Loghonhaạn Ḍighaạgh Buphẹ Nạ Ratughemhị Bọ Baibul Phọ Osopha Okumu AZihova

1-2. (a) Eeghe kụ iḍighi kụ abuniin abuphẹ yira rotughemhị bọ Baibul phọ rokiilhaan bọ osopha okumu aZihova? (b) Yira kooḅeghiọn eeghe siẹn emhuoghaạph phọ ephẹn phọ?

ARARAẠR iwạ ni okikima anạ oḍighi aani oniin Ogbaanhaạn AZihova ḍughụm? Eeni nạ ughiilhaan ghan mọ awe dị r’anạ roḍighi ghan oḍighi, arighirị anạ, obobọ abuọ eghunotu anạ koghaghạm nyinhạ olhoghi. Obobọ eeni nạ uutughiạn ghan mọ nạ ka/tue adaphạn siigbu phọ Enhaạn. Eḍighi idiphọ, pọ nạ atue ni anaghanhạn iyaạr phọ eḍighi bọ kụ abuphẹ yira rotughemhị ghan bọ Baibul phọ rookpukiạn ghan bọ oḍighi Abugbaanhaạn AZihova.

² AZizọs bịn alhegheri ni mọ odọ oghiilhaan phọ ophọn phọ katue ni asophoghom oye okumu aZihova. (Mat. 13:20-22) Kuolọ odị alhoghonhaạn ni ḍighaạgh buphẹ rokiilhaan bọ odạph odị. Odị aḍeenhaan ghụn bumatuạn phọ odị ipẹ bidị kologhonhaạn bọ ḍighaạgh buẹn phọ (1) olhọgh elhegh raraạr dị ketue ni esophoghom oghị aghisigh phọ abidị, (2) obughẹ ephomhoghiạn phọ abidị esi aZihova, (3) ooḅenion araraạr dị bidị oḍighi eḅẹl siphẹ aghuḍum mọ abidị, ḅilhẹ (4) okpạr opu ipaanhaạn phọ abidị. Ika kụ idị yira kotue osighẹ oḍighinhom iphẹn aZizọs aḅenhị bọ bumatuạn phọ odị mem dị yira osighẹ ḍinyạ phọ Kelhọm Ghuḍum K’agee-pọ! rologhonhaạn ḍighaạgh opọ yira rotughemhị bọ Baibul phọ osopha okumu aZihova?

LOGHONHAẠN ḌIGHAẠGH OPỌ NẠ RATUGHEMHỊ BỌ OLHỌGH ELHEGH RARAẠR DỊ REKIKIMA NYODỊ OPHOPH OGHỊ AGHISIGH

3. Nạ ragbi mọ eeghe kụ iwạ bọ okikima aNikodimos oḍighi aani onyọ amatuạn aZizọs?

³ ANikodimos, oniin oḍiemhiom abuọ aJu phọ amhoọgh ni oghiilhaan dị awạ okikima odị oḍighi aani onyọ amatuạn aZizọs. AZizọs amhiigh bọ rukumuan phọ odị, odiiny unwanyụ kụ iten bịn aNikodimos alhọgh elhegh mọ aZizọs oye dị Enhaạn kụ arom. (Jọn 3:1, 2) Kuolọ, aNikodimos asaḅạr ghụn oghị oteẹny aZizọs eten ibooghiạn loor ‘oghiilaan abuọ aJu phọ.’ (Jọn 7:13; 12:42) Eeni odị aatughiạn ghan mọ odị aḍighi onyọ amatuạn aZizọs pọ mọ odị katoph dọl phọ odị r’eegu phọ abuọ aJu phọ olhọgh bọ nyodị.a

4. Ika kụ idị aZizọs alhoghonhaạn bọ ḍighaạgh Nikodimos onhaghanhạn ipẹ Enhaạn rawạ bọ ḍighaạgh odị?

⁴ ANikodimos alhegheri ni iilhogh phọ, kuolọ iwạ ni mọ odị anhaghanhạn raraạr phọ aZihova rawạ bọ ḍighaạgh odị. Ika kụ idị aZizọs alhoghonhaạn bọ nyodị ḍighaạgh? AZizọs amiteom mem aghaaphạn Nikodimos, ghalhamọ r’amem dị aḍughul meghul. AZizọs aghaạph kẹn raraạr dị aNikodimos kaḍighi pidị arue aḍighi aani onyọ amatuạn odị: mọ odị akiton, aḍiiny muụm, aḅilhẹ amhoọgh omheeraam aghị esi Oọny phọ Enhaạn.—Jọn 3:5, 14-21.

