Iiḍaạny Phọ Emite Bọ Siphẹ Ophiịny Igbilha Phọ

Iduọn aFero anhaghạn bọ mọ awe phọ Izrạl moḍuạ Ijipt, bịn anme olhoghi odị. Odị atọ aḅenhị we eghạm mọ odị mọ: ‘Iikpomhoghi oomo arughuugh eghạm mọ amhị, ophorogh bidị! Yira mu/meera mọ bidị ogheel.’ Odị r’awe eghạm mọ odị umhiigh ni ophorogh awe phọ Izrạl.

AJehova asighẹ eekpoogh ootụ kụ aḍiemhiom ghan we phọ odị ootaany, kụ ḍughul aḍighinhom ghan eekpoogh aniạn. Odị aaḅakị bidị asiemhi siphẹ Ophiịny Igbilha phọ kụ aḅenhị bidị mọ ophooghian.

Ipẹ reten, awe phọ Izrạl umhiịn ni dị aFero r’awe eghạm mọ odị roporogh bidị. Risigh abidị Ophiịny Igbilha phọ kụ odi, kụ omhạn abidị awe eghạm mọ aFero. Bidị umhiigh ni omhoghi oḅenhị aMozis mọ: ‘Yoor komugh ni bịn! Nạ muwilhẹ ghụn iyoor epẹ Ijipt.’ Kuolọ aMozis aḅenhị bidị mọ: ‘Ke/kiilaan. Ikori kụ emhiịn ipẹ aJehova kuphẹl bọ iyira.’ AMozis akạr aḍuom olhoghi aJehova. K”iduọn ḍughụm?

AJehova aḅenhị we phọ Izrạl mọ bidị ookpomhoghi raraạr phọ abidị, onyaaghiạn oghiọm aghisigh erelhe phọ. Ḍughul phọ aḍiphẹ phọ, aJehova aḍighi ni idị eekpoogh aniạn phọ eḍiemhiom bọ bidị keḅula omhạn etọl igbo abidị r’awe phọ Ijipt. Gạ awe phọ Ijipt, ufiri kụ arọl. Kuolọ gạ awe phọ Izrạl, aḍiḅaạl kụ irọl.

AJehova aḅenhị Mozis mọ aphoophe ḍighaạgh phọ odị aphoghomhiom ophiịny phọ. Kụ aJehova aḍighi idị ogbagarạ ookuugh aghugh oomo aḍughul phọ aḍiphẹ phọ. Ophiịny phọ adia ni, kụ eten emite siphẹ ogbo phọ. Awe phọ Izrạl urelhe ni oten siphẹ eten phọ egharaghạr bọ r’amuụm ophiịny phọ dị ameerạ iyạl phọ agạ phọ idiphọ iikpe.

Awe eghạm mọ aFero utuonhọm ni we phọ Izrạl orelhe bọ roḅeẹny ophiịny phọ. Kuolọ aJehova agbaragbaramhị ni bidị, kụ aḅilhẹ aḍighi idị iidighilha arughuugh eghạm mọ emhiigh okporonhụ. Kụ awe eghạm mọ omhiigh olooghị mọ: ‘Oḍuạ siẹn phọ! AJehova kụ rabianhaan bidị.’

AJehova aḅenhị ni Mozis mọ: ‘Poophe ḍighaạgh phọ anạ aphoghomhiom ophiịny phọ.’ Mem mem mọ, amuụm mọ aakpereghiom ni we eghạm mọ aFero. Kụ aFero r’oomo awe phọ odị omhugh, r’oniin onyọ abidị o/kpetenhaan.

Ḍieriphọ agạ ophiịny phọ, aḍita awe phọ Izrạl mokpetenhaan bọ uuseeny ni Enhaạn r’aḍuọr. Bidị umoọr mọ: “Moọr ḍuọr aboom aJehova, loor esi dị odị kụ abụgh apelheghiom. Arusụ phọ r’abuphẹ rokiilhom bọ bidị, odị maḅiemhi siphẹ ophiịny phọ.” Iduọn awe phọ romoọr bọ ḍuọr phọ, anmariịr phọ ughẹr ri iḅạ r’isaghạ phọ abidị. Olhoghi atorobọ oye aḅaạl li loor iduọn bidị mokạr bọ okpetenhaan.