Watchtower ONLINE LIBRARY
Watchtower
ONLINE LIBRARY
Abua
  • BIBLE
  • PUBLICATIONS
  • MEETINGS
  • w23 May opoḍi 8-13
  • Idị AZihova Rapagharanhaạn Ghan Bọ Iiḅereghị Ayira

No video available for this selection.

Sorry, there was an error loading the video.

  • Idị AZihova Rapagharanhaạn Ghan Bọ Iiḅereghị Ayira
  • Otu Okoriom Dị Ragbeelhom Omhạr Phọ Azihova (Ituughạ)—2023
  • Subheadings
  • Similar Material
  • EENI AZIHOVA KA/PAGHARANHAẠN ETEN PHỌ EPẸ YIRA ROGON BỌ
  • ARETEN DỊ AZIHOVA RAPAGHARANHAẠN GHAN IIḄEREGHỊ ḌIO ARODON
  • EMOGHI NI OMHEERAAM OWẠ R’OSIGHẸ IIḄEREGHỊ AYIRA DỊ AZIHOVA APHAGHARANHAẠN
  • AZihova Kapagharanhaạn Ni Iiḅereghị Phọ Amhị?
    Otu Okoriom Dị Ragbeelhom Omhạr Phọ Azihova (Ituughạ)—2023
  • Onhighemhị Eten Iiḅereghị Phọ Ayira
    Otu Okoriom Dị Ragbeelhom Omhạr Phọ Azihova (Ituughạ)—2023
Otu Okoriom Dị Ragbeelhom Omhạr Phọ Azihova (Ituughạ)—2023
w23 May opoḍi 8-13

EMHUOGHAẠPH ITUUGHẠ PHỌ 21

Idị AZihova Rapagharanhaạn Ghan Bọ Iiḅereghị Ayira

“Iduọn yira molegheri bọ iphẹn phọ, yira oḅilẹ ni olegheriom mọ yira momoọgh ni ipẹ yira olọm bọ nyodị.”—1 JỌN 5:15.

AḌUỌR PHỌ 41 Please Hear My Prayer

OGHAẠPH OOKARAGHa

1-2. Eeghe kụ edị yira kotue ni ookia ilọ iiḅereghị phọ ayira?

NẠ MAMHOỌGH ghan ni iikia mughumọ aZihova rapagharanhaạn ghan ni iiḅereghị anạ ḍughụm? Eḍighi idiphọ, pọ ko/gina anạ. Ibadị abumor r’abumaranhi moghaạph ghan ni ilọ iphẹn phọ, ekạr ekpaariọm mem dị bidị odi esi iiḅaghamhị. Eḍighi maạr dị yira odi esi imhinhimhiịn, eeni kẹn kikparanhaạn ni iyira olhọgh elhegh ipẹ aZihova rapagharanhaạn bọ iiḅereghị phọ ayira.

2 Uguạ ooḅeghiọn ephigh phọ yira kotue bọ okuphom owol mọ aZihova rapagharanhaạn ghan ni iiḅereghị arebenhẹ phọ odị. (1 Jọn 5:15) Yira kooḅeghiọn kẹn ni sipuru phọ iphẹn: Uḍighi ika kụ eeni amem rekịgh ghan bọ mudị aZihova ra/pagharanhaạn iiḅereghị phọ ayira? Ighẹn areten kụ edị aZihova rapagharanhaạn ghan iiḅereghị rodon?

EENI AZIHOVA KA/PAGHARANHAẠN ETEN PHỌ EPẸ YIRA ROGON BỌ

3. AZihova atụ eeghe kụ rawạ bọ dị yira kokị ghan esi odị iiḅereghị?

3 Aḍinyạ iigbia phọ ingọ ni iyira okuphom owol mọ aZihova akạr kụ uphomhoghiạn iyira ḅilhẹ yira omạn ni maạr esi odị. (Hag. 2:7; 1 Jọn 4:10) Pọ kụ iyaạr phọ odị rawạ bọ mọ ooḅereghị ghan olhọm nyodị olhoghonhaạn aḍighaạgh. (1 Pit. 5:6, 7) Odị rawạ mọ yira orọl otuman nyodị obọ yira orue okparaghạm iiḅaghamhị dị yira osoman.