5. Ika kụ idị yira kologhonhaạn bọ ḍighaạgh opọ yira rotughemhị bọ olhọgh elhegh raraạr dị rekikima nyodị okumu aZihova?

⁵ Ghalhamọ opọ nạ ratughemhị bọ amhoọgh ni olhegheri iyaạr aBaibul phọ, odị kamoghi ni olhoghonhaạn aḍighaạgh orue olhọgh elhegh iyaạr phọ rekikima bọ nyodị okumu aZihova. Eeni oḍighi odị obobọ isophoghom eghunotu kụ rekikima bọ nyodị ophoph oghị aghisigh. Esi iduọn phọ, miteom mem alhoghonhaạn nyodị ḍighaạgh. Nạ atue ni amạgh aani nyodị oru k’anạ olhe eḍien obobọ omite aani k’odị. Iphẹn phọ etue ni emiteom eepoogh dị odị kaḅenhị nyinhạ raraạr phọ reeḅaghamhị bọ nyodị. Loghonhaạn ḍighaạgh nyodị onmeeghi araraạr siphẹ aghuḍum mọ odị, ku/tuạn oḍighi ilọ keḅeraạn nyinhạ, kuolọ ekpasị esi ephomhoghiạn phọ odị amhoọgh bọ esi aZihova.

6. Ika kụ idị nạ katue aloghonhaạn ḍighaạgh opọ nạ ratughemhị bọ omhoọgh akpọ oḅio osighẹ oḍighinhom ipẹ odị ratuughạ bọ? (1 Korịnt 16:13)

⁶ Mem dị opọ nạ ratughemhị bọ akuphom owol mọ aZihova kaloghonhaạn ni nyodị ḍighaạgh odaphạn asiigbu aBaibul phọ, kekparamhị ni nyodị osighẹ oḍighinhom ipẹ odị ratuughạ bọ. (Bạl 1 Korịnt 16:13.) Oḍighi phọ anạ idiphọ odị ratughemhị ghan oye Baibul kotue ni otomaạm otughemhiạ otu askul. Oghẹn otughemhiạ kụ aḅeraạn ghan nyinhạ mem mọ nạ aghị ghan bọ askul? Eeni aḍighi otughemhiạ phọ opọ alhoghonhaạn ghan bọ nyinhạ ḍighaạgh olhegheri mọ nạ katue ni aḍighi iyaạr phọ oḅenhị bọ nyinhạ oḍighi phọ. Eniin phọ eten phọ, ogey otughemhiạ aBaibul raḅenhị ghan opọ odị ratughemhị bọ ipẹ Enhaạn rawạ bọ mọ odị aḍighi phọ, kụ aḅilhẹ angọ nyodị okuphom owol mọ aZihova kaloghonhaạn ni nyodị ḍighaạgh onmeeghi araraạr lọ ewạ siphẹ aghuḍum mọ odị. Nạ kaḍighi aani ika iphẹn phọ?

