Ọdaphan Jọn

19 Kụ ạ Pạịlet arom bụo ẹgham mọ kụ ọgurogh Jizọs. 2 Kụ ạbuo ẹgham mọ ọsighe iitoor olhoom eghoony uwo ẹmha ozu nyọdi, kụ ọkpolhoghi nyọdi oodor ạsuoma, 3 kụ oru ghan ọteeny nyọdi ọḅem mọ: “Yoor rọmagh ni o, Uwo Ẹmha ạbuo a Ju phọ!” Kụ bịdi ooḅorogh ghan nyọdi kẹn. 4 Kụ ạ Pạịlet ạḅilhe amite ạḅenhi bịdi mọ: “Ịmiin! Mị amiteom nyọdi riruomonaan inyinha oḍeenhaan mọ mị ụ́miin esi dị ọdi ạpioman.” 5 Kụ a Jizọs amitenhom eghoony iitoor phọ ozu bọ nyọdi r’oodor ạsuoma phọ ọkpolhoghi bọ nyọdi. Kụ ạ Pạịlet ạḅenhi bịdi mọ: “Ịmiin oye phọ!” 6 Kụolo mem mọ aruwo ẹmhu ạbupinyon rịkia phọ r’abukoriom mọ ọmhiin bọ Jizọs, umhiigh ọlo mọ: “Kạn nyọdi loor oreeny aghiigh! Kạn nyọdi loor oreeny aghiigh!” Kụ a Pạịlet ạḅenhi bịdi mọ: “Nyinha kụ ịsighe nyọdi ẹghi eghiigh,* loor esi dị mị ụ́miin esi dị ọdi ạpioman.” 7 Kụ ạbuo a Ju phọ ọḅenhi nyọdi mọ: “Yoor ọmoogh ni olhogh, kụ ọdaphan olhogh phọ ọdi ạkpe omhugh, loor esi dị ọdi akophora mọ ọno ọony Ẹnhaan.”

8 Ạ Pạịlet ạnhaghan bọ ịpe bịdi rọkaaph bọ, oghiilhaan phọ ọdi ạbugh ni, 9 kụ ọdi ạḅilhe aḍigh ẹpe ogiga opoghom mọ, kụ apuru Jizọs mọ: “Nạ ọlo ẹghen?” Kụolo a Jizọs ọ́phagharanhaan nyọdi. 10 Kụ ạ Pạịlet apuru nyọdi mọ: “Nạ ruḅoronhom ghan ịmhi? Nạ ólhegheri mọ mị ạmoogh ni ịikpo oseere ạna r’ịikpo oghiigh ạna?”* 11 Kụ a Jizọs ạphagharanhaan nyọdi mọ: “Mọ Ẹnhaan kụ ómheera bọ ọbo nạ mụ́moogh ịikpo oḍighi ạmhi ịyaar. Pọ kụ ịyaar phọ ịkaraph oye phọ ụḅogh bọ ịmhi ạngo nyịnha ẹbugh bọ epu ịlo ạna.”

12 Ạ Pạịlet ạtuan ni ịphen phọ ạwa ghan eten oseere ọdi, kụolo ạbuo a Ju phọ ụlo ghan mọ: “Nạ aseere oye phọ ọphon phọ pọ nạ kọ́yaghiri a Siza. Tọrobo oye lọ aghophora mọ ọno uwo ẹmha ạwa sighiton rạki esi a Siza.” 13 Ạ Pạịlet rọnhaghan ikpo ọnhu phọ ịphen phọ, kụ amiteom Jizọs. Ọdi ạrolhom ạgada ịiruen esi dị ọde sighiigh ude phọ, dị oghol ọnhu a Hibru mọ ạ Gạbạtạ. 14 Aḍio phọ ạḍiphe phọ iḍighi ḍio iikolhobian Ẹyaal Ọphel Otenhe phọ; kụ rẹki ọteeny odiiny ạwa* phọ. Kụ ọdi ạḅenhi bụo a Ju phọ mọ: “Ịmiin! Ọphon kụ uwo ẹmha phọ anyinha!” 15 Kụolo bịdi ụlo ghan mọ: “Sịghe nyọdi ạḍuanham! Sịghe nyọdi ạḍuanham! Kạn nyọdi loor oreeny aghiigh!” Kụ ạ Pạịlet apuru bịdi mọ: “Mị ukiigh uwo ẹmha phọ anyinha?” Kụ aruwo ẹmhu ạbupinyon rịkia phọ ọphagharanhaan mọ: “Emuton Siza yoor ụ́moogh ọnhon uwo ẹmha.” 16 Kụ ọdi ạḅogh nyọdi ạngo bụo ẹgham mọ, mọ ọghi ọkan loor oreeny oghiigh.

