‘Igona Loor Obọ Oye Kiikeleghi Ghan Bọ Inyina Aboọr Ologhi!’

1. Odaphạn Kolosị 2:​4, 8, ika kụ idị aSetạn rakparaghạ ghan oponomaam iloghi ayira?

ASETAN rawạ mọ yira owilhẹ ooḅereghị aZihova. Omhoọgh ekol, odị rakparaghạ ghan onme iitughiạn phọ ayira, iduọn phọ pọ, oponomaam iloghi phọ ayira, bịn oḍighi idị yira konaghanạn ghan nyodị. Odị rakparaghạ ghan olhereghian ayira obobọ ookeleghi ayira dị kodạph nyodị, esi oḍighi idị yira kodạph ruuphuạ iphulupul phọ ayira.​—⁠Bạl Kolosị 2:​4, 8.

2-3. (a) Eeghe kụ iḍighi kụ ewạ bọ ni dị yira kopogh okiririom iphụr arurụ phọ ogẹ bọ siphẹ Kolosị 2:8? (b) Yira kooḅeghiọn eeghe siẹn emhuoghaạph phọ ephẹn?

² Edugh ni dị aSetan kuukeleghian iyira ḍughụm? Ii. Tuutughiạn mọ aPọl o/⁠geanaạn budị omheeraam u/⁠moọgh iphụr arurụ phọ edi bọ siphẹ Kolosị 2:⁠8. Ageanaạn ghụn Kristẹn dị osagharạn uwaloor iigbia phọ. (Kọl. 1:​2, 5) AKristẹn phọ abuphẹ phọ urọl li esi ootor’osooromineen mem mọ opọ phọ loor iikeleghian phọ aSetan, kụ yira phọ okạr kụ odi esi ootor’osooromineen rodon. (1 Kọr. 10:12) Eeghe kụ iḍighi? Loor esi dị mophorogh Setan oler siẹn ade phọ, kụ odị akạr agbon ookeleghi arebenẹ phọ abuẹn oḅạr bọ Enaạn. (Ogan. 12:​9, 12, 17) Oḅarạm isiẹn, yira odi mem dị abuḍighinhom ikarạph r’awe iigbegheḍiom “koIoghorị ghan bịn.”​—⁠2 Tim. 3:​1, 13.

³ Siẹn emhuoghaạph phọ ephẹn phọ yira kooḅeghiọn ipẹ aSetan rasighẹ ghan bọ “olegheri iyaạr aḅirini phọ” kanmeom iitughiạn phọ ayira. Yira kooḅeghiọn kẹn iraạr “ikeḍi,” kirokirọ dị aSetan rasighẹ ghan kaḍighinhom (Efẹ. 6:11) Kụ siphẹ emhuoghaạph phọ etum bọ siẹn, yira kooḅeghiọn ipẹ yira kotue bọ okpor osighẹ torobọ ikarạph iitughiạn dị ikạ ikeḍi phọ odị elhọgh siphẹ aloor phọ ayira. Ophụr ooḅeghiọn iyaạr dị yira otuughạ esi eten phọ epẹ aSetan aakeleghi bọ we phọ Izrạl mem mọ bidị oḍigh bọ De Oguanhaan phọ.

ODẸGH OPHOGH OOḄEREGHỊ IKAAGHINHEẸN ARARAẠR

4-6. Odaphạn Deuteronomy 11:​10-15, eeghe onmia eten iḅeph kụ edị awe phọ Izrạl osoman, mem mọ bidị oḍigh bọ De Oguanhaan phọ?

⁴ Eten ikeḍi, aSetan asighẹ ni iiḅereghị ikaaghinheẹn araraạr kụ adeghọm we phọ Izrạl. Ika kụ idị odị aḍighi bọ iduọn phọ? Odị asighẹ aḍighinhom eepoogh oghị owạ iyaạr olhe phọ abidị. Mem mọ awe Izrạl oḍigh bọ De oguanhaan phọ, Eten phọ epẹ bidị oḅeph ghan bọ eḍien inmia ni. Mem mọ bidị orọl bọ Izipt, awe Izrạl ukpạ ghan muụm siphẹ ophiịny aNaịl phọ kụ ooduom ghan iizuphạ phọ abidị. Toroboiperolbọ, siphẹ aDe oguanhaan phọ, i/ḍighi edị bidị kokpạ muụm esi ogbogh ophiịny kụ ooduom iizuphạ phọ, kuolọ iḍighi edị bidị kokori mem olophiạ obobọ ooto kụ kasoorom. (Bạl Deuteronomy 11:​10-15; Isa. 18:​4, 5) Esi iduọn phọ, iwạ mọ awe phọ Izrạl otuughạ emhoom eten iḅeph. Ipẹ phọ i/⁠dugh, loor esi dị ogbogh opol abuphẹ olhegheri bọ ilọ oḅeph iizo momhuughu epẹ edalạ phọ.

