EMHUOGHAẠPH ITUUGHẠ PHỌ 21
Ogananami Phọ—Idị Remạ Ghan Ilọ Aghisigh Phọ Anạ
“Erọl li idiphọ! Jizọs Omoọgh-we, tue!”—OGAN. 22:20.
AḌUỌR PHỌ 142 Holding Fast to Our Hope
OGHAẠPH OOKARAGHa
1. Oghẹn osopha dị amhạn maạr kụ edị torobọ oye amhoọgh osopha?
RODON awe omoọgh osopha dị amhạn maạr osopha. Bidị kobakị ni aZihova Enhaạn phọ amhoọgh bọ elheom otooghị epẹ asikẹ phọ, obobọ kobakị mulhọgh ḍien phọ odị, Setan Eru phọ? Asugha ogbo o/lho. Ipẹ nạ asopha bọ kụ kemạ mughumọ nạ kamoọgh ni ghuḍum k’agee-pọ obobọ nạ k/amoọgh. (Mat. 25:31-33, 46) Amem “igbogh iiḅaghamhị phọ,” kụ edị kolhọgh elhegh buphẹ komoọgh bọ ghuḍum r’abuphẹ kopiemhi bọ.—Ogan. 7:14; 14:9-11; Ezek. 9:4, 6.
2. (a) AHibru 10:35-39 uromha iyira oḍighi eeghe? (b) Ika kụ idị aḍinyạ Ogananami phọ ketue ilhoghonhaạn iyira ḍighaạgh?
2 Bạl Hibru 10:35-39. Eḍighi iyaạr dị nạ asopha obakị itooghị phọ aZihova, pọ osopha phọ anạ aḍighi ni olọ osụ olhoghi. Kụ nạ rawạ ni mọ abunhọn osopha aani odọ osopha phọ ophọn phọ. Esi iduọn phọ, nạ katue ni asighẹ ipẹ aḍinyạ Ogananami phọ eghaạph bọ alhoghonhaạn bidị ḍighaạgh. Aḍiikiạ aḍinyạ phọ aḍiẹn phọ eḍeenhaan ipẹ kemitenhaan bọ buphẹ rogbagharạn ghan bọ Enhaạn, kụ eḅilhẹ egananami ḍisẹph kirokirọ dị buphẹ oḅạr bọ oḅilhẹ obakị itooghị phọ Enhaạn komoọgh. Emoghi ni dị yira kotuughạ ikpanhạ igey phọ iphẹn phọ. Oḍighi ghan iduọn phọ kikparamhị ni iyira oghiọm aghisigh okumu ghan aZihova. Oḅarạm isiẹn phọ, yira kotue ni osighẹ iphẹn yira motuughạ bọ olhoghonhaạn ḍighaạgh bunhọn osopha ogey osopha kụ otuụgh odaphạn.
3. Yira kooḅeghiọn eeghe siẹn emhuoghaạph phọ ephẹn phọ?
3 Siẹn emhuoghaạph phọ ephẹn phọ yira kooḅeghiọn sipuru phọ iphẹn: Eeghe aḍisẹph kụ rekori buẹn obakị bọ itooghị phọ Enhaạn? Ḍierị phọ aḍighaạgh phọ eeghe kụ kemitenhaan buphẹ obakị bọ etotọgh elhom enhạm mọ oghaạgh bọ oghol siphẹ aḍinyạ Ogananami phọ?
EEGHE KỤ REKORI BUẸN OḄẠR BỌ AZIHOVA
4. Eghẹn egu kụ edị aJọn amiịn dị omheerạ r’aZizọs epẹ k’akẹ?
4 Esi uḍien, otelhedom mọ Jọn amhiịn ni iyạl egu awe dị osephọm ghuḍum k’agee-pọ loor esi dị bidị ubakị itooghị phọ aZihova. Eḅẹl egu phọ pọ 144,000 phọ. (Ogan. 7:4) Usighẹ bidị siẹn ade phọ ogheelhom k’akẹ otooghị r’aZizọs ophoghomiom ade phọ. (Ogan. 5:9, 10; 14:3, 4) AJọn amhiịn uḍien dị bidị omheerạ r’aZizọs epẹ k’akẹ siphẹ eeḅarạph phọ aZayọn.—Ogan. 14:1.