Kụ bịdi ọpham Jizọs ọḍuanham. 17 Ọdi arool li oreeny ịmhinhimhiin* phọ ọdi anyeenhiom ekpisi dị oghol mọ Esi Ọkeeghi Ẹmhu, kụ ọnhu a Hibru okol mọ ạ Gọlgọtạ. 18 Pạ phọ kụ ịdi bịdi ọkan Jizọs igbo ịyal awe, oniin ḍịghaagh elhiom ọphoripho ḍịghaagh ekeeny. 19 Ạ Pạịlet ạge ni kẹn ịyaar ạkan sịphe oreeny ịmhinhimhiin* phọ. Ạge mọ: “A Jizọs ọpo ạ Nạzạrẹt phọ, Uwo Ẹmha ạbuo a Ju phọ.” 20 Kụ ịbadi ạbuo a Ju phọ ạal li ịyaar phọ ọge bọ, loor esi dị esi phọ ọkan bọ Jizọs sịphe oreeny phọ ituman ẹmha phọ, kụ ụge ọnhu a Hibru, r’ọnhu ạ Lạtịn, r’ọnhu a Grik. 21 Kụolo aruwo ẹmhu ạbupinyon rịkia ạbuo a Ju phọ ụḅenhi Pạịlet mọ: “Kạ́ge mọ, ‘Uwo Ẹmha ạbuo a Ju phọ,’ gẹ ghụn mọ ọdi ạḅem mọ, ‘Mị Uwo Ẹmha ạbuo a Ju phọ.’” 22 Kụ ạ Pạịlet ạḅenhi bịdi mọ: “Ịpe mị mạge bọ, mị mạge.”

23 Ạbuo ẹgham mọ rọkan Jizọs sịphe oreeny phọ kụ ọsighe rụsuoma ạnyu phọ ọdi odi inya abin, oye ye bin, kụ ọḅilhe ọsighenhom ạsuoma olhoghi phọ ọdi. Kụolo ạsuoma olhoghi phọ ọdi ọ́mhoogh esi dị ọkol, ulho k’ạnyu k’ude. 24 Kụ oniin ạḅenhi ghan nyoniin mọ: “Kụ́paar, ọsa ẹlhel olhegheriom oye phọ kạsighe bọ.” Ịphen phọ imite omhunhenhi ịpe ịge iigbia phọ ẹghaaph bọ mọ: “Bịdi udian rụsuoma phọ ạmhi, kụ ọsa ẹlhel ọsighenhom ạsuoma phọ ạmhi.” Kụ ạbuo ẹgham mọ ụkar kụ oḍighi ịphen phọ.

25 Tọrobo ịpe ẹrol bọ, onhiin phọ a Jizọs r’umaranhi onhiin phọ ọdi, ra Meri ạnhir phọ a Klopạs, ra Meri Mạgdạlin, ụmheera ni otuman sịphe oreeny ịmhinhimhiin* phọ ọkan bọ Jizọs. 26 Kụ a Jizọs rọmhiin onhiin phọ ọdi r’ọnyo ạmatuan phọ ọdi ạphomhoghian bọ dị ọmheera otuman pạ phọ, kụ ạḅenhi onhiin phọ ọdi mọ: “Nhịr phọ, pọrono ọony ạna!” 27 Kụ ọdi ạḅenhi ọnyo ạmatuan phọ mọ: “Pọrono onhiin ạna!” Kụ emhiigh ḍio phọ ạḍiphe phọ, ọnyo ạmatuan phọ ạsighe ni onhiin phọ a Jizọs agheelhom k’ọdi.

