ESI ITUUGHẠ PHỌ 51
Ika Kụ Idị Nạ Katue Aḍighinhom Ikpo-onhụ Anạ Eten Dị Keḅeraạn AZihova?
AZihova ulhẹm bọ iyira, unmoom ni iyira iikiạ inmo—inmo aḍiaḅạ. Ipẹ yira roḍighinhom ghan bọ inmo phọ iphẹn phọ retir ghan ni nyodị? Ii! (Ibạl Jems 1:26.) Esi iduọn phọ, ika kụ idị yira koḍighinhom bọ inmo aḍiaḅạ phọ eten dị eḅeraạn aZihova?
1. Ewạ mọ oḍighinhom ika inmo aḍiaḅạ phọ?
ABaibul phọ uḅenhị iyira mọ ‘oniin akparamhị ghan olhoghi oniin, oniin alhọgh ghan aphophe nyoniin.’ (1 Tesalonikạ 5:11) Nạ aatughiạn ni we dị ewạ mọ okparamhị? Nạ kaḍighi eeghe pidị ilhoghi abidị eḅaạl? Ḅenhị bidị mọ bidị omạn ni maạr esi anạ. Nạ atue ni akaạph akol eegharạ abidị dị eḅeraạn nyinhạ. Nạ aatughiạn ni esi aBaibul dị ketue ekparamhị oye dị nạ alhegheri? Ibadị ariisi aBaibul edi ni dị nạ katue asaḅạr. Ka/bula mọ, eten phọ epẹ nạ aḍighinhom bọ ikpo-onhụ phọ anạ ketir aani ni oye phọ. Kparaghạ ghan oḅạ eten dị eyoghoyoghọ.—Proverbs 15:1.
2. Ighẹn ikpo-onhụ kụ edị yira ko/ḅạ ghan?
ABaibul phọ aḅẹm mọ: “Ke/sighẹ ghan ikarạph ikpo onhụ kụ eghaaphọm oghaạph.” (Ibạl Efesọs 4:29.) Iphẹn phọ remạ ghan mọ yira ko/ḅạ ghan ikarạph ikpo-onhụ ḅilhẹ ko/ḅaanhaạn ghan oye ikpo-onhụ dị yira olhegheri mọ kepin esi odị. Yira kokel kẹn ikalhaghiạn r’iḅoroghom.—Ibạl Proverbs 16:28.
3. Eeghe kụ kilhoghonhaạn iyira ḍighaạgh oḅạ ghan eten dị kekparamhị bunhọn?
Ibadị amem araraạr phọ ipẹ yira rokaạph ghan bọ reḍeenhaan ghan idị edi ekpom ayira obobọ iyaạr dị yira rootughiạn. (Luk 6:45) Esi iduọn phọ otuughạ ootughiạn ghan araraạr dị eḍighi ilọ eghuan, idị enighẹ, ekpeanaạn oboom, eḅilhẹ eḍighi imạ. (Filipai 4:8) Orue oḍighi iduọn phọ, omhiigha loor kụ oselẹ ghan raraạr phọ ipẹ yira kosighẹ bọ ozaamhiạn ghan loor ḅilhẹ r’arighirị phọ ayira. (Proverbs 13:20) Kenighẹ kẹn ni ootughiạn ghan kụ ogbi oghaạph iyaạr. Tuutughiạn idị ikpo-onhụ phọ anạ ketir bunhọn. ABaibul phọ aḅẹm mọ: “Ikpo-onhụ dị uu/tughiạn kụ oḅạ regim ghan oye idiphọ elool-eghạm, kuolọ anem oye phọ opọ asụ bọ olhoghi phọ eḍighi eekonhom.”—Proverbs 12:18.
OLHEGHERI OBUGHẸ
Ooḅeghiọn eten dị yira oḅạ kụ olhoghi aZihova kaḅaạl kụ eḅilhẹ ekparamhị bunhọn.
4. Pamhaghạn ikpo-onhụ phọ anạ
Eeni amem, yira roḅạ ghan ni ikpo-onhụ dị esighẹ rekị kụ yira ologhoma saị. (Jems 3:2) Ibạl Galetia 5:22, 23, kụ eeḅeghiọn sipuru phọ iphẹn:
Eghẹn eegharạ siẹn phọ kụ edị nạ kalọm aZihova pidị nạ atue apamhaghạn ikpo-onhụ phọ anạ? Ika kụ idị araagharạ phọ iphẹn phọ ketue elhoghonhaạn nyinhạ ḍighaạgh?
Ibạl 1 Korịnt 15:33, kụ eeḅeghiọn ḍipuru phọ aḍiẹn:
Ika kụ idị arighirị, areephegh, asifim, r’asuọr phọ nạ asaḅạr bọ retir ghan ikpo-onhụ phọ anạ?
