Ọdaphan Luk

23 Kụ oomo aḍita awe phọ oḅerenhu, kụ ọsighe nyọdi ọghiom Pạịlet. 2 Kụ bịdi omhiigh ọgba ọḅam ẹmhu ọdi mọ: “Yoor ụmhiin oye phọ ọphon phọ dị raakelheghi ghan bụo eelhe phọ ayoor. Ọdi ạḅem ghan mọ kúsogh iisogh ụngo Siza, ḅịlhe mọ ọno kụ ạ Krạịst phọ, uwo ẹmha phọ.” 3 Kụ ạ Pạịlet apuru nyọdi mọ: “Nạ kụ Uwo Ẹmha ạbuo a Ju phọ ni?” Kụ a Jizọs ạphagharanhaan nyọdi mọ: “Nạ r’aloor kụ rạkaaph.” 4 Kụ ạ Pạịlet ạḅenhi ruwo ẹmhu ạbupinyon rịkia phọ r’aḍita awe phọ mọ: “Mị ụ́miin olhogh dị oye phọ ọphon phọ asoor.” 5 Kụolo bịdi úmeera, ụḅem ghan ghụn mọ: “Ọdi rạkom ghan ịiḅaghamhi kạlhogh igbo awe phọ loor esi ạraraar phọ ọdi rạtughemhi bọ oomo a Judia, ọdi amhiigh k’ẹpe Gạlili kụ masi aani ẹphen.” 6 Ạ Pạịlet rọnhaghan ịphen phọ kụ apuru olhegheri mụghumo oye phọ ọlo ạ Gạlili. 7 Ọdi rọwaaghi olhegheri mọ a Jizọs ọlo ekool phọ ạ Hẹrọd kụ rapogh bọ, kụ arom mọ ọsighe ọghiom Hẹrọd. Mem mọ ọpo phọ ạ Hẹrọd ạrol aani ni Jeruselem.

8 Ạ Hẹrọd ạmhiin bọ Jizọs, olhoghi phọ ạḅaal li iboom. Ịdi eḍighi bọ mebia ni ọdi rạwa ghan bọ ọmhiin aani a Jizọs loor esi dị ọdi mạnhaghan ni ịbadi ạraraar ịlo ọdi, kụ ạwa ghan ni ọmhiin ịiḍaany dị kaḍighi. 9 Esi ịduon phọ ọdi amhiigh ni opuru a Jizọs ịbadi asipuru, kụolo ọ́phagharanhaan nyọdi. 10 Kụ aruwo ẹmhu ạbupinyon rịkia phọ r’ạbutughemhia Olhogh phọ ụmheregha ghan ni, kụ r’ọghagh olhoghi ọgbaaghi sịagba ọḅam ẹmhu ọdi. 11 Kụ ạ Hẹrọd r’ạbuo ẹgham mọ ọdi ụzoom ni nyọdi ịlo ạteeny, kụ ọkpolhoghi nyọdi ịma ạsuoma ọgilaam ọdi, kụ aḅulhemhi nyọdi ạghiom Pạịlet. 12 Ẹpe ọmhan ạmulhogh ḍien ạrol li igbo ạ Hẹrọd rạ Pạịlet, kụolo ḍio phọ ạḍiphe phọ ịyal phọ ạbidi uḍigh ni rịghiri.