LOGHONHAẠN ḌIGHAẠGH OPỌ NẠ RATUGHEMHỊ BỌ OBUGHẸ EPHOMHOGHIẠN PHỌ ODỊ ESI AZIHOVA

7. Ika kụ idị aZizọs alhoghonhaạn ḍighaạgh we obughẹ ephomhoghiạn phọ abidị esi aZihova?

⁷ AZizọs alhegheri ni mọ ephomhoghiạn Enhaạn ketue ni enyu bumatuạn phọ odị osighẹ oḍighinhom ipẹ bidị rotuughạ bọ. Odị atughemhị ghan ni bumatuạn phọ odị raraạr dị kebughẹ ephomhoghiạn phọ abidị esi Odẹ k’akẹ phọ abidị. Esi omaạm, aZizọs atomaạm aZihova odẹ dị rangọ ghan igey araraạr nmụny odị. (Mat. 7:9-11) Abuniin abuphẹ ronaghạn bọ ikpo onhụ phọ aZizọs iphẹn phọ k”olhoghoma ghan ephomhoghiạn odẹ. Gbiom olhoghi ipẹ etir bọ bidị mem mọ bidị onhaghạn bọ oghaạph omaaniọm odẹ phọ aḅilhẹ bọ asighẹ oọny phọ odị r’eenyuụm, ghalhamọ r’iduọn maḍighi bọ ni ikarạph araraạr. Bidị ukạr kụ omhiịn mọ aZihova apomhoghiạn agey nmụny phọ odị odi bọ siẹn ade phọ.—Luk 15:20-24.

8. Ika kụ idị nạ katue aloghonhaạn ḍighaạgh opọ nạ ratughemhị bọ obughẹ ephomhoghiạn phọ odị esi aZihova?

⁸ Nạ kẹn katue ni aloghonhaạn ḍighaạgh opọ nạ ratughemhị bọ obughẹ ephomhoghiạn phọ odị esi aZihova, esi oghaạph ghan olhọgh iiphaghamhiọm ilọ imạ araagharạ phọ aZihova mem dị nạ ratughemhị nyodị. Torobọ amem dị nyinha retuughạ, ḍighi idị odị kalegheri ipẹ araraạr phọ odị ratuughạ bọ eḍeenhaan mọ aZihova akạr kụ uphomhoghiạn iyira. Mem dị nyinha reeḅeghiọn ilọ ekiạ etagharạn phọ, ḍighi ni idị odị kalegheri mọ aZihova atuạn ni kẹn nyodị kụ amiteom bọ ekiạ etagharạn phọ. (Rom 5:8; 1 Jọn 4:10) Mem dị odị alhegheri mọ aZihova apomoghiạn nyodị iboom kenyu ni nyodị ophomhoghiạn aani aZihova.—Gal. 2:20.

9. Eeghe kụ ilhoghonhaạn ḍighaạgh Michael onme adọl aghuḍum mọ odị?

⁹ Ooḅeghiọn eḍeenhaan aMichael, olọ Indonesia. Odị alhegheri ni igey phọ kuolọ odị o/ḍiiny muụm. Mem dị odị amhạn 18 asiạ, odị aḍigh ni oḍighi oghiilhom ghan ogbogh amoto enhọn eelhe. Onyebel roten, odị aḅula ni Indonesia aphin anhịr kụ awilhẹ eghunotu phọ odị aḅula epẹ oḍighi phọ odị. Mem mọ odị odi bọ ni epẹ phọ, anhịr phọ odị r’onyanhị phọ odị omhiigh otuughạ aBaibul phọ kụ ophoph oghị ghisigh. Onhiin aMichael r’omhugh, kụ aMichael asopha oḅula Indonesia okori ophogh odẹ phọ odị, kụ amhiigh aani otuughạ aBaibul phọ. Ikạr kụ etir Michael iboom mem dị bidị ooḅeghiọn esi ituughạ phọ 27, gạ phọ oghol bọ mọ “Olhegheri Obughẹ” siphẹ aḍinyạ phọ Kelhọm Ghuḍum K’agee-pọ! Mem dị odị aatughiạn ipẹ aZihova alhoghoma bọ omhiịn dị Oọny phọ Odị ramiinhọm, aMichael azu ni izin. Ekiạ etagharạn phọ itir ri nyodị kụ enyu nyodị onme adọl aghuḍum mọ odị kụ aḍiiny muụm.

LOGHONHAẠN ḌIGHAẠGH OPỌ NẠ RATUGHEMHỊ GHAN BỌ OOḄENHION ARARAẠR DỊ ODỊ AḌIGHI EḄẸL

10. Ika kụ idị aZizọs alhoghonhaạn ḍighaạgh buḅẹl abumatuạn phọ odị ooḅenhion araraạr dị bidị oḍighi eḅẹl? (Luk 5:5-11) (Miịn kẹn afoto phọ.)