ADevid dị akem aḅiriman r’onẹ odị, okpetenhaan osọph dị oroph nyodị.

AZihova anhaghạn ni iiḅereghị phọ aDevid kụ atagharạn nyodị ḍighaạgh amulhọgh ḍien phọ odị (Miịn ekpịgh phọ 4)

4. Ika kụ idị yira olhegheri bọ mọ aZihova rapagharanhaạn ghan ni iiḅereghị abuphẹ rokumu bọ nyodị? (Miịn kẹn afoto phọ.)

4 Mem dị yira robạl Baibul phọ, yira rogbor ghan ni komhiịn mọ aZihova rapagharanhaạn ghan ni iiḅereghị arebenhẹ phọ odị. Nạ atue ni aatughiạn eniin eḍeenhaan? Uw-emhạ phọ Devid. Odị amhoọgh ni bugbagarạ abumulhọgh ḍien siphẹ adọl aghuḍum mọ odị, kụ odị agbor ghan alhọm olhoghonhaạn aḍighaạgh aZihova esi iiḅereghị. Eniin amem odị amhoghiom ni mọ: “Sey Zihova, naghanhạn iiḅereghị phọ amhị; naghạn ilọm mọ amhị. Nạ oye dị oguan ra/bi ghan ḅilhẹ nạ oye elhiom eḍighinhom iyaạr, uphagharanhaạn imhị.” (Ps. 143:1) AZihova aphagharanhaạn ni iiḅereghị phọ aDevid alhọm bọ ophẹl odị. (1 Sam. 19:10, 18-20; 2 Sam. 5:17-25) R’okuphom owol aDevid aḅẹm ni mọ: “AZihova atuman ni oomo abuphẹ romạgh bọ nyodị.” Yira kẹn kotue ni okuphom aani owol ipẹ phọ.—Ps. 145:18.

Otelhedom mọ aPọl ralọm ghan aZihova esi iiḅereghị.

AZihova anhaghạn ni iiḅereghị phọ aPọl esi ongọ odị inyaạm orue okparạm (Miịn ekpịgh phọ 5)

5. Arebenhẹ phọ aZihova iḍiodi phọ umhiịn ghan ni ophagharanhaạn iiḅereghị phọ abidị eten phọ epẹ bidị ogon ghan bọ ḍughụm? Ngọ eḍeenhaan. (Miịn kẹn afoto phọ.)

5 Eeni amem, aZihova ka/pagharanhaạn iiḅereghị phọ ayira eten phọ epẹ yira rogon bọ. Ipẹ kụ imitenhaan otelhedom mọ Pọl. Odị alhọm Enhaạn osighẹ “ooburom” iiḅaghamhị dị agim nyodị. APọl aaḅereghị ni ilọ igbagarạ iiḅaghamhị phọ iphẹn phọ iraạr amem. AZihova aphagharanhaạn ni iiḅereghị phọ ipẹ phọ? Ii, kuolọ ke/ten phọ epẹ aPọl agon ghan bọ. Kparipẹ r’osighẹ iiḅaghamhị phọ, aZihova angọ ghụn nyodị inyaạm mọ odị amhoghi bọ oghiọm aghisigh okumu Odị eten dị ekpẹ oḍuomolhoghi.—2 Kọr. 12:7-10.

6. Uḍighi ika kụ eeni amem rekịgh ghan bọ mudị aZihova ra/pagharanhaạn iiḅereghị phọ ayira?

6 Eeni amem yira phọ kẹn ni ko/miịn ophagharanhaạn iiḅereghị phọ ayira eten phọ epẹ yira ogon ghan bọ. Kuolọ yira kotue ni okuphom owol mọ aZihova kụ alhegheri eten dị ekạr enhighẹ olhoghonhaạn ayira ḍighaạgh. Odị katue ni aḍighi ‘apuemi ipẹ yira rolọm ghan bọ, oḅilẹ bọ rootughiạn ghan.’ (Efẹ. 3:20) Loor ephigh phọ ephẹn phọ, ophagharanhaạn iiḅereghị phọ ayira katue ni atu mem r’eten dị yira uu/tughiạn.