5. Eeghe kụ k’emitenhaan busugheneen 144,000 phọ moọny amem?
5 Umhiigh oselẹ abuphẹ koḍighi bọ 144,000 phọ k’amem abutelhedom mọ. (Luk 12:32; Rom. 8:17) Kuolọ uḅenhị Jọn mọ siḍio aruukunha phọ onhụ abạl abuẹn phọ dị kosugha siẹn ade phọ kakom ni. Kụ igbogh iiḅaghamhị phọ egbi omhiigh, kolọgh ni “busugheneen” phọ “elhegh” dị esughanam omhạn oḍeenhaan mọ bidị omoọgh ni kuuḅi aghisigh aZihova. (Ogan. 7:2, 3; 12:17) Kụ igbogh iiḅaghamị phọ remhiigh, kosighẹ ni busugheneen phọ abuẹn phọ okimọm k’akẹ oḅarạm buerị phọ abuọ egu 144,000 phọ, ophạm bọ omheeraam mọ abidị bịn k’aḍuugh. Bidị k’otooghị r’aZizọs siphẹ Omhạr phọ Enhaạn.—Mat. 24:31; Ogan. 5:9, 10.
6-7. (a) AJọn aḅilhẹ amhiịn eghẹn egu, kụ eeghe kụ edị yira olhegheri ilọ abidị? (b) Eeghe kụ iḍighi kụ abusugheneen phọ ḅilhẹ ‘r’aḍigbogh adita phọ’ komoọgh bọ ogbolhomaam esi ipẹ edi bọ Ogananami phọ emhuoghaạph phọ 7?
6 Mem mọ odị amhiịn bọ egu abuphẹ kokeel bọ k’akẹ phọ, aJọn aḅilhẹ ni amhiịn “siadạm awe”. Kuolọ dị u/kịgh 144,000 phọ, buẹn phọ ko/tue ogbi. (Ogan. 7:9, 10) Yira olhegheri eeghe ilọ abidị? Uḅenhị Jọn mọ: “Buẹn abudị mokpetenaan bọ igbogh iiḅaghamị phọ, bidị usighẹ iḅaạl Oọny Oyool-ogạ phọ kụ ootolhom bọ rusuomạ phọ abidị oḅaalamị.” (Ogan. 7:14) Bidị r’okpetenaan igbogh iiḅaghamị phọ, “asiadạm awe” phọ abuẹn phọ kokelhọm ḍisẹph kirokirọ siẹn ade phọ.—Ps. 37:9-11, 27-29; Prov. 2:21, 22; Ogan. 7:16, 17.
7 Mughumọ oselẹ nyinhạ ogheel k’akẹ obobọ orọl isiẹn ade phọ, nạ amiịn ni idị ipẹ ogẹ bọ siphẹ Ogananami phọ emhuoghaạph phọ 7 egbolomaam aani nyinhạ? Dị iikia ilọ nạ amiịn ni. Amem mọ amuphẹ phọ keḍighi ni ḍiọ oḅaạl olhoghi esi iyạl phọ arugu arebenhẹ phọ Enhaạn! Ilhoghi ayira kekạr kụ eḅaạl esi iduọn yira osopha bọ obakị itooghị phọ aZihova. Aḍinyạ Ogananami phọ eḅilhẹ ekaạph eeghe ilọ igbogh iiḅaghamị phọ?—Mat. 24:21.