⁵ AZihova aḅenị we Izrạl phọ mọ asidọl phọ abidị m’enmia. Kụ odị abarạm iphụr arurụ phọ iphẹn edaphạn bọ siẹn, eghịgh bọ mudị i/⁠moọgh maạr oḍighinhom r’oghaạph iḅeph phọ mọ: “Gona loor obọ ekpom anạ k’eekelheghi ghan bọ nyinhạ okpuḍian ongọ inhọn arumhụgh, kụ oḅilhẹ ooḅereghị abidị.” (Deut. 11:​16, 17) Eeghe kụ iḍighi kụ aZihova aḅilhẹ bọ aphụr rurụ ilọ iiḅereghị ikaaghinheẹn araraạr mem dị rokaạph ilọ otuughạ emhoom eten oḅeph iizo?

⁶ AZihova alhegheri ni mọ awe phọ Izrạl kosoman ni odẹgh ophogh oghị otuughạ ilọ areten oḅeph iizo ekpisi phọ, ḍighaạgh awe areelhe phọ okitonhom bọ bidị, rooḅereghị ghan bọ ikaaghinheẹn arumhụgh. Okạr agey, areelhe phọ okitonhom bọ bidị okạr kụ omaạr ilọ oḅeph iizo gạ phọ epẹ phọ opu we phọ Izrạl, kụ awe phọ Enaạn kotue ni otuughạ aani sighalanyạ phọ ḍighaạgh abidị, kuolọ ootor’osooromineen arọl li. Iitughiạn abuḅephom iizo aKena phọ ikpasị esi omheeraam emhụgh phọ abidị Baal. Bidị umheeraam mọ aBaal kụ amhoọgh okuaḍio phọ, ḅilhẹ mọ odị kụ r’angọ ghan olophiạ. Kụ aZihova o/⁠wạ mọ bidị osighẹ omheeraam okpẹ phọ opọ phọ ookeleghiom we phọ odị. Toroboiperolbọ, mem emhạn mem, awe phọ Izrạl usaḅạr ghan ni ooseeny aBaal. (Num. 25:​3, 5; Judg. 2:13; 1 Ki. 18:18) Nyiidiphọ, miịn ipẹ aSetan arue bọ aakeleghi we phọ Izrạl.

IRAẠR IKEḌI DỊ ASETAN ASIGHẸ AḌIGHINHOM OOKELEGHIOM AWE PHỌ IZRẠL

7. Ika kụ idị omheeraam awe phọ Izrạl aḍigh esi odẹgh ophogh mem mọ bidị oḍigh bọ De Oguanhaan phọ?

⁷ Eḅẹl ikeḍi phọ aSetan asighẹ bọ aḍighinhom pọ ipẹ repụ bọ bidị omhiịn amem dị olọph kalophọm iizuphạ phọ abidị. Olophiạ o/⁠kạr ghan olhọph April kụ eghị esi September epẹ aDe Oguanhaan phọ torobọ alhạ. Aghuḍum mọ abidị ḅilhẹ r’iizuphạ phọ ikpasị esi olophiạ phọ opọ amhiigh ghan bọ olhọph unwanyụ October. ASetan aakeleghi we phọ Izrạl esi ootughiạn ghan mọ oghị aghisigh pọ bidị kotuughaạny aani iḍighinhom araraạr areelhe phọ ekitonhom bọ bidị. Areelhe phọ ipẹ phọ umheeraam mọ koḍighi raraạr aghuḍum ongọ rumhụgh phọ, pidị engọ bidị olophiạ. Awe Izrạl phọ abuphẹ u/⁠moọgh bọ omheeraam u/⁠kị esi aZihova, umheeraam mọ ephẹn kụ ogina eten dị bidị koḍighi okpetanhaan oodoọny aghozogh phọ, kụ iḍighi kụ, bidị omhiigh oḍighiyogh aani araraạr aghuḍum oghueniom emhụgh okpẹ phọ, Baal.

