Ọdaphan Luk

10 Ịphen phọ reten kụ Uwo Ẹmhoogh phọ ạsaḅar 70 ạbunhon ạbumatuan kụ adi bịdi ịyal yạl, kụ ạḅem mọ oḍia ghan ọghi oomo ạramha phọ r’arikpisi phọ ọdi kạki bọ. 2 Kụ ọdi ạḅenhi bịdi mọ: “Ọkar agey, ibugha phọ ẹbugh ni, kụolo awe arukumuan phọ okom. Esi ịduon phọ, ịlom Uwo Oḍighi ibugha phọ mọ ọdi ạmhagh we arukumuan ạlhogh oḍighi ibugha phọ ọdi. 3 Ịki! Kụ ịmiin! mị rirom inyinha mọ ịki ịdipho ạnmuny iyool ịga dị edi igbo areephe ạno. 4 Kẹ́pam okuru ikpoki ọbobo okuru eḍien ọbobo rokoro, kụ kẹ́magh kẹn oye* ẹpe eten phọ. 5 Tọrobo otu lọ nyinha eḍigh, ịpur ghan ẹḅem mọ: ‘Ẹepho ẹrolhonhaan otu phọ ọphon phọ.’ 6 Kụ eru mạar dị oye dị ẹepho ẹḅeraan odi sịphe phọ, pọ ẹepho phọ anyinha kẹtol li r’ọdi. Kụolo eru mạar dị úlo, pọ keḅula ni esi anyinha. 7 Esi ịduon phọ ịtol sịphe otu phọ ọpo phọ, elhe ẹḅilhe ẹphughol rạraar lọ ịngo inyinha, ịdi eḍighi bọ ẹkpe ni ọkpe oye dị rakumuan rukumuan. Kẹ́bilhe otu phọ ọpo phọ ẹki ẹwa ẹnhon esi ọrol.

8 “Ḅịlhe kẹn, tọrobo ẹmha lọ nyinha eḍigh kụ awe phọ ịsighe inyinha, ile ni ịyaar lọ ịngo inyinha, 9 kụ eekonhom bụlo úmoon sịphe ẹmha phọ kụ ẹḅenhi bịdi mọ: ‘Ọmhar phọ Ẹnhaan mituman inyinha.’ 10 Kụolo tọrobo ẹmha lọ nyinha eḍigh kụ awe phọ inyinha ị́sighe, ịki ẹpe aroḅodo phọ ạbidi kụ ẹḅem mọ: 11 ‘Ghạlhamo r’ịisaar phọ ẹdaph bọ ruwol ayoor sịen ẹmha phọ anyinha bịn yoor mọokpa roseere. Tọrobo ịpe ẹrol bọ, ilegheri mọ Ọmhar phọ Ẹnhaan matuman sịen.’ 12 Mị rịḅenhi ghan inyinha mọ ḍio phọ ạḍiphe phọ ạraraar kedughanhaan ni Sọdọm epu ẹmha phọ ẹpe phọ.

13 “Ịmhinhimhiin kụ kịrolhonhaan inyinha, we a Korezin! Ịmhinhimhiin kụ kịrolhonhaan inyinha, we ạ Bẹtseidạ! loor esi dị mụghumo uḍighi ịiḍaany phọ oḍighi bọ rạmha phọ anyinha ẹpe Tạyạ rạ Sạịdọn ọbo bịdi mokiton k’aḍiodi ọkpolhoghian rụsuoma ọto ọtol ude esi ọoru. 14 Esi ịduon phọ, ạraraar kedughanhaan ni Tạyạ rạ Sạịdọn mem ịiruen phọ ipu inyinha. 15 Kụ nyinha awe ạ Kạpạnịọm, kiphophe ni inyinha osiemhi k’ạke ḍụghum? Eeye, nyinha kẹki ghụn sịphe Oḍi phọ!*

16 “Tọrobo oye lọ alher rụru ịngo inyinha pọ aler rụru ụngo ịmhi. Kụ tọrobo oye lọ ighel inyinha pọ mughel aani ịmhi. Kụ tọrobo oye lọ ughel ịmhi pọ maghel aani Nyọpo urom bọ ịmhi.”