7. Uḍighi ika kụ eeni amem kewạ bọ dị yira konme iiḅereghị phọ ayira? Kaạph angoọm eḍeenhaan.

7 Yira otue ni onme ipẹ yira olhọm bọ aZihova mem dị yira okạr omhiịn ipẹ aZihova rawạ bọ mọ araraạr eghị. Ooḅeghiọn eḍeenhaan aMartin Poetzinger. Umor phọ Poetzinger aphịn bọ anhịr i/bia bịn olhọgh nyodị otu ikoli awe itooghị aGermany phọ. Eḅẹl amem mọ, odị aaḅereghị alhọm aZihova mamiteom nyinhọ siphẹ otu ikoli phọ pidị odị atue apogh anhịr phọ odị aḅilhẹ amiigh oḍighi iphelhegbeel phọ odị. Toroboiperolbọ, mem dị iyạl awiki meten, odị o/mhiịn eḍeenhaan dị eghịgh mudị aZihova maphagharanhaạn iiḅereghị phọ odị. Esi iduọn phọ, odị anme iiḅereghị phọ odị kụ aaḅereghị mọ: “Seseeny Zihova, uḍeenhaan imhị ipẹ nạ rawạ bọ mọ mị uḍighi phọ.” Kụ odị amhiigh ootughiạn ilọ abueriphọ abumor phọ odi bọ siphẹ otu ikoli phọ rokparaghạm bọ. Ibadị abidị utọ ghan ni ilọ anmariịr phọ r’ibạm anmụny phọ abidị. Umor phọ Poetzinger aḅilhẹ aaḅereghị mọ: “Zihova maḍighi esi emhoom ekool arukumuan phọ nạ ungọ bọ imhị. Ulhoghonhaạn imhị ḍighaạgh dị mị katue akparamhị aḅilhẹ angọ bumor phọ akpọ oḅio.” Esi esugha asiạ phọ odị arọl bọ siphẹ ikoli phọ, odị aḍighi ghan iphẹn phọ!

8. Eeghe ekpanhạ iyaạr kụ edị yira kolọgh elhegh mem dị yira rooḅereghị?

8 Ku/bulha mọ aZihova amoọgh ni igbiighi, kụ kamunhenhi ni mem lọ eteẹny. Ogbi phọ odị ophọn phọ aḅaramaạm ni osiemhi eekunha oomo iiḅaghamhị dị rekọm ghan imhinhimhiịn ḍio phọ arodon—idiphọ iiḅaghamhị dị oye ka/tue apamaghạn, e/moon, ḅilhẹ r’aḍuugh. AZihova kasighẹ Omhạr phọ odị kụ amunenhiom ruguanhaan phọ odị. (Dan. 2:44; Ogan. 21:3, 4) Toroboiperolbọ, kụ egbi oteẹny amem mọ amuphẹ phọ, aZihova angọ ni eepoogh Setan maphạm ni itooghị aḅirinhi phọ.b (Jọn 12:31; Ogan. 12:9) Eḍighi maạr dị aZihova akunughi iiḅaghamhị omhạr awe nyiidiphọ phọ, kekịgh mudị aSetan ratooghị ni agey. Kụ iḍighi kụ, okoriom dị aZihova kamunenhi ruguanhaan phọ odị, i/mạ mọ odị uteḅeeny ni iyira egbenhẹm bịn. Uguạ ooḅeghiọn iniin areten dị aZihova rulhoghonhaạn ghan iyira ḍighaạgh.

