Ọdaphan Ịpe ạ Mạtiu Ạge Bọ
28 AḌio Ophooghian phọ reten, kụ a Meri Mạgdạlin r’ọphoripho a Meri phọ, oru eḅon ạḍiroor ạḍiḅel aḍio awiki phọ ophogh oḍi phọ.
2 Ade phọ iphiigha ni kụ bịdi ogbi bọ oru phọ, loor esi dị ọokpaany a Jehova* mạḅua ẹpe k’ạke atu aakilhemhi ḍighiigh phọ opukiom bọ ọnhu oḍi phọ ạsighe, kụ ạtolhom. 3 Aloor phọ ọdi ịghigh ḍịḅaal aḍio dị rẹmepheghian, kụ iinmenhan phọ ọdi ẹḅaal ịdipho ibikpo. 4 Abukoriom mọ ụmhoogh ni oboom oghiilhaan mem mọ ọmhiin bọ ọokpaany phọ, kụ omhiigh ookpereghaany, kụ ọghigh we dị momhuughu.
5 Kụ ọokpaany phọ ạḅenhi nmạriir phọ mọ: “Kẹ́moogh oghiilhaan, mị alegheri ni mọ nyinha rẹwa ghan Jizọs ọpo ọkan bọ oghiigh sịphe oreeny phọ. 6 Ọdi ólho sịen, loor esi dị Ẹnhaan maḅeton nyọdi esi aḍuugh ịdipho ọdi ạḅem bọ. Itu ẹmhiin esi phọ ọmhunheeny bọ nyọdi. 7 Kụ eegborion ẹghi ẹḅenhi bụmatuan phọ ọdi mọ moḅeton nyọdi esi aḍuugh, nyinha kẹmiin ni nyọdi ẹpe Gạlili. Loor esi dị ọdi mịphur inyinha anyeenhe. Kébula ịphen mị mịḅenhi bọ inyinha.”
8 Kụ bịdi oogborion ọḅua ẹpe oḍi phọ r’oghiilhaan r’iboom ibo, oghiil ọghi ọḅenhi ạbumatuan phọ ọdi. 9 Kụ ekperenhom bịn a Jizọs ạghi ạteeny bịdi, kụ ạmhagh bịdi, kụ bịdi omheel ghisigh ọdi, ọpham ruwol ọdi okpuḍian ọngo nyọdi. 10 Kụ a Jizọs ạḅenhi bịdi mọ: “Kẹ́moogh oghiilhaan! Ịki, ẹḅenhi bumor phọ ạmhi mọ bịdi ọghi ẹpe Gạlili. Ẹpe kụ ẹdi bịdi kụmhiin ịmhi.”
11 Bịdi rọḍua, kụ buniin abukoriom mọ omite oḍigh ẹpe ẹmha phọ ọḅenhi ruwo ẹmhu ạbupinyon rịkia phọ oomo ịpe emite bọ. 12 Kụ aruwo ẹmhu ạbupinyon rịkia phọ r’ikumor awe phọ romite ezue roopuruan, kụ ọngo iboom ipoḍi a silva we ẹgham mọ 13 kụ ọḅenhi bịdi mọ: “Ịḅem mọ, ‘ạbumatuan phọ ọdi uru ḍughul mem dị yoor rọnaani kụ omhi ḍizu phọ ọdi.’ 14 Ạ Pạịlet ạnhaghan ịphen phọ yoor kọkaaphan ni nyọdi,* kẹ́moogh ọoḅaghamhian aloor.” 15 Kụ bịdi ọsighe ipoḍi a silva phọ kụ ọtuugh ịpe ọḅenhi bọ bịdi oḍighi, kụ ịphen phọ kụ ịdi mọghaaph olheenye igbo ạbuo a Ju phọ k’arodon.
16 Kụ 11 ạbumatuan phọ onyeenhe Gạlili ẹpe ẹeḅaraph phọ a Jizọs ạḅem bọ mọ bịdi ọghi ọteeny nyọdi. 17 Bịdi ọmhiin bọ nyọdi, ukpuḍian ni ọngo nyọdi, kụolo buniin ụmhoogh ni iikia. 18 Kụ a Jizọs ạghi ạteeny bịdi, kụ ạḅem mọ: “Mụngo ịmhi oomo ịikpo ẹpe k’ạke phọ r’ịsien ade phọ. 19 Esi ịduon phọ, ịki ẹtughemhi we oomo areelhe phọ oḍighi ạbumatuan ạmhi, eḍiinye ghan bịdi mụum esi aḍien Ọde phọ r’Ọony phọ r’uwaloor iigbia phọ, 20 ẹtughemhi ghan bịdi oḍighi oomo ạraraar phọ mị ạto bọ ịḅenhi inyinha. Kụ ịmiin! mị odi ni r’anyinha tọrobo aḍio tụtu ẹteeny eekunha aḅirinhi phọ.”*