Ọdaphan Ịpe ạ Mạtiu Ạge Bọ
16 Kụ ạbuo ạ Fạrisi phọ rạ Sạdusi phọ uru ni ọteeny nyọdi ọdegh ọdi ophogh, kụ ọḅenhi nyọdi mọ aḍighi amiteom eḍeenhaan k’ạke bụno ọmhiin. 2 Kụ ọdi ạphagharanhaan bịdi mọ: “Ẹteeny dulhe, nyinha rẹḅem ghan mọ, ‘Aḍio phọ kepooph ni iḍue, ịdi eḍighi bọ okuaḍio phọ ạtogh ni,’ 3 kụ ḍịroor nyinha ẹḅem mọ, ‘Rodon phọ aḍio phọ kẹephoom ni ọlophia ạḅilhe ạloph, ịdi eḍighi bọ okuaḍio phọ ạtogh ni kụolo akire.’ Nyinha epogh ghan ni okuaḍio phọ bịn rẹkaaph ịlo aḍio kẹtol, kụolo nyinha ítue ịnaghanhan ẹmhu ạraraar phọ remiteghu bọ nyịidipho. 4 Ọkaraph oghiil dị mọwilhe Ẹnhaan* rọwa ghan ọmhiin eḍeenhaan, kụolo kọ́ngo bịdi eḍeenhaan emuton eḍeenhaan phọ a Jona.” Ọdi rọghaaph ịphen phọ kụ ạwilhe bịdi ạḅua.
5 Kụ ạbumatuan phọ ọḅeeny ọphoripho ạga ọphiiny ạbazi phọ kụ owulha ọphamham ạ brẹd. 6 Kụ a Jizọs ạḅenhi bịdi mọ: “Igonha loor anyinha esi a yist ạ Fạrisi phọ rạ Sạdusi phọ.” 7 Kụ bịdi oopuruan sịphe igbo phọ ạbidi mọ: “Yira ụ́pam ạ brẹd utumhom.” 8 Kụ a Jizọs rolhegheri ịphen phọ, kụ ạḅem mọ: “Uḍighi ika kụ nyinha rẹkaaph ghan bọ sịphe igbo phọ anyinha mọ nyinha ị́pam ạ brẹd, nyinha awe dị omheeraam aghom? 9 Nyinha kẹ̋nhaghanhan ni ịphen mị rạkaaph bọ, ọbobo nyinha ebulha ni ịpe mị ạsighe bọ oogh iiḅoghoḍi ạ brẹd phọ ạngoom eḍien 5,000 awe phọ r’ọnhu ạrigiel phọ nyinha eekpomhoghi bọ? 10 Ọbobo ịpe mị ạsighe bọ oḍual iiḅoghoḍi ạ brẹd phọ ạngoom eḍien 4,000 awe phọ r’ọnhu igbogh ạrigiel phọ nyinha eekpomhoghi bọ? 11 Uḍighi ika kụ nyinha ị́toph bọ ịmiin mọ mị rạ́kaaph ghan ịlo ạ brẹd, kụolo mọ igonha loor esi a yist ạ Fạrisi phọ rạ Sạdusi phọ?” 12 Kụ bịdi ọnhaghanhan mọ ọdi ạḅem ghan mọ bịdi ogonha loor, esi ịtughemhi ạ Fạrisi phọ rạ Sạdusi phọ, kési a yist ạ brẹd.
