eru.’ 26 Kụ nyinha emiigh ọḅem mọ: ‘Yoor ulhe ni ọphughol r’ạna, kụ nạ ạḅilhe ạtughemhi ghan ẹpe aroḅodo phọ ayoor.’ 27 Kụolo ọdi kịḅenhi inyinha mọ, ‘Mị úlegheri ekpisi dị nyinha ẹḅua kụ eru. Ịḍua sịen ghisigh ạmhi buḍighinhom ịkaraph!’ 28 Mem dị nyinha ẹmhiin Ebrạhạm, r’ Ạịzik, ra Jekọb, r’oomo ariil phọ dị odi ẹpe Ọmhar phọ Ẹnhaan, kụolo iroph inyinha omiteom erugh, nyinha kẹtol li ẹpe phọ emoghi yogh ẹḅilhe ẹkirigha rạlhaal anyinha. 29 Ọḅaram ịsien, awe kọḍua ni ẹpe erumhuḍio phọ remite ghan bọ r’ẹpe erumhuḍio phọ remeel ghan bọ r’ẹpe ẹsiinyom mọ r’ẹpe esoorom mọ, otu ọtol ịdaabili sịphe Ọmhar phọ Ẹnhaan. 30 Kụ ịmiin! buniin ạbudi odi ọmhan koḍighi ni bụḅel, kụ buniin ạbudi oḍighi bụḅel oḅula ọmhan.”
31 Mem mọ ọpo phọ buniin ạbuo ạ Fạrisi phọ uru ni ọteeny nyọdi kụ ọḅenhi mọ: “Ḍụa ẹphen phọ ạghi ẹnhon ekpisi, loor esi dị ạ Hẹrọd rạwa oghiigh ạna.” 32 Kụ ọdi ạḅenhi bịdi mọ: “Ịki ẹḅenhi ẹekpa ako phọ ọpo phọ mọ, ‘Mịin! Rodon r’iḍue mị raporogh ịkaraph aruwaloor kạḅilhe aakonhom we, kụ mị kạmadan omhunhenhiom ịraar aḍughul otu phọ.’ 33 Tọrobo ịpe ẹrol bọ, mị ạmoogh ọghiom aghisigh erelhe phọ ạmhi rodon r’iḍue r’ọmhan iḍue, loor esi dị emuton Jeruselem, ị́kpeanhaan dị kọtol ẹnhon ekpisi kụ okiigh oyil. 34 Jeruselem, Jeruselem, ọzeom ariil phọ r’ọpo ratoḅol ghan bọ ikpo bụlo orom mọ oru ọteeny nyọdi, ịbadi amem mị mạwa ni ookpomhoghi ạnmuny phọ ạna ịdipho ạkenhegh ramughonhom ghan bọ nmụny ọdi! Kụolo nạ ọ́wa. 35 Ịmiin! Mịwilhenhaan inyinha otu phọ anyinha. Mị rịḅenhi ghan inyinha mọ nyinha ịmhi kị́mhiin mụn ni bịn tụtu nyinha ẹḅem mọ: ‘Ạḍiseph kụ edianhaan ọpo ratumhom bọ ḍien phọ a Jehova!’”*