IYAẠR DỊ KEMITENHAAN BUẸN ROGBAGHARẠN GHAN BỌ ENHAẠN
8. Amem dị eḍighi ika kụ edị igbogh iiḅaghamhị phọ kemiigh bọ, kụ iphẹn phọ ketir ika ibadị awe?
8 Idiphọ arumhuoghaạph phọ eten bọ meghaạph bọ, itooghị aḅirinhi phọ ophọn phọ kekitonhaan ni ezuoghom Babilọn ogbogh phọ, oomo aruukụ iiḅereghị okpẹ aḅirinhi phọ. (Ogan. 17:16, 17) Mem dị eḍighi iduọn phọ, pọ igbogh iiḅaghamhị phọ memiigh. Iphẹn phọ kekọm ni idị awe kooghiraany omiigh ooseeny aZihova ḍughụm? Eeye. Karipẹ dị bidị koḍighi iduọn phọ ghụn, Ogananami phọ emhụ phọ 6 aḍeenhaan mọ mem mọ amuphẹ phọ ekpạr bọ ni iboom, awe phọ abuẹn r/okumu ghan bọ aZihova kowạ oghoph ḍighaạgh abuọ itooghị phọ ḅilhẹ r’abumuul ḍighi aḅirinhi phọ, otomaạm bọ raaḅarạph. Loor esi iduọn awe phọ abuẹn phọ ko/meera bọ oḍighan gạ omhạr phọ k’Enhaạn, aZihova kamiịn bidị idiphọ abuigbagharạn.—Luk 11:23; Ogan. 6:15-17.
9. Ika kụ idị awe phọ aZihova komeerạ sạm mem igbogh iiḅaghamhị phọ, kụ ipẹ phọ kekọm eeghe?
9 Etu ni inẹ mọ arebenhẹ phọ aZihova komeerạ ni sạm mem igbogh iiḅaghamhị phọ, ibadị ko/moọgh mụn bọ esi okpasị oḍuomolhoghi. Ogina phọ abidị bịn kụ kokiọm ghisigh oḍighi we dị rokumu aZihova Enhaạn phọ dị u/meera ubakị “elhom enhạm mọ.” (Ogan. 13:14-17) Emeerạ phọ abidị i/phighapigha bọ kekọm ni idị abuẹn rogbagharạn ghan bọ aZihova kokaghạm bidị olhoghi. Kụ iphẹn phọ keḍighi idị ookpomhoghan areelhe phọ kozuom we phọ Enhaạn oomo isiẹn ade phọ. Kụ imiịn egbaaghị ezọ ighurughuụr phọ ephẹn phọ idiphọ ozuoghom mọ aGog opọ aMagog.—Ezek. 38:14-16.
10. Odaphạn Ogananami 19:19-21, aZihova kamegheron ika mem dị ozuom we ph’odị?
10 AZihova kamegheron ika ilọ igbagarạ izuoghom mọ iphẹn phọ? Odị uḅenhị iyira mọ: “Oghạgh olhoghi phọ amhị katuphaany ni.” (Ezek. 38:18, 21-23) Ogananami phọ emhụ phọ 19 ekaạph ni iyaạr dị keḅilhẹ emite. AZihova katom ni Oọny phọ Odị mọ aghoph we phọ Odị aḅilhẹ akpạr apu mulhọgh ḍien phọ abidị. Mem mọ amuphẹ kozuom aani bọ mulhọgh ḍien phọ, abuọ “eghạm k’akẹ” phọ kodạph ni Zizọs—buẹn phọ aruukpaạny phọ rukumu bọ Enhaạn ḅilhẹ r’144,000 phọ. (Ogan. 17:14; 19:11-15) Eekunha eghạm mọ ephẹn phọ kemiteom eeghe? Muphe oomo awe r’arookpomhoghan phọ egbagharạn ghan bọ aZihova!—Bạl Ogananami 19:19-21.
