Ọdaphan Ịpe ạ Mạtiu Ạge Bọ

5 Mem mọ a Jizọs ạmhiin bọ ḍita awe phọ, ọdi ạsiiny ni ẹeḅaraph. Ọdi rọrol ude, kụ ạbumatuan phọ ọdi oru ọteeny nyọdi. 2 Kụ ọdi amhiigh ọtughemhi ạbidi mọ:

3 “Ọḅaal olhoghi odianhaan ni bụphe olhegheri bọ mọ bụno omoghi ni ịiḅakiom Ẹnhaan,* loor esi dị Ọmhar k’ạke phọ ọlo ạbidi.

4 “Ọḅaal olhoghi odianhaan ni bụphe odi bọ ọto, loor esi dị kọodereghi ni bịdi.

5 “Ọḅaal olhoghi odianhaan ni bụuphonheen awe phọ, loor esi dị bịdi kole ni erua ade phọ.

6 “Ọḅaal olhoghi odianhaan ni bụphe ọmhoogh bọ eboom ẹephua ạraraar dị eḍighi elhiom ghisigh Ẹnhaan, loor esi dị kọgbaanyamhi ni ẹephua phọ ạbidi.

7 “Ọḅaal olhoghi odianhaan ni bụphe rọnma ghan bọ bụnhon ighirigiir, loor esi dị kọnma aani ni bịdi ighirigiir.

8 “Ọḅaal olhoghi odianhaan ni bụphe ilhoghi phọ ẹserere bọ, loor esi dị bịdi kọmiin ni Ẹnhaan.

9 “Ọḅaal olhoghi odianhaan ni bụphe rọwa ghan bọ ẹepho, loor esi dị bịdi koḍighi nmụny Ẹnhaan.

10 “Ọḅaal olhoghi odianhaan ni bụphe mọgbiphoghom bọ loor oḍighi ghan ạraraar dị eḍighi elhiom ghisigh Ẹnhaan, loor esi dị Ọmhar k’ạke phọ ọlo ạbidi.

11 “Ọḅaal olhoghi idianhaan ni inyinha mem dị awe ụtuan ịmhi kụ rịḅenhi yogh inyinha, rịgbiphoghom inyinha, ḅịlhe rịgbaanhaan inyinha ịkaraph ạsiagba kịrokiro. 12 Ibo, kụ ẹkuamhi ẹmhoogh ọḅaal olhoghi, loor esi dị ịikpia phọ anyinha ẹbugh ni ẹpe k’ạke, ịdi eḍighi bọ ịpe kụ ịdi bịdi ọgbiphoghom ni riil phọ ẹpe ọmhan.

13 “Nyinha kụ aboph ade phọ, kụolo eḍighi mạar dị aḍiroph aboph phọ ephe, koḅulhemhi bọ ika ḍiroph phọ? Ọ́mhoogh mụn mạar oḍighinhom, emuton ozu bịn dị awe kọozeghi.

14 “Nyinha kụ ạḍiḅaal aḅirinhi phọ. Ẹmha dị edi ạnyu ẹeḅaraph rẹ́booghian ghan. 15 Awe rókpereghiom ghan ọtozi dị ọsu egunhum,* rọḅam ghan ghụn ạnyu ọmheremhiom ọtozi, kụ asoor dị oomo awe otu phọ kọmiinhom eten. 16 Iginha phọ kẹn, ạḍiḅaal phọ anyinha ẹmhu dị awe kọmiin, pịdi ọmiin ịma iiḍighi phọ anyinha kụ okuenhi Ọde phọ anyinha odi bọ ẹpe k’ạke phọ.