17 Kụ 70 ạbumatuan phọ uḅula ni r’ibo, kụ ọḅem mọ: “Uwo Ẹmhoogh, ghạlhamo r’ịkaraph aruwaloor phọ bịn reḍighi ghan ni ịlo yoor oghol ḍien phọ ạna ọḅenhi bịdi.” 18 Ọdi rọnhaghan ịphen phọ kụ ạḅenhi bịdi mọ: “Mị ạmiin Setan dị mạḍua ẹpe k’ạke amheel mụdi aḍio kụ ịmheephian. 19 Ịmiin! Mị mịngo inyinha ịikpo ọozeghiom ạrakaraph ạraraar r’asikororoph ạnyu ade, r’ịikpo ọkpar opuom ịikpo ạmulhogh ḍien phọ, kụ r’ịyaar inyinha kíḍighi. 20 Tọrobo ịpe ẹrol bọ, kẹ́tuan mọ ịkaraph aruwaloor phọ reḍighi ghan ịlo nyinha ẹḅem kụ ebo, ibo ghụn loor ịduon mọge bọ siḍien phọ anyinha ẹpe k’ạke.” 21 Ẹnhaan ạngo ni uwaloor iigbia phọ Jizọs mem mọ ọpo phọ kụ ọdi ạmhoogh iboom ibo kụ ạḅem mọ: “Mị raboom ni nyịnha sịen ogbo awe phọ Ọde, Uwo Ẹmhoogh ạke phọ r’ade phọ, loor esi dị nạ mamhiigha loor ạbooghinhaan rạraar phọ ịphen phọ we dị ọsu olhoghi ọḅilhe ọmhaar ḍịnya kụ aganhanhamhi aḍeenhaan ịbam ạnmuny. Ii Ọde, loor esi dị ịduon kụ ịdi nạ rạwa.” 22 A Jizọs ạḅilhe ạḅem mọ: “Ọde phọ ạmhi mạḅogh oomo ạraraar ụngo ịmhi, kụ oye ólho dị alhegheri oye dị Ọony phọ aru emuton Ọde phọ; ḅịlhe kẹn oye ólho dị alhegheri oye dị Ọde phọ aru emuton Ọony phọ r’ạtorobo oye lọ Ọony phọ rạwa oganhanhamhi Ọde phọ ọdi oḍeenhaan.”

23 Ọdi rọghaaph ịphen phọ rọmhan kụ ạḅenhi oginha ạbumatuan phọ mọ: “Ọḅaal olhoghi odianhaan ni bụphe rọmiin aani bọ rạraar phọ nyinha rẹmiin bọ. 24 Mị rịḅenhi ghan inyinha mọ ịbadi ariil r’aruwo ẹmha ụwa ni ọmhiin aani ạraraar phọ nyinha rẹmiin bọ kụolo ụ́miin, bịdi ụwa kẹn ni ọnhaghan aani ạraraar phọ nyinha rẹnaghan bọ kụolo ụ́naghan.”

25 Oniin oye dị alhegheri Olhogh phọ agey ạmheera ni ọdegh ọdi ophogh, kụ apuru mọ: “Ọtughemhia, mị kaḍighi eeghe kụ ạmoogh ghuḍum k’agee-pọ?” 26 Kụ ọdi apuru oye phọ mọ: “Ọge ika sịphe Olhogh phọ? Kụ nạ ạnaghanhan eeghe esi ịpe nạ mạal bọ?” 27 Kụ oye phọ ạphagharanhaan mọ: “‘Nạ kạpomoghian a Jehova* Ẹnhaan phọ ạna r’oomo ekpom ạna r’oomo aghuḍum* ạna r’oomo ịnyaam ạna r’oomo olhoghi ạna’ ḅịlhe mọ ‘pọmoghian matuman ạna ịdipho aloor phọ ạna’” 28 Kụ ọdi ạḅenhi oye phọ mọ: “Nạ ạpagharanhaan ni agey; ḍighi ghan ịphen phọ bịn nạ kạmoogh ni ghuḍum.”

