Ilọ Olhọgh Aḍighaạgh Mem Dị Iiḅaghamhị Emite

Rogbor ghan ni konhaghạn ḍio arodon iinhaghạn ilọ ekperenhom iiḅaghamhị. Mem dị iiḅaghamhị emite, rolọgh ghan ni inyaạm ookpomhoghi r’ookolhobian araraạr olhoghonhaạn aḍighaạgh. Loor esi iduọn phọ, Aloor Phọ Repogh Bọ m’omheera mọ torobọ olạ agadạ amhoọgh Ekụ Omiteom Olhoghonhaạn Aḍighaạgh Mem Iiḅaghamhị.

Mem dị abumor phọ odi bọ ekụ phọ ephẹn phọ onhaghạn mọ ekperenhom iiḅaghamhị memite ekpisi, bidị roogborion ghan ni komhạgh ikumor awe ekool phọ olhegheri odọ olhoghonhaạn aḍighaạgh dị abumor phọ omhoghi. Kụ eru maạr dị araraạr ephuughị iboom dị abumor phọ odi bọ ekool phọ ko/tue oselhemhi, olạ agadạ phọ kolhọgh ni bumor dị osilor oḍiemhiom oḍighi olhọgh aḍighaạgh phọ. Abumor phọ abuẹn phọ kowạ ni bumor dị komiteom loor obobọ m’osogh araraạr dị ewạ, eeni kẹn bidị k’okooghi ni oḅilhẹ odiighi raraạr dị emoghi siphẹ ekool phọ.

Asuọ odi ni odạph eten phọ ephẹn phọ kụ oḍighi araraạr. Relhoghonhaạn ghan ḍighaạgh dị awe ko/lhọgh inyaạm oḍighi iyaạr dị eeni ekụ phọ ephẹn phọ moḍighi ni, dị igbaragbarạ ke/tọl, ḅilhẹ ko/lioghom ikpoki obobọ osighẹ raraạr oḍighinhom eten dị i/kpẹ, ipẹ remite ghan bọ mem dị awe okpạl emhụ bịn oghị olhoghonhaạn aḍighaạgh.

Abumor phọ abuẹn olạ agadạ phọ omạ bọ kolhegheri ni onhụ ikpoki r’onhụ awe dị koḍighinhom oḍighi phọ. Bidị kotue kẹn ni okaaphạn we dị ophamhạgh riisi siphẹ ekool phọ, buẹn kotue bọ ni olhọgh ḍighaạgh dị oḍighi phọ ayira kaagborion. Esi iduọn phọ, oye ku/kpạl emhụ ubonyị osogh, usighẹ raraạr ukị, obobọ ku/nyeenhe bịn ukị epẹ iyaạr phọ emite bọ dị u/ḅenhị nyodị m’aḍighi idiphọ.

Ghalhamọ riduọn phọ ni, yira rowạ ghan ni olhọgh aḍighaạgh mem lọ iiḅaghamhị emite. (Hib 13:16) Yira opomhoghiạn agey bumor phọ ayira! Yira koḍighi ika? Dị emhạn maạr epelhom, yira kotue ni okol buẹn iiḅaghamhị phọ emheelhom bọ r’abuẹn odi bọ olhoghonhaạn abidị ḍighaạgh ooḅereghị. Yira kotue kẹn ni osogh aani ikpoki ilọ arukumuan oomo aḅirinhi phọ. Ilạ agadạ kirọ kirọ kụ kokạr olhegheri esi dị emhoghi osighẹ ikpoki phọ oḍighinhom, dị eḅọph r’iiḅakiọm Aloor Phọ Repogh Bọ. Kụ eru maạr lọ yira rowạ okạr oghị olhoghonhaạn aani aḍighaạgh r’aloor, pọ oḍeenhaan mọ yira ookolhobian ni esi ogeeghị aḍinyạ phọ Local Design/Construction Volunteer Application (DC-50).

IPOGH VIDIO PHỌ AḌIGHO DỊ EPHUEGHỊ RARAẠR EPẸ BRAZIL, KỤ EPHAGHARANHAẠN ḌIPURU PHỌ EDAPHẠN BỌ SIẸN:

Eeghe iyaạr kụ iḅeraạn nyinhạ ilọ olhoghonhaạn aḍighaạgh phọ Abugbaanhaạn aZihova omiteom bọ mem mọ aḍigho phọ eḍigh bọ Brazil 2020 esoor bọ?