8. Eeghe kụ omuneniom iyạl ikeḍi dị aSetan asighẹ aḍighinom? Gbạ.

⁸ Omuneniom iyạl ikeḍi phọ aSetan ateenyọm bọ we phọ Izrạl pọ aruuphuạ iphulhupul phọ. Areelhe phọ ipẹ Enaạn roo/ḅereghị ghan bọ uuseenyom ghan rumhụgh phọ abidị r’aroozọ dị i/ḅaạl. Iiseeny phọ iphẹn phọ i/ḅaạl bọ, iḅaramaạm orolhạn esi igbo alhephiri r’alhephiri ḅilhẹ anmariịr r’anmariịr, siphẹ otu iiḅereghị phọ abidị. Orolhạn esi igbo iyạl alhephiri anmụny ḅilhẹ r’inhọn odọ orolhạn esi dị u/ḅaạl iḍighi eḍighinhom iyaạr dị bidị osighẹ mọ enighẹ ni! (Deut. 23:​17, 18; 1 Ki. 14:24) Awe areelhe phọ umheeraam mọ araraạr aghuḍum mọ iphẹn phọ reḍighi ghan iyaạr dị arumhụgh phọ kesẹph de phọ. Iḍighinhom araraạr orolhạn esi dị u/ḅaạl iḍạ ibadị abuọ Izrạl phọ elhọgh ooḅereghị arumhụgh okpẹ phọ. Okạr oghaạph, aSetan masighẹ bidị alọgh dọl arebenẹ.

9. Odaphạn Hosea 2:​16, 17, ika kụ idị aSetan asophoghom eten phọ epẹ abuọ Izrạl phọ omhiịn ghan bọ aZihova?

⁹ ASetan asighẹ ni omuneniom iraạr ikeḍi aḍighinom. Odị asophoghom eten phọ epẹ abuọ Izrạl phọ omhiịn ghan bọ aZihova. Siiḍio phọ aZerimaya, aZihova agbeelom ni mọ ariil okpẹ phọ rowạ oḍighi idị awe phọ odị kobula ḍien phọ onọ “loor aBaal.” (Jer. 23:27) Esighẹ rekị bịn awe phọ Enaạn uwilẹ ni ḍien phọ aZihova, oḍighinom ghan ghụn Baal, remạ ghan bọ mọ “Uw-emoọgh” obobọ “Uwotu.” Iphẹn phọ kesophoghom we Izrạl phọ omiịn ogbaranaạn dị odi igbo aZihova r’aBaal, bịn medughanaan we phọ osighẹ iiḍighi araraạr aghuḍum iiseeny phọ aBaal ooḅughonom r’iiseeny phọ aZihova.​—⁠Bạl Hosea 2:​16, 17 r’igẹ phọ edi bọ ude phọ.

IKEḌI DỊ ASETAN RAḌIGHINHOM GHAN ḌIO ARODON

10. Ighẹn ikeḍi kụ edị aSetan rasighẹ ghan kaḍighinom ḍio arodon?

¹⁰ ASetan raḍighinom aani ghan kẹn iniin phọ ikeḍi phọ ḍio arodon. Odị rateenyọm ghan we esi osighẹ oḍighinom ipẹ repụ bọ oye phọ, ḅilẹ r’ophophe orolạn esi dị u/ḅaạl, ḅilẹ r’osophoghom eten phọ epẹ awe omhiịn bọ aZihova. Ophụr ooḅeghiọn ekeḍi phọ epẹ esughanam bọ omhạn phọ.