29 Kụolo oye phọ ạwa oḍeenhaan mọ ọno oye elhiom eḍighinhom ịyaar ri, kụ apuru Jizọs mọ: “Ạnhian nụun kụ amatuman ạmhi?” 30 Kụ a Jizọs ạphagharanhaan mọ: “Oye ạrol li dị ạḍua Jeruselem rạki Jeriko kụ amheel aḍigh ḍịghaagh ạruḅa. Bịdi ụkporion ni ạsuoma ọdi ọḅilhe ọsigheogh rạraar ọdi, okuphogh, kụ ropogh ẹpughol ạmuum bịn ọwilhe ọḅua. 31 Kụ iizuanhaan ni dị ọpinyon rịkia raten eten phọ ẹpe phọ, kụolo ạmhiin bọ oye phọ ạgbal ọphoripho ạga phọ bịn aten. 32 Iginha phọ kẹn, mem dị oniin ọnyo a Livạị aru asi aani esi phọ kụ ạmhiin oye phọ, ạgbal ọphoripho ạga phọ bịn aten. 33 Kụolo oniin oye ọlo ạ Sạmeria dị raten aani eten phọ aru ni asi sịphe phọ, kụ rọmhiin oye phọ, kụ ạmhoogh igbiririph ạghi esi ọdi. 34 Esi ịduon phọ, ọdi ạghi ni ạteeny oye phọ kụ aaduom riisi phọ elo r’amiim, ạḅilhe ạghoroghi yogh. Kụ ạsaany oye phọ ẹnham ọdi ạghimhom otu abutenhenheen amhiigh ophogh oye phọ. 35 Rẹteeny ḍio phọ etum bọ sịphe, kụ ọdi ạsighe ịyal a dinerạị* ạngo uwo esi phọ, kụ ạḅenhi mọ: ‘Uphoghonhaan ịmhi oye phọ ọphon phọ, kụ tọrobo amaliom dị nạ ạḅilhe alhiom, mị kạkpe ni nyịnha mem dị mị aḅula.’ 36 Nạ ragbi mọ ạnhian sịen ịraar phọ ạbidi kụ aḍeenhaan mọ ọno amatuman oye phọ amheel bọ aḍigh ḍịghaagh ạruḅa phọ?” 37 Kụ ọdi ạḅem mọ: “Ọpo ạnma bọ nyọdi ighirigiir phọ.” Kụ a Jizọs ạḅenhi nyọdi mọ: “Kịa aḍighi aani iginha phọ.”

38 Bịdi rọḅua, kụ ọghi oḍigh eniin ẹmha. Kụ ạnhir dị oghol mọ ạ Mạtạ ạsighe nyọdi ạlhogh otu. 39 Kụ ạnhir phọ ạmhoogh ni umaranhi dị oghol mọ a Meri, ọphon phọ ạrol ude ruwol Uwo Ẹmhoogh phọ ạnhaghan ghan ịpe rạkaaph bọ.* 40 Kụolo ịbadi ạraraar oḍighi ịgbaragbaramhi ni Mạtạ, kụ ọdi aru ạḅenhi Jizọs mọ: “Uwo Ẹmhoogh, ị́kigh ịyaar esi ạna ịduon umaranhi phọ ạmhi ụwilhenhaan bọ ịmhi oomo ạraraar phọ? Ḅẹnhi mọ ọdi aru ụlhoghonhaan ịmhi ḍịghaagh.” 41 Kụ Uwo Ẹmhoogh phọ ạphagharanhaan nyọdi mọ: “Mạtạ, Mạtạ, nạ rạaḅaghamhian loor kạphughan ịlo ịbadi ạraraar. 42 Kụolo yira omoghi iphurukpu ạraraar, ọbobo eniin bịn. Kụ ẹlo a Meri, ọdi ạsaḅar mugey abin phọ, kụ kọ́boor nyọdi.”