EGHẠM MỌ RETEN, BỊN APINHIEEN
11. Eghẹn iyaạr dị emhạn maạr siẹn aḍinyạ Ogananami phọ kụ kemite?
11 Gbiom olhoghi idị ketọl mem dị arebenhẹ phọ Enhaạn kokpetenhaan bọ muphe amulhọgh ḍien phọ Enhaạn! P’eeghe ibo dị ketọl! Agey ni, amuphe aBabilọn ogbogh phọ kakọm ni ibo epẹ k’akẹ, kuolọ enhọn iyaạr edi ni dị kekọm iboom ibo. (Ogan. 19:1-3) Ephẹn phọ iyaạr dị ekạr emhạn maạr siẹn aḍinyạ Ogananami phọ—“apinhieen Oọny Oyool Ogạ phọ.”—Ogan. 19:6-9.
12. Odaphạn Ogananami 21:1, 2, apinhieen Oọny Oyool Ogạ phọ katọl pụr amem?
12 Apinhieen phọ katọl pụr amem? Oomo 144,000 phọ kokị ni k’akẹ kụ ogbi ee eghạm Amagidọn phọ. Toroboiperolbọ, amuẹn phọ kụ k/amem apinhieen Oọny Oyool Ogạ phọ. (Bạl Ogananami 21:1, 2.) Apinhieen Oọny Oyool Ogạ phọ kasighẹ esi mem dị mee eghạm Amagidọn phọ oten oḅilhẹ ophiemhi oomo amulhọgh ḍien phọ Enhaạn.—Ps. 45:3, 4, 13-17.
13. Apinhieen Oọny Oyool Ogạ phọ kaḍighinhaan eeghe buẹn kopinhom aani bọ bịn?
13 Apinhieen Oọny Oyool Ogạ phọ kaḍighinhaan eeghe buẹn kopinhom aani bọ bịn? Idiphọ okạr apinhieen raḅophoghị ghan bọ olhephiri oọny r’anhịr ephogh, pọ kụ idị apinhieen phọ otomaạm bọ kaḅophoghị Uw-emhạ phọ, Zizọs Kraịst, ‘r’onyanhị phọ’ odị, 144,000 phọ. Apinhieen phọ ophọn phọ kakọm bọ ni iboom ibo, kụ kakughuron omhoom agomẹt phọ katooghị bọ de phọ 1,000 asiạ.—Ogan. 20:6.
EMHẠ EGHUAN R’IDỊ REMẠ GHAN ESI ANẠ
Esi osighẹ iyaạr otomaạm ogananami phọ emhuoghaạph phọ 21 ekaạph mọ, omhoom aJeruselem emhạ iigbia phọ aḍuạ “k’Enaạn epẹ k’akẹ” kụ resoor ude, kụ kasighẹ ḍisẹph kirokirọ kụ etumhonhaan buphẹ oḅạr bọ Enhaạn siphẹ Itooghị Oniin Oonịr Asiạ Phọ (Miịn siikpịgh phọ 14-16)
14-15. Emhuoghaạgh Ogananami phọ 21 etomaạm 144,000 eeghe? (Miịn afoto oḅẹl opoḍi phọ.)
14 Oghiọm aghisigh, Ogananami phọ emhụ phọ 21 etomaạm 144,000 phọ emạ eelhe dị oghol mọ “Omoom aJeruselem.” (Ogan. 21:2, 9) Emhạ phọ ephẹn phọ olọgh anyụ 12 asighiigh dị eḍighi iphighiom mọ, kụ ogẹ ghan anyụ asighiigh phọ “siḍien 12 abutelhedom Oọny Oyool Ogạ phọ.” Ephigh phọ ephẹn phọ k’ekạr kụ eḅeeraạny Jọn, ika? Loor esi dị odị amhiịn ḍien odị dị ogẹ aani ḍinhiin aḍighiigh phọ. P’eeghe eepoogh!—Ogan. 21:10-14; Efẹ. 2:20.
