Ḍeenhaan Ghan Oseenyạn

Oḍeenhaan ghan oseenyạn pọ onhaghanhạn ghan ipẹ ophodiphọ oye phọ raatughiạn bọ, alhoghoma bọ, raraạr dị amhaghamhị maạr r’idị ekuom. Abunhọn rolegheri ghan ni mem dị yira okạr oseenyạn bidị. Mem dị yira oḍeenhaan ghan eegharạ oseenyạn epẹ erugh phọ, yira rotuughaạny ghan ephomhoghiạn phọ r’ogbolhomaam mọ aZihova, kụ iphẹn phọ reḍighi ghan idị awe rowạ ghan olhegheri aZihova.—Fil 2:4.

Eten phọ epẹ yira rotughemhị bọ, roḅạ bọ, ronaghanhạn, romaaghiạn oḅilhẹ oseere ghisigh ayira eḍeenhaan ghan eegharạ oseenyạn. Yira roḍeenhaan ghan oseenyạn mem dị yira omhoọgh ḍiḅeeraạn awe. Mem dị yira olhọgh elhegh raraạr aḍiḅeeraạn, omheeraam r’adọl oye phọ, ongọ oromha r’olhoghonhaạn aḍighaạgh kuolọ u/kpaariọm oḍighi ipẹ yira rokaạph bọ. Mem dị buphẹ yira oteẹny bọ epẹ erugh phọ osighẹ olhoghonhaạn aḍighaạgh ayira, r’ingọ ghan ni iyira ibo.

IPOGH VIDIO PHỌ MOỌGH AANI IBO OḌIGHI AWE BUMATUẠN—TOPHOMHI SIGHALHANYẠ PHỌ ANẠ—ḌEENHAAN GHAN OSEENYẠN, KỤ EPHANYANHAẠN SIPURU PHỌ EDAPHẠN BỌ SIẸN:

• 

  Ika kụ idị aNeeta aseenyạn Jade mem mọ u/nuụn bọ ukị dị bidị kotuughạ?

• 

  ANeeta aḍeenhaan ika Jade ogbolhomaam mem mọ aḅẹm bọ mọ aloor onọ edugh epughạn otuughạ?

• 

  ANeeta aḍeenhaan ika Jade oseenyạn mem mọ aḅẹm bọ mọ odị o/mhaạr oḅoonhomhị araraạr?