Ọdaphan Jọn
16 “Mị mịḅenhi inyinha rạraar phọ ịphen phọ ọbo nyinha kekpetaan ghan bọ emeel. 2 Awe kiphorogh ni inyinha sịphe arubughotu phọ. Ọkar ọghaaph, amem retu ni dị tọrobo oye dị ighiigh inyinha kạatughian ghan mọ ọno makumuan rukumuan iigbia ạngo Ẹnhaan. 3 Kụolo bịdi koḍighi ịphen phọ loor esi dị bịdi kőlhegheri Ọde phọ r’ạmhi. 4 Tọrobo ịpe ẹrol bọ, mị mịḅenhi inyinha rạraar phọ ịphen phọ pịdi ẹteeny mem mọ kemite bọ nyinha ẹetughian mọ mị ịḅenhi ni inyinha.
“Mị inyinha ị́ḅenhi ịphen phọ k’emhiighom mọ loor esi dị mị ụrol li r’anyinha. 5 Kụolo nyịidipho mị rạki ọteeny Ọpo urom bọ ịmhi; kụ ọnyo anyinha ịmhi úpuru mọ, ‘Nạ rạki ẹghen?’ 6 Kụolo loor ịduon mị ịḅenhi bọ inyinha ịphen phọ, nyinha memheelhom oboom ọto. 7 Tọrobo ịpe ẹrol bọ, ịphen mị rịḅenhi bọ inyinha etu ni ịne, kụ eḍighi ịlo ạsuo anyinha ịduon mị rạḍua bọ. Loor esi dị eḍighi mạar dị mị ụ́ki, pọ ọlogh ḍịghaagh phọ kátu ịteeny inyinha; kụolo eḍighi mạar dị mị ạghi, mị kiruom ni inyinha nyọdi. 8 Kụ mem dị ọpo phọ aru, kaganhanhamhi ni aḍeenhaan aḅirinhi phọ ịyaar dị ịkaraph eru, r’ịyaar dị elhiom eḍighinhom ịyaar eru, r’ịyaar dị ọoruen aru. 9 Ẹḅel phọ, ọdi kaganhanhamhi ni aḍeenhaan aḅirinhi phọ ịyaar dị ịkaraph eru, loor esi dị bịdi ụ́moogh omheeraam utu esi ạmhi; 10 ẹdi etum pạ, ịyaar dị elhiom eḍighinhom ịyaar eru, loor esi dị mị rạki ọteeny Ọde phọ kụ nyinha ịmhi kị́mhiin mụn; 11 kụ ẹdi etum pạ, ịyaar dị ọoruen aru, loor esi dị mosophonhaan ọoruen ọtooghia aḅirinhi phọ ọphon phọ.
12 “Mị ạḅilhe ni ạmoogh ịbadi ạraraar ọḅenhi anyinha, kụolo nyinha kétue ẹnaghanhan nyịidipho. 13 Tọrobo ịpe ẹrol bọ, mem dị ọpo phọ,* uwaloor igey phọ, aru, ọdi kịiḅaki ni inyinha ọlhoghonhaan anyinha ḍịghaagh ọnhaghanhan oomo igey phọ, ọdi kạ́atughian ịlo ọdi bịn ạkaaph, ịpe ọdi ạnhaghan bọ kụ ịdi ọdi kạkaaph, kụ ịḅenhi inyinha rạraar dị kemite ghisigh. 14 Ọpo phọ kughuenhi ni ịmhi, loor esi dị ọdi kịḅenhi inyinha rạraar dị ọdi ạnhaghan ọnhu ạmhi. 15 Oomo ạraraar phọ Ọde phọ ạmhoogh bọ ịlo ạmhi. Pọ kụ ịyaar phọ mị ạḅem bọ mọ ọdi kịḅenhi inyinha rạraar dị ọdi ạnhaghan ọnhu ạmhi. 16 Mọony amem nyinha ịmhi kị́mhiin mụn, kụ mọony amem nyinha kịmhiin ni ịmhi.”
