ESI ITUUGHẠ PHỌ 12
Eeghe Kụ Kelhoghonhaạn Nyinhạ Ḍighaạgh Oghiọm Aghisigh Ituughạ ABaibul Phọ?
Aạl ghan kụ oḅilhẹ otuughạ aBaibul phọ eḍighi ni iyaạr asuọ. Kuolọ re/dugh ghan. Eeni amem nạ atue ni aatughiạn mughumọ nạ katue ni akiọm ghisigh atuughạ ghan Baibul phọ. Uḍighi ika kụ enighẹ bọ olhọgh ikuph oghiọm aghisigh ituughạ phọ? Eeghe kụ kelhoghonhaạn nyinhạ ḍighaạgh oghiọm aghisigh etigheri ipaanhaạn?
1. Uḍighi ika kụ ituughạ aBaibul phọ emạn bọ maạr?
“Oghaạph phọ Enaạn raḅạ ni eye, ḅilẹ ralom ni.” (Hibru 4:12) Ituughạ aBaibul phọ emạn ni maạr loor esi dị regananamhi ghan iitughiạn Enhaạn ḅilhẹ r’ogbolhomaam dị amhoọgh aru esi anạ. ABaibul phọ kangọ nyinhạ oḍuomolhoghi, olhegheri iyaạr ḅilhẹ r’ogey osụ-olhoghi. Dị epelhom siẹn, aBaibul phọ kalhoghonhaạn nyinhạ ḍighaạgh oḍighi oyaghirị aZihova. Iduọn nạ ratuughạ bọ Baibul phọ, nạ rangọ ghan eepoogh Baibul phọ oḍighi oḍighi siphẹ aghuḍum mọ anạ.
2. Uḍighi ika kụ enighẹ bọ ni olhọgh elhegh idị igey aBaibul phọ emhạn maạr?
Igey aBaibul phọ ekịgh imạ aruphua. Epẹ kụ iyaạr phọ aBaibul phọ uromha bọ iyira mọ “ko igey phọ kụ ka/bool ramem.” (Proverbs 23:23) Mem dị yira olhọgh elhegh idị igey aBaibul phọ emhạn maạr, kinyu ni iyira olhọgh ikuph otuughạ ghan—ghalhamọ r’amem dị yira osomhan ipaanhaạn.—Ibạl Proverbs 2:4, 5.
3. AZihova kalhoghonhaạn nyinhạ ika ḍighaạgh oghiọm aghisigh otuughạ ghan?
Idiphọ Olemhiạ dị amhoọgh oomo iikpọ r’Oyaghirị anạ, aZihova kalhoghonhaạn ni nyinhạ ḍighaạgh otuughạ ilọ odị. Odị katue ni angọ nyinhạ iikpọ oḍighinhom “ipẹ eḅeraạn bọ nyodị.” (Ibạl Filipai 2:13.) Esi iduọn phọ, odị katue ni angọ nyinhạ ibuọm otuughạ obobọ osighẹ ipẹ nạ matuughạ bọ oḍighinhom mem lọ eghịgh mudị i/dugh. Eḍighi maạr dị nạ awạ olhoghonhaạn aḍighaạgh orue okpạr opu odẹgh ophogh obobọ ikpuuroghọm, odị kangọ ni nyinhạ. Gbor ghan alhọm aZihova esi iiḅereghị olhoghonhaạn aḍighaạgh oghiọm aghisigh otuughạ aBaibul phọ.—1 Tesalonikạ 5:17.
OLHEGHERI OBUGHẸ
Ooḅeghiọn idị nạ katue akiọm ghisigh atuughạ ghan Baibul phọ etigheri ibadị araraạr dị n’amhoọgh oḍighi obobọ ikpuuroghọm. Ipẹ reten kụ yira ooḅeghiọn idị aZihova kalhoghonhaạn nyinhạ ḍighaạgh oghiọm aghisigh ituughạ phọ.
4. Maghamhị maạr ituughạ aBaibul phọ anạ
Eeni amem loor esi ibadị araraạr oḍighi, rekịgh ghan ni mudị amem otuughạ aBaibul phọ i/lo. Eeghe kụ ketue elhoghonhaạn nyinhạ ḍighaạgh? Ibạl Filipai 1:10, kụ eeḅeghiọn sipuru phọ iphẹn:
Ighẹn kụ iniin araraạr phọ “ipẹ esooran bọ,” ewạ bọ mọ osọn ghan osighẹ?
Nạ kaḍeenhaan ika mọ nạ amaghamhị ni maạr ituughạ aBaibul phọ anạ?
Eḍighi maạr dị nạ awạ oḅạr iisaạr r’ikpo kụ olhọgh esi, kụ nạ aphụr alhọgh iisaạr phọ, esi ke/tọl dị ikpo phọ keḍigh
Eḍighi maạr dị nạ aphụr alhọgh ikpo phọ, esi ketọl li dị iisaạr phọ keḍigh. Iduọn kẹn kụ edị nạ aphụr ‘asọn ghan ipẹ esooran bọ’ kụ aḍighi eḅẹl siphẹ aghuḍum mọ anạ, amem ketọl li oḍighi inhọn araraạr
Otuughạ ghan aBaibul phọ regbaanyamhị ghan eephuạ phọ yira omhoọgh bọ olhegheri r’oḍighi ipẹ Enhaạn rewạ bọ. Ibạl Matiu 5:6, kụ eeḅeghiọn ḍipuru phọ aḍiẹn:
Yira omhaghamhị maạr ituughạ aBaibul phọ, eeghe asuọ kụ edị yira komoọgh?