Eeghe kụ ketue etir eten phọ epẹ nạ raḅaanhaạn ghan bọ we?
Ibạl Ecclesiastes 3:1, 7, kụ eeḅeghiọn ḍipuru phọ aḍiẹn:
Oghẹn odọ amem kụ edị kewạ mọ oḅoorian obobọ okoriom mem dị enhighẹ kụ ogbi oghaạph iyaạr?
5. Kaạph ghan imạ ilọ abunhọn
Eeghe kụ kilhoghonhaạn iyira ḍighaạgh oghel oḅạ ghan ikpo-onhụ dị kepin esi oye? Ipegh VIDIO phọ, kụ eeḅeghiọn sipuru phọ edaphạn bọ siẹn.
Siphẹ avidio phọ, eeghe kụ iḍighi kụ onyọ umor phọ awạ bọ onme araraạr phọ odị rakaạph ghan bọ ilọ abunhọn?
Odị aḍighi eeghe orue onmia?
Ibạl Ecclesiastes 7:16, kụ eeḅeghiọn ḍipuru phọ aḍiẹn:
Ewạ mọ ootughiạn ghan eeghe mem dị yira rowạ oghaạph ikarạph ilọ oye?
Ibạl Ecclesiastes 7:21, 22, kụ eeḅeghiọn ḍipuru phọ aḍiẹn:
Asiikpịgh phọ iphẹn phọ kelhoghonhaạn nyinhạ ḍighaạgh ika ophamhaghạn aloor mem dị oye aghaạph ikarạph ilọ anạ?
6. Ḅaanhaạn ghan buọ eghunotu anạ eyoghoyoghọ eten
AZihova rawạ mọ oḅaanhaạn ghan buọ eghunotu ayira eyoghoyoghọ eten ḅilhẹ r’ephomhoghiạn. Ipegh VIDIO phọ, kụ eeḅeghiọn ḍipuru phọ edaphạn bọ siẹn.
Eeghe kụ kelhoghonhaạn nyinhạ ḍighaạgh oḅaanhaạn ghan eghunotu anạ eyoghoyoghọ eten?
Ibạl Efesọs 4:31, 32, kụ eeḅeghiọn ḍipuru phọ aḍiẹn:
Ighẹn ikpo-onhụ kụ kelọgh epophe buọ eghunotu anạ?
AZihova aghaạph ni amiteom mọ odị apomoghiạn ni Zizọs Oọny phọ odị. Ibạl Matiu 17:5, kụ eeḅeghiọn ḍipuru phọ aḍiẹn:
Nạ katuughaạny aani ika aZihova mem dị nạ raḅaanhaạn buọ eghunotu phọ anạ?
Wạ ghan roopoogh osẹph abunhọn
ABUNIIN AWE OOTUGHIẠN MỌ: “Enighẹ ni oghaạph ghan ipẹ edi bọ olhoghi phọ anạ. Mughumọ ikpo-onhụ phọ anạ enighẹ obobọ i/nighẹ.”
Nạ ameeraam ni iphẹn phọ? Eeghe kụ iḍighi?
OGHAẠPH OOKARAGH
Ikpo-onhụ phọ ayira ketue ni eekonhom obobọ eḍighi oye iyaạr. Ewạ ni mọ omhaạr ghan ootughiạn kụ ogbi oghaạph, olhegheri mem dị ekpẹ oghaạph iyaạr, ḅilhẹ r’eten phọ epẹ yira kokaạph bọ.
Ooḅula
Ika kụ idị nạ katue asighẹ ikpo-onhụ phọ anạ aḍighinhom olhoghonhaạn aḍighaạgh bunhọn?
Ighẹn ikpo-onhụ kụ edị nạ rawạ oghel?
Eeghe kụ kilhoghonhaạn iyira ḍighaạgh oḅạ ghan ikpo-onhụ dị eyoghoyoghọ ḅilhẹ kelọgh bunhọn epophe?
WAAGHỊ AMHIỊN
Eeghe kụ kilhoghonhaạn iyira ḍighaạgh oḅạ ghan imạ ikpo-onhụ?
Miịn iyaạr dị kelhoghonhaạn nyinhạ ḍighaạgh oghel ikarạph ikpo-onhụ.
Miịn idị nạ kaḍighi kụ akel oghaạph ghan ikarạph ilọ abunhọn.
Miịn idị aZihova alhoghonhaạn ḍighaạgh oniin oye orue owilhẹ oḅaaghị yogh ghan ikarạph ikpo-onhụ.
“Mị Umhiigh Ni Okiririom Ophogh Adọl Aghuḍum Mọ Amhị” (The Watchtower, August 1, 2013)