Abuọ Anhiạn Kụ Arighirị Anạ Siphẹ Intanẹt Phọ?

Oyaghirị pọ oye dị “aḅạr oye loor esi aḍiḅeraạn obobọ eegu dị alhọgh.” Esi omaạm, aJonathan r’aDevid umhiigh siya arighirị phọ abidị iyaạr i/gbariọn bọ mem mọ aDevid aghiigh bọ Goliath. (1Sa 18:1) Torobọ onyọ abidị amhoọgh ni raagharạ dị eḍạ ḍiḅeraạn ophodiphọ. Esi iduọn phọ, asiya arighirị dị ekpulhạn rekpasị ghan esi araraạr dị oye phọ alhegheri. Resighẹ ghan ni mem r’inyaạm okạr orue olhegheri oye. Kuolọ ozụ eniin esi siphẹ intanẹt phọ, bịn nạ mamhoọgh we dị kokophora oḍighi arighirị anạ. Eḍighi bọ idị awe siphẹ intanẹt phọ kotue bọ ni obooghị iniin araraạr ilọ abidị, re/dugh ghan okạr olhegheri odọ awe phọ bidị oru bọ. Esi iduọn phọ, emạn ni maạr omhaạr omhiigha aloor kụ osaḅạr arighirị. Ka/kiilhaan oghel adom oḍighi oyaghirị oye dị nạ u/kạr ulegheri, loor esi dị nạ o/wạ dị kepin esi odị. Loor esi iiḅaghamhị dị ketue ni emite esi ooḍikuan ghan r’awe siphẹ intanẹt phọ, abuniin awe osopha mọ bunọ ko/ḍighinhom ghan. Toroboiperolbọ, ighẹn araraạr kụ edị ewạ mọ lọgh olhoghi eḍighi maạr dị nạ asaḅạr ri oḍighinhom?

IPOGH VIDIO PHỌ SIGHẸ OSỤ OLHOGHI KỤ AḌIGHINHOM INTANẸT PHỌ, KỤ EPHANYANHAẠN SIPURU PHỌ EDAPHẠN BỌ SIẸN:

• 

  Ewạ mọ pụr aaḅeghiọn eeghe araraạr kụ agbi ogẹ iyaạr obobọ olhọgh afoto siphẹ intanẹt phọ?

• 

  Eeghe kụ iḍighi kụ ewạ bọ omhiigha aloor kụ osaḅạr arighirị anạ siphẹ intanẹt phọ?

• 

  Eeghe kụ iḍighi kụ nạ kamoọgh bọ mem dị nạ amaanhaạn osighẹ oḍighinhom intanẹt phọ?—Efẹ 5:15, 16