ARETEN DỊ AZIHOVA RAPAGHARANHAẠN GHAN IIḄEREGHỊ ḌIO ARODON

9. Ika kụ idị aZihova katue ulhoghonhaạn iyira ḍighaạgh mem dị yira rowa osopha osopha? Kaạph amaaniọm.

9 Odị rungọ ghan iyira osụ olhoghi. AZihova aguanhaan ni ongọ ghan ayira osụ olhoghi phọ ewạ bọ osighẹ osophaam ghan ogey osopha. Yira omoghi ni osụ olhoghi phọ k’Enhaạn, ekạr ekpaariọm mem dị yira rosopha osopha dị katir ri oomo adọl aghuḍum mọ ayira, idiphọ osopha dị agbolhomaam mughumọ oye kabạl li ilhom obobọ kapin ni anhịr. (Jems. 1:5) Omhiịn eḍeenhaan umaranhi dị ilhom u/bạl dị oghol mọ Maria.c Odị amhiịn ni oniin onyọ umor mem dị odị rakọy eten opọ oomo amem r’oḅaạl olhoghi. Odị aghaạph mọ: “Idiphọ arighirị phọ ayoor rekpạr bọ, idiphọ kụ edị aḍiḅeraạn iyạl phọ ayoor rebụgh. Mị ulhegheri ni mọ ewạ mọ mị usopha osopha. Mị uuḅereghị ni iboom ilọ iphẹn phọ. Ii, mị ulhegheri ni mọ mị amoghi ni iiḅakiọm aZihova, kuolọ mọ aZihova kụ ku/sophonhaan imhị osopha phọ.” Odị alhoghoma ni mọ aZihova apagharanhaạn ni iiḅereghị ilọ osụ olhoghi phọ odị aaḅereghị bọ. Ika? Odị awaaghị ni raraạr siphẹ arinyạ phọ ayira, kụ amhiịn rumhuoghaạph dị ekạr ephagharanhaạn sipuru dị eeḅaghamhị ghan nyodị. Odị aḅilhẹ kẹn adạph oromha onhiin odị dị akpạr ri siẹn igey phọ. Oromha phọ alhoghonhaạn aMaria ḍighaạgh ooḅeghiọn ipẹ odị alhoghoma bọ. Eekunha phọ, odị arue ni asopha osopha dị aḍighi olọ osụ olhoghi.

Onyọ umor dị odị ogbogo aruuruen, rabạl ghan Baibul.

Ika kụ edị aZihova rungọ ghan bọ iyira inyaạm okparạm? (Miịn ekpịgh phọ 10)

10. Odaphạn Filipai 4:13, aZihova kaḍighi eeghe olhoghonhaạn aḍighaạgh rebenhẹ phọ odị? Ngọ eḍeenhaan. (Miịn kẹn afoto phọ.)

10 Odị rungọ ghan iyira inyaạm okparạm. Idiphọ aZihova angọ bọ ni inyaạm otelhedom mọ Pọl, odị kungọ aani kẹn iyira inyaạm mọ ewạ bọ orue okparạm. (Bạl Filipai 4:13.) Ooḅeghiọn idị aZihova alhoghonhaạn ḍighaạgh onyọ umor dị oghol mọ Benjamin okparaghạm asidọl dị ekpạr ri iboom. Ibadị amem eghoroghọr odị, aBenjamin ḅilhẹ r’odẹ r’onhiin r’abumor odị urọl ghan ekpisi dị awe dị iiḅaghamhị emitenhaan rotọl ghan ephẹn Africa. ABenjamin aḅẹm mọ: “Mị uuḅereghị ghan egbạ gbạ amem alhọm aZihova inyaạm orue oḍighi ipẹ enhighẹ bọ siphẹ ariḍien phọ odị. AZihova aphagharanhaạn ni iiḅereghị phọ amhị esi ongọ amhị eephọ olhoghi, akpọ oḅio oghiọm aghisigh oḍighi iphelhegbeel phọ, ḅilhẹ r’ongọ amhị rinyạ aạl dị iḍur imhị etumeriom nyodị.” Odị aḅilhẹ aḅẹm mọ: “Aạl araraạr dị emiteghunhaan bumor r’abumaranhi phọ r’otuughạ ipẹ aZihova alhoghonhaạn bọ bidị ḍighaạgh okparạm, ilhoghonhaạn ni imhị ḍighaạgh oghiọm aghisigh orọl adọl dị ekpẹ oḍuomolhoghi.”