17 “Kẹ́etughian mọ mị uru ophiemhi Olhogh phọ ọbobo ịge Ariil phọ. Mị útu ophiemhi, mị uru omhunhenhi. 18 Ọkar agey, mị rịḅenhi ghan inyinha mọ ghạlhamo ạke phọ r’ade phọ iphe ni, r’eniin ekpo ịge dị ẹkar eghom ọbobo ạpakiri ekpo ịge dị edi sịphe Olhogh phọ dị kepe ílo tụtu oomo ạraraar emhunhughan. 19 Esi ịduon phọ, oye lọ ạka nyoniin esi iilhogh phọ ịphen phọ eghom bọ iboom kụ ạtughemhi ghan bụnhon oḍighi aani ịdiphọ, pọ ọ́kpeanhaan oḍigh aani Ọmhar k’ạke phọ. Kụolo oye dị raako ghan iilhogh phọ ịphen phọ kụ ạḅilhe rạtughemhi aani ghan bụnhon, pọ ạkpeanhaan ni oḍigh aani Ọmhar k’ạke phọ. 20 Mị rịḅenhi ghan inyinha mọ eḍighi mạar dị elhiom eḍighinhom ịyaar phọ anyinha ípu ẹlo ạbutughemhia Olhogh phọ r’ạbuo ạ Fạrisi phọ, pọ nyinha kétue ni bịn eḍigh Ọmhar k’ạke phọ.

21 “Nyinha mẹnhaghan ghan ni dị ọḅenhi we iḍiodi phọ mọ: ‘Kạ́ko enu, kụ oye lọ ạko enu kọsighe ni ọki otu ịiruen.’ 22 Kụolo, mị rịḅenhi ghan inyinha mọ tọrobo oye lọ ạghiom ghisigh ạghagham olhoghi umor ọdi kọsighe ni ọki otu ịiruen; ḅịlhe oye lọ rạḅa ghan ịgbagara ikpo ọnhu kaafolhomhiom umor ọdi, kọsighe ni ọki Ọkaraghi Ogbogh Otu Ịiruen phọ; kụ oye lọ ạḅenhi ọnhon oye mọ, ‘Nạ oopho uwo elologhi!’ kạki ni Gẹhẹnạ,* esi phọ ạnian phọ edi ghan bọ.

23 “Eḍighi mạar dị nạ ạpham inmo rạkimom ẹpe ẹkpan phọ kụ ạatughian mọ umor ạna ạghagham ni nyịnha olhoghi, 24 bịlhe inmo phọ ạna sịphe aghisigh ẹkpan phọ, ạphur ạghi ạwa ẹepho r’umor phọ ạna, nạ roḅula kụ agbi ọngo inmo phọ ạna.

25 “Mem dị oye r’ạna ẹmhoogh ịiḅaghamhi kụ nyinha edi eten rẹki otu ịiruen phọ, gboogborion ạteeny nyọdi ẹghaaphogh ọbo ọdi kạḅogh ghan bọ nyịnha ạngo oogboom ịiruen phọ, kụ oogboom ịiruen phọ ạḅogh nyịnha ạngo okoriom otu ikoli phọ, kụ ọlhogh nyịnha ikoli. 26 Mị ạkar rạḅenhi ghan nyịnha mọ, nạ kámite ni bịn tụtu nạ ạkpe ọbam ạ kọịn* phọ ạna asugha bọ.

27 “Nyinha mẹnhaghan ghan ni dị ọḅem mọ: ‘Kále ẹmha.’ 28 Kụolo mị rịḅenhi ghan inyinha mọ tọrobo oye lọ aphogh ghan ạnhir ephoph tụtu ạmhoogh ẹephua ọrolhan esi r’ọdi, pọ malheom ni ẹmha nyọdi sịphe ekpom mọ ọdi. 29 Esi ịduon phọ, eḍighi mạar dị ekpeḍien elhiom ạna reḍighi ghan ịdi nạ kakpetaan, pọ pọghoron aroph. Loor esi dị ẹnighe epu dị eniin esi aloor ạna kẹḍua kpạripe dị kotoph oomo aloor phọ ạna osumeeny Gẹhẹnạ.* 30 Ḅịlhe kẹn, eḍighi mạar dị ạḍighaagh elhiom ạna reḍighi ghan ịdi nạ kakpetaan, pọ soph aroph. Loor esi dị ẹnighe epu dị eniin esi aloor ạna kẹḍua kpạripe dị kotoph oomo aloor phọ ạna osumeeny Gẹhẹnạ.*

31 “Nyinha mẹnhaghan ghan ni dị ọḅem kẹn mọ: ‘Oye lọ aseere ạnhir ọdi, ạngoom ghan nyọdi ḍịnya oseereom ạnhir.’ 32 Kụolo mị rịḅenhi ghan inyinha mọ, tọrobo oye dị úkol ẹmhu ọrolhan esi dị ụ́ḅaal* kụ aseere ạnhir ọdi, pọ mạyegheron nyọdi ạngo olhe ẹmha, kụ oye lọ aphin ạnhir phọ ọphon phọ pọ malhe ẹmha.

