Aḍinyạ Otuughaạm ABaibul Dị Egbatanhaạn

January 2021, Aloor Phọ Repogh Bọ ugbeelhom ni mọ momiteom ḍimhoom aḍinyạ osighẹ otuughaạm aBaibul dị oghol mọ, Kelhọm Ghuḍum K’agee-pọ!a Nạ ulhoghoma ika mem mọ nạ anhaghạn bọ igbeelhom mọ? AMatthew, epẹ Canada, aḅẹm mọ: “Idị olhoghi amhị aḅaạl! Kụ oḅaạl olhoghi phọ amhị abụgh ghan bịn mem mọ rongọ bọ raghaạph phọ oḅilhẹ roḍeenhaan sividio phọ eghaạph bọ iyaạr phọ otuạn bọ kụ omiteom ḍinyạ phọ, ḅilhẹ r’ipẹ moḍighinhom bọ ophogh. Mị ukạr kụ agon omhiịn ḅilhẹ r’osighẹ oḍighinhom aani.”

Kelhọm Ghuḍum K’agee-pọ! phọ amiteom emhoom eten otughemhiọm awe Baibul phọ. Toroboiperolbọ, opọ bịn kụ ko/gbaranhaạn dị odi igbo aḍimhoom aḍinyạ phọ r’ipẹ otughemhiọm ghan bọ Baibul phọ epẹ omhạn. Eḍighi maạr dị nạ raḍighinhom Kelhọm Ghuḍum K’agee-pọ! opọ oprint bọ omiteom, pọ eeni nạ mamhiịn ni mọ olhẹm aḍinyạ phọ agbatanhaạn ni. Olhegheri iyaạr phọ eḍighi bọ, pọ okiririom ophogh ipẹ olhẹm bọ ḍinyạ phọ.

Aḍimhoom Aḍinyạ Dị Olhẹm Mọ Agbatanhaạn

Ipoḍi aḍinyạ phọ emoọgh oogbiim. Eeghe kụ iḍighi kụ ewạ bọ mọ olhẹm iduọn phọ? Aḍinyạ phọ Kelhọm Ghuḍum K’agee-pọ! emoọgh imạ asifoto dị repel li 600, epel ipẹ edi bọ siphẹ aḍinyạ phọ What Can the Bible Teach Us? ḍioph amem. Ipoḍi aḍimoom aḍinyạ phọ emoọgh kẹn ibadị ariisi dị iyaạr u/gẹ​—ḅilhẹ kẹn afoto u/dorọ. Iyạl ariphigh phọ iphẹn phọ imiteom ni ipaanhaạn: Ipoḍi aḍinyạ phọ kụ epheghepheghẹ pọ asifoto dị edi oniin opoḍi etue ni eḍeenhaan ophodiphọ omhạn phọ. Okpetenhaan iphẹn phọ, abumor phọ odi bọ International Printing Department (IPD), epẹ Wallkill, New York, U.S.A., uḍighinhom ni ophogh inya arinyạ dị rosighẹ ghan ni kogeọm rinyạ ayira. Ekụ Igẹ phọ siphẹ Aloor Phọ Repogh Bọ uuḅeghiọn ni torobọ aḍinyạ phọ ophogh kụ osaḅạr ḍidị ke/kạr eḍeenhaan iyaạr lọ edi ophoriphọ omhạn phọ. Ghalhamọ r’iduọn aḍiẹn phọ kụ emhạn bọ ikpoki epu iphediphọ ipẹ yira rogeọm ghan bọ ibadị arinyạ ayira, keḍighi idị abuphẹ kotuughạ bọ Kelhọm Ghuḍum K’agee-pọ! phọ kobạl bịn dị afoto dị odi ophoriphọ opoḍi phọ ka/gbaragbaramhị bidị.

Okpogho dị agbatanhaạn. Nạ aḅọgh okpogho aḍimoom aḍinyạ phọ nạ kamiịn mọ agbatanhaạn ni r’ikpogho ipheriphọ arinyạ phọ ayira, loor esi dị oḅarạm iyaạr dị egbatanhaạn dị kekoph okpogho phọ. Kparipẹ roḍighinhom odọ okpogho dị kanmanạ, ophọn phọ o/nmanạ ḅilhẹ asifoto okpogho phọ emaạr eganana. Iyaạr phọ oḅarạm bọ okpogho phọ reloghonhaạn ghan ḍighaạgh dị ka/nuụn aḅu mem lọ ogbor roḍighinhom. Toroboiperolbọ, ikpoki dị koḍighinhom oniin okpogho phọ ophọn koḍighinhom ni oogh ipẹ renmanạ ghan bọ. Ibadị ilạ agadạ ukpụl li rumhụ omhiịn mọ oteẹny ni odọ okpogho phọ ophọn phọ dị aḍighi phọ edugh.

Eeghe kụ iḍighi kụ osaḅạr bọ raraạr dị emhạn idiphọ ikpoki? Onyọ umor dị rakumuan aani ghan r’IPD aḅẹm mọ: “Yoor rowạ dị kokuamị oḍighinhom ḍinyạ phọ aḍiẹn phọ, kụ iḍighi kụ yoor rowạ mọ aghiọm ni ghisigh adụgh omhiịn ghalhamọ rogbor ghan koḍighinhom.” Eduardo, dị rakumuan ghan Printery Ofịs olạ agadạ aBrazil aḅẹm mọ: “Olhoghi ayira aḅaạl li agey omhiịn iduọn oḍighom mọ aZihova osighẹ bọ okạr igey araraạr kụ olhemhọm ḍimạ aḍinyạ phọ aḍiẹn phọ, dị ketọl ebia, eḅilhẹ edụgh ophạm, kuolọ eniin phọ amem mọ osighẹ ikpoki phọ rosogh ghan bọ oḍighinhom emạ eten.”