17 Kụ buniin ạbumatuan phọ ọdi ọghaaph ghan sịphe igbo phọ ạbidi mọ: “Eeghe kụ ẹmhu ịphen ọdi ụḅenhi bọ iyira mọ, ‘Mọony amem nyinha ịmhi kị́mhiin mụn, kụ mọony amem nyinha kịmhiin ni ịmhi,’ ḅịlhe mọ, ‘loor esi dị mị rạki ọteeny Ọde phọ’?” 18 Kụ bịdi ọḅilhe ọḅem ghan mọ: “Eeghe kụ ẹmhu ịpe ọdi ạḅem bọ mọ, ‘mọony amem’? Yira ụ́naghanhan ịphen ọdi rạkaaph bọ.” 19 A Jizọs alhegheri ni mọ bịdi rọwa opuru ọno ḍipuru, kụ ạḅenhi bịdi mọ: “Nyinha repuru ghan ḍipuru phọ ạḍien sịen igbo phọ anyinha loor ịduon mị ạḅem bọ mọ: ‘Mọony amem nyinha ịmhi kị́mhiin mụn, kụ mọony amem nyinha kịmhiin ni ịmhi’? 20 Mị ạkar rịḅenhi ghan inyinha mọ, nyinha kemoghi ni ẹḅilhe eḍeenhaan mọ nyinha emeelhom ọto, kụolo aḅirinhi phọ kọmoogh ni ibo; nyinha kekururu ni, kụolo okururu phọ anyinha katen ni ibo. 21 Mem dị oghunhughun rakun ạnhir ephoph, rameelhom ghan ni ọto loor esi dị amem ọdi mẹteeny, kụolo ọdi rọmhar ọbumoony phọ bịn mawulha ịmhinhimhiin phọ ọdi ạmhiinhom bọ, loor esi ibo ọmhiin ọbumoony phọ ọdi mạmhar bọ aseere sịen aḅirinhi phọ. 22 Ịduon kụ ịdi ạdol phọ anyinha edi aani, nyịidipho nyinha emeelhom ni ọto, kụolo mị kạḅilhe ni ịmhiin inyinha kụ ibo emuza rokpom mọ anyinha, kụ oye inyinha kạ́ar ibo phọ. 23 Ḍio phọ ạḍiphe phọ nyinha ịmhi kípuru ḍipuru. Mị ạkar rịḅenhi ghan inyinha mọ, tọrobo ịyaar dị nyinha ẹlhom Ọde phọ, ọdi kạtuan ni ḍien phọ ạmhi ịngo inyinha. 24 Kụ k’ạnyiidipho nyinha ke̋ghol ḍien phọ ạmhi ẹlhom r’eniin ịyaar. Ịlom bịn kịngo ni inyinha, pịdi ibo phọ anyinha emunughan.
25 “Mị mạsighe rạghaaph ọmaanhiom ịḅenhiom inyinha rạraar phọ ịphen phọ. Kụ amem retu ni dị mị kạ́sighe ghan mụn rạghaaph ọmaanhiom kụ ịḅenhiom inyinha ịyaar, kụolo mị kạkaaph ghan ịlo Ọde phọ ịḅenhi inyinha onyen. 26 Ḍio phọ ạḍiphe phọ nyinha kekol li ḍien phọ ạmhi ẹlom Ọde phọ tọrobo ịyaar; kụ ịphen mị ạghaaph bọ rẹ́ma ghan mọ mị kụ kịlhomonhaan inyinha. 27 Ịdi eḍighi bọ Ọde phọ r’aloor ịphomhoghian ni inyinha, loor esi dị nyinha mịphomhoghian ịmhi kụ ẹḅilhe emeeraam mọ mị uru ịdipho ọmeera enye Ẹnhaan. 28 Mị uru sịen aḅirinhi phọ ịdipho ọmeera enye Ọde phọ, kụ nyịidipho mị rạḍua sịen aḅirinhi phọ ọghi ọteeny Ọde phọ.”
29 Kụ ạbumatuan phọ ọdi ọḅenhi nyọdi mọ: “Ịhii! Nyịidipho nạ mamhiigh rạkaaph onyen, nạ ọ́sighe mụn rạghaaph ọmaanhiom kụ rạkaaphom. 30 Yoor molhegheri mọ nạ alegheri ni oomo ạraraar ḅịlhe mọ ímoghi dị nạ kakori mọ oye apuru nyịnha ḍipuru loor esi dị nạ alegheri ni ịpe ọdi rạatughian bọ. Esi ịduon phọ yoor momheeraam mọ nạ ụḅua kạ Ẹnhaan kụ aru.” 31 Kụ a Jizọs ạphagharanhaan bịdi mọ: “Nyinha memheeraam nyịidipho? 32 Ịmiin! Amem retu ni, kụ ọkar agey, mụen kụ amem mọ nyinha kẹwalhalha bọ, uwo otu akeel otu, kụ ẹbilhe dị oginha ạmhi kạtol. Kụolo oginha ạmhi bịn úlo, loor esi dị Ọde phọ odi ni r’ạmhi. 33 Mị mịḅenhi inyinha ịphen phọ pịdi nyinha ẹmoogh ẹepho dị eego esi ạmhi. Nyinha kẹmiinhom ni sịen aḅirinhi phọ, kụolo ịkpo oḅio! Mị mạkpar apu aḅirinhi phọ.”