13 Ạ Pạịlet ạmhagh ni ruwo ẹmhu ạbupinyon rịkia phọ, r’ạbutooghia phọ, r’awe phọ aakpomhoghi 14 kụ ạḅenhi mọ: “Nyinha ịsighe oye phọ ọphon phọ iruom ịmhi mọ rạḅenhi ghan we phọ mọ ọgbagharan bụo ịtooghi phọ. Kụ ịmiin! mị mapuru ni nyọdi sipuru ghisigh anyinha, kụolo mị ụ́miin ịyaar dị eḍeenhaan mọ ọdi aḍighi ni rạraar phọ nyinha ẹgba bọ rẹḅam ẹmhu ọdi. 15 Kụ ạ Hẹrọd kẹn bịn ịyaar ọ́mhiin, loor esi dị aḅulhemhi ni nyọdi uruom iyoor, ịmiin! ọdi óḍighi ịyaar dị ẹkpe ọtuan oghiigh. 16 Esi ịduon phọ mị kạliom nyọdi bịn aseere mọ agheel.” 17* —— 18 Kụolo oomo aḍita awe phọ ụlo ọḅem mọ: “Kiigh oye phọ ọphon phọ* kụ aseere Bạrạbạs!” 19 (Ụlhogh oye phọ ọphon phọ ikoli loor esi dị aḍighi ịdi awe ọgbagharan bụo ịtooghi ẹmha phọ, ạḅilhe ạko enu.) 20 Kụ ạ Pạịlet ạḅilhe ni ạḅaanhaan we phọ, loor esi dị ọdi ạwa oseere a Jizọs. 21 Kụ bịdi ọlo mọ: “Kạn nyọdi loor oreeny aghiigh! Kạn nyọdi loor oreeny aghiigh!” 22 Kụ ọdi ạḅilhe ạḅenhi bịdi omhunhenhiom ịraar amem mọ: “Eeghe kụ iḍighi? Oye phọ ọphon phọ asoor eeghe olhogh? Mị ụ́miin ịyaar dị aḍighi dị ẹkpe ọtuan oghiigh; esi ịduon phọ mị kạliom nyọdi bịn aseere mọ agheel.” 23 Bịdi ọnhaghan bọ ịphen phọ, ụkuamhi ghan ghụn bịn ọlo mọ oghiigh nyọdi,* tụtu ạ Pạịlet amheera. 24 Kụ ạ Pạịlet asopha mọ oḍighi ịpe awe phọ rọwa bọ. 25 Kụ ọdi aseere oye phọ bịdi ọḅem bọ mọ oseere phọ, ọpo ọlhogh bọ ikoli loor ịduon aḍighi bọ ịdi awe ọgbagharan bụo ịtooghi phọ ạḅilhe bọ ạko enu, kụolo ạḅogh Jizọs ạngo bịdi mọ ọghi oḍighi ịpe bịdi rọwa bọ.

26 Ịduon bịdi ọpham bọ nyọdi rọḍuanham, usiph ni oye dị arelhe raḍigh ẹpe ẹmha phọ, kụ ọngo oreeny ịmhinhimhiin* phọ mọ arool ạdapham ghan Jizọs. Ḍien oye phọ ughol mọ ạ Sạịmọn kụ ọlo ạ Sạịrini. 27 Aḍita awe ụdaph ni Jizọs, kụ igbo ạbidi ạnmariir ụrol li dị ọgiphigha ghan rokpolhoghi ạbidi loor ọto ọḅilhe omhoghinhaan ghan nyọdi. 28 Kụ a Jizọs akiton aphogh nmạriir phọ kụ ạḅem mọ: “Nmạnyaan a Jeruselem, kímhoghinhaan ịmhi. Imoghinhaan ghụn siloor anyinha r’ạnmuny phọ anyinha; 29 ịmiin! amem retu ni dị awe kọḅem ghan mọ, ‘Ọḅaal olhoghi kụ odianhaan nmạriir phọ ạbuphe útue bọ usoph eghun, r’ạrukuruḅaka phọ ị́mar bọ r’ạramamaam mọ ịbam ạnmuny ụ́maam bọ!’ 30 Kụ awe komiigh ni ọḅenhi ạraaḅaraph phọ mọ, ‘Imhelheghuom iyoor!’ kụ ọḅenhi ruugum mọ mọ, ‘Iikpereghiom iyoor!’ 31 Eru mạar dị ịphen phọ emite ni mem dị oreeny phọ kőmhugh, eeghe kụ kemite mem dị oreeny phọ amhugh?”

32 Ụpham ni ịyal abusoroghuom iilhogh dị rọwa ọze aani ọḍapham nyọdi. 33 Bịdi rosi esi phọ oghol bọ mọ Ọkeeghi Ẹmhu, kụ ọkan nyọdi sịphe oreeny phọ igbo ịyal abusoroghuom iilhogh phọ, oniin ḍịghaagh elhiom ọphoripho ḍịghaagh ekeeny. 34 Kụ a Jizọs ạḅem mọ: “Ọde, sạr ạwilhenhaan bịdi, ịdi eḍighi bọ bịdi úlegheri ịpe bịdi roḍighi bọ.” Kụ bịdi ụsa ni kẹn ẹlhel odiom ạrusuoma phọ ọdi. 35 Kụ awe phọ ụmheregha ni ophogh ghan. Kụolo ạbutooghia phọ ụgilaam ni nyọdi kụ ọḅem ghan mọ: “Ọdi ạphel li bụnhon; ạphelha aani nụun loor ọdi eru mạar dị ọdi aḍighi ni Krạịst phọ, Ọpo Ẹnhaan Mạsaḅar bọ.” 36 Ạbuo ẹgham mọ bịn ụgilaam aani ni nyọdi. Bịdi ụngo nyọdi miim dị rạlagh 37 kụ ọḅem ghan mọ: “Mọ nạ kụ Uwo Ẹmha ạbuo a Ju phọ, pọ pẹla loor ạna.” 38 Ụge kẹn ni ịyaar ọkan sịphe oreeny phọ ạnyu ẹmhu ọdi, mọ: “Ọphon Uwo Ẹmha ạbuo a Ju phọ.”