AZihova malhoghonhaạn ghan ni nyinhạ ḍighaạgh dị eego esi abumor r’abumaranhi phọ? (Miịn siikpịgh phọ 11-12)d

11-12. Ika kụ edị aZihova katue asighẹ bumor r’abumaranhi phọ ayira apagharanhaạm iiḅereghị phọ ayira? (Miịn kẹn afoto phọ.)

11 Odị rasighẹ ghan kaḍighinhom bumor r’abumaranhi phọ. Ḍughul phọ eḅaạl odị kasighẹ bọ ghuḍum mọ odị apighironhọm ekiạ, aZizọs aaḅereghị ni agey. Odị alhọm mọ aZihova ku/meera mọ awe ootughiạn mọ erugh aḍuugh epum nyodị loor oopụ aḍien Enhaạn. Kparipẹ r’oḍighi ipẹ odị alhọm bọ, aZihova alhoghonhaạn ghụn Zizọs ḍighaạgh esi orom ookpaạny m’aghị aadereghị nyodị. (Luk 22:42, 43) Eniin phọ eten phọ kẹn kụ edị aZihova rulhoghonhaạn ghan iyira ḍighaạgh mem dị abumor r’abumaranhi phọ ayira omhạgh obobọ oru k’ayira oodereghị ayira. Oomo ayira otue ni owạ roopoogh oḅaanhaạn ghan bumor r’abumaranhi phọ ayira ‘r’aroḍọgh onmạ ighirigiir.’—Prov. 12:25.

12 Ooḅeghiọn eḍeenhaan onyọ umaranhi dị oghol mọ Miriam. Ḍiniin aḍio dị ogina aMiriam odi olhoghotu, mem dị iyạl ikpo awiki reten mem mọ olom mọ odị amhugh bọ, aMiriam amhiigh okururu r’oḅonyonhu ozuan. Kụ odị arọl ghan emoghi ḍughul r’ootaany, kụ akạr amhoghi oye oḅaanhaạn. AMiriam aḅẹm mọ: “Inyaạm imhị i/rọl omhạgh oye, iyaạr dị mị arue aḍighi pọ oḅaanhaạn aZihova. Kụ siphẹ mị ramoghi bọ aḅilhẹ raaḅereghị, bịn aḍimhạgh eḍigh fon amhị. Okumor oye ookpomhoghan dị aḍighi ogbo oyaghirị amhị kụ ramạgh.” Okumor oye phọ r’anhịr odị uudereghị ni Miriam. Kụ odị aru akuphom owol mọ aZihova kụ anyu onyọ umor phọ omhạgh.

Oyil arookonhom dị raḍeenhaan ghan raraạr dị ogẹ ḍinyạ olom r’anhịr.

Ika kụ edị aZihova katue anyu we olhoghonhaạn anạ ḍighaạgh? (Miịn siikpịgh phọ 13-14)

13. Ngọ eḍeenhaan idị aZihova katue asighẹ oye dị raa/ḅereghị ghan nyodị apagharanhaạm iiḅereghị ayira.

13 Odị katue ni asighẹ aḍighinhom we dị roo/ḅereghị ghan nyodị. (Prov. 21:1) Eeni amem, aZihova rasighẹ ghan ni we dị roo/ḅereghị nyodị kaphagharanhaạm iiḅereghị arebenhẹ odị. Esi omaạm, odị anyu ni uw-emhạ phọ Artaxerxes onhaghạn ilọm mọ aNehemiah ilọ oḅulha aJeruselem olhoghonhaạn aḍighaạgh olhọgh emhạ phọ. (Neh. 2:3-6) Ḍio arodon, aZihova katue ni anyu oye dị raa/ḅereghị ghan nyodị ongo olhoghonhaạn aḍighaạgh dị ebenhẹ odị amhoghi.

