Ọdaphan Luk
17 Kụ ọdi ạḅenhi bụmatuan phọ ọdi mọ: “Olegheri ni mọ ạraraar dị kẹkom okpetaan ẹmoogh oru. Kụolo ịmhinhimhiin kụ kẹtolhonhaan oye phọ ọpo keego bọ esi ọdi kụ etu! 2 Mịnighe ghụn ọsighe ẹna phọ rọgbeom ghan bọ ikpo ịizupha ọkpoom orum ọdi oroph osumeeny ọphiiny ạbazi, kpạripe dị ọdi kaḍighi ịdi oniin sịen ạbubam mọ ạbuen phọ kakpetaan. 3 Igonha loor anyinha. Eḍighi mạar dị umor ạna aḍighi ịkaraph pọ ḅạam nyọdi, kụ ọdi akiton pọ sạr ạwilhenhaan. 4 Ghạlhamo ọdi ạpioman nyịnha oḍual amem ḍio phọ kụ aḅula oḍual amem ạḅenhi nyịnha mọ, ‘Mị makiton,’ nạ ạmoogh ọsar ọwilhenhaan ọdi.”
5 Kụ abutelhedom mọ ọḅenhi Uwo Ẹmhoogh phọ mọ: “Bụghe omheeraam mọ ayoor.” 6 Kụ Uwo Ẹmhoogh phọ ạḅem mọ: “Eru mạar dị nyinha ẹmhoogh omheeraam dị alheeny ịdipho ekpo ạ mọstạd, nyinha kẹḅenhi ni oreeny ạ sịkạmịn phọ ọphon phọ mọ, ‘Tuphuronhu sịen phọ asuma ẹpe ọphiiny ạbazi phọ kụ asi!’ bịn kịnhaghanhan ni inyinha.
7 “Ọghen ọnyo anyinha kụ kạḅenhi ẹbenhe ọdi dị ạḅua ozo ọbobo ạḅua ophogh iyool ịga arigheel mọ, ‘Ụgua tue ạrol ude sịen ịdaabili phọ alhe eḍien’? 8 Ọdi kạ́ḅenhi ghụn mọ, ‘Ụsaanhaan ịmhi eḍien dị mị kale dulhe phọ, ạgbagha ukpe ịisa aru ụḅamaghinhaan ịmhi kụ ạmheera akori mị ule ụpughol, mị rọmhadan kụ agbi ọghi olhe ọphughol aani’? 9 Ọdi kạ́sereghian ẹbenhe phọ mọ aḍighi ịpe orom bọ nyọdi, kạsereghian ni? 10 Iginha phọ kẹn, mem dị nyinha eḍighi oomo ịpe ịḅenhi bọ inyinha mọ iḍighi phọ, ịḅem ghan mọ: ‘Yoor oopho ạrebenhe. Ịphen yoor oḍighi bọ kụ ẹdi yoor ọkpe ni oḍighi’”
11 Ịduon ọdi rạki bọ Jeruselem, ọdi ạghi ni asi ọku ạ Sạmeria rạ Gạlili. 12 Ịduon ọdi raḍigh bọ eniin ẹmha, ḍioph awe dị ẹzegh ọku ufe eḍighi ụmhiin ni nyọdi, kụolo ụmheera ekpisi dị ẹkelhan nyọdi. 13 Kụ bịdi ọlo omiteom ọḅem mọ: “Jizọs, Ọtughemhia, ụnma iyoor ighirigiir!” 14 Ọdi rọmhiin bịdi kụ ạḅenhi mọ: “Ịki eḍeenhaan loor anyinha bụpinyon rịkia phọ.” Kụ ịduon bịdi rọki bọ, bịn ọḅaal. 15 Oniin ọnyo ạbidi rọmhiin mọ ọno mamhoon, kụ aaghiraan aḅula aghuenhi ghan Ẹnhaan r’ẹḍogh dị ẹghi ạnyu. 16 Kụ ọdi amheel aḅolholho sịphe aruwol phọ a Jizọs, ạseph ghan nyọdi. Oye phọ ọlo ạ Sạmeria. 17 Kụ a Jizọs ạḅem mọ: “Oomo aḍioph phọ ạbidi kụ ụḅaal bọ ni, kị́dipho? Bụeripho esugha phọ odi ẹghen? 18 Ọnhon oye óoghiraan mụn oḅula oghuenhi Ẹnhaan emuton oye phọ ọphon aḍighi bọ ọlo ẹnhon eelhe?” 19 Kụ ọdi ạḅenhi oye phọ mọ: “Ḅetenhu ạghi; omheeraam mọ ạna maakonhom nyịnha.”