¹⁰ Abuḅẹl abumatuạn phọ aZizọs ukem ni olhọgh elhegh mọ aZizọs kụ aMesaya phọ oguanhaan bọ. Kuolọ bidị umhoghi ni olhoghonhaạn aḍighaạgh orue osighẹ oḍighi iphelhegbeel phọ oḍighi eḅẹl iyaạr siphẹ aghuḍum mọ abidị. APita r’Andrụ momhiigh ni odạph aZizọs kụ aZizọs agbi bọ okạr oḅenhị abidị mọ ibilhẹ raraạr anyinha emhiigh odạph amhị oomo amem. (Mat. 4:18, 19) Bidị uḍighi bukoniọm akonị, bidị r’aJems r’aJọn kụ uḍighi ghan bọ oḍighi phọ ophọn phọ. (Mạk 1:16-20) Mem mọ aPita r’Andrụ osopha bọ “owilẹ izugurụ phọ abidị” odạph aZizọs oomo amem, eeni bidị uukolhobian ni inhọn areten omiteom ghan ongọ eghunotu phọ abidị. Eeghe kụ inyu bọ bidị ooḅenion araraạr? Aḍinyạ phọ aLuk iḅenhị iyira mọ aZizọs aḍighi ni iiḍaạny dị ekparamhị bidị eḅilhẹ engọ bidị okuphom owol mọ aZihova kamiteom ni angọ bidị.—Bạl Luk 5:5-11.

11. Eeghe araraạr okparamhị omheeraam kụ edị nạ katue aḅenhị opọ nạ ratughemhị ghan bọ?

¹¹ Yira ko/tue oḍighi iiḍaạny idiphọ aZizọs. Kuolọ yira kotue ni okaạph oḅenhị aani buphẹ yira rotughemhị ghan bọ Baibul phọ idị aZihova rasẹph ghan buphẹ osighẹ bọ nyodị kụ oḍighi eḅẹl. Esi omaạm, nạ atue ni akaạph aḅenhị nyodị ipẹ aZihova alhoghonhaạn bọ nyinhạ ḍighaạgh mem mọ purukụ nạ amhiigh bọ ituughạ. Eeni imhoghi mọ ḅaanhaạn uw-emhụ oḍighi anạ ongọ anạ eepoogh oghị aani ghan ituughạ. Kaaphọm ni idị omheeraam mọ anạ makpạr iduọn nạ mamhiịn bọ idị aZihova masẹph osopha phọ nạ asopha bọ osighẹ odị oḍighi eḅẹl.

12. (a) Eeghe kụ iḍighi kụ enhighẹ bọ ophạm aani ghan abunhọn abukaaphọm oghị otughemhiọm oye Baibul? (b) Ika kụ idị nạ katue asighẹ sividio atughemhiọm eten dị ketir opọ nạ ratughemhị bọ? Ngọ eḍeenhaan.

¹² Opọ nạ ratughemhị ghan bọ kamooghọm kẹn suọ mem dị abunhọn abumor r’abumaranhi oghaạph idị bidị orue ooḅenhion raraạr pidị bidị osighẹ rukumuan aZihova oḍighi eḅẹl. Kụ iḍighi kụ, mem dị nạ rakị otughemhị odị, pạm aani ghan bunhọn abumor r’abumaranhi. Ngọ bidị eepoogh oghaạph ipẹ bidị onhaghạn bọ igey phọ ḅilhẹ r’araraạr dị bidị oḍighi orue osighẹ arukumuan phọ aZihova oḍighi eḅẹl. Oḅarạm isiphẹ, imiteom mem ephogh ghan sividio phọ edi bọ gạ phọ oghol bọ mọ “Olhegheri Obughẹ” obobọ “Waaghị Amhiịn” siphẹ aḍinyạ phọ Kelhọm Ghuḍum K’agee-pọ! Esi omaạm, mem dị nyinha reeḅeghiọn esi ituughạ phọ 37, kụ repogh vidio phọ aḅẹm bọ mọ AZihova Kamiteom Ni Ilọ Yira Omhoghi Orolhọm, nạ atue ni amaaghị raraạr ituughạ dị edi siphẹ avidio phọ.