15 Emhạ dị eghịgh nyeẹn phọ i/lo. Oḍighinom olhom oḅodo emhạ phọ ofiafiạ agol, emhoọgh 12 arunhụ aḍibuo ibekularị, usighẹ odọ kirokirọ imạ asighiigh kụ olhoghọm iphighiom r’iikpe emhạ phọ—kụ utooghị ni oomo phọ araraạr phọ eten dị eelheeny. (Ogan. 21:15-21) Kuolọ, aJọn alhọgh ni elhegh mọ iyaạr edi ni dị esugha! Naghạn idị odị aḅilhẹ aghaạph: “Mị u/miịn otu iiḅereghị siphẹ emạ phọ, idị eḍighi bọ otu iiḅereghị emạ phọ, pọ Enaạn oomo iikpọ Omoọgh-we phọ r’Oọny Iyool Ogạ phọ. Emạ phọ i/moọgh iyaạr oḍighinom aḍiḅaạl erumuḍio phọ r’unwanyụ phọ, loor esi dị aḍiḅaạl eegu phọ Enaạn esoorom ni nyodị, ḅilẹ Oọny Iyool Ogạ phọ kụ otozị odị.” (Ogan. 21:22, 23) Abuphẹ oḍighi bọ pakirị omhoom aJeruselem mọ komiịn ghan aZihova ghisigh r’aghisigh. (Hib. 7:27; Ogan. 22:3, 4) AZihova r’aZizọs kụ otu iiḅereghị phọ odi bọ emhạ phọ.
Abuanhiạn kụ kokelhọm imạ araraạr phọ osighẹ bọ omaaniọm “ophiịny” phọ ḅilhẹ “ireeny” phọ? (Miịn siikpịgh phọ 16-17)
16. Eeghe kụ kemitenhaan omhạr awe siphẹ Oonịr Asiạ Itooghị Phọ Enhaạn?
16 Ekạr eḍighi iyaạr ibo dị abuẹn osagharạn bọ uwaloor iigbia phọ kootughiạn ilọ emhạ phọ iphẹn phọ. Kuolọ iphẹn phọ egbolomaam aani ni buẹn kotọl bọ siẹn ade phọ. Siphẹ Oonịr Asiạ Itooghị Omhạr phọ, Omhoom aJeruselem mọ kasighẹ ni atu ḍisẹph kirokirọ. AJọn amhiịn dị aḍisẹph phọ rekil idiphọ “ophiịny amuụm aghuḍum.” Kụ ekeeny r’elhiom ophiịny phọ “ireeny aghuḍum” irọl lị dị emhoọgh rinyạ “ookonomom ghan areelhe phọ.” (Ogan. 22:1, 2) Oomo awe phọ kotọl bọ mem mọ amuphẹ phọ komooghọm ni suọ oomo araraạr phọ iphẹn phọ. Kụ enụm enụm, oomo omhạr awe dị onhaghanhạn Enhaạn oḍighi we dị omhunughan. Kụ e”moon, ariiphinha, r’izin ke/tọl mụn.—Ogan. 21:3-5.
17. Odaphạn Ogananami phọ 20:11-13, abuọ anhiạn kụ komooghọm suọ Oonịr Asiạ Itooghị Omhạr phọ?
17 Abuọ anhiạn kụ kokelhọm imạ araraạr phọ iphẹn phọ? Abuḅẹl phọ pọ, aḍigbogh aḍita phọ kokpetenaan bọ eghạm mọ Amagidọn, ibạm anmụny dị omhạr siphẹ omhoom aḅirinhi phọ. Kuolọ emhuoghaạgh Ogananami phọ 20 eḅilhẹ kẹn ni ekaạph mọ koḅerion ni buphẹ momuughu bọ. (Bạl Ogananami 20:11-13.) Abuọ ‘elhiom eḍighinhom iyaạr phọ’ omhuughu bọ epẹ omhạn ‘r’abuekeeny eḍighinhom iyaạr phọ’—u/moọgh aani bọ eepoogh otuughạ aani ilọ aZihova—koḅerion aani ni orọl isiẹn ade phọ. (Iiḍighi 24:15; John 5:28, 29) Iphẹn phọ remạ ghan mọ oomo awe dị m’orọl ghan siẹn ade phọ kụ edị koḅerion siphẹ Itooghị Oonịr Asiạ phọ ḍughụm? Eeye. Ko/ḅerion aani buḍighinhom ikarạph phọ abuphẹ olhegheri bọ ni kụ oghel eepoogh okumu aZihova. Ungọ ni bidị eepoogh kuolọ bidị uḍeenhaan mọ bunọ u/kpianhạn omhoọgh aghuḍum dọl aparadis.—Mat. 25:46; 2 Tẹs. 1:9; Ogan. 17:8; 20:15.