13 A Jizọs roḍigh ekool ạ Sịsạriạ Filipạị, kụ apuru bụmatuan phọ ọdi mọ: “Awe rọḅem ghan mọ Ọony phọ oye ạnhian?” 14 Kụ bịdi mọ: “Buniin rọḅem ghan mọ ạ Jọn Oḍiinyeom Mụum mọ, bụniin mọ Ẹlạịjạ, kụ bụnhon mọ a Jerimạyạ ọbobo oniin sịphe ariil phọ.” 15 Kụ ọdi apuru bịdi mọ: “Nyinha phọ rẹḅem aani ghan mọ mị ạnhian?” 16 Kụ ạ Sạịmọn Pita ạphagharanhaan mọ: “Nạ kụ ạ Krạịst phọ, Ọony Ẹnhaan phọ odi ghan bọ.” 17 Kụ a Jizọs ạḅenhi nyọdi mọ: “Ọḅaal olhoghi odianhaan ni nyịnha Sạịmọn ọony phọ a Jona, ịdi eḍighi bọ ịḅaal r’iphulhupul kụ íganhanhamhi ịphen phọ iḍeenhaan* nyịnha, kụolo Ọde phọ ạmhi odi bọ k’ạke phọ kụ aganhanhamhi. 18 Mị ạḅilhe rạḅenhi ghan nyịnha mọ: Nạ a Pita, kụ ạnyu aḍighiigh phọ ạḍien phọ kụ ẹdi mị kapighi ookpomhoghan phọ ạmhi, kụ ạrunhu aḍibuo Oḍi phọ* kétue ẹkpar epu. 19 Mị kạngo nyịnha ịsabi Ọmhar k’ạke phọ, kụ tọrobo ịyaar lọ nạ ạghoroghi sịen ade phọ pọ ẹdi mọghoroghi ni ẹpe k’ạke, kụ tọrobo ịyaar lọ nạ ạakpo sịen ade phọ pọ ẹdi mọokpo ni ẹpe k’ạke.” 20 Kụ ọdi ạkuamhi ạphur rụru bụmatuan phọ mọ kụ́ḅenhi oye mọ ọno kụ ạ Krạịst phọ.
21 Emhiigh mem mọ ạmuphe phọ kụ rẹki, a Jizọs amhiigh ni ọtughemhi ạbumatuan phọ ọdi mọ ọno ạmoogh ọghi a Jeruselem ọmhiinhom ịbadi ạraraar ḍịghaagh ikumor awe phọ r’aruwo ẹmhu ạbupinyon rịkia phọ r’ạbutughemhia Olhogh phọ, kụ bịdi okiigh nyọdi, kụ Ẹnhaan aḅeton nyọdi esi aḍuugh omhunhenhiom ịraar aḍughul otu phọ. 22 A Pita rọnhaghan ịphen phọ kụ ạmhagh nyọdi atenhom ọgbal, kụ amhiigh ọḅaam ọdi mọ: “Kạ́kaaph ịdipho Uwo Ẹmhoogh, ịphen phọ nyịnha kémitenhaan ni bịn.” 23 Kụ ọdi ạgumhom ọmhan Pita, kụ ạḅem mọ: “Ten ọmhan ạmhi, Setạn! Nạ maḍighi ḍighiigh okpetaan atu esi ạmhi, ịdi eḍighi bọ ịitughian phọ ạna ịlo awe, kị́lo Ẹnhaan.”
24 Kụ a Jizọs ạḅenhi bụmatuan phọ ọdi mọ: “Oye lọ rạwa oḍighi ọnyo ạmatuan ạmhi kạparanhaan loor ọdi, kụ ạsighe oreeny ịmhinhimhiin* phọ ọdi ụdapham ghan ịmhi. 25 Ịdi eḍighi bọ tọrobo oye lọ rạwa ọphel aghuḍum mọ ọdi katoph ni, kụolo tọrobo oye lọ aghol ẹmhu ạmhi kụ aroph ghuḍum mọ ọdi kạmoogh ni ghuḍum. 26 Ọkar ọghaaph, eeghe ạsuo kụ ẹdi oye kạmoogh eru mạar dị ạmhoogh oomo aḅirinhi phọ kụolo aroph ghuḍum mọ ọdi? Ọbobo eeghe kụ ẹdi oye katue ạngo oonmenhenhiom aghuḍum ọdi? 27 Ọony phọ oye kạpam ni rụukpaany phọ ọdi atumhom r’eghuan Ọde phọ ọdi, kụ ọdi kạdaph ni ẹzo ạtorobo oye kụ ạkpe ịikpia. 28 Mị akạr rịḅenhi ghan inyinha mọ buniin ạbuen ọmheregha bọ sịen phọ kómugh tụtu ọphur ọmhiin dị Ọony phọ oye ratu r’Ọmhar phọ ọdi.”