LOGHONHAẠN ḌIGHAẠGH OPỌ NẠ RATUGHEMHỊ GHAN BỌ OKPẠR OPU IPAANHAẠN

13. Ika kụ idị aZizọs aakolhobian bumatuạn phọ odị ilọ okaran amem dị rosophoghom bidị?

¹³ AZizọs aḅenhị ghan ni bumatuạn phọ odị mọ bidị kosoman ni isophoghom, ghalhamọ r’esi abuọ asiya abidị. (Mat. 5:11; 10:22, 36) Mem mọ arukumuan phọ aZizọs resi bọ eekunha, odị aḅenhị ni bumatuạn phọ odị mọ bidị kosoman ni ḍuugh. (Mat. 24:9; Jọn 15:20; 16:2) Kụ aroma bidị mọ bidị ogona loor siphẹ arukumuan phọ abidị. Esi omaạm, odị aḅenhị bidị mọ bidị kuu/gbakiạn ghan r’awe dị rosophoghom bidị, ḅilhẹ mọ bidị ogona loor esi ikpo onhụ r’iḍighinhom araraạr abidị, pidị bidị otue okiọm ghisigh oḍighi iphelhegbeel phọ.

14. Ika kụ idị yira kotue ookolhobian opọ yira rotughemhị ghan bọ okaran isophoghom? (2 Timoti 3:12)

¹⁴ Idiphọ aZizọs, yira kotue ni ologhonhaạn ḍighaạgh opọ yira rotughemhị ghan bọ okaran isophoghom, esi oghaạph ghan oḅenhị odị raraạr dị odị katue ni asoman ḍighaạgh awe dị r’odị roḍighi ghan oḍighi, righirị odị, r’abuọ asiya odị. (Bạl 2 Timoti 3:12.) Abuniin abuphẹ r’odị roḍighi ghan bọ oḍighi otue ni omilhọgh nyodị loor iduọn odị ratuughạ bọ Baibul phọ. Eeni asiya odị kẹn otue ni oḍaghạ omheeraam mọ odị. Yira onhuụn ookolhobian opọ yira rotughemhị ghan bọ okaran isophoghom, pọ odị katue ni ameerạ mem lọ isophoghom mọ eru.

15. Eeghe kụ ketue eloghonhaạn ḍighaạgh opọ nạ ratughemhị ghan bọ okaran isophoghom eghunotu?

¹⁵ Idị egbolhomaam isophoghom eghunotu, loghonhaạn ḍighaạgh opọ nạ ratughemhị bọ olhegheri iyaạr phọ eḍighi bọ kụ kotue bọ ni okaghạm nyodị olhoghi. Asiya phọ odị otue ni ootughiạn mọ rookelheghi nyodị obobọ eeni itughemhị abuọ aZihova i/ḅeraạn bidị. Ghalhamọ araraạr phọ aZizọs aḍighi ghan bọ bịn i/ḅeraạn ghan buniin abuọ eghunotu odị. (Mạk 3:21; Jọn 7:5) Tughemhị nyodị omhiigha aloor kụ oḅaanhaạn ghan abunhọn, ghalhamọ r’abuọ asiya odị.

16. Ika kụ idị yira kotue ologhonhaạn ḍighaạgh buphẹ yira rotughemhị ghan bọ oghaạph ilọ omheeraam mọ abidị r’amagheel?

¹⁶ Opọ nạ ratughemhị ghan bọ Baibul phọ alhegheri mọ ghalhamọ asiya phọ odị uḍeenhaan ni ḍiḅeraạn aBaibul phọ, odị ku/kparaghạ oghaạph oomo araraạr dị odị alhegheri mem mọ opọ phọ, obọ asiya phọ odị kokiilhaan ghan bọ omhoọgh araghaạph r’odị enhọn amem. Esi iduọn phọ, ḅenhị odị aghaạph ghan ilọ omheeraam mọ odị eten dị kemiteom eepoogh oghiọm aghisigh raghaạph phọ enhọn amem. (Kọl. 4:6) Odị atue ni aḅenhị buọ asiya phọ odị oghị isiphẹ jw.org. Iphẹn phọ kengọ bidị eepoogh otuughạ obughẹ ilọ abuọ aZihova mem muọ abidị.