14. Eeghe kụ edị nạ asereghiạn esi ipẹ emitenhaan bọ Soo Hing? (Miịn kẹn afoto phọ.)

14 Umaranhi dị oghol mọ Soo Hing alhoghoma ni dị aZihova asighẹ oyil arookonhom alhoghonhaạn nyodị ḍighaạgh. Oọny odị amhoọgh iiḅaghamhị epul. Kụ mem dị oọny phọ odị aḍighima iyaạr ekperenhom, odị r’olom odị uwilhẹ ni oḍighi phọ abidị obọ otue opogh nyodị. Iphẹn phọ iḍighi ni idị ikpoki eku bidị. ASoo Hing aḅẹm mọ ighịgh mudị odị oḍigh dị oḍur bịn onhenhe omhadạn. Odị azu ni ekpom odị angọ aZihova, kụ alhọm olhoghonhaạn aḍighaạgh. Kụ oyil arookonhom mọ amhiigh owạ areten olhoghonhaạn odị r’eghunotu odị ḍighaạgh. Iphẹn phọ iḍighi ni idị bidị orue omhoọgh olhoghonhaạn aḍighaạgh aGomẹnt phọ kụ oḅilhẹ omhoọgh esi orọl dị bidị kotue okpẹ. Kụ ipẹ reten, kụ aSoo Hing aḅẹm mọ: “Yoor umhiịn ni ḍighaạgh aZihova esi oomo ipẹ emite bọ. Odị akạr ‘ranaghạn ghan iiḅereghị.’”—Ps. 65:2.

EMOGHI NI OMHEERAAM OWẠ R’OSIGHẸ IIḄEREGHỊ AYIRA DỊ AZIHOVA APHAGHARANHAẠN

15. Eeghe kụ ilhoghonhaạn oniin onyọ umaranhi olhegheri mọ aZihova rapagharanhạan ghan ni iiḅereghị phọ odị?

15 AZihova ra/gbor ghan kaphagharanhaạn iiḅereghị phọ ayira reten iiḍaạny. Kuolọ ophagharanhaạn phọ yira romoọgh ghan bọ kụ edị yira omhoghi bọ orue oḅạr Odẹ k’akẹ phọ ayira. Esi iduọn phọ, gon ghan omhiịn ipẹ aZihova kapagharanhaạn bọ iiḅereghị phọ anạ. Onyọ umaranhi dị oghol mọ Yoko aatughiạn ghan mọ aZihova ra/pagharanhaạn ghan iiḅereghị odị, kụ odị amhiigh ogẹ ghan olhọgh esi oomo araraạr dị odị alhọm aZihova esi iiḅereghị. Kụ onyebel roten, kụ odị aghị aphogh siphẹ aḍinyạ phọ odị kụ amhiịn mọ aZihova maḍighinhaan ni nyodị ibadị araraạr phọ odị alhọm bọ, ghalhamọ r’iniin dị odị mawulha ni. Mem etum mem, kewạ ni dị yira kogbirima ilọ ipẹ aZihova rapagharanhaạn ghan bọ iiḅereghị phọ ayira.—Ps. 66:19, 20.

16. Ika kụ edị yira kotue oḍeenhaan ghan omheeraam mem dị yira ooḅereghị? (Hibru 11:6)

16 Yira roḍeenhaan ghan omheeraam mem dị yira ooḅereghị ḅilhẹ r’amem dị yira omheera osighẹ iiḅereghị phọ ayira etigheri eten phọ epẹ ophagharanhaạn phọ aru bọ. (Bạl Hibru 11:6.) Ooḅeghiọn eḍeenhaan aMike r’anhịr odị Krissy. Bidị umhoọgh ḍiigbu okumu epẹ Betẹl. Kụ aMike aḅẹm mọ: “Yoor ugeeghị ni ibadị amem oghị aani, kụ yoor ogbor ghan ooḅereghị olhọm aZihova oteẹny aḍiigbu phọ aḍiẹn phọ, kuolọ i/ḅọph.” Toroboiperolbọ, aMike r’aKrissy ukuphom ni owol mọ aZihova kụ akạr alhegheri esi dị enhighẹ osighẹ abidị oḍighinhom siphẹ oḍighi phọ odị. Bidị ughiọm ni ghisigh oḍighi ghan ipẹ bidị kotue bọ, okumuan ghan idiphọ abukọy eten opọ oomo amem mo ekpisi dị ewaạm mọ ebụgh ḅilhẹ r’olhoghonhaạn ghan aḍighaạgh olhoghoḍị aruutu oḍighom mọ. Rodon bidị roḍighi oḍighi abupoghom eghir. AMike aḅẹm mọ: “K/oomo amem kụ edị aZihova aphagharanhaạn ghan iiḅereghị phọ ayoor eten phọ epẹ yoor ootughiạn bọ, kuolọ ipẹ odị aphagharanhaạn ghan bọ kụ inhighẹ ghan epu ipẹ yoor ootughiạn bọ.”

