Asipuru Dị Abuẹn Robạl Ghan Bọ Rinyạ Phọ Ayira Opuru

Ikpo onhụ phọ edi bọ 2 Tesalonikạ 3:14 eghaạph bọ ilọ olhọgh elhegh oye, eḍighi edị ikumor awe ookpomhoghan phọ kụ koḍighi obobọ torobọ onyọ aKristẹn kụ kaḍighi?

Otelhedom mọ Pọl agẹ ni ḍinyạ aghiọm Kristẹn phọ odi bọ Tesalonikạ, kụ aḅẹm mọ: “Iini siẹn oye odi ni siphẹ ogbo phọ anyina dị ka/naghanạn dom mọ ogẹ bọ riruomaan inyina siẹn aḍinyạ phọ aḍiẹn. Nyina emiịn odọ oye phọ ophọn, iIọgh nyodị elegh.” (2 Tẹs. 3:14) Epẹ omạn, yira uḅẹm ghan mọ ikumor awe phọ kụ koḍighi iphẹn phọ. Esi iduọn phọ, eḍighi maạr dị oye siphẹ ookpomhoghan phọ aghiọm ghisigh raḅitonhaạn ghan ikpo onhụ phọ Enhaạn, ikumor awe phọ ungọ ghan ni oghaạph ophurọm rurụ ookpomhoghan phọ. Rongọ oghaạph phọ, abumor r’abumaranhi phọ koo/ḍikuan mun r’oye phọ epel omite epẹ erugh phọ r’isiphẹ ituughạ phọ.

Toroboiperolbọ ewạ ni mọ ooḅenhion iyaạr, loor esi dị yira monhaghanhạn nyiidiphọ mọ ikpo onhụ phọ aPọl egbolhomaam torobọ onyọ aKristẹn. Esi iduọn phọ, i/moghi dị ikumor awe phọ kongọ oghaạph ophurọm arurụ ookpomhoghan phọ. Eeghe kụ iḍighi? Ooḅeghiọn iyaạr phọ aPọl aghaạph ghan bọ mem mọ odị angọ bọ oromha phọ ophọn phọ.

Otelhedom mọ Pọl aḅẹm mọ abuniin siphẹ ookpomhoghan phọ “ro/naghanạn ghan ipẹ” bidị oromha bọ. Epẹ omạn, mem dị odị aghị ophogh ookpomhoghan phọ, odị atọ ni aḅenhị bidị mọ: “Oye lọ ra/ḍighi ghan, ku/le ghan.” Ghalhamọ r’iduọn phọ, abuniin awe u/meera ukumuan etigheri iduọn kotue bọ ni. Awe phọ abuẹn phọ kẹn oḅilhẹ roḅilhigha yogh ghan sidọl abunhọn awe. Ika kụ edị abumor r’abumaranhi phọ odi bọ siphẹ ookpomhoghan phọ kozoọm we phọ abuẹn ro/naghanhạn ghan bọ oromha?—2 Tẹs. 3:6, 10-12.

APọl aḅenhị bidị mọ ‘oIhọgh elegh’ oye phọ. Ekpo onhụ aGrik phọ ogbạ bọ siẹn phọ remạ ghan olhegheri odọ oye phọ ophọn phọ, kụ ogonha aloor esi odị. APọl angọ oromha phọ ophọn phọ ookpomhoghan phọ, k/oginha ikumor awe phọ. (2 Tẹs. 1:1; 3:6) Esi iduọn phọ, eḍighi maạr dị onyọ aKristẹn amhiịn mọ onyọ umor obobọ umaranhi ra/naghanhạn ghan oromha aBaibul, oye phọ katue ni asopha ‘ogbatanaạn’ oye phọ.

Iphẹn phọ remạ ghan mọ odị kazoọm oye phọ idiphọ oye dị mogbatạn osighẹ siẹn ookpomhoghan phọ ḍughụm? Eeye! APọl aḅarạm mọ: “lpụr ghụn nyodị rurụ idiphọ onyọ asiya anyina.” Loor esi iduọn phọ, onyọ umor obobọ onyọ umaranhi atue ni asopha mọ onọ kaa/ḅughonhaan r’onyọ umor phọ ophọn phọ obobọ aḍẹ oḍẹ r’odị, epel mem dị oghị ituughạ obobọ omite epẹ erugh phọ. Onyọ umor katuạn eeghe kụ aḍighi bọ iduọn phọ? “Obọ umughoIoor asiph” nyopọ ra/daphạn ghan bọ oromha phọ. Iphẹn phọ keloghonhaạn ḍighaạgh dị onyọ umor phọ ra/naghanhạn ghan bọ oromha phọ kanmia.—2 Tẹs. 3:14, 15.

Abumor r’abumaranhi phọ kolegheri bọ ika onyọ umor dị akpẹ olhọgh elhegh? Eḅẹl phọ, ewạ dị yira kokạr okuphom owol mọ onyọ umor obobọ onyọ umaranhi ‘ra/naghanhạn ghan oromha’ idiphọ aPọl aghaạph bọ. APọl ra/kaạph ghan siẹn phọ ilọ awe dị odaphạn ni sinhị-iilhogh aBaibul phọ kụ oḍighi iyaạr dị ooruẹn olhoghi ayira u/meeraam. Kụ odị ra/kaạph ghan kẹn ilọ awe dị eḍighinhom araraạr phọ abidị egbatanhaạn r’ephẹn ayira. Ikpo onhụ phọ iphẹn phọ re/kaạph ghan ilọ awe dị oḍighi iyaạr dị repin esi ayira. Kparipẹ ghụn, aPọl rakaạph ghan ilọ awe dị mongọ ni oromha dị okpasị siphẹ aBaibul phọ kuolọ u/daphạn.

Eḍighi maạr dị yira omhiịn mọ onyọ umor obobọ onyọ umaranhi ra/naghanhạn ghan oromha aBaibul,a yira otue ni osopha mọ yira koo/ḍikuan ghan r’odị, epel omite epẹ erugh phọ r’oghị ituughạ. Loor esi iduọn torobọ oye kụ kasopha bọ ilọ oḍighi, oye phọ ku/kaaphọgh uḅenhị bunhọn awe epel buọ eghunotu oye phọ dị oḍighi Bugbaanhaạn. Oginha amem dị yira omite epẹ erugh phọ obobọ oghị ituughạ kụ edị yira kooḍikuan ghan r’oye phọ. Kụ mem dị odị aalemhi reten phọ odị, kụ edị yira koḅilhẹ omiigh ooḍikuan odị.