11. Ika kụ idị aSetan masophoghom eten phọ epẹ awe omhiịn bọ aZihova?

¹¹ ASetan rasophoghom ghan eten phọ epẹ awe omhiịn bọ aZihova. Mem mọ abutelhedom mọ aZizọs omuughu bọ, abunhiin dị oghophora mọ bunọ aKristẹn umiigh ni oleenye eleeny itughemị okpẹ. (Iiḍighi 20:​29, 30; 2 Tẹs. 2:⁠3) Awe phọ abuẹn phọ omheel bọ oḍuạ umhiigh ni ogbuurogh elhegh egey Enaạn phọ. Esi omaạm, bidị u/⁠sighẹ ghan mun uḍighinom ḍien phọ Enaạn siphẹ asiBaibul phọ bidị ogeeghị bọ oteneghi, kparipẹ ghụn bidị usighẹ ḍitaaneẹn aḍien phọ “Uw-emoọgh” kụ oḍighinom. Iduọn bidị oonmenemiom bọ ḍikạr aḍien phọ Enaạn r’Uw-emoọgh, iḍighi idị ekparanaạn buphẹ robạl aani bọ Baibul phọ omhiịn idị aZihova agbatanaạn r’abuerị phọ “aruw-emoọgh” phọ oghaạph bọ oghol siphẹ aḍinyạ iigbia phọ. (1 Kọr. 8:⁠5) Bidị uḍighinom eniin phọ ekpo onhụ phọ “Uw-emoọgh” esi aZihova r’aZizọs, bịn eḍighi idị ekparanaạn we olhegheri ogbaranaạn dị odi igbo aZihova r’Oọny phọ odị. (Jọn 17:⁠3) Igbaragbarạ phọ iphẹn phọ kụ ikọm bọ itughemị Iraạr Arumụgh Kụ Eniin phọ​—⁠itughemị dị i/⁠lo siphẹ Ekpo onhụ phọ Enaạn. Loor esi iduọn phọ, ibadị mosighẹ mọ Enaạn ekpạr onaghanạn ḅilhẹ mọ yira ko/⁠tue olegheri nyodị. P’eeghe okpẹ!​—⁠Iiḍighi 17:⁠27.

12. Eeghe kụ edị aruukụ iiḅereghị okpẹ mophophe, kụ iphẹn phọ mekọm eeghe, odaphạn Rom 1:​28-31?

¹² ASetan raḍighinom ghan ruuphuạ iphulupul. Mem Izrạl iḍiodi phọ, aSetan aḍighinom ikarạph aruukụ iiḅereghị ophopheom aroozọ dị i/ḅaạl. Ḍio arodon, odị raḍighi aani ghan kẹn igini phọ. Ikarạph aruukụ iiḅereghị omeeraam ni oḅilẹ ropoghe ghan roozọ dị i/ḅaạl. Loor esi iduọn phọ, ibadị dị oghophora mọ bunọ rokumu Enaạn mowilẹ odạph asiigbu phọ Enaạn eegholaan bọ ni, idị egbolomaam roozọ dị i/ḅaạl. Otelhedom mọ aPọl aghaạph ni aageliọn siphẹ aḍinyạ phọ odị agẹ bọ aghiọm Kristẹn phọ aRom idị iphẹn phọ mekọm. (Bạl Rom 1:​28-31.) Iniin “araraạr dị i/⁠kpẹ” pọ odokirokirọ orolạn esi dị u/ḅaạl, idiphọ orolạn esi igbo iyạl alhephiri anmụny. (Rom. 1:​24-27, 32; Ogan. 2:20) P’eeghe idị emạn maạr dị yira kodaphạn itughemị aBaibul phọ eegholaan bọ!

13. Eeghe kụ enhọn ikeḍi dị aSetan rasighẹ ghan kaḍighinom?

¹³ ASetan raḍighinom ghan ipẹ repụ bọ oye phọ. Eḍighi ni eseeriom ayira otuughạ asighalanyạ dị kiloghonaạn iyira ḍighaạgh omoọgh iyaạr olhe ḅilẹ r’ophoghom eghunotu ayira. (1 Tim. 5:⁠8) Ibadị amem yira rokị ghan askul ḅilẹ kolọgh muboom amem otuughạ aḍinyạ obọ yira omhoọgh sighalanyạ phọ rewạ bọ. Kuolọ ewạ ni ogona aloor. Ibadị areelhe, aruutu askul phọ ro/⁠tughemị ghan we sighalanyạ phọ bịn, kuolọ roḅarạm ghan olegheri iyaạr awe. Rotughemị ghan nmụny askul phọ dị kopogh ogunọm Baibul phọ, ḅilhẹ mọ Enaạn i/⁠lo ghan. Rotughemị ghan, m’itughemị phọ ipẹ eḅẹm bọ mọ iyaạr iḅuạ yaạr kụ eten yaạr kụ ikạr eegholomi ipẹ aghuḍum amiigh bọ. (Rom. 1:​21-23) Idọ itughemị phọ iphẹn phọ egbạgh ni ‘olegheri iyaạr phọ Enaạn.’​—⁠1 Kọr. 1:​19-21; 3:​18-20.