33 “Nyinha mẹnhaghan ghan ni kẹn dị ọḅenhi we iḍiodi phọ mọ: ‘Kákunya kụ ạwilhe dị nạ ụ́ḍighi, kpạripe ghụn ḍighi ịpe nạ maghunya bọ ọngo a Jehova.’* 34 Kụolo mị rịḅenhi ghan inyinha mọ: Kékunya ghan roghunya, kékunya r’ạke phọ, loor esi dị ạgada ịtooghi Ẹnhaan; 35 kékunya r’ade phọ, loor esi dị ịkasi ọkpasaghiom aruwol ọdi; kékunya ra Jeruselem, loor esi dị ẹmha ogbogh Uwo Ẹmha phọ. 36 Kékunya r’ẹmhu anyinha loor esi dị nyinha kétue eḍighi ịdi aḍiniin ạḍilhaal kẹḅaal ọbobo ebil. 37 Kpạripe ghụn nyinha ẹḅem mọ ‘Ii’ pọ eḍighi ghan ii, ‘Eeye,’ pọ eeye, loor esi dị tọrobo ịyaar dị epel ịphen phọ pọ ịḅua esi ọkaraph oye phọ kụ eru.

38 “Nyinha mẹnhaghan ghan ni dị ọḅem mọ: ‘Kọsighe ekpeḍien ọkpeom ekpeḍien kụ ọsighe ọlhaay ọkpeom ọlhaay.’ 39 Kụolo, mị rịḅenhi ghan inyinha mọ: Kébian ọkaraph oye, kpạripe ghụn oye lọ aḅor okpo elhiom ạna, ḅịlhe ạngo nyọoripho. 40 Eḍighi mạar dị oye ạtuan ọsighe ạsuoma olhoghi ạna kụ rạwa ọsighe ạna ọghi otu ịiruen, pọ ngọom nyọdi ạsuoma ạnyu phọ ạna. 41 Kụ eḍighi mạar dị oye lọ ạpham egbogh esi ạkpaariom nyịnha oroolhonhaan ọdi dool orelheom oniin ạ mạịl,* pọ telheom ịyal ạ mạịl. 42 Ngọ ni oye dị ạlhom nyịnha ịyaar, kụ kạ́ḅitonhaan oye dị aru ạalhe* ạna ịyaar.

43 “Nyinha mẹnhaghan ghan ni dị ọḅem mọ: ‘Pọmoghian matuman ạna kụ ạlhogh ḍien mulhogh ḍien ạna.’ 44 Kụolo mị rịḅenhi ghan inyinha mọ: Ịpomoghian ghan bụmulhogh ḍien anyinha kụ ẹeḅereghinhaan ghan bụphe rịgbiphoghom bọ inyinha, 45 pịdi nyinha eḍeenhaan mọ nyinha ạnmuny Ọde phọ anyinha odi bọ k’ạke, loor esi dị raḍighi ghan ịdi ogogo phọ ọdi kạmu ạteeny bugey r’ạbukaraph, r’ịdi ọlophia phọ kạlophom bụo elhiom eḍighinhom ịyaar r’ạbuo ekeeny eḍighinhom ịyaar. 46 Eeghe ạsuo kụ ẹdi nyinha kẹmoogh eḍighi mạar dị nyinha ẹphomhoghian oginha ạbuphe ịphomoghian bọ inyinha? Kíniin phọ kụ ẹdi ạbubonyiom iisogh phọ roḍighi aani ghan? 47 Eeghe ịyaar dị ẹgbatanhaan kụ ẹdi nyinha reḍighi eḍighi mạar dị nyinha ẹmhagh ghan oginha abumor anyinha? Kíniin phọ kụ ẹdi awe areelhe phọ roḍighi aani ghan? 48 Esi ịduon phọ, imunughan ịdipho Ọde k’ạke phọ anyinha amhunhughan bọ.