17. Ika kụ idị nạ katue aakolhobian opọ nạ ratughemhị ghan bọ ongọ ghan ophagharanhaạn we dị opuru ḍipuru ilọ Abugbaanhaạn AZihova? (Miịn kẹn afoto phọ.)

¹⁷ Nạ atue ni aḍighinhom gạ phọ oghol bọ mọ “Frequently Asked Questions” siphẹ jw.org, pidị opọ nạ ratughemhị ghan bọ atue aakolhobian ongọ ophagharanhaạn dị akper dị abuọ asiya odị obobọ awe dị r’odị roḍighi ghan oḍighi kotue ni opuru. (2 Tim. 2:24, 25) Torobọ amem dị nyinha retuughạ ḍinyạ phọ Kelhọm Ghuḍum K’agee-pọ! iiḅeghiọn ni gạ phọ oghol bọ mọ “Abuniin Awe Ootughiạn Mọ.” Ḅenhị odị asighẹ ikpo onhụ ilọ odị kụ aphagharanhaạm. Ka/bilhẹ oḅenhị odị inhọn areten dị odị kanighemhị ophagharanhaạn phọ odị. Nyinha eḍighi ghan iduọn phọ, keloghonhaạn nyodị ḍighaạgh ogbạ omheremhị omheeraam mọ odị r’akpọ oḅio.

18. Ika kụ idị nạ katue aloghonhaạn ḍighaạgh opọ nạ ratughemhị ghan bọ omite aani ghan epẹ erugh phọ? (Matiu 10:27)

¹⁸ AZizọs atọ aḅenhị bumatuạn phọ odị mọ bidị oghaạph iiḅi iinhaghạn phọ oḅenhị we. (Bạl Matiu 10:27.) Eḍighi maạr dị opọ nạ ratughemhị ghan bọ anhuụn amhiigh oghaạph ilọ omheeraam mọ odị oḅenhị abunhọn, pọ odị kanuụn ni kẹn obeḍenhọm aZihova. Ika kụ idị nạ katue bọ aloghonhaạn nyodị ḍighaạgh oteẹny aḍiigbu phọ aḍiphẹ phọ? Mem dị ookpomhoghan phọ omhoọgh igbeelhom dị egbatanhaạn ilọ omite epẹ erugh phọ, loghonhaạn ḍighaạgh nyodị olhegheri araraạr dị odị kaḍighi orue osianhaan oḍighi aani okaaphọm. Ḅenhị nyodị mọ redugh ghan omhiigh araghaạph mem mọ amuphẹ phọ. Odị katue kẹn ni amooghọm suọ mem dị odị angọ aani ḍien odị oḍighi aani asaimẹnt. Iphẹn phọ keḍighi idị kedughanhaan nyodị oghaạph ghan ilọ omheeraam mọ odị r’akpọ oḅio.

ḌEENHAAN MỌ NẠ AḌUOM NI OLHOGHI OPỌ NẠ RATUGHEMHỊ GHAN BỌ

19. Ika kụ idị aZizọs aḍeenhaan mọ odị aḍuom ni olhoghi bumatuạn phọ odị, kụ ika kụ idị yira kotue otuughaạny nyodị?

¹⁹ Kụ aZizọs agbi bọ ogheel k’akẹ, odị aḅenhị ni bumatuạn phọ odị mọ oomo abidị koḅilhẹ omiinhạn epẹ k’akẹ. Kuolọ bidị u/naghanhạn emhụ ipẹ aZizọs aghaạph bọ. Ghalhamọ r’iduọn phọ ni, odị aḍuom ni olhoghi mọ bidị rowạ ni oḍighi ipẹ eḅeraạn bọ nyodị. (Jọn 14:1-5, 8) Odị alhegheri ni mọ bidị omoghi ni mem orue onhaghanhạn iniin araraạr, idiphọ oḍuom olhoghi ogheel k’akẹ phọ. (Jọn 16:12) Ewạ kẹn ni dị yira koḍuom olhoghi mọ buphẹ yira rotughemhị ghan bọ rowạ ni oḍighi ipẹ eḅeraạn bọ aZihova.