14. Eeghe kụ edị olegheri iyaạr awe rapophe ghan?

¹⁴ Olegheri iyaạr awe rapogh ghan kagunọm siigbu elhiom eḍighinom iyaạr phọ aZihova. Re/⁠lọgh ghan kephophe eemuma uwaloor iigbia phọ Enaạn, kparipẹ ghụn repophe ghan, “eḍighinom iyaạr iphulupul phọ.” (Gal. 5:​19-23) Rekọm ghan ophoophe aloor r’iḅo igbogh, bịn meḍighi idị awe “kobeeph ikarạph.” (2 Tim. 3:​2-4) Aroozọ phọ iphẹn phọ egbạgh ni oyoghoyoghọ phọ r’osooromi aloor phọ Enaạn rawạ ghan bọ mọ arebenẹ phọ odị omoọgh. (2 Sam. 22:28) Abuniin aKristẹn dị moghị ogbogh askul momeera mọ iitughiạn awe eḅọl ilhoghi phọ abidị kparipẹ ghụn r’iitughiạn Enaạn. Ooḅeghiọn eniin eḍeenhaan idị ketue ni emite.

15-16. Yira otuughạ eeghe esi ipẹ emitenhaan bọ onyọ umarani phọ ayira?

¹⁵ Onyọ umarani dị marọl oḍighi oomo amem mọ dị epel li 15 asiạ aḅẹm mọ: “Idiphọ onyọ Ogbaanaạn dị maḍiiny muụm, mị m’aạl li aḅilẹ anaghạn ilọ ooto r’osooromineen dị odi oghị ogbogh askul, kuolọ mị u/⁠meeraam. Mị uutughiạn ghan mọ oroma phọ imị u/⁠gbolomaam.” Eeghe iiḅaghamị kụ edị odị asoman? Odị aghaạph ni amiteom mọ: “Ibạl arinyạ phọ isighẹ ni muboom amem dị tutụ mị u/⁠moọgh ghan mun mem dị ekasiạn ooḅereghị aZihova idiphọ mị aḍighi ghan bọ, aloor amị kẹn idugh ghan ni esi esi dị mị u/⁠tue ghan ukelọm raghaạph aBaibul r’abunhọn, ḅilhẹ kẹn amem ookolobian ghan kụ oghị ituughạ bịn i/⁠tọl ghan. Mem dị mị aloghoma bọ loor mọ ogbogh askul phọ rekạ siya phọ amị r’aZihova, mị umiịn ni mọ ewạ dị mị kabilẹ askul phọ. Kụ ipẹ kụ idị mị aḍighi.”

¹⁶ Ika kụ idị ogbogh askul atir iitughiạn onyọ umarani phọ ophọn phọ? Odị aphagharanhaạn mọ: “eḍighi umugholoor esi amị oghaạph mọ askul phọ mị asaḅạr bọ oghị phọ utughemhị imị ilọ ophogh ghan asipiomạn abunhọn awe, ekpaariọm bumor r’abumarani phọ, r’ogon ghan idị epelhom idị bidị kotue oḍighi, ḅilhẹ r’orọl ghan aḍiọ amị. Isighẹ ni imị mem owilhẹ yogh iphẹn phọ. Iphẹn phọ itughemhị imị idị eḍighi ootoro’osoroomineen ophogh ogunhọm iphụr arurụ phọ Odẹ k’akẹ phọ ayira r’angọ ghan bọ dị eego esi oḍighom mọ odị. AZihova kụ alhegheri ilọ amị upu imị phọ r’aloor. Sey, ḅẹm loor mọ mị ulhegheri ni!”

17. (a) Eeghe kụ eḍighi osopha ayira? (b) Yira kooḅeghiọn eeghe siphẹ emhuoghaạph phọ etum bọ siẹn?

¹⁷ Sopha ni omheerạ giph “obọ oye kasighẹ ghan bọ olegheri iyaạr aḅirini phọ” aakeleghiom nyinạ aboọr ologhi. Kiọm ni ghisigh agona loor esi ikeḍi phọ aSetan. (1 Kọr. 3:18; 2 Kọr. 2:11) Ka/⁠meera odị asophoghom eten phọ epẹ nạ amhiịn bọ aZihova. Daphạn imạ asiigbu phọ aZihova. Kụ ka/⁠meera aSetan aakelheghi nyinhạ ogunhọm oroma phọ aZihova. Nạ kaḍighi ika, eḍighi maạr lọ nạ alhoghoma mọ olhegheri iyaạr aḅirini phọ matir aani nyinhạ? Emhuoghaạph phọ etum bọ siẹn kiḍeenhaan iyira ipẹ Ikpo Onhụ phọ Enaạn kilhoghonhaạn bọ iyira ḍighaạgh orue onyu olher “iikparạ” iitughiạn r’araagharạ.​—⁠2 Kọr. 10:​4, 5.