ESI ITUUGHẠ PHỌ 57
Nạ Kaḍighi Eeghe Eḍighi Maạr Dị Nạ Aḍighi Igbogh Ikarạph?
Ghalhamọ nạ apomhoghiạn ni aZihova iboom kụ aḅilhẹ rakparaghạ ghan oḍighi idị keḅeraạn nyodị, eeni amem nạ kapiomạn ghan ni nyodị. Toroboiperolbọ, iniin ikarạph ebụgh ni epu inhọn. (1 Korịnt 6:9, 10) Eḍighi maạr dị nạ aḍighi igbogh ikarạph, pọ ka/bula mọ ephomhoghiạn phọ aZihova amhoọgh bọ aru esi anạ k”esi eekunha; odị anyaaghiạn ni osạr owilhenhaạn r’oḅilhẹ olhoghonhaạn anạ ḍighaạgh.
1. Yira koḍighi eeghe kụ aZihova asạr uwilhenhaạn iyira?
Abuphẹ ophomhoghiạn bọ aZihova ro/ḅaạl ghan olhoghi mem dị bidị oḍighi igbogh ikarạph. Kuolọ bidị romoọgh ghan ni iidereghị esi ipẹ aZihova aguanhaan bọ we phọ odị mọ: “Ghalhamọ ikarạph phọ anyinha itọgh idiphọ oodor, mị kaḍighi idị keḅaạl idiphọ ibikpo.” (Isaiah 1:18) Eḍighi maạr dị yira okạr ri okiton, aZihova kasạr ri uwilhenhaạn iyira. Yira koḍighi eeghe kụ eḍeenhaan mọ yira mokiton? Yira kobilhẹ oḍighi ikarạph phọ, kụ olọm aZihova osạr owilhenhaạn loor esi dị yira moḍighi idị olhoghi odị u/ḅaạl. Kụ yira olọgh inyaạm onme ikarạph iitughiạn phọ obobọ raagharạ phọ ekọm bọ idị yira oḍighi ikarạph, kụ oḅilhẹ olọgh inyaạm odaphạn asiigbu phọ aZihova esererẹ bọ.—Ibạl Isaiah 55:6, 7.
2. Ika kụ idị aZihova rasighẹ ghan ikumor awe phọ kaḍighinhom olhoghonhaạn ayira ḍighaạgh mem dị yira oḍighi ikarạph?
Eḍighi maạr dị yira oḍighi igbogh ikarạph, aZihova uḅenhị iyira mọ ‘oghị oteẹny ikumor awe ookpomhoghan phọ.’ (Ibạl Jems 5:14, 15.) Ikumor awe phọ abuẹn phọ opomhoghiạn ni aZihova r’iyool phọ odị. Motughemhị bidị ilọ olhoghonhaạn ayira ḍighaạgh oḅilhẹ omhoọgh asiya dị ekpạr r’aZihova.—Galetia 6:1.
Ika kụ idị ikumor awe phọ rulhoghonhaạn ghan iyira ḍighaạgh mem dị yira oḍighi igbogh ikarạph? Iyạl obobọ iraạr ikumor awe kosighẹ ni Baibul phọ uulemhiom iyira. Bidị koḅilhẹ kẹn ni ukparamhị iyira, uromha iyira ilọ oḍighi pidị yira ko/ḅula mun oḍighi ikarạph phọ. Kuolọ ikumor awe phọ rogbatạn ghan ni kosighẹ igbo abumor phọ oye dị aḍighi igbogh ikarạph kụ u/meera ukiton, obọ abunhọn siphẹ ookpomhoghan phọ kodạph ghan bọ eḍighinhom araraạr phọ odị.
OLHEGHERI OBUGHẸ
Olhegheri obughẹ idị yira kotue okuamhị osereghiạn olhoghonhaạn aḍighaạgh phọ aZihova rungọ ghan bọ iyira mem dị yira oḍighi igbogh ikarạph.
3. Oghaạph ikarạph phọ omiteom rilhoghonhaạn ghan iyira ḍighaạgh oḅilhẹ omhoọgh igey asiya r’aZihova
Torobọ ikarạph dị yira oḍighi retir ghan ni aZihova, esi iduọn phọ yira rokaạph ghan koḅenhị nyodị. Ibạl Psalm 32:1-5, kụ eeḅeghiọn ḍipuru phọ aḍiẹn:
Eeghe kụ iḍighi kụ enighẹ bọ oghaạph ghan ikarạph phọ ayira oḅenhị aZihova kparipẹ raaghị?
Mem dị yira oghaạph ikarạph phọ ayira oḅenhị aZihova kụ oḅilhẹ owạ olhoghonhaạn aḍighaạgh ikumor awe phọ, olhoghi ayira rapọ ghan ni. Ipegh VIDIO phọ, kụ eeḅeghiọn ḍipuru phọ edaphạn bọ siẹn.
Siphẹ avidio phọ, ika kụ idị ikumor awe phọ olhoghonhaạn ḍighaạgh Canon oḅula esi aZihova?
I/wạ mọ aaghinhaạn ikumor awe phọ iyaạr, loor esi dị bidị odi olhoghonhaạn ayira ḍighaạgh. Ibạl Jems 5:16, kụ eeḅeghiọn ḍipuru phọ aḍiẹn:
Ika kụ idị oghaạph oomo ipẹ emite bọ oḅenhị ikumor awe phọ keḍighi idị kedughanhaan bidị olhoghonhaạn ayira ḍighaạgh?
Kaạph ikarạph phọ nạ aḍighi bọ, ḅenhị ikumor awe phọ ipẹ eru bọ igey, kụ asighẹ olhoghonhaạn aḍighaạgh phọ aZihova aḍighi bọ olọ ephomhoghiạn
4. AZihova raḍeenhaan ghan ni igbiririph we dị moḍighi ikarạph
Eḍighi maạr dị oye dị aḍighi igbogh ikarạph u/meera udaphạn siigbu phọ aZihova, rogbatạn ghan ni nyodị kosighẹ igbo abumor phọ, kụ yira roo/ḍikuan ghan mun r’odị. Ibạl 1 Korịnt 5:6, 11, kụ eeḅeghiọn ḍipuru phọ aḍiẹn:
Odaphạn ipẹ ayist raḍighi ghan bọ afalhaạ, eeghe kụ kemite siphẹ ookpomhoghan phọ eḍighi maạr dị owilhẹ oḍighinhom ikarạph dị u/meera ukiton?
Ikumor awe phọ rotuughaạny ghan ni onmạ ighirigiir phọ aZihova esi oghị olhoghonhaạn aḍighaạgh we dị mogbatạn osighẹ igbo abumor phọ. Ibadị moḅula ni siẹn ookpomhoghan phọ ghalhamọ r’iduọn ilhioghọm mọ ephin bọ ni, ilhoghonhaạn ni bidị ḍighaạgh olhegheri mọ eḍighinhom iyaạr phọ abidị i/nighẹ.—Psalm 141:5.
Ika kụ edị eten phọ aZihova razoọm ghan bọ we dị oḍighi ikarạph eḍeenhaan mọ odị aḍighi Enhaạn elhiom ooruẹn r’ephomhoghiạn dị ru/ḅenhị ghan iyira oḍighi araraạr dị ipel iyira oḍighi?
5. AZihova rasạr ghan ni kuwilhenhaạn iyira mem dị yira okiton
AZizọs asighẹ ḍidogh kụ aghaaphọm ipẹ aZihova raloghoma ghan bọ mem dị oye akiton. Ibạl Luk 15:1-7, kụ eeḅeghiọn ḍipuru phọ aḍiẹn:
Iphẹn phọ etughemhị nyinhạ eeghe ilọ aZihova?
Ibạl Ezekiel 33:11, kụ eeḅeghiọn ḍipuru phọ aḍiẹn:
Eeghe iyaạr dị emhạn maạr kụ edị yira koḍighi kụ oḍeenhaan mọ yira mokạr ri okiton?
Idiphọ okoriom, aZihova amoọgh ni ogbolhomaam iyool phọ odị
ABUNIIN AWE OOTUGHIẠN MỌ: “Eḍighi maạr dị bidị oḅenhị ikumor awe phọ ikarạph dị bidị oḍighi, pọ kogbatạn bidị osighẹ igbo abumor r’abumaranhi phọ.”
Nạ kaḅenhị eeghe oye dị alhoghoma iduọn phọ?
OGHAẠPH OOKARAGH
Eḍighi maạr dị yira oḍighi igbogh ikarạph kụ okạr ri okiton oḅilhẹ owilhẹ oḍighi ghan ikarạph phọ, aZihova kasạr ri uwilhenhaạn iyira.
Ooḅula
Uḍighi ika kụ enighẹ bọ oghaạph ikarạph dị yira oḍighi oḅenhị aZihova?
Yira koḍighi eeghe pidị osạr ikarạph ayira uwilhenhaạn iyira?
Eḍighi maạr dị yira oḍighi igbogh ikarạph, eeghe kụ iḍighi kụ yira kowạ bọ olhoghonhaạn aḍighaạgh ikumor awe phọ?
WAAGHỊ AMHIỊN
Miịn idị aZihova aḍeenhaan oniin oye odọ onmạ ighirigiir phọ oghaạph bọ oghol siphẹ Isaiah 1:18.
Ikumor awe phọ rologhonhaạn ghan ika ḍighaạgh oye dị aḍighi igbogh ikarạph?
Miịn idị roḍeenhaan ghan ephomhoghiạn r’onmạ ighirigiir we dị mogbatạn osighẹ siẹn ookpomhoghan phọ.
Siphẹ emhuoghaạph phọ “Iwạ Mọ Mị Uḅula Esi AZihova,” miịn iyaạr dị ekọm idị oniin oye dị aḍuạ siẹn igey phọ alhoghoma mọ aZihova kụ aḍur nyodị aḅulhemhi.
“ABaibul Phọ Ranme Ghan Ni Sighuḍum” (The Watchtower, April 1, 2012)