ESI ITUUGHẠ PHỌ 46
Eeghe Kụ Iḍighi Kụ Nạ Kaḅọgh Bọ Loor Angọ AZihova Aḅilhẹ Aḍiiny Muụm?
Oḅọgh aloor ongọ aZihova pọ ooḅereghị oḅenhị odị mọ nạ kaaseeny ghan oginha odị bịn kụ asighẹ ogbi odị aḍighi eḅẹl iyaạr siphẹ aghuḍum mọ anạ. (Psalm 40:8) Ipẹ reten, kụ nạ aḍiiny muụm. Oḍiiny amuụm mọ raḍeenhaan ghan mọ nạ maḅọgh loor angọ aZihova. Osopha oḅọgh aloor ongọ aZihova phọ kụ osopha dị amhạn amaạr apu dị nạ katue asopha. Eeghe kụ ketue enyu nyinhạ osopha osopha dị amhạn maạr iduọn?
1. Eeghe kụ renyu ghan oye oḅọgh aloor ongọ Enhaạn?
Ephomhoghiạn kụ rinyu ghan iyira oḅọgh aloor ongọ aZihova. (1 Jọn 4:10, 19) ABaibul phọ uḅenhị iyira mọ: “Ipomoghiạn [aZihova] r’oomo ologhi anyina, r’oomo uwaIoor anyina, r’oomo iitughiạn anyina, r’oomo inyaạm anyina.” (Mạk 12:30) Yira roḍeenhaan ghan mọ yira opomhoghiạn Enhaạn esi ikpo-onhụ r’eḍighinhom araraạr. Idiphọ iyạl awe dị ophomhoghiạn siloor robalhạn ghan bọ, ipẹ kụ idị ephomhoghiạn phọ ayira esi aZihova rinyu ghan iyira oḅọgh aloor ongọ odị kụ oḍiiny amuụm.
2. Ighẹn aḍisẹph kirokirọ kụ edị aZihova maguanhaan rebenhẹ phọ odị moḍiiny bọ muụm?
Nạ aḍiiny muụm, nạ kaḍighom aani siphẹ eghunotu phọ aZihova eḍighi bọ elọ oḅaạl olhoghi. Opọ kụ amem dị nạ kamiịn ibadị areten dị odị kaḍeenhaan mọ odị aphomhoghiạn ni nyinhạ, kụ nạ aḅilhẹ aḍuraan atuman nyodị eten dị epu idị merọl ghan. (Ibạl Malachi 3:16-18.) AZihova kaḍighi Odẹ anạ, kụ nạ aḅilhẹ amoọgh eghunotu abumor r’abumaranhi dị ophomhoghiạn aZihova kụ oḅilhẹ kẹn ophomhoghiạn nyinhạ siẹn oomo aḅirinhi phọ. (Ibạl Mạk 10:29, 30.) Kewạ ni mọ gbariọn radạ orue osianhaan oḍiiny amuụm. Rewạ dị nạ katuughạ ilọ aZihova, apomhoghiạn nyodị kụ aḅilhẹ amoọgh omheeraam akị esi Oọny phọ odị. Kụ eekunha phọ, nạ kaḅọgh loor angọ aZihova. Nạ aḍighi iphẹn phọ kụ aḍiiny muụm, pọ nạ ratelhe aani eten phọ epẹ ketorori bọ engọ ghuḍum k’agee-pọ. Ekpo-onhụ phọ Enhaạn eḅẹm mọ: ‘Oḍiiny amuụm mọ . . . riphẹl li inyinha.’—1 Pit 3:21.
OLHEGHERI OBUGHẸ
Ooḅeghiọn iyaạr phọ eḍighi bọ kụ osopha oḅọgh aloor ongọ aZihova r’oḍiiny amuụm emhạn bọ maạr.
3. Torobọ onyọ ayira amoọgh osaḅạr oye dị odị kaaḅereghị
Awe Izrạl iḍiodi phọ uutughiạn ghan mọ bidị kotue ni ooḅereghị aZihova r’ekaanheẹn emhụgh phọ Baal. Kuolọ aZihova arom ni oyil phọ odị Ilaija oghị oolemhi aḍiitughiạn phọ aḍiphẹ phọ. Ibạl 1 Kings 18:21, kụ eeḅeghiọn ḍipuru phọ aḍiẹn:
Eeghe osopha kụ edị awe phọ Izrạl omhoọgh osopha?
Idiphọ awe phọ Izrạl, yira omoọgh osaḅạr oye dị yira kooḅereghị. Ibạl Luk 16:13, kụ eeḅeghiọn sipuru phọ iphẹn:
Uḍighi ika kụ yira ko/ḅạr bọ aZihova r’onhọn oye obobọ enhọn iyaạr kụ ooḅereghị?
Yira koḍeenhaan ika mọ yira osopha ooḅereghị aZihova?
4. Tuutughiạn ghan ephomhoghiạn phọ aZihova maḍeenhaan bọ nyinhạ
AZihova mungọ iyira ibadị imạ inmo. Eeghe kụ edị yira kotue ongọ aani nyodị? Ipegh VIDIO phọ.