20 Ạbuo ạ Fạrisi phọ ropuru nyọdi mem mọ Ọmhar phọ Ẹnhaan katu bọ, kụ ọdi ạphagharanhaan bịdi mọ: “Ọmhar phọ Ẹnhaan kátu eten dị oomo awe kọlogh elhegh; 21 kụ awe kọ́ḅem kẹn mọ, ‘Ịmiin, odi ẹphen!’ ọbobo, ‘Odi ẹpe!’ Loor esi dị Ọmhar phọ Ẹnhaan odi sịen igbo anyinha.”
22 Kụ ọdi ạḅenhi bụmatuan phọ ọdi mọ: “Amem retu ni dị nyinha kẹwa ọmhiin aḍio dị Ọony phọ oye kạtol r’anyinha, kụolo nyinha kẹ́miin. 23 Kụ awe kịḅenhi ghan ni inyinha mọ, ‘Ịmiin ẹpe!’ ọbobo, ‘Ịmiin ẹphen!’ Kẹ́ki, kụ kẹ́daph bịdi. 24 Ịdipho aḍio ẹmheephian oniin ạpakiri ạke phọ regbororian ghan bọ kẹghi ọphoripho ạpakiri phọ, kụ ịdi kẹtol aani ḍio phọ Ọony phọ oye katu bọ. 25 Kụolo, ọdi kạpur ri ạmiinhom iboom, kụ oghiil phọ ọphon phọ okel nyọdi. 26 Kụ ịdipho emite bọ mem mọ a Noa kụ ịdi kẹtol aani mem mọ Ọony phọ oye katu bọ: 27 bịdi ulhe ghan ni ọḅilhe ọphughol, alhephiri ạnmuny ophinhogh ghan nmạriir, awe ọḅilhe ọnhughenyan yogh ghan nmạnyaan ạbidi tụtu ẹteeny bọ ḍio phọ a Noa aḍigh bọ oghuugh phọ, kụ Ạmuum Aḍigho phọ aru bọ aphiemhi oomo ạbidi. 28 Iginha phọ kẹn kụ ẹdi ẹrol aani mem mọ ạ Lọt: awe ulhe ghan ni ọphughol, oghooghi ghan, aalhaghi ghan, ọzuphogh ghan ịizupha, ọḅilhe ọlhoghoḍi ghan ruutu. 29 Kụolo ḍio phọ ạ Lọt ạḅua bọ Sọdọm, ạke phọ ạlhoph ni nịan rạ sọlfọ kụ ephiemhi oomo ạbidi. 30 Iginha phọ kụ ẹdi kẹtol aani ḍio phọ koganhanhamhi bọ Ọony phọ oye.
31 “Ḍio phọ ạḍiphe phọ oye dị odi ạnyu otu kụ ạraraar ọdi edi olhoghi otu kúsoor ọghi ookoroghian ạraraar phọ, iginha phọ kẹn, oye dị odi ozo kúḅula olhoghi otu ọsighe ạraraar dị ọdi mạwilhe. 32 Ịitughian ạnhir phọ ạ Lọt. 33 Tọrobo oye lọ rạwa ọphel aghuḍum mọ ọdi kamugh ni, kụolo tọrobo oye lọ amhugh kạmoogh ni ghuḍum. 34 Mị rịḅenhi ghan inyinha mọ, ḍughul phọ ạḍiphe phọ ịyal awe kọminha ni ẹmhinha; kụ ọsighe oniin ọbilhe nyọoripho. 35 Ịyal ạnmariir kọtol li esi ọgbeom ghan ẹna ịyaar; kụ ọsighe oniin ọbilhe nyọoripho.” 36* —— 37 Kụ bịdi opuru nyọdi mọ: “Uwo Ẹmhoogh, ịphen phọ kemite ẹghen?” Kụ ọdi ạḅenhi bịdi mọ: “Esi dị ạraraar emhuughu kụ ẹdi aruga reekpomhoghan ghan.”