OḌẸGH OPHOGH DỊ ASUGHA OMHẠN
18. Ade phọ ketọl ika eekunha 1,000 asiạ phọ?
18 Eekuna 1,000 asiạ phọ oomọ awe dị odi siẹn ade phọ koḍighi we dị omhunughan. Oomo awe dị kotọl mem mọ opọ phọ koḍighi we dị mokpetenaan ikarạph phọ Adam. (Rom. 5:12) Itulughian ikarạph phọ Adam koḅeeri oseemhi eekunha k’agee-pọ. Esi iduọn phọ, abuẹn odi bọ siẹn ade phọ “kotue ni omoọgh ghuḍum” idiphọ awe dị omhunhughan siphẹ eekunha 1,000 asiạ phọ.—Ogan. 20:5.
19. Uḍighi ika kụ oḅilhẹ bọ omoghi odẹgh ophogh dị asughanam omhạn?
19 Yira olhegheri ni mọ aZizọs akpạr ri apụ oomo ipẹ aSetan aḍighi bọ ophuẹ adọl aruukuan phọ odị. Odị aphamanạm ni omheeraam mọ odị mem odẹgh ophogh. Kuolọ oomo awe dị omhunughan kụ koḍighi aani ni iduọn phọ eḍighi iyaạr dị bidị osoman odẹgh ophogh aSetan? Torobọ oye kamoọgh ni eepoogh ophagharanaạn aḍipuru phọ aḍiphẹ phọ mem mọ komiteom bọ Setan siphẹ abyss phọ eekunha 1,000 asiạ phọ. (Ogan. 20:7) Abuphẹ ophamanạm bọ ḍimheerạ phọ abidị siphẹ odẹgh ophogh phọ ophọn phọ asughanam bọ omhạn, komoọgh ni ghuḍum k’agee-pọ kụ oḅilhẹ omoọgh egey eereẹgh. (Rom. 8:21) Kopiemhi ni buigbagharạn phọ ḅilhẹ r’aSetan r’aruukpaạny phọ odị k’agee-pọ.—Ogan. 20:8-10.
20. Imiin phọ edi bọ ḍinyạ Ogananami phọ etir ika nyinhạ?
20 Etọl ika esi anạ siẹn yira mookaragh bọ ḍinyạ Ogananami phọ? Olhoghi anạ o/ḅaạl omhiịn idị imiịn phọ iphẹn phọ egbolomaam nyinhạ ḍughụm? Iphẹn phọ nyinhạ i/nyu omhạgh aani abunhọn oru oḍighan ayira okumu Enhaạn phọ ayira? (Ogan. 22:17) Nyiidiphọ yira mooḅeghiọn bọ raraạr phọ iphẹn phọ kemite bọ epẹ ghisigh, ekạr itir aani iyira idiphọ etir bọ Otelhedom mọ Jọn, kụ aḅẹm bọ mọ: “Erọl li idiphọ! Jizọs Omoọgh-we, tue!.”—Ogan. 22:20.
AḌUỌR PHỌ 27 The Revealing of God’s Sons
a Emhuoghaạph phọ ephẹn phọ kụ isughanham omhạn esi arumhuoghaạph phọ eekaragh bọ ḍinyạ Ogananami phọ. Siẹn emhuoghaạph phọ ephẹn phọ, yira komiịn idị buphẹ oḅạr bọ aZihova komoọgh oḅaạl olhoghi ghisigh, r’idị abuphẹ oghel bọ itooghị phọ Enhaạn komoọgh muphe.