Omiteom Arinyạ Mem ACOVID-19 Phọ

Umhiigh oprint omiteom aḍinyạ phọ Kelhọm Ghuḍum K’agee-pọ! unwanyụ aMarch 2021. Kụ ipaanhaạn irọl li loor esi dị iḍighi mem ezẹgh aCOVID-19 phọ. Loor iduọn u/meera bọ mọ awe oḍigh Betẹl, ilọ abumor phọ roḍuạ ghan bọ erugh koru oḍighi printery koḍigh i/tọl, ḅilhẹ ilọ omhạgh abumoom awe m’oru okumuan aani Betẹl i/tọl. Esi iduọn phọ, awe dị okumuan ghan siprintery phọ u/kasiạn ghan, ḅilhẹ oghughi yogh iniin asiprintery loor itọ agomẹt.

Ika kụ idị okpạr bọ opu ipaanhaạn phọ iphẹn phọ? Mem lọ koḍighi oḍighi siphẹ asiprintery phọ, umhạgh ghan bumor r’abumaranhi inhọn ariikpịgh siphẹ Betẹl mọ oghị olhoghonhaạn ḍighaạgh ekula amem. Oniin onyọ umor dị oghol mọ Joel dị rakumuan aani ghan r’IPD aḅẹm mọ, “Eegharạ osighẹ aloor ophighironhọm ekiạ phọ abidị r’omheera otuughạ omhoom oḍighi kụ iḍighi bọ idị edugh omadạn oboom oḍighi phọ ophọn phọ.”

Etigheri ipaanhaạn phọ, yira moprint omiteom irubal aḍinyạ phọ Kelhọm Ghuḍum K’agee-pọ! Orue omiteom arinyạ phọ imhoghi ni raraạr kirokirọ dị roḍighinhom ghan oprint arinyạ idiphọ aprinting plates, laminate film, ḍinyạ, iki, r’agọm. Siphẹ iḅẹl oogh arunwanyụ phọ oprint bọ rinyạ phọ, bịn ulheom ni ikpoki dị epel 2,300,000 adollar (U.S.) oghoom araraạr phọ koḍighinhom bọ bịn. Omhiịn mọ u/lheoghom ikpoki ilọ ateẹny, yoor romiịn ghan mọ oprint oginha onhụ arinyạ phọ arookpomhoghan phọ rowạ bọ bịn.

“Epamanhạn Imạ Idoronheẹn”

Ika kụ idi abutughemiạ r’abuphẹ bidị rotughemhị ghan bọ Baibul phọ olhoghomha ilọ aḍimhoom aḍinyạ otuughaạm aBaibul phọ aḍiẹn phọ? APaul, oniin onyọ umor epẹ Australia, aḅẹm mọ: “Aḍinyạ phọ Kelhọm Ghuḍum K’agee-pọ! phọ edụgh agey oḍighinhom kụ olhoghi amhị raḅaạl ghan agey osighẹ otughemhiọm awe Baibul. Odẹ ḍinyạ phọ eten dị reḍạ ghan ḍiḅeraạn dị kenyu oye phọ oghaạph aani ilọ edi olhoghi odị. Epamanhạn itughemhị dị eegholhaany, sipuru dị retir ghan ekpom, sividio, sifoto, igbe kirokirọ, ḅilhẹ r’asiigbu dị opọ ratuughạ bọ kaporogh oteẹny. Epamanhạn imạ idoronheẹn dị rinyu ghan imhị onhighemhị eten itughemhị phọ amhị.”

Oniin oye dị rotughemhị ghan Baibul epe United States aḅẹm mọ: “Aḍinyạ phọ ekạr kụ iḅeraạn imhị. Asifoto phọ rilhoghonhaạn ghan imhị ḍighaạgh onhaghanhạn ikpanhạ araraạr phọ. Asividio phọ retir ghan ekpom amhị keḅilhẹ inyu imhị oḍighi iyaạr omiteom.” Oye phọ ratuughạ ghan iyạl amem wiki phọ ḅilhẹ kẹn ragbor ghan ni kaghị ituughạ r’ookpomhoghan phọ.

Esugha ni irubal onhụ aḍinyạ phọ Kelhọm Ghuḍum K’agee-pọ! dị rewạ mọ oprint omiteom ibadị arunhụ. Okạr oghaạph, k’aḍio arodon, Aloor Phọ Repogh Bọ momheera mọ omiteom ḍinyạ phọ aḍiẹn runhụ dị emhạn 710, kụ iphẹn phọ esighẹ 340 arunhụ epuom ipẹ omiteom bọ ḍinyạ phọ What Can the Bible Teach Us?

Ikạ kụ idị yira roteẹny ghan bọ ikpoki oprint omiteom arinyạ phọ iphẹn phọ? Esi iisogh oomo isiẹn aḅirinhi phọ, opol rosogh ghan bọ siphẹ donate.jw.org. Yoor rosereghiạn ni eegharạ inmo phọ anyinha, milhoghonhaạn bọ iyoor ḍighaạgh omiteom araraạr otughemhiọm aBaibul phọ buphẹ rowạ bọ otuughạ ilọ aZihova kụ ‘oghelhọm ghuḍum k’agee-pọ.’​—Psalm 22:26.