17-18. Yira okuphom owol eeghe daphạn Psalm 86:6, 7?

17 Bạl Psalm 86:6, 7. Okọ suọr phọ aDevid akuphom ni owol mọ aZihova anhaghạn ni aḅilhẹ aphagharanhaạn iiḅereghị phọ odị. Nạ katue ni amoọgh aani oniin phọ okuphom owol phọ. Areḍeenhaan phọ yira mooḅeghiọn bọ siẹn emhuoghaạph phọ ephẹn phọ, ingọ iyira oḍuom olhoghi mọ aZihova kungọ ni iyira osụ olhoghi r’inyaạm orue okparạm. Odị katue ni asighẹ bumor r’abumaranhi phọ obobọ we dị roo/ḅereghị ghan nyodị aḍighinhom olhoghonhaạn ayira ḍighaạgh.

18 Ghalhamọ r’iduọn ibadị amem aZihova ka/pagharanhaạn bọ iiḅereghị phọ ayira eten phọ epẹ yira ootughiạn bọ, yira okuphom ni owol mọ odị kapagharanhaạn ni. Odị kungọ ni iyira ipẹ yira omhoghi bọ mem mọ opọ ekpeanhaạn bọ. Esi iduọn phọ, kiọm ni ghisigh aaḅereghị ghan r’oḍuom olhoghi mọ odị kanaghạn ni iiḅereghị phọ anạ, kụ akpọ oḅio mọ aZihova kaphogh ni nyinhạ kụ aḅilhẹ “agbaanyamhị ruuphuạ oomo ayira” siphẹ omhoom aḅirinhi phọ odị masi bọ siẹn edạ aḍighaạgh.—Ps. 145:16.

NẠ KAPAGHARANHAẠN IKA?

  • Uḍighi ika kụ aZihova eeni amem ra/pagharanhaạn ghan bọ iiḅereghị ayira eten phọ epẹ yira rogon bọ?

  • Ngọ reḍeenhaan ilọ areten dị aZihova katue apagharanhaạn iiḅereghị ayira.

  • Ika kụ idị yira kotue oḍeenhaan omheeraam mem dị yira rogon ophagharanhaạn iiḅereghị ayira?

AḌUỌR PHỌ 46 We Thank You, Jehovah

a AZihova ungọ iyira okuphom owol m’onọ kapagharanhaạn ni iiḅereghị ayira eḍighi maạr lọ emhoọgh muḅọph r’ogbi odị. Mem dị yira osoman odẹgh ophogh kirokirọ, yira kotue ni okuphom owol mọ odị kungọ ni iyira olhoghonhaạn aḍighaạgh phọ ewạ bọ orue ophamhanhạm adọl dị ekpẹ oḍuomolhoghi esi odị. Uguạ, ooḅeghiọn ipẹ aZihova rapagharanhaạn ghan bọ iiḅereghị ayira.

b Orue olhegheri iyaạr phọ eḍighi bọ kụ aZihova amheera bọ mọ aSetan atooghị ni, pọ miịn emhuoghaạph phọ “Keep Your Eyes on the Big Issue,” siphẹ Watchtower aJune 2017.

c Monme iniin asiḍien.

d ILỌ AFOTO: Onhiin r’onyanhị odị osuma okeel enhọn ekpisi idiphọ aruuruen. Abumor r’abumaranhi phọ okuraam bidị oḅilhẹ rongọ ghan bidị raraạr dị bidị omhoghi orolhọm.

    Abua Publications (2001-2025)
    Log Out
    Log In
    • Abua
    • Share
    • Preferences
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share