Umor Ph’anạ R’anạ Ipụr Ephomhoghiạn​—Ika?

Oḅẹm nuụn mọ nạ odi Galili siḍio ph’aJizọs. Kụ nạ masi epẹ Jeruselem olhe aani eyaạl arogbogo phọ. Kụ emhạ phọ emuza r’awe dị oḍuạ eekelhạ arikpisi kụ oru aani olhe eyaạl phọ. Nạ rawạ oghị ophighirọn ekiạ ongọ aJihova. R’ogạ dị nạ aphạm, kụ nạ rakparaghạ ogbalhaghạ oolhọgh awe phọ, siphẹ aruukụ asimarugh emhạ phọ, oghị osi isiphẹ otu iiḅereghị phọ. Nyiidiphọ nạ masi, kụ awe omuza otu iiḅereghị phọ dị rokori ophiinyọn aani arikiạ. Nạ odini rakori, bịn eteẹny nyinhạ ongọ ogạ ph’anạ opinyọn rikiạ phọ. Opọ kụ amem dị, n’aatughiạn umor anạ dị r’anạ emhoọgh ḍiaḅạ, dị eeni odi ni igbo aḍita awe phọ obobọ siphẹ emhạ phọ. Siẹn mesi bọ, aJizọs akaạph ni idị nạ kaḍighi. (Bạl Matiu 5:24.) Ika kụ idị nạ r’umor ph’anạ kewạ eephọ idiphọ aJizọs aromhoghiom bọ? Pogh igẹ ph’edi bọ siẹn ude phọ, kụ amakị ipẹ ewạ bọ mọ ḍighi.

EWẠ MỌ . . .

• kiạ ateẹny umor ph’anạ mem dị n’amhiịn m’ephigh edi ni oghol emhụ ipẹ nạ aḍighi bọ oghạgh olhoghi

• kparaghạ oolemhi umor ph’anạ eḍighi maạr lọ odị rakạgh olhoghi iboom obobọ ragbạ omheremhị m’anạ apiomạn aani ni

• er rurụ agey angọ mem lọ umor ph’anạ rakaạph ipẹ odị alhoghoma bọ, ghalhamọ nạ o/kạr rị onhaghanhạn, lọm osạr owilhenhaạn dị aḍuạ k’ekpom kụ amite, esi ipẹ odị maghaạph bọ obobọ inhọn ilọ mekọm ipẹ n’aḍighi bọ emite

EWẠ MỌ UMOR PH’ANẠ . . .

• awạ olhoghonhaạn aḍighaạgh abunhọn awe siphẹ ookpomhoghan phọ, esi oghaaphọgh opiomạn ph’anạ oḅenhị abidị

• amhooghaam nyinhạ, aaḅulha oomo ikarạph kazin kazin, kụ agbi oḅenhị anạ mọ meeraam mọ nạ kụ upiomạn

• alhọgh elhegh osooromhi aloor r’akpọ oḅio phọ nạ aḍeenhaan bọ oghị oteẹny odị, kụ asạr awilhenhaạn nyinhạ r’oomo ekpom

Galhamọ r’iduọn iiseeny ph’ayira i/ḅarạm mụn bọ rikiạ inhạm rodon, aJizọs ratughemhị ghan m’eeghe amasian kụ odi igbo omhoọgh eephọ r’abumor ayira r’iiseeny dị Enaạn kesighẹ?