28 Ịphen phọ reten, bịn a Jizọs alhegheri mọ ọno mạdighi ạman oomo ạraraar phọ Ọde phọ ọno ạḅenhi bọ nyịnho oḍighi, kụ ạḅem mọ: “Ạmuum rụphu ịmhi,” omhunhenhi ịpe ịge iigbia phọ ẹghaaph bọ. 29 Oko dị omuzeḍi miim dị rạlagh ạrol li sịphe phọ. Esi ịduon phọ bịdi ụsighe iisighom ọlhogh olhoghi amiim mọ rạlagh bọ, kụ ọpharari iisighom mọ ọla a hisop kụ ophoophe ọghimhom sịphe ọnhu phọ ọdi. 30 A Jizọs rọonema miim mọ rạlagh bọ kụ ạḅem mọ: “Oomo ạraraar memhunhughan!” kụ azumeri ẹmhu ọdi bịn esophaany.

31 Kụ loor ịduon aḍio phọ ạḍiphe phọ eḍighi bọ Ḍio Iikolhobian, ạbuo a Ju phọ ụghi ni ọḅenhi Pạịlet mọ owunhughi ruwol awe phọ, ọḅilhe osoroghi ruzu phọ ọbo kẹtol ghan bọ sịphe ireeny ịmhinhimhiin phọ ẹteeny Ḍio Ophooghian phọ (loor esi dị a Ḍio Ophooghian phọ ạḍiphe phọ iḍighi ḍigbogh aḍio ophooghian). 32 Kụ ạbuo ẹgham mọ oru owunhughi ruwol ọḅel oye phọ r’aruwol ọphoripho oye phọ ọkan bọ sịphe oreeny phọ ọogaany a Jizọs. 33 Bịdi oru bọ osi sịphe a Jizọs odi bọ, ụmhiin mọ ọdi mamhugh, esi ịduon phọ bịdi úbunhughi ruwol ọdi. 34 Kụolo oniin ọnyo ẹgham agim ni ịkpurugaany ọdi ọsoph, kụ ịḅaal r’ạmuum emite mem mem mọ. 35 Kụ ọpo ạmhiin bọ mạghaaph ịlo ịphen phọ, kụ ịpe ọdi ạghaaph bọ ịne ni, kụ ọdi alegheri ni mọ ịpe ọdi rạkaaph bọ ịne ni, kụ ạghaaph ịphen phọ pịdi nyinha emeeraam aani. 36 Ọkar ọghaaph, ịphen phọ imite omhunhenhi ịpe ịge iigbia phọ ẹghaaph bọ mọ: “R’oniin ọbarara ọdi kóbun.” 37 Kụ ẹnhon esi sịphe ịge iigbia phọ ẹḅem kẹn mọ: “Bịdi kopogh ni ọmiin ọpo bịdi ogim bọ.”

38 Ịphen phọ eten bọ, oye ọlo Ạrịmạtia dị oghol mọ a Josẹf ạghi ni ạteeny Pạịlet ạlhom ọsighe aḍizu phọ a Jizọs ọghi oḍi. Ọdi ọnyo ạmatuan a Jizọs, kụolo óḍighi ịdi awe kolegheri loor esi oghiilhaan ạbuo a Ju phọ. Kụ ạ Pạịlet amheera ni, esi ịduon phọ ọdi ạghi ni ạsighe ḍizu phọ. 39 Kụ a Nikodimọs, oye phọ ạghi bọ ḍughul ạteeny Jizọs, aru aani ni, kụ ạpham mạạ ra alo dị oḅua arumom, dị ẹemor phọ keḍighi ni 33 a kilogrạm.* 40 Kụ bịdi ọsighe rạraar phọ repur bọ ịma eḍu phọ ọlhogh olhoghi iidugha arukpe kụ ophurughiom ḍizu phọ a Jizọs, ọdaphan eḍighinhom ịyaar amaḍi ạbuo a Ju phọ. 41 Kụ oghoony ịizupha ạrol li ẹpe oghiigh bọ nyọdi,* kụ ẹpe oghoony phọ omhoom oḍi ạrol li dị kọ̋lhogh ghan oye. 42 Kụ loor ịduon aḍio phọ ạḍiphe phọ eḍighi bọ Ḍio Iikolhobian ạbuo a Ju phọ, kụ oḍi phọ atuman bọ kẹn ẹpe phọ, bịdi ụlhogh ni Jizọs pạ phọ.