Oḍighi ‘Ebenhẹ Phọ Asụ Bọ Olhoghi Aḅilhẹ Akpẹ Oḍuomolhoghi’

AZizọs kụ Uw-emhụ ookpomoghan aKristẹn phọ. (Efesọs 5:23) Rodon, aZizọs odi epẹ k’akẹ phọ kụ raḍiemhiom ghan budaphạm mọ odị siẹn ade phọ dị eego esi ‘ebenhẹ phọ asụ bọ olhoghi aḅilhẹ akpẹ oḍuomolhoghi.’ (Ibạl Matiu 24:45.) AZizọs angọ ni “ebenẹ phọ” oḍighi oḍighi r’elhiom osophaam ilọ oḍighi iniin araraạr, kuolọ bidị kokiọm ni ghisigh oḍighi ebenhẹ aKraist kụ ologhonhaạn ghan ḍighaạgh bueriphọ abuphẹ osagharạn aani bọ uwaloor iigbia phọ. Anhiạn kụ ebenhẹ phọ? Ika kụ idị ebenhẹ phọ ruphogh iyira?

1. Anhiạn kụ ‘ebenhẹ phọ asụ bọ olhoghi aḅilhẹ akpẹ oḍuomolhoghi’?

AZihova rasighẹ ghan ni oniin oye obobọ eẹny egu awe kangoọm iiḅakiọm we phọ odị. (Malachi 2:7; Hibru 1:1) AZizọs amhugh bọ, abutelhedom mọ r’ikumor awe phọ orọl bọ Jeruselem kụ uḅilhẹ omhiigh oḍiemhiom ghan. (Iiḍighi 15:2) Dị edaphạn eten phọ epẹ phọ, rodon eẹny egu ikumor awe kụ uḍighi bọ Loor Phọ Repogh Bọ Bugbaanhaạn AZihova. Bidị kụ romiteom ghan raraạr dị kekparamhị siya awe phọ r’aZihova, koḅilhẹ ooḅakị oḍighi oghaạph ilọ omhạr phọ. Egu ikumor awe phọ abuẹn phọ kụ ‘ebenhẹ phọ asụ bọ olhoghi aḅilhẹ akpẹ oḍuomolhoghi . . . aZizọs amạ bọ’ ophạm iiḍighi phọ iphẹn phọ. (Matiu 24:45) Torobọ oye siphẹ Aloor Phọ Repogh Bọ aḍighi aani odị osagharạn uwaloor iigbia phọ, kụ bidị omoọgh oḍuomolhoghi otooghị r’aKraist epẹ k’akẹ phọ, mem dị aghuḍum mọ abidị asi eekunha siẹn ade phọ.

2. Ighẹn araraạr okparamhiọm asiya awe phọ r’aZihova kụ edị ebenhẹ phọ akpẹ bọ oḍuomolhoghi phọ ramiteom ghan?

AZizọs aḅẹm mọ ebenhẹ phọ akpẹ bọ oḍuomolhoghi phọ “[kangọ ghan bueriphọ aKristẹn phọ] eḍien, mem lọ ekpẹ ongọ.” (Matiu 24:45) Idiphọ egey eḍien reḍighi ghan bọ idị aloor ayira kemoon eḅilhẹ ekpạr, kụ edị eḍien phọ ebenhẹ phọ ramiteom ghan bọ, eḍighi bọ iromoghiom dị okpasị siphẹ Ekpo-onhụ phọ Enhaạn, ringọ ghan iyira inyaạm oḅạr aZihova r’oḅilhẹ oḍighi oḍighi phọ aZizọs ungọ bọ iyira. (1 Timoti 4:6) Yira roteẹny ghan iromoghiom mọ ipẹ phọ rilhoghonhaạn ghan bọ iyira ḍighaạgh olhegheri ogbi phọ Enhaạn kụ oḅilhẹ okparamhiọm asiya phọ ayira r’odị, dị eego esi ituughạ phọ, rookpomhoghan eghir r’arookpomhoghan eephugh, rinyạ phọ regbạ ghan bọ Baibul phọ ḅilhẹ r’asividio phọ.

OLHEGHERI OBUGHẸ

3. Ewạ dị awe phọ aZihova koḅophoghạn ghan okumuan

Eeḍiạn iiḅakiọm aZizọs, Aloor Phọ Repogh Bọ romaạr ghan ni kophogh oḍighi Abugbaanhaạn aZihova. Eniin phọ eten phọ kụ edị aZizọs aaḅakị aani Kristẹn oḅẹl okuron asiạ phọ. Ipegh VIDIO phọ.

AVIDIO: AZihova Raakpomhoghi Ghan Ni We Phọ Odị (6:18)

Ibạl 1 Korịnt 14:33, 40, kụ eeḅeghiọn ḍipuru phọ aḍiẹn:

• Ika kụ idị asiikpịgh phọ iphẹn phọ eḍeenhaan mọ aZihova rawạ ni mọ Abugbaanhaạn phọ odị oḅophoghạn ghan okumuan?

4. Ebenhẹ phọ akpẹ bọ oḍuomolhoghi phọ ramaạr ghan kaaḅakị oḍighi oghaạph iiḅi iinhaghạn phọ

Oghaạph ghan ilọ omhạr phọ kụ okpanhạ oḍighi dị aKristẹn oḅẹl okuron asiạ phọ oḍighi ghan. Ibạl Iiḍighi 8:14, 25, kụ eeḅeghiọn sipuru phọ iphẹn:

• AKristẹn oḅẹl okuron asiạ phọ usighẹ ghan iiḅakiọm ilọ oghaạph iiḅi iinhaghạn phọ ḍighaạgh abuọ anhiạn?

