Ọdaphan Ịpe ạ Mạtiu Ạge Bọ
17 Odiiny aḍughul otu reten kụ a Jizọs ạpham Pita ra Jems rạ Jọn umor phọ ọdi ạsiinyom ạnyu eboom ẹeḅaraph. 2 Kụ ọdi anmia sịphe ghisigh ạbidi; kụ arisigh phọ ọdi ạmhu ịdipho erumuḍio, kụ ạsuoma ạnyu phọ ọdi asoor* ịdipho ạḍiḅaal. 3 Bịdi odi ni ropogh, kụ a Mozis r’ Ẹlạịjạ omitenhaan bịdi, kụ ọghaaphan ghan nyọdi. 4 Kụ a Pita ạḅenhi Jizọs mọ: “Uwo Ẹmhoogh, ẹnighe agey ịduon yoor odi aani bọ sịen. Eru mạar dị ẹḅeraan ni nyịnha, pọ mị kạlogh sịen ịraar arogbogo, oniin ọlo ạna, oniin ọlo a Mozis, oniin ọlo Ẹlạịjạ.” 5 Ọdi odi ni rạkaaph, bịn ọphalhaḅaal ọotu asoorom bịdi, kụ ẹḍogh ẹḅa sịphe ọotu phọ mọ: “Ọphon kụ Ọony phọ ạmhi mị ạphomhoghian bọ, eḍighinhom ịyaar phọ ọdi ịḅeraan ni ịmhi iboom. Ịnaghanhan nyọdi.” 6 Ạbumatuan phọ ụmhoogh ni oboom oghiilhaan mem mọ ọnhaghan bọ ịphen phọ, kụ omheel oḅolholho yogh. 7 Kụ a Jizọs aru ạḅogh bịdi, kụ ạḅem mọ: “Iḅerenhu. Kẹ́moogh oghiilhaan.” 8 Bịdi ophoophe bọ rụmhu ạbidi, ụ́miin ọnhon oye emuton Jizọs. 9 Ịduon bịdi ọḍua bọ sịphe ẹeḅaraph phọ rosoor, a Jizọs ạphur ri bịdi rụru mọ: “Kẹ́ḅenhi oye uḍien phọ ọphon phọ tụtu oḅeton Ọony phọ oye esi aḍuugh.”
10 Kụolo ạbumatuan phọ upuru nyọdi mọ: “Uḍighi ika kụ ạbutughemhia Olhogh phọ rọḅem ghan bọ mọ Ẹlạịjạ kụ kạpur atu?” 11 Kụ ọdi ạphagharanhaan bịdi mọ: “Ọkar agey Ẹlạịjạ ratu ni, kụ kaḅulhemhi ni oomo ạraraar ịpe ẹkpe bọ ọrol. 12 Kụolo mị rịḅenhi ghan inyinha mọ Ẹlạịjạ maru ni kụ bịdi ụ́logh elhegh, kpạripe ghụn bịdi uḍighi nyọdi ịlo ẹḅeraan bịdi. Eniin phọ eten phọ kụ ẹdi Ọony phọ oye kạmiinhom ḍịghaagh ạbidi.” 13 Kụ ạbumatuan phọ ọnhaghanhan mọ ọdi ạḅenhi ghan bịdi ịlo ạ Jọn Oḍiinyeom Mụum mọ.
14 Bịdi rọkpul ḍita awe phọ, kụ oye aru ạteeny nyọdi, akpuḍian kụ ạḅem mọ: 15 “Uwo Ẹmhoogh, nmạ ọony ạmhi ighirigiir, ịdi eḍighi bọ ọdi rasiphi ghan isughuna kụ aloor phọ ẹpam ni iboom. Ọdi rạ́gba ghan mem omheel oḍigh olhoghi ạnian r’olhoghi ạmuum. 16 Mị ụsighe ni nyọdi aruom bụmatuan phọ ạna, kụolo bịdi útue uukonhom nyọdi.” 17 Kụ a Jizọs ạḅem mọ: “Oghiil dị omheeraam ụ́moogh ḅịlhe mạphu ạmhan, mị kạtol r’anyinha kạpur amem? Mị kạminoghom rọozo phọ anyinha ịphen phọ kạpur amem? Ịsighe nyọdi iruom ịmhi.” 18 Kụ a Jizọs ạḅaam ọkaraph uwaloor phọ, kụ ạḅua loor ọony phọ, bịn ọony phọ amhoon mem mem mọ. 19 Kụ ạbumatuan phọ oru ọteeny Jizọs mem dị oginha ọdi bịn odi kụ opuru mọ: “Uḍighi ika kụ yoor útue bọ uporogh ọkaraph uwaloor phọ?” 20 Kụ ọdi ạḅenhi bịdi mọ: “Loor esi dị omheeraam mọ anyinha akom. Mị ạkar rịḅenhi ghan inyinha mọ, eru mạar dị nyinha ẹmhoogh omheeraam dị alheeny ịdipho ekpo ạ mọstạd, nyinha ketue ni ẹḅenhi ẹeḅaraph phọ ẹphen mọ, ‘Ḍụa sịen ạghi pạ,’ bịn kẹḍua ni, kụ ịyaar ílo dị nyinha kétue eḍighi.” 21* ——
22 Amem mọ a Jizọs r’ạbumatuan phọ ọdi ookpomhoghan bọ ẹpe Gạlili kụ ẹdi ọdi ạḅenhi bịdi mọ: “Kobool li Ọony phọ oye ọlogh ḍịghaagh awe, 23 kụ bịdi okiigh nyọdi, kụ Ẹnhaan aḅeton nyọdi esi aḍuugh omunhenhiom ịraar aḍughul otu phọ.” Kụ bịdi okururu iboom.
24 Bịdi rosi Kạpạnịọm, kụ awe phọ rọbonyi ghan bọ iisogh ịyal ạ drạkmạ* phọ oru ọteeny Pita kụ opuru mọ: “Ọtughemhia phọ anyinha rásogh aani ghan iisogh ịyal ạ drạkmạ phọ?” 25 Kụ ọdi mọ: “Rasogh ghan ni.” Kụolo ọdi roḍigh olhoghi otu, bịn a Jizọs ạphur ạḅaanhaan nyọdi kụ apuru mọ: “Nạ ạatughian aani ika Sạịmọn? Bụo ạnhian kụ rosogh ghan iisogh kọngo ruwo ẹmha aḅirinhi phọ? Ạnmuny ạbidi ḍụghum ọbobo aruuruen phọ?” 26 Ọdi rọḅem mọ: “Aruuruen phọ,” kụ a Jizọs ạḅenhi nyọdi mọ: “Eru ịdipho, pọ ạnmuny phọ ụ́kpe osogh ghan iisogh. 27 Kụolo ọmhiin mọ yira úḍighi ịdi kepin esi ạbidi, kịa ẹpe ọphiiny ạbazi phọ atebeeny ḍịḅaph, kụ ạsighe ẹḅel ena phọ nạ kạḍa bọ. Nạ ạtagharan ọnhu phọ nạ kạmiin ni kọịn a silva.* Sịghe ạghi asoghom ịlo ạna r’ạmhi.”