5. Ka/ḅula omhạn ghalhamọ nạ usomhan ni ikpuuroghọm
Eeni amem, awe kowạ ghan ni osophoghom ituughạ aBaibul phọ anạ. Lọgh elhegh eḍeenhaan aFrancesco. Ipegh VIDIO phọ, kụ eeḅeghiọn sipuru phọ edaphạn bọ siẹn.
Siẹn avidio phọ, eghunotu r’arighirị aFrancesco uzọ ika mem mọ odị aḅenhị bọ bidị raraạr phọ odị ratuughạ bọ?
Eeghe asuọ kụ aḍuạ amite loor iduọn odị u/ḅula bọ omhạn?
Ibạl 2 Timoti 2:24, 25, kụ eeḅeghiọn sipuru phọ iphẹn:
Abuọ eghunotu anạ r’arighirị anạ ologhoma ika iduọn nạ ratuughạ bọ Baibul phọ?
Odaphạn esi aBaibul phọ, ewạ mọ zoọm ika oye dị olhoghi phọ ra/ḅaạl ghan omhiịn dị nạ ratuughạ Baibul phọ? Kụ eeghe kụ iḍighi?
6. Beḍenhọm olhoghonhaạn aḍighaạgh aZihova
Iduọn nạ raḍuraan bọ kotuman aZihova, kụ edị eephuạ phọ anạ oḍighi ipẹ eḅeraạn bọ nyodị kebụgh ghan bịn. Ghalhamọ r’iduọn phọ ni, eeni amem kikparanhaạn ni iyira onmeeghi araraạr siphẹ aghuḍum mọ ayira pidị yira oḍighi ipẹ eḅeraạn bọ Enhaạn. Eḍighi maạr dị nạ alhoghoma idiphọ phọ, pọ ka/ḅonyonhu azuan. AZihova kalhoghonhaạn ni nyinhạ ḍighaạgh. Ipegh VIDIO phọ, kụ eeḅeghiọn sipuru phọ edaphạn bọ siẹn.
Siẹn avidio phọ, eeghe araraạr kụ edị aJim anmeeghi siphẹ aghuḍum mọ odị orue oḍighi ipẹ eḅeraạn bọ aZihova?
Eeghe iyaạr siphẹ eḍeenhaan phọ odị kụ itir nyinhạ?
Ibạl Hibru 11:6, kụ eeḅeghiọn sipuru phọ iphẹn:
AZihova kaḍighinhaan eeghe “buphẹ osighẹ bọ oomo ologhi phọ abidị kụ rowaạm bọ nyodị”?
Odaphạn iphẹn phọ, aZihova raloghoma ghan ika mem dị nạ alhọgh ikuph otuughạ aBaibul phọ?
OYE ATUE NI APURU MỌ: “Uḍighi ika kụ nạ ratuughạ ghan bọ Baibul phọ r’Abugbaanhaạn aZihova?”
Nạ kapagharanhaạn ika?
OGHAẠPH OOKARAGH
Ghalhamọ r’iduọn re/kạr ghan bọ kedugh, otuughạ ghan aBaibul phọ ketue ni elhoghonhaạn nyinhạ ḍighaạgh oghelhọm aghuḍum k’agee-pọ. Kiọm ghisigh abeḍenhọm ghan aZihova, bịn odị kasẹph ni nyinhạ.
Ooḅula
Uḍighi ika kụ igey aBaibul phọ emạn bọ maạr esi anạ?
Ika kụ idị nạ katue asọn raraạr phọ “ipẹ esooran bọ”?
Uḍighi ika kụ ewạ bọ mọ lọm aZihova olhoghonhaạn aḍighaạgh orue oghiọm aghisigh otuughạ ghan aBaibul phọ?
WAAGHỊ AMHIỊN
Ḅeeḅeghiọn inya araraạr dị melhoghonhaạn ḍighaạgh ibadị omhaạr oḍighinhom amem mọ abidị.
“Ilọ Oḍighinhom Amem Mọ Anạ R’osụ-olhoghi” (Awake!, February 2014)
Lọgh elhegh idị aZihova alhoghonhaạn ḍighaạgh oniin anhịr dị olom mọ u/naghanhạn iyaạr phọ atụ bọ kụ ralọgh ikuph okumu Enhaạn.
Miịn idị oniin oye amhooghọm suọ loor okparạm anhịr odị.
Eeni amem awe roḅẹm ghan mọ Abugbaanhaạn aZihova rogbaragbaramhị ghan rughunotu. Iduọn phọ ni?
“Abugbaanhaạn AZihova Rogbaragbaramhị Ghan Rughunotu Obobọ Rolọgh Ghan Kophophe?” (Edi intanẹt)