• APita r’aJọn uḍighi eeghe mem mọ abueriphọ abutelhedom mọ ongọ bọ bidị iiḅakiọm?

Oghaạph iiḅi iinhaghạn phọ kụ oḍighi dị amhạn maạr apụ ipheriphọ iiḍighi phọ, dị Aloor Phọ Repogh Bọ rooḅakị. Ipegh VIDIO phọ.

AVIDIO: Ogbon Oḍighi Oghaạph Iiḅi Iinhaghạn Phọ (1:24)

AZizọs aghaạph ni akparamhị mọ iiḅi iinhaghạn phọ emạn ni maạr iboom. Ibạl Mak 13:10, kụ eeḅeghiọn sipuru phọ iphẹn:

• Uḍighi ika kụ oghaạph iiḅi iinhaghạn phọ amạn bọ maạr agey esi Aloor Phọ Repogh Bọ?

• Uḍighi ika kụ rewạ bọ mọ ‘ebenhẹ phọ asụ bọ olhoghi aḅilhẹ akpẹ oḍuomolhoghi’ kụ aaḅakị oḍighi oghaạph iiḅi iinhaghạn phọ siẹn oomo aḅirinhi phọ?

5. Ebenhẹ phọ akpẹ bọ oḍuomolhoghi kụ rangọ ghan iiḅakiọm

Aloor Phọ Repogh Bọ kụ rongọ ghan iiḅakiọm buphẹ oḍighi bọ Kristẹn siẹn oomo aḅirinhi phọ. Kuolọ bidị rolegheri ghan ika iiḅakiọm ongọ? Ooḅeghiọn ipẹ aloor phọ ephogh ghan bọ Kristẹn oḅẹl okuron asiạ phọ orue ghan bọ oḍighi iduọn phọ. Ibạl Iiḍighi 15:1, 2, kụ eeḅeghiọn sipuru phọ iphẹn:

• AKristẹn phọ orọl bọ siphẹ oḅẹl okuron asiạ phọ usoman eeghe iiḅaghamhị?

• Abuọ anhiạn kụ edị aPọl, aBanabạs, r’abueriphọ awe phọ oghị oteẹny oghaaphọgh iiḅaghamhị phọ?

Ibạl Iiḍighi 15:12-18, 23-29, kụ eeḅeghiọn ḍipuru phọ aḍiẹn:

• Tutụ aloor phọ repogh bọ kosopha ilọ oḍighi, bidị uḍighi eeghe owạ iiḅakiọm Enhaạn ilọ iiḅaghamhị phọ esoor bọ?—Miịn siikpịgh phọ 12, 15, r’28.

Ibạl Iiḍighi 15:30, 31 r’16:4, 5, kụ eeḅeghiọn sipuru phọ iphẹn:

• AKristẹn oḅẹl okuron asiạ phọ umhegheron ika mem mọ oteẹny bọ iiḅakiọm aloor phọ repogh bọ?

• Ika kụ idị aZihova asẹph bidị loor iduọn bidị onhaghanhạn bọ?

Ibạl 2 Timoti 3:16 r’aJems 1:5, kụ eeḅeghiọn ḍipuru phọ aḍiẹn:

• Aloor Phọ Repogh Bọ rowạ ghan iiḅakiọm ḍighen kụ ogbi osopha iyaạr?

OGHAẠPH OOKARAGH

Aloor Phọ Repogh Bọ kụ ‘ebenhẹ phọ asụ bọ olhoghi aḅilhẹ akpẹ oḍuomolhoghi’ aKraist amạ bọ oḍiemhiom awe phọ odị. Aloor Phọ Repogh bọ kụ rongọ ghan iiḅakiọm koḅilhẹ omiteom raraạr dị kekparamhị siya awe phọ r’aZihova siẹn oomo aḅirinhi phọ.

Ooḅula

• Anhiạn kụ amạ bọ ‘ebenhẹ phọ asụ bọ olhoghi aḅilhẹ akpẹ oḍuomolhoghi’ ophogh ghan awe phọ Enhaạn?

• Ighẹn areten kụ edị Aloor Phọ Repogh Bọ romaạr ghan kuphogh iyira?

• Nạ ameeraam ni mọ Aloor Phọ Repogh Bọ kụ ‘ebenhẹ phọ asụ bọ olhoghi aḅilhẹ akpẹ oḍuomolhoghi’ phọ ḍughụm?

WAAGHỊ AMHIỊN

Miịn ipẹ Aloor Phọ Repogh Bọ odẹ bọ raraạr orue oḍighi oḍighi phọ abidị.

“Aloor Phọ Repogh Bọ Bugbaanhaạn AZihova Remạ Ghan Eeghe?” (Edi intanẹt)

Tuughạ alhegheri idị Aloor Phọ Repogh Bọ romaạr ghan komhiịn mọ bidị ungọ ni iyira eḍien dị emhoon dị kekparamhị siya phọ ayira r’aZihova.

Omiteom Araraạr Dị Emoon (17:18)

Abuphẹ oḍighi bọ Loor Phọ Repogh Bọ osighẹ ika oḍighi phọ aZizọs maḅọgh bọ alhọgh ḍighaạgh abidị?

Eepoogh Dị Rosereghiạn Ni (7:04)

Ika kụ idị ituughạ phọ r’arookpomhoghan phọ eganhanhamhi mọ aZihova kụ raaḅakị ni Loor Phọ Repogh Bọ?

AZihova Ratughemhị Ni We Phọ Odị (9:39)