Ighẹn kụ iniin areten dị nạ katue aḍeenhaan mọ nạ apomhoghiạn ni aZihova? Ibạl Psalm 104:14, 15 r’1 Jọn 4:9, 10, kụ eeḅeghiọn sipuru phọ iphẹn:
Ighẹn inmo aZihova kụ edị nạ akạr rasereghiạn?
Ika kụ idị inmo phọ iphẹn phọ etir nyinhạ?
Mem dị oye ungọ iyira inmo dị ekạr iḅeraạn iyira, yira rowạ ghan ni reten oḍeenhaan mọ yira omaghamhị ni maạr. Ibạl Deuteronomy 16:17, kụ eeḅeghiọn ḍipuru phọ aḍiẹn:
Mem dị nạ amaạr aphogh oomo araraạr phọ aZihova maḍighinhaan bọ nyinhạ, enyu nyinhạ oḍighinhaan odị eeghe?
5. Oḅọgh aloor ongọ aZihova remiteom ghan ḍisẹph kirokirọ
Ibadị awe omeeraam mọ oolheghaany, oḍigh ogey oḍighi obobọ ikpoki kengọ ni bidị oḅaạl olhoghi. Iduọn phọ ni ḍughụm? Ipegh VIDIO phọ, kụ eeḅeghiọn sipuru phọ edaphạn bọ siẹn.
Ghalhamọ r’iduọn oọny phọ aphomhoghiạn bọ ni ophegh abọl, eeghe kụ iḍighi kụ odị awilhẹ bọ?
Odị asopha oḅọgh aloor ongọ aZihova, ka/bọl. Nạ aatughiạn mọ osopha phọ odị anighẹ ni? Eeghe kụ iḍighi?
Otelhedom mọ Pọl aḍigh ni ogbogh oḍighi kụ agbi bọ oḍighi onyọ aKristẹn. Odị atuughạ iilhogh aJu ḍighaạgh oye dị aalheghaany ni. Kuolọ odị awilhẹ ni oomo phọ ipẹ phọ aḍighi onyọ aKristẹn. APọl alhoghoma ni saị ḍughụm? Ibạl Filipai 3:8, kụ eeḅeghiọn sipuru phọ iphẹn:
Uḍighi ika kụ aPọl aḅẹm bọ mọ oḍighi phọ odị aḍighi ghan bọ kụ agbi bọ oḍighi onyọ aKristẹn phọ aḍighi “eekuna amuphe” obobọ iiyạ?
Eeghe asuọ kụ edị odị amhoọgh?
Nạ ragbi mọ eeghe kụ kengọ nyinhạ ogey asuọ, ooḅereghị aZihova obobọ oḍighi enhọn iyaạr?
APọl amhoọgh ni suọ dị apu raraạr phọ ipẹ odị awilhẹ yogh bọ mem mọ odị aḍighi bọ onyọ aKristẹn phọ
ABUNIIN AWE OOTUGHIẠN MỌ: “Ooḅereghị Enhaạn bịn kụ ko/ginha iyaạr dị oye kaḍighi, esi iduọn phọ i/wạ olhọgh oomo amem oye phọ.”
Nạ ragbi mọ enighẹ ni oḅọgh aloor anạ ongọ aZihova? Eeghe kụ iḍighi?
OGHAẠPH OOKARAGH
Ephomhoghiạn kụ rinyu ghan iyira oḅọgh aloor ongọ aZihova kụ oḍiiny amuụm.
Ooḅula
Eeghe kụ iḍighi kụ aZihova akpeanhaạn bọ ni dị yira kooseeny oḅilhẹ opomhoghiạn k’ekpom?
Ika kụ idị aZihova rakpẹ ghan iikpiạ rebenhẹ phọ odị moḍiiny bọ muụm?
Keḅeraạn ni nyinhạ oḅọgh aloor ongọ aZihova?
WAAGHỊ AMHIỊN
Miịn iyaạr dị eḍighi idị oniin omoọr suọr r’oniin oye dị aphegh ghan bọl osopha oḅọgh aloor ongọ aZihova.
Iḍoọgh Ropuru Ghan Mọ—Mị Kaḍighinhom Eeghe Ghuḍum Amhị?—Aḍigbaany Adọl Amhị (6:54)
Miịn inhọn iraạr ariphigh dị nạ katuạn aḅọgh loor angọ aZihova.
“Uḍighi Ika Kụ Nạ Kaḅọgh Bọ Loor Angọ AZihova?” (The Watchtower, January 15, 2010)
Siẹn aḍuọr phọ koḍeenhaan bọ vidio phọ, miịn ibo dị abuphẹ moḅọgh bọ loor ongọ aZihova romoọgh ghan.
Siphẹ emhuoghaạph phọ “Esi Ibadị Asiạ Mị Uukia Ghan Ni Mọ, ‘Utụ Eeghe Kụ Ulhẹm Bọ Iyira?’” lọgh elhegh iyaạr dị enyu oniin anhịr ooḅeghiọn araraạr dị odị asighẹ aḍighi eḅẹl.
“ABaibul Phọ Ranme Ghan Ni Sighuḍum” (The Watchtower, November 1, 2012)