20. Ika kụ idị oniin onyọ umaranhi epẹ Malawi aḍeenhaan mọ odị aḍuom ni olhoghi opọ odị ratughemhị bọ?

²⁰ Yira oḍuom olhoghi mọ opọ yira rotughemhị ghan bọ Baibul phọ rawạ ni oḍighi ipẹ enhighẹ bọ. Esi omaạm, onyọ umaranhi dị oghol mọ Chifundo epẹ Malawi, amhiigh ni otughemhị anhịr dị rakị ghan Catholic dị oghol mọ Alinafe, ḍinyạ phọ Kelhọm Ghuḍum K’agee-pọ! Iduọn bidị otuughạ bọ omhạn esi ituughạ phọ 14, aChifundo apuru ni Alinafe mughumọ enighẹ ni osighẹ araraạr dị okạ ooḅereghiọm Enhaạn. Aḍipuru phọ iphin ni esi Alinafe kụ aphagharanhaạn mọ, “Oye phọ kụ kasopha iyaạr dị eḅeraạn nyodị oḍighi!” AChifundo aatughiạn ni mọ eeni odị ka/meera mun otuughạ aBaibul phọ. Kuolọ r’okparạm odị aghiọm ni ghisigh ituughạ phọ r’Alinafe, kụ aḍuom olhoghi mọ ghisigh odị kanaghanhạn ni. Iyạl ikpo arunwanyụ reten, aChifundo apuru ni Alinafe ḍipuru phọ edi bọ esi ituughạ phọ 34, eḅẹm bọ mọ: “Eeghe asuọ kụ edị nạ mamhoọgh esi otuughạ ghan aBaibul phọ r’ilọ egey Enhaạn phọ, Zihova?” AChifundo aḅẹm mọ, “odị [Alinafe] aghaạph ni imạ ibadị araraạr dị odị matuughạ, eniin pọ, Abugbaanhaạn AZihova ro/ḍighi ghan raraạr dị aZihova aghel.” I/bia bịn Alinafe awilhẹ osighẹ ikaaghinheẹn araraạr ooḅereghiọm Enhaạn, bịn asianhaan aḍiiny muụm.

21. Ika kụ idị yira kotue ologhonhaạn ḍighaạgh opọ yira rotughemhị ghan bọ Baibul phọ osopha okumu aZihova?

²¹ Ghalhamọ r’iduọn aZihova kụ raḍighi ghan bọ idị oye dị ratuughạ Baibul phọ kapoph, yira omoọgh aani ni kẹn oḍighi oḍighi. (1 Kọr. 3:7) Yira ko/tughemhị ghan oye phọ ipẹ Enhaạn rawạ bọ bịn, yira kologhonhaạn kẹn nyodị ḍighaạgh omhoọgh ephomhoghiạn dị eḍiinyan esi aZihova. Kụ yira oḅilhẹ ologhonhaạn nyodị ḍighaạgh oḍeenhaan ephomhoghiạn phọ epẹ phọ esi ooḅenhion araraạr dị odị aḍighi ghan eḅẹl siphẹ aghuḍum mọ odị. Yira kotughemhị kẹn nyodị ilọ obeḍenhọm aZihova ghalhamọ r’amem dị odị asoman ipaanhaạn. Mem dị yira oḍeenhaan mọ yira oḍuom ni olhoghi nyodị, kengọ ni nyodị okuphom owol mọ odị katue ni adaphạn siigbu phọ aZihova aḅilhẹ asopha okumu odị.