39 Kụ oniin osoroghuom iilhogh phọ ọkan bọ sịphe phọ amhiigh ni ọḅenhi yogh ọdi mọ: “Tọ nạ ụḅem mọ nạ kụ ạ Krạịst phọ? Pẹla loor ạna ạḅilhe ụphel aani iyoor!” 40 Kụolo ọphoripho ạḅaam ni nyọdi mọ: “Nạ Ẹnhaan rákiilhaan ghan? Oye phọ ọphon phọ r’ạna kụ osophonhaan oniin phọ ọoruen phọ. 41 Ọoruen phọ ọphon phọ usophonhaan bọ iyira ạkpeanhaan ni, ịdi eḍighi bọ ịphen phọ ịikpia ạraraar phọ yira oḍighi yogh bọ; kụolo oye phọ ọphon ọ́pioman.” 42 Kụ ọdi ạḅem mọ: “Jizọs, ụutughian ni ịmhi mem dị nạ aḍigh sịphe Ọmhar phọ ạna.” 43 Kụ a Jizọs ạḅenhi nyọdi mọ: “Mị ạkar rạḅenhi ghan nyịnha rodon phọ mọ, nạ kạtol li r’ạmhi sịphe Pạrạdạịs.”

44 Mem mọ ọpo phọ rẹteeny omhunhenhiom odiiny ạwa* phọ, kụolo ufiri aḍigh ni de phọ tụtu ẹteeny omhunhenhiom esugha ạwa* phọ, 45 loor esi dị ogogo phọ ọ́mhu mụn; kụ ukpe phọ osophom bọ esi iigbia phọ ạkoghoronhaan sịphe ogbo phọ k’ạnyu k’ude. 46 Kụ a Jizọs ạlo mọ: “Ọde, mị ạḅogh ghuḍum mọ ạmhi ạlogh ḍịghaagh ạna.” Ọdi rọḅem ịphen phọ bịn esophaany. 47 Uwo ẹmhu ạbuo ẹgham mọ rọmhiin ịphen emite bọ, kụ amhiigh oghuenhi Ẹnhaan ọḅem mọ: “Ọkar agey, oye phọ ọphon phọ oye elhiom eḍighinhom ịyaar ri.” 48 Mem mọ oomo aḍita awe phọ ookpomhoghan bọ ọmhiin ịpe kokiigh bọ nyọdi ọmhiin bọ rạraar phọ emiteghu bọ, umhiigh ni ọgiphigha arokpolhoghi ạbidi, kụ oghelheghu ilhoghi aruutu ạbidi. 49 Kụ oomo ạbuphe olhegheri bọ nyọdi ụmheregha ni ekpisi dị ẹkel. Kụ ạnmariir phọ ọdaph bọ nyọdi mem mọ ọdi rạḍua bọ Gạlili ụrol aani ni sịphe phọ ọmhiin rạraar phọ ịphen phọ.

50 Kụ oye dị oghol mọ a Josẹf aru ni, ọdi aḍighi aani okumor oye sịphe Ọkaraghi Ogbogh Otu Ịiruen ạbuo a Ju phọ. Ọdi aḍighi ogey oye r’oye elhiom eḍighinhom ịyaar. 51 (Oye phọ ọphon phọ ómheeraam ịpe bịdi oḅian bọ oḍighi a Jizọs.) Ọdi ọlo ẹmha a Judia dị oghol mọ Ạrịmạtia, kụ akori aani ghan Ọmhar phọ Ẹnhaan. 52 Oye phọ ọphon phọ ạghi ni ạteeny Pạịlet ạlhom ọsighe aḍizu phọ a Jizọs ọghi oḍi. 53 Ọdi asoore nyọdi kụ aphurughiom ịma oodugha ukpe, kụ ạsighe ạghi ạlhogh oḍi dị oguph loor aḍighiigh dị kọ̋lhogh ghan oye. 54 Aḍio phọ ạḍiphe phọ iḍighi ḍio Iikolhobian, kụ mọony amem a Ḍio Ophooghian phọ kemiigh. 55 Kụ ạnmariir phọ ọdaph bọ nyọdi mem mọ ọdi rạḍua bọ Gạlili ụghi aani ni ọmhiin esi phọ oḍi bọ nyọdi r’ịpe ọmhunheeny bọ nyọdi, 56 kụ bịdi oḅula ọghi ookolhobian rạraar dị ẹmhoogh ịma eḍu r’arolo ịma eḍu. Kụolo ọdaphan olhogh phọ, bịdi uphooghian